^{3 1} Ni vo la mai I na va uwa o Fesito, a vo devu e tolu na bogi, a qai cavu tu me la cake I Jerusalemi. ² A qai bilitaki vuwa o Paula vuwadru na bete levu qei nidru na ledru turaga na Jiu, a ru va mamasu jiya, a kere vidru meru lomaniya bale jiya, aru vatala jiya me la mai I Jerusalemi o keya, a ru vo kwa meru va mate niya I calevu. ⁴ A kwa o Fesito, ni vo vatawa no mai I Sisaria o Paula, a vo varau me la yaji ke o keya. ⁵ A kwa, o mutou mutu vo turaga, medu la bale vata, ke kiya na bura e no vuwa na tamata I kwe, mutu qai bilitaki niya ke. ⁶ A no qanedru no ga o keya me bogi walu se me bogi jini a qai la bale I Sisaria; no vo qwata mai a no o keya I na I nono ni vilewai, a kwa me kau mai o Paula. ⁷ Ni vo cava mai o keya, a ru no wavoki jiya na Jiu a ru la bale mai I Jerusalemi, a ru bilitaki niya o Paula na kwa bura sara e wara, e ru tasi va djinadjinataki niya rewa. ⁸ A vo tuniya o Paula, aqu tasi vaveya e kiya na kwa bura, I na ledru I vunau na Jiu, se I were ni lotu, se vuwa o Sisa. ⁹ Ni vo oka jiya o Fesito me va yalo okataki nidru na Jiu, a tata vuwa o Paula, a kwa, o oka jiya mo la cake I Jerusalemi, no lewai ke ve qu mata I na vi kwa I kwe, se jikai? ¹⁰ A qai kwa o Paula, a qu vo tu I na mata nivilewai ni leya o Sisa, e jiki e dodonu mequ lewai ke: a qu tasi vaveya e kiya na kwa bura vuwadru na Jiu, I kwe o vo kila jiya oka sara. ¹¹ Kodaki ni qu jiya tamata I varau bura, se qu vaveya e kiya na kwa e dodonu me qu mate ke, a qu tasi oka jiya mequ mate: kodaki e jikai na vi kwa I kwe e ru bilitaki niko au ke, e jikai e kiya me rewa jiya me soliko au vuwadru. A qu vo cavu jiya o Sisa me lewaiko au. ¹² Io o Fesito, ni vo vi tataki devu qei nidru na matavilewai, a kwa, o qai cavu jiya o Sisa, io o na kau vo Sisa. ¹³ A vo bogi vica, a ru qai la mai o Akaripana tui qei niya o Perinaise I Sisaria, me ru vi kidavaki ke o Fesito. ¹⁴ Ni ru vo bogi wara no, vo lai kwai Paula o Fesito vuwa na tui, a kwa, e kiya na tamata e vesu tu, o keya a vadei niya o Filikesa: ¹⁵ niqu nokoto mai Jerusalemi, a ru vo bilitaki niya o rau na bete levu qei nidru na ledru qase na Jiu, aru kwa mequ lewaiya me lai ocaji. ¹⁶ A qu qai kwa vuwadru, e tasi niya na ledru I varau na kwai Roma meru soliya boto e kiya na tamata me vamate, maluwa me lai dani re o rau na bilitaki niya, me rewa tale ga ke na leya kwa bale jiya I na vuku ni kwa bura a bilitaki ke vuwa. ¹⁷ Ni ru vo cava mai I kei, aqu tasi va berebere, ni vo lai qwata mai qu vo nokoto I na I nono ni vilewai, a kwa me mei mai na tamata I igi. ¹⁸ Ni vo tucake o rau na bilitaki niya, eru tasi bilitaki i na kwa bura me kodaki na kwa qu numiya: ¹⁹ Io e yavalu ga na kwa e ru vilejitaki niya i na ledru lotu, qei niya e kiya na tamatao Jisu,o keya a vo mate, io a kwa o Paula e si cola no o keya. ²⁰ Ni qu vo tasi kila jiya oka mequ lewaiya na vi kwa I kwe, a qu tarogiya e mata la cake I Jerusalemi o keya, me lewai ke na vi kwa I kwe, se jikai. ²¹ Ni vo kodaki o Paula, me nokoto no re me lewaiya o Akusito, aqu qai kwa me vatawa no re me qai la yaji vo Sisa. ²² A qai kwa o Fesito vo Akaripa, o au muni, qu mata varogo na tamata I qoi. A kwa o keya, I vai qwata o na qai varogo jiya. ²³ I vai qwata, niru vo la mai o Akaripa qei niya oPerinaise, eru uku cavu mai, aru unu I na were ni vi tarogi, qei nidru vata na turaga ni valu ya levu, qei nidru na turaga ni koro, no vo varojiya o Fesito, a vo mei mai o Paula. ²⁴ A kwa o Fesito, o mutou Akaripa na tui, qai niko mutou taucoko ga na tamata mutu no qaneko madou I kei, mutu vo daniya na tamata I kwe, e vuku o keya vakaikaitaki niko au o rau na Jiu eru levu, mai Jerusalemi I kei muni, aru kwa e tasi dodonu me cola o keya. ²⁵ Ni qu vo daniya ni tasi vaveya o keya e kiya na kwa bura e dodonu me mate ke, a cavujiya o Akusito o keya me lewaiya, a qu qai lewaiya mequ vatalajiya ke. ²⁶ E jikai na kwa me volai ke vuwa na lequ turaga.O keys I kwe qu meiya mai ke ve mouth mata, me kwa djina vuwako mutou,Akaripa na tui, me tarogi re me macala ke na kwa mequ volaiya. ²⁷ Ni vo lai dani voko au na kwa lialia me lai vatala e kiya me vesu, e tasi va kila jiya muni na kwa bura a bilitaki vuwa.