^{1 2} Ni vo lewai devu me madu soko I Itali, aru soliya o Paula, e yavalu tale na tamata eru vesu, vuwa e kiya na turaga ni mata sojiya ni leya o Akusito, e yaca o Juliase. Ni madu vo vodo kiya e kiya na waqa ni Atiramitio, madu vo va rewa, madu nakijiya me madu soko voleka jiya na baravi o Esia; e kiya na kwai Masitonia mai Cesolonaika, o Arisitako, a la qaneko madou. ^{3 4 5 6} Na qwata madu uru ke I Saitoni.A yalo oka vo Paula o Juliase, a serekiya me la vuwadru o wekaya me vacegu ke. Madu qai soko dai yaji, madu soko voleka jiya o Kipiro, ni vo bura na cagi. Ni madu vo soko jiya na wasawasa I Silisia qei niya o Pamifilia, a cava sara I Maira mai Lisia. A daniya ke na turaga ni valu e kiya na waqa ni Alekisadria, e soko I Itali; a va vodo niko madou ke. ^{7 8} Ni madu vo soko maluwa tu e wara na bogi, e cava dredrei me madu doniya o Nito, ni vo taroviko madou na cagi, madu qai soko voleka jiya o Kiriti, e doniya o Salimoni; E vo va lailai e dredrei me sivijiya, madu vo cava jiya e kiya e tavo e yaca na toba oka; a voleka ke e kiya na rara o Lasea. ^{9 10 11} Ni vo bo gu I wara, a vo dredrei na soko, ni si qai devu ga na gauna ni lolo, a qai va salataki nidru o Paula, a kwa vuwadru o mutou na turaga, qu kila jiya e na levu na bura qei niya na kwa e du na dainiya I na soko I kwe, e na tasi bura ga na I usana qei na waqa, o datou muni. Na turaga ni valu ni vo vabau jidru nai taukei ni waqa, e jikai na vi kwa e kwa o Paula. ^{12 13} Ni vo tasi oka na toba igi me kele me I na vula I driwadriwa, eru o levu vuwadru eru lewaiya meru soko kani kiya, ledru numiya ke ru rewa yaji I Finaisi, meru kele ke I na vula I driwadriwa; igi na toba I Kiriti, e doniya na ceva I ra qei niya na tokalau vuwaliku. A qai liwa vamaluwa na ceva, eru vakasama ni ru vo rewa jiya na kwa eru nakijiya, aru yavi kelekele, aru soko voleka jiya o Kiriti. ^{14 15 16} A tasi balavu, a qai laba na cagi levu, e yaca o Urokilitoni. Ni vo ceburaki niya na laca ni waqa, a tasi tau rewa ke na mata ni cagi, madu qai deiniya ga me savu yaji. A savu ke a voleka jiya e kiya na yanuyanu e yaca o Kilota, a vo e lailai sara me madu tasi rewa jiya na velovelo: ^{17 18} nii ru qai va rewajiya cake mai I kwe, aru qai vaveya na va Tuwalu, aru va tuwalutaki niya ke na waqa; niru vo mataku lala meru tava kasa I volivoli, aru serekiya na gwacagwaca, a savu yaji. Ni madu vo suwa I gelegele va levu sara I na cava, vai qwata aru dai niya na I usana: ^{19 20} ni vo bogi tolu madu vo deiniya madu lima na gwacagwaca ni waqa. Ni vo bogi e wara e tasi lai dani na mata ni siga se na kalokalo, a liwa na cagi levu, a qai ladai vuwako madou na nuitaki niya na cola. ^{21 22} Ni vo balavu na ledru tasi kana, a tu cake o Paula na kedru vi mama, a kwa, o mutou na turaga, e vo dodonu me mutu varogo jiko au I mata, me kuwa na yavi kelekele mai Kiriti, a cava ke na bura I kwe qei niya na dai. Io I kwe, qu va mamasu jiko mutou me mutu kuwa ni yalo lailai: