15 ¹ Woax zanyf, naih ah đomc Pha-li-si munh, tăng Ye-lu-sa-lem stengv taih lov Zâu Yê-su naic Nănh. ² Ha săngh laix mâyh nyăngz stâyb-sây buz bix ayx longđ stongz zez tâuh nyăngz gâyf? Nănh stiz max đaox puf đangc nzăngđ nhlync năngv? ³ Zâu Yê-su coong, “Wâyc săngh laix nyâuh bix quanyf Tênb-Hungh nyăngz đoouc lif gâyf, bix cănh âyz nyâuh nyăngz stongz zez tâuh nyăngz gâyf? ⁴ Wâyc Zâu Tênb-Hungh bux Coong, “nyâuh hopđ zuc jâuz nyâuh nyăngz nzif Pha, laiv lanh zaux nănh nyăngz nzif Pha six zuc tayx tayc. ⁵ Six nyâuh coong, “Laiv lanh coong ănz nyâuh nyăngz nzif Pha, “Laiv hungđ yaz stăngc tuz nzif Pha, six yaz pungx hođ phunz Zâu Tênb-Hungh nzof gôh. ⁶ Woax lanh munh max zuc jâuz nănh nyăngz nzif Pha nzof gôh, six nyâuh quanyf Zâu Tênb-Hungh nyăngz đoouc lif gâyf, bix cănh âyz nyâuh stongz zez tâuh nyăngz gâyf ayx. ⁷ Pâyh zac nyâuh ngokx nyăngz munh lex! Ê-sai stênx stengb ja lănv tauv nyâuh seenz toix gôh, ⁸ Nănh coong, “Nâyx đomc munh nongc nzeetx pâuh yaz, six nănh stiz nyăngz nyâuđ gâyh yaz côz nzongf. ⁹ Nănh stiz congx yaz six max naih lungđ phănc, stiz cungb pangc yaz nyăngz gâyf ayx coonz, bix zoz bamh munh njăpc taih nyăngz gâyf nzaox." Laiv hungđ hayh ayx phunz naih wâyx ¹⁰ Zâu Yê-su êu songx munh taih, songđ lănv bux nănh stiz Coong, “Nyâuh cayb mungv bix saz yaz coong nâyx đomc woac bex. ¹¹ Nhlync nzac nzeetx ninyh nyăngz muif hungđ six max hayh wâyx munh, six laiv hungđ tăng munh nzeetx coong seetb taih, nzăngđ hayh wâyx munh." ¹² Stâyb-sây buz taih coong ănz Yê-su, stênx-stengb Mâyh pâyz tuz Mâyh coong nâyx đomc woac Pha-li-si munh max mungv tuz max? ¹³ Zâu Yê-su tauz coong, “Toix laiv zâyz njăngx max zâyf Tênb-toongh pha songx, six zuc pengz cloon đungh seetb taih. ¹⁴ Dluyh pyenz stiz gôh; Nănh stiz ayx yeenv jau munh, six mâyc blâuf, six coong mâyc blâuf cănh yeenv mâyc blâuf munh, six njynh iz lanh zuc tuih nzac ninyh cotb nzuf. ¹⁵ Phê-rơ coong, “Jođ Stênx stengb pob manyf nâyx đomc woac pây phunz buz mungv. ¹⁶ Zâu Yê-su naic, ha nyâuh lauf max zengx pâyz naz? ¹⁷ Nyâuh max pâyz nhlync nzac nzeetx ninyh six nzac nyâuđ muf, blătc quaix đangz nzăngđ pungx seetb taih mah? ¹⁸ Nzeetx coong laiv hungđ six tăng nyâuđ nyâyh seetb taih, nzăngđ ayx phunz munh naih wâyx. ¹⁹ Songđ wâyc munh yămz nyâuđ nyâyh ayx huđ nyăngz jau, tayx munh, caoz munh, ayx pongz lauh, ayx stac, ayx za zanyx manyf, ayx peo munh. ²⁰ Nâyx đomc dlayc nzăngđ ayx phunz munh naih wâyx, max zâyf nhlync năngv max đaox puf đangc bix hayh naih wâyx đêh. Yê-su luiđ tuz manđ seetb gâyh tauh munh sab nyăngz stynb (Makv 7:24-30) ²¹ Zâu Yê-su seetb ninyh gâyh woax nomz tync, năngx