¹ A vo bogi lima a qai la bale o Ananaiasa na bete levu qai nidru na qase, e kiya na tamata e vuku I na tata, o Teritulu, eru bilitaki niya o Paula vuwa na turaga. ² Ni vo lai covi mai o keya, a vo tekivu o Teritulu me bilitaki niya, a kwa, madu vo vacegu va levu balejiko mutou, a vo cava me oka na matanitu I kwe I na lemutu lewaiya va vuku. ³ madu vo va okaoka ke I na visiga taucoko ga qei niya na vi vanuwa taucoko ga, I Filikesa va turaga sara, madu na marautaki niya. ^{4 5 6} Ke balavu vuwako mutou na lequ tata,qu va mamasu jiko mutou mutu yalo oka mutu va rogo jiko madou va lailai. Madu vo daniya na tamata e dau vi va calai, e dau va tubu bura o keya vuwadru taucoko ga na Jiu I vuravura, a vo simata vuwadru na tokani ni kwai Nasareci: ni viva burabura niya muni na were ni lotu; madu qulumiya,madu mata lewaiya me kodaki na lemadu vanuwa. ⁷ O Laisiasa e Turaga levu ni valu e la va kaikai mai, a kwali raki niya mai madu lima, ⁸ a tata vuwadru meru bilitaki niya meru la mai vuwako mutou: no mutu vo tarogiya, no mutu vo kila jiya rewa na kwa taucoko ga madu bilitaki niya vuwa. ⁹ A ru jiya I va djinadjina na Jiu, a kwa e djina na vi kwa I kwe. ¹⁰ Ni vo deguvacu na turaga vuwa o Paula me tata, a qai kwa o keya, ni qu vo kila jiya ni vo levu na yabaki ni o jiya turaga ni lewa ke I na vanuwa I kwe, qu oka jiya va levu mequ kwa bale jiko au: ¹¹ o vo kila jiya, e si qai devu ga e jinikaruwa na bogi ni qu la cake ke I Jerusalemi mequ lotu. ¹² A ru tasi daniko au ni maru viba vata e kiya I were ni lotu se qu va tubu bura vuwadru na lewe vuqa, e jikai ga I na were ni lotu, se I rara; ¹³ eru jika muni ni vatakeya rewa ni djina na kwa eru bilitaki niko au ke. ¹⁴ Na kwa I kwe qu vo vatusa niya vuwako mutou, na I valavala eru vatoko niya me vavuvuli kani kiya, a qu vo lotu kodaki kei vuwa na ledru Kalou na lequ qase, mequ va djina jiya taucoko ga na kwa e volai I na vanuwa qei nidru na parofita: ¹⁵ qu vo va nuinui vuwa na Kalou, niru na tucake tale o rau na mate, o rau na yalo dodonu qei nidru na tasi yalo dodonu, o rau eru nuitaki niya muni o rau. ¹⁶ Na kwa I kwe qu gumaikali ke, me kuwa ni kiya na siga e cala ke na lewaiya qu yaloga vuwa Kalou, se vuwadru na tamata. ¹⁷ Ni vo devu e levu na yabaki, a qu la mai mequ kau na kwa ni loloma I na lequ vanuwa, qei niya na I madrali e yavalu. ¹⁸ E yavalu na Jiu mai Esia eru daniko au niqu va savasavataki no I na were ni lotu, madu tasi levu, se me madu mauwe. ¹⁹ E dodonu meru la mai tu ve mutu mata I kei, meru kwa, kodaki eru kila jiya e kiya na kwa bura vuwako au. ²⁰ Se meru kwa o rau I kwe, kodaki eru daniya e kiya na kwa bura vuwako au, niqu vo tu ve ru matanivilewai, ²¹ na vuku ga ni tata e kiya ga ni kodaki I kwe, niqu vo no I kedru vi mama, qu coco, na vuku ni ledru tucake tale na mate mutu qai tarogiko au ke I na siga I kwe. ²² Ni vo varogo na kwa I kwe o Filikesa, a vo kilajiya oka na lotu, a vo vasuka nidru, a kwa,Ni co la vale mai o Laisiasa na turaga levu ni valu, qu na qai lewaiya na mutu vi lejitaki niya. ²³ A tata vuwa e kiya na turaga ni valu me va tawa niya o Paula, me dai niya ga me la vali, me kuwa ni vatau niya e kiya o wekaya e qwaraviya, se la mai vuwa. ²⁴ Ni vo bogi vica, a vo la mai o Filikesa qei niya la yalewa o Tarusila, na lewa ni Jiutia, a lai vatala me la mai o Paula, a varogo jiya ni tatataki niya na vabau jiya o Karisito Jisu. ²⁵ Ni vo vunautaki niya no nai varau dodonu, na I varau maluwa, qI niya na vi lewai e si bere mai, e saqanini o Filikesa, a kwa, la dai re nikuwa; niqu vo gwalala I na kiya na gauna, qu na qai coviko mai. ²⁶ A vo nuitaki niya ni na soli lavo vuwa o Paula: o keya I kwe e lai vatala va levu ke, meru vi talanowa qaneya. ²⁷ Ni vo devu e ruwa na yabaki, a vo la mai o Porisiu Fesito me sosomotaki niya o Filikesa: no vo oka jiya o Filikesa me va yalo okataki nidru na Jiu vuwa, a deiniya o Paula me vesu no ga.