^{1 2} Ni madu vo cabe cola, madu qai kila jiya ni yaca ni yanuyanu igi o Melita. A ru lomaniko madou va levu na I taukei; a ru va mudre niya na quto, aru meiko madou yakiya I were, I na vuku ni luvu e tau, qei niya na driwadriwa. ^{3 4} Ni vo la mai e kiya na I vesu na quto o Paula, a lai biu sara I na quto e mudre tu, a vo dolo mai I na katakata e kiya na gwata, a viviya e lima. Ni ru vo daniya o rau na I taukei, ni vo lili tu ve lima na gwata, aru vi kwa yaki niya vai nidru, e djina e tamata dau laba o keya I kwe, ni vo cabe cola mai I wai taci, o tasi deniya o saumiya me cola. ^{5 6} A qai kurejiya na gwata I quto mudre o keya, e tasi bura ke. A ru numiya ni na vuce mai o keya, se reba vasauri me ciba; ni ru vo waciya va lailai, e tasi lai dani e kiya na kwa bura me la mai vuwa, a qai vuki eru yaloga a ru kwa e kiya na Kalou o keya. ^{7 8 9 10} E nokoto e kiya e tavo igi e yavalu na jiki ni vanuwa e leya na turaga ni yanuyanu, o Pupiliu e yaca; a vacegu niko madou o keya, a va kaniko madou oka me tolu na bogi. A tauvi mate o tamaya o Pupiliu, e katakata e veketaki dra; a unuviya o Paula, a masu a tabakiya ve lima, a va colaniya. Ni vo vai I kwe, a ru la tale mai o rau na tauvi mate I na yanuyanu, a ru va colai: e levu na kwa eru va rokorokotaki niko madou ke; no madu vo soko kani kiya, a ru kau I waqa na kwa e yaga vuwako madou. ^{11 12} Vo devu e tolu na vula, madu soko e kiya na waqa ni Alekisadria, a kele I na yanuyanu igi I na vula I driwadriwa, na keya matakau na druga teigwane. Ni madu vo vila I Sairakuse, madu nokoto no ke me bogi tolu. ^{13 14 15} Ni madu vo ladai mai ke, madu vo cavuyaki, madu cava I Rijio; ni vo bogi kiya qai liwa na ceva, madu vo cava vai qwata I Putioli: madu daniya ke na vi wekani e yavalu, a ru va masu jiko madou me madu nokoto ga me bogi vitu: a madu qai la I Roma. A ru varogo mai ke na kemadu I tukutuku o rau na vi wekani, a la mai I na rara i Apio qei niya na bure tolu, meru la mai sota qaneko madou: ni vo danidru o Paula, a va okaoka vuwa na Kalou, a vo tudei mai. ^{16 17 18} Ni madu vo unu I Roma, a vo dai o Paula me no takiya ga qei niya e kiya na sojiya me vatawa niya. Ni vo bogi tolu, a qai soqonidru vata na ledru turaga na Jiu o keya: ni ru soqo vata mai, a kwa o keya vuwadru, o mutou na vi wekani, aqu tasi vaveya e kiya na kwa bura vuwadru na ledatou, se na ledru I varau na tuqwaqwa, aqu vesu ga qu soli yaji ve ru lima na kwai Roma mai Jerusalemi. O rau, niru vo lewaiko au, eru okajiya meru sere kiko au, ni jikai na kwa vuwako au mequ mate ke. ^{19 20} Ni ru vo kwa o rau na Jiu me kuwa, e uqejiko au qu yaloga mequ cavujiya o Sisa me lewaiko au; e jikai na kwa mequ bilitaki nidru ke na kwai lequ. O keya I kwe qu va soqoni jiko mutou vata ke, me mutu tolaviko au ke niqu vesu I na senidodo igi na vuku ni ledru numiya na Isireli. ^{21 22} A ru kwa vuwa, e jikai e kiya mai Jutia e volai iko mai vuwako madou, e jikai tale vuwadru na viwekani e la mai I na kila jiya se kwa e kiya na bura bale jiko : madu mata varogo jiko se cava na lemu numiya: ni madu vo kila jiya na tata ni vi va buraburataki na lotu kani kiya I kwe I na vi vanuwa taucoko ga. ^{23 24} A ru vo lokuciya vuwa e kiya na siga, aru levu na la mai I na leya were; a serekiya vuwadru o keya me kwa na matanitu ni Kalou, me va djinadjinataki niya o Jisu mai na leya I vunau o Mosese, qei nidru na parofita, e tekivu I vai qwata, me yacoviya I vai yavi. Eru va djina jiya eru yavalu na vi kwa e lai kwai, o tasi va djina jiya. ^{25 26} Ni ru vo tasi yalo vata vai nidru, aru vo la dai, ni vo lai tataki devu o Paula I na kiya na tata: a vo tata djina na yalo tabu ni kwa o Aisea na parofita vuwadru na lemutu qase, a kwa, la vuwadru na tamata I kwe, a kwa, mutu na varogo no ga, a numideniya tu; mutu na dau daniya tu ga, mutu na tasi daniya: ²⁷ Ni vo uro mai eru yaloga na tamata I kwe, a duduvara eru bebe, a kabulu eru mata; me kiya na siga e tola ke eru mata, a rogo eru bebe, e kila jiya eru yalo, eru na saumaki mai, qu na va cola nidru. ^{28 29} O keya I kwe me mutu qai kila jiya, niru vo kau mai na cola vuwa na Kalou vuwadru na vi matanitu kani kiya; eru na varogo jiya. Ni vo tatataki niya devu o keya na vi kwa I kwe, aru vo la dai o rau na Jiu, aru vileji vai nidru. ^{30 31} A nokoto o Paula me yabaki ruwa taucoko I na were a voliya tu o keya, a va cegunidru taucoko ga na nokoto vuwa, a vunautaki niya na matanitu ni Kalou, a va vuvulitaki niya va doudou sara na kwa qeiniya o Jisu Karisito na Turaga, e jikai na tamata e taroviya.