¹ A qai kwa vuwa o Paula o Akaripa, e vatarai no vatusa niko mai. A qai dodokiya e lima o Paula, a tukuniya: ² A qu numiya ni qu vo kalougata, o iko Akaripa na tui, niqu na tukuniko au nikuwa ve mutu mata na vuku ni kwa taucoko ga eru bilitaki niko au ke na Jiu: ³ io, mutu vo kilajiya taucoko ga na ledru I varau na Jiu vata na vi kwa eru dau vi lejitaki niya: o keya I kwe qu va mamasu jiko mutou ke me mutu vosojiya ga re me mutu varogo jiko au. ⁴ Na lequ I varau niqu si jiya i luve me cava jiya mai na siga i kwe, niqu no qanedru na kwai lequ mai Jerusalemi, eru kila jiya taucoko ga na Jiu; ⁵ o rau eru kila jiko au i mata, kodaki eru mata kwa mai, niqu varau va Farisi me kodaki o rau na tekuciya va mata yalai sara na ledu lotu ⁶ A qqu qai tu muni mequ lewai I na vuku ni kwa qu vo va nuinuitaki niya na tata ni yalayala a soliya na Kalou vuwadru na lemadu qase: ⁷ o kiya na kwa I kwe eru vakasamataki niya meru rewa jiya o rau na lemadu yavusa e jinaruwa, eru dau soro va kaikai I na vi siga na vi bogi.Na viki ni va nuinui I kwe, I Akaripa na tui, eru vo bilitaki niko au ke na Jiu. ⁸ I vai e kodaki, mutu vo numiya ni kwa e dau va jijiqataki, me va tu nidru cake tale na Kalou? ⁹ O au tale ga, aqu numiya I qu yaloga e vo dodonu mequ vi mecaki I na kwa e wara qei niya e yaca o Jisu na kwai Nasareci. ¹⁰ Na kwa muni I kwe aqu vaveya mai I Jerusalemi; a ru levu eru lotu qu sogo jidru I na vi were ni vi vesu, no ru vo lesiko au ke na bete levu; niru vo va mate a qu kwa me kodaki ke. ¹¹ Ni qu vo lai ocaji jidru va levu I na vi were ni lotu taucoko ga, qu va saurarataki nidru meru dai niya na lotu, niqu vo oca va levu sara vuwadru, a qu vabura niya muni na vi rara kani kiya. ^{12 13 14} Ni qu a la no ke I Tamasiko ni ru lesiko au a vatala jiko au na bete levu, no vo siga levu no, na tui, a qu vo daniyaI calevu e kiya na kakarama mai lomalagi, e siviya na key a kakarama na Mata-ni-siga, a tabu wavoki jiko au qei nidru muni aru la qaneko au. Ni madu vo reba taucoko I na qwele, qu varogo e kiya na domo e tata vuwako au I na tata va Ipiriu, a kwa I Saula ,I Saula, o va burabura niko au e ña vuku ni cava? e bura vuwako mo caqe jiya na mata ni sa. ¹⁵ A qu qai kwa, o cei o mutou, na turaga? a kwa na turaga, o au o Jisu, o keya o. vaburabura niya: ¹⁶ io mo tucake ga, mo tu ve mu la: niqu vo daniko I na vuku ni kwa I kwe, mequ lesiko mo jiya I talatala qei niya na dau tukutuku muni I na vi kwa mo daniko au ke, qei niya na vi kwa lai dani vuwako: ¹⁷ qu na va cola niko mai vuwadru na tamata ni Isireli, qei nidru na vi matanitu kani kiya, o rau a qu qai vatala jiko ke, ¹⁸ no lai basukiya eru mata, meru saumaki mai I na gilogilo I na kakarama, I na leya kaikai o setani vuwa na Kalou meru kuwa ni lai ocaji I na I valavala bura, merujiya I taukei vata muni I taku qei nidru na yalo savasava ni ru vabaujiko au. ¹⁹ Io ni vo devu kwe,I Akripa na tui, qu vo tasi talai dredrei I na tola va lomalagi: ²⁰ qu vo kwa rewa I mata vuwadru mai Tamasiko, qei niya i jeruisalemi, qei niya na yasayasa va Jutia, vuwadru muni na matanitu kani kiya, meri vi vutuni meru saumaki mai vuwa na Kalou, meru vaveya nakwa e kilikili qei niya na vi vutuni. ²¹ O keya I kwe eru qulumiya au ke na Jiu I na were ni lotu, aru sagaiya meru va mate niko au. ²² Ni vo vukeiko au na Kalou, a qu vo cola me cava mai na siga I kwe, qu vo kwa vuwadru na yalai vuwadru muni na yalevu, e jikai na kwa kani kiya qu kwa igi ga na kwa eru kwa na parofita qei niya o Mosese e na cava mai: ²³ e na mate na Karisito igi na kedru I matai na tucake tale mai na mate, e na vatakeya na kakarama vuwadru na tamata na Isireli, vuwadru muni na matanitu kani kiya. ²⁴ Ni vo tukuniya no o keya kodaki I kwe o keya, a tata I na domo levu o Fesito,I Paula,o go lialia; e vo lialianiko na vuku levu. ²⁵ A kwa o keya,I Fesito va turaga sara, aqu tasi lialia; qu cavujiya ga na tata e djina e vuku: ²⁶ no vo kila jiya na vi kwa I kwe na tui, qu tata va dodonu ke vuwa; niqu kila jiya e tasi cilo vuwa e kiya na kwa i kwe e tasi vai e kiya na kwa I na vanuwa e cilo. ^{27 28 29} I AkaripA na tui, o vo va djina jidru na parofita se jikai? aqu kila jiko mutou qu va djina jiya ga. A qai vuwa o Paula o Akaripa, e vo va lailai no rewa jiko mequ lotu va Karisito. A qai kwa o Paula. Aqu vo masu vuwa na Kalou, e jikai me balejiko takiya ga, e balejidru muni o rau eru varogo jiko au nikuwa,se me vo e lailai, se me kuwa ga ni vo, me mutu kodaki o au; me kuwa ga na senidodo I kwe. ^{30 31 32} A qai tu cake na tui, qei niya na kovana, qeniya o Perinaise, qei nidru o rau eru no vata qeinidru: niru vo la vajikijiki, eru vo vatataki vai nidru, a kwa, Na tamata I kwe e tasi vaveya e kiya na kwa e dodonu me mate ke se vesu. A qai kwa vuwa o Fesito o Akaripa, na tamata I kwe kodaki e tasi cavu jiya o Sisa me lewaiya, e dodonu ga me serekiya.