¹ A okajiya la mate o Saula. na gauna igi aru va buraburataki ke nai soqosoqo ni soro aru nokoto mai Jerusalemi; aru vo kala ke ina viyasana o Jutiya qeiniya o Samaria, o rau ga apositolo e jikai. ² Aru vo bulujiya o Sitiveni e yavalu na tamata lotu, aru vaveya na soqo ni mate levu e vuku. ³ O Saula, e vaburabura nidru va levu nai soqosoqo ni soro, niru vo unu i na viwere taucoko ga, eru tatataki nidru na teigwane qeinidru na lewa, a dei nidru ina were ni vivesu. ⁴ O rau eru vo seiyaki, aru la ina vivanuwa taucoko ga a vunautaki ke nai tukutuku. ⁵ A qai labale o Filipi ina rara o Samaria, a vunautaki niya ke o Karisito vuwadru. ⁶ O rau na tamata eru yalo vata meru varogo na kwa e kwa o Filipi, niru vo varogo eru daniya na vikwa mana e vaveya o keya. ⁷ Niru vo ladai mai vuwadru na lewe levu e yavalu na yalo bura e unuvidru, niru vo kulakula ina domo levu; qeinidru na lewe levu eru saqanini, qei niya na lokiloki, eru va colai. ⁸ A levu kena marau ina rara igi. ⁹ A levu na marau na rara igi. E kiya na tamata, o Saimoni e yaca, e dau vai sausau makawa ina rara igi, a vakaracidru valevu ke na kwai Samaria, e dau tukuniya e kiya e oka cake sara. ¹⁰ Aru varogojiya o rau taucoko ga, o rau na kwa yalai qeinidru na kwa yalevu, aru kwa, o keya i kwe na kaikai levu ni Kalou. ¹¹ Aru vo varogo jiya, avo vakaracidru va balavu o keya ina leya i sausau. ¹² Ni ru vo va djina jiya o Filipi ni vunautaki niya na matanitu ni Kalou, qeiniya e yaca o Jisu Karisito, eru qai vavitaisotaki, o rau na teigwane qeinidru na lewa. ¹³ A qai vadjina jiya o Saimoni; ni vo vavitaiso devu, eru dau no vata o Filipi; a karaciya o keya, no daniya nai vatakilakila ni cakacaka mana levu e vai no. ¹⁴ Niru vo qai varogo na apositolo nivo no mai Jerusalemi, eru vadjinajiya na tata ni Kalou o rau na kwai Samaria, aru vatalajiya o Pita qeiniya o Joni vuwadru. ¹⁵ O rau niru vo labale, aru masulaki nidru, meru rewajiya na Yalo Tabu. ¹⁶ Avo tasi cava vuwa e kiya vuwadru igi: aru vo vavitaisotaki ga e yaca na Turaga. ¹⁷ Aru tabakidru veru lima, avo cava ke vuwadru na Yalo Tabu. ¹⁸ Nivo daniya o Saimoni nivo soli na yalo tabu ni ledru vi yabaki ve ru lima nai apositolo, a qai mata soliya vuwadru nai lavo. ¹⁹ A kwa, "Soliya muni mai voko au na kaikai iqoi, me cava muni na Yalo Tabu vuwadru yakiya qu tabakidru ve qu lima." ²⁰ A kwa vuwa o Pita, me muru rusa vata na lemu siliva, niko numiya ni vo voli rewa na i solisoli ni Kalou ina i lavo. ²¹ E jikai e jiki se na lemu i votavota ina kwa ikwe, ni tasi dodonu mu yalo ina mata ni Kalou. ²² O keya ikwe mo vivutuni ina lemu i valavala ca ikwe, no masu vuwa na Kalou, bara rewa ke ni o tasi lai ocaji ina lemu numiya ke mu yalo. ²³ Niqu daniya ni o tu ga ina vanuwa e gaga sara, o vo vesu tu ina i valavala ca. ²⁴ A qai tata o Saimoni, a kwa, "Mutu masulaki niko au vuwa na Turaga, me kuwa ni cava mai vuwako au e iya na drau e tata ke." ²⁵ O au, niru vo kwa devu aru vunautaki niya na tata ni Turaga, aru vo la tale i Jerusalemi, aru vunautaki niya nai tukutuku oka ina rara yalai e wara mai Samaria. ²⁶ A tata o Filipi e kiya na agilosi ni Turaga, a kwa, no la ina mata ni cava, ina calevu mai Jerusalemi i Kesa, igi na vikai. ²⁷ A qai vaveya o keya a la: a daniya, e kiya na kwai Iciopea, na matani vanuwa, na tamata levu i Kadasi na ledru ranadji na kwai Iciopea, na leya dauniyau okeya, a la i Jerusalemi me lai soro. ²⁸ Avo la tale, a wilikiya la i vola o Aisea na parofita, no nokoto ve la qiqi na turaga. ³⁰ A qai wavu yaji o Filipi, a vo varogo ni wilikiya na leya i vola o Aisea na parofita; a kwa, o kilajiya na kwa o wilikiya, se jikai? ³¹ A kwa o keya, qu rewajiya vacava, kodaki e jikai e kiya me tuberiko au? "A masujiya o Filipi me cabe cake meru no vata." ³² Ikwe na jiki ni vola tabu a wilikiya o keya, A tuberiya o keya me kodaki na sivi e vamate; "Me kodaki na lami e galu ve mata o keya e kiya, e kodaki o keya, e tasi tata." ³³ Nivo malumalumu no o keya, a tasi lewaiya va dodonu: o cei e na kwa na leya i tubutubu? Nivo ladai i vuravura na leya cola. ³⁴ A qai tata o Filipi vuwa na matani vanuwa, a kwa, qu tarogi ke re, "A tataki jiya o cei na parofita na tata ikwe: o keya ga, se kani kiya? " ³⁵ A qai dogaga o Filipi, a tekivu vo na jiki ni vola tabu igi, a vunau taki niya o Jisu vuwa. ³⁶ Niru vo la tu imcalevu, aru cava vakiya na ruwai: a kwa na mata ni vanuwa, daniya, vo no na wai; na cava e taroviko au mequ kuwa ni vavitaiso? ³⁷ A kwa o Filipi, kodaki o vabaujiya mu yalo taucoko, evo vai ga. A tata o keya, a kwa, A qu vo vadjinajiya ni vo luve ni Kalou o Jisu Karisito. ³⁸ A qai kwa o keya me tu vakiya re na qiqi ni turaga: aru vo la ruwaruwa i ruwai, o Filipi qeiniya na matani vanuwa, a vo vavitaisotakiniya. ³⁹ Niru vo lacake mai ruwai, avo va meiya dai o Filipi na Yalo ni Turaga, a vo tasi daniya tale na mata ni vanuwa, a vo la ina leya calevu avo marau no. ⁴⁰ Avo lai dani o Filipi i Asoto: ava yato viya na virara taucoko ga a vunautakiniya nai tukutuku oka, a cava sara i Sisaria.