e jikai e kiya vuwako e lavele la cola, e na bura ga na waqa: ^{23 24 25 26} ni vo no voleka voko au na bogi I kwe e kiya na agilosi ni Kalou, o keya aqu vo leya, o keya muni a qu qwaraviya, a kwa, kuwa ni mataku, Paula; o na la ga vuwa o Sisa: daniya, aru vo solidru taucoko ga vuwako na Kalou o mutu soko vata. O keya I kwe, o mutou na turaga, mutu va cegu niqu va djina jiya na Kalou, e vo cava ga me kodaki ni lai kwai vuwako au. Du na vo dai ga I na kiya na yanuyanu. ^{27 28 29} Ni vo cava mai na I ka jinikava ni bogi, no madu vo vi savuyaki no I na wasawasa o Atiria, ni vo yaloga ni bogi eru vo numiya na lewe ni waqa ni ru vo voleka jiya e kiya na vanuwa; a varau jiya na wai, aru kila jiya ni katu ruwasagavulu: niru vo savu yaji va lailai, a varujiya tale na wai, aru kila jiya ni vo katu jinalima. Ni ru vo mataku ke lala madu kasa I na vi vatu, aru dainiya na I kelekele e va mai vuwa na turaga, aru oka jiya tu siga na vanuwa. ^{30 31 32} Ni ru vo varau meru tuba I na waqa o rau na kwai muwa, ni ru vo tukuciya na vevlovelo I ruwai, me kodaki na kwa eru vaveya meru dainiya na I kelekele I na muwa I mata ni waqa a kwa o Paula vuwa na turaga ni valu, vuwadru muni na sojiya, kodaki eru na jikai ni nokoto no ga i na waqa o rau I kwe, mutu na tasi cola rewa. E ru qai sele jiya na ledru I noka ni velovelo na sojiya, aru deiniya me viri yaji. ^{33 34 35} Ni vovoleka mai na siga, a vo cikevidru taucoko ga o Paula meru kana, a kwa, I kwe na keya I jinikava ni bogi mutu wawa ga mutu lolo, mutu tasi kaniya e kiya na kwa; o keya I kwe qu masujiko mutou ke mutu kana re: e yaga me mutu cola ke: e jikai e kiya vuwako mutuou e na lutu mai e kiya e rau ni ulu. Ni vo tata devu kodaki I kwe, a qulu na madrai, a va okaoka vuwa na Kalou ve ru mata taucoko g;ni vo doviya, a vo tekivu me kana. ^{36 37 38} A ru qai vacegu taucoko ga, aru kana muni o rau. O mutou taucoko ga mutu nokoto I waqa madu ruwa na drau ka vitusagavulu la ono. Ni ru vo kana devu niru vo bori; aqru va mamataki niya na waqa, aru deiniya na sila I ruwai. ^{39 40 41} Ni vo siga mai, eru tasi kila jiya na vanuwa: aru daniya e kiya na toba e va matacawa, aru vo bose jiya meru va kasa niya ke na waqa, kodaki e rewa. Ni ru vo drejiya dai na I kelekele ni waqa, aru deiniya tu mai ruwai, a serekiya na I noka ni uli, a ru va rewaniya na laca levu I na cagi, a ru soko I vanuwa. A ciri kodaki I na vanuwa e sota ke na drodro, aru va kasa niya na waqa, a cobalt sara na muwa I mata, a tasi savuli rewa1, a tasere na muwa turaga na kaikai ni biau. ^{42 43 44} A ru vo bose o rau na sojiya meru va mate nidru na tamata eru vesu tu, Keru qai tuba e yavalu, meri cola. Ni vo okajiya na turaga ni valu me va colaniya o Paula, a tarovidru ke na kwa eru numiya; a kwa meru rido I mata o rau na kila jiya na qau rewa; meru simata I vanuwa: o rau na keya vo, e yavalu I rara, e yavalu I kwa kani kiya ni waqa. A kodaki I kwe, aru vo cabe cola taucoko I vanuwa.