ninyh Ty-rơ, cloon Sai-đôn stâyz phangz. ²² Naih ah tauh Ca-na-an nyăngz munh nzif taih êu coong, “Paix Zâu! Đa-vitv hungh nyăngz sây stunz lex! Jođ hâuđ lênh yaz, yaz nyăngz sab zuc manđ wâyb seenz zâuđ yongb. ²³ Six Zâu Yê-su max tauz nănh ah zâux tiny stăngv, stâyb-sây buz nzăngđ taih bux Nănh, stâyb-Pha lex! Bux êu tah bôf muf zef gôh, wâyc zuc nănh hamv haoh lêpc pănh cah đangz taih. ²⁴ Zâu Yê-su tauz, Zâu Tênb-Hungh êu yaz taih lov Y-sa-la-ên munh stâyz phangz nyăngz pa-jiz yungh gaih jêmh. ²⁵ Woax tauh munh nzif nzăngđ quâyc nzac Nănh nyăngz cah đangc ninyh paix Nănh yâuc jođ coong, “Zâu lêx! Jođ Mâyh stăngc Njâuv yaz. ²⁶ Zâu Yê-su tauz coong, “Max hopđ zuc zoz sây nyăngz năngv phunz clô nhlync. ²⁷ Tah bôf tauz coong, “Toix gôh Zâu lex! Clô taih yămz Zâu nyăngz nzoongf đi zu sây ayx năngv stăm tuih nhlync lêc. ²⁸ Zâu Yê-su numđ nănh coong naz songđ bux nănh, ô lex! Mâyh seenz zeen tuz gongx nzongf, âyz mâyh nyăngz oix six tuz gôh! Toongx woax zanyf, woax tauh munh nzif nyăngz sab songđ tuz gumc gongx nzuf. Yê-su zany tuz munh đungx nyăngz gumc ²⁹ Zâu Yê-su ninyh gâyh woax nomz tync, Nănh lêpc Ga-li-lê coiđ synh ninyh, songđ staox woa zoongz ninyh stâyv woa. ³⁰ Songx munh tinyh ênz ninyh lov Nănh hongđ nzongf, munh ênz gumc quac, mâyc buđ, oongx max hayh coong woac, năngx cloon đungx hungđ gumc munh taih tăpx ănz Zâu Yê-su nyăngz staux synh, Nănh songđ zany tuz gumc gongx nzuf phunz nănh stiz. ³¹ Songx munh songđ phătc njingc, munh quac hayh yăngh jau, munh oongx hayh coong woac, munh mâyc buđ hayh mangc tuz phătc jau yăngh, nănh stiz songđ tanv Y-sa-la-ên munh nyăngz Tênb-Hungh. Yê-su uyx pyâyz tynb lanh munh (Makv 8:1-10) ³² Zâu Yê-su êu stâyb-sây buz taih bux nănh stiz coong, “Yaz seenz numđ hâuđ lênh nâyx đomc munh, nănh stiz taih cloon yaz yămz nây tuz pôz noib nzof, yâuc max naih laiv lungđ phunz nănh stiz nhlync, Yaz yâuc max oix phunz nănh stiz tanyđ nyâuđ sab muf pyau, sangx max đanyf stiz hayh nyâuđ sab đoonh glinyf jămc lâyc bah đămx jau ninyh. ³³ Stâyb-sây buz coong, “Pănh yămz nây six jêmh stymz, pănh ayx laix hayh lov tuz laiv hungđ caux phunz buc nâyc săngb lanh munh nhlync neh? ³⁴ Zâu Yê-su naic, “Ha nyâuh năngx naih sax nomz nzu weh? Nănh stiz tauz, buz cungb năngx naih nhlic nomz nzu cloon iz tauh byauf jeenz lêc đêh. ³⁵ Zâu Yê-su bux êu songx munh stâyv woa nib ninyh. ³⁶ Nănh nzauf woa nhlic nomz nzu cloon tauh byauf taih hâuđ Tênb-Hungh tuz nzof, Nănh nzăngđ jaoz nzu phunz stâyb-sây buz nzâyz ninyh patz phunz songx munh nhlync. ³⁷ Songx munh nhlync pêu nzuf, nănh stiz ninyh sâub woax đomc nzu yăngc, năngx tuz nhlic đanz pong. ³⁸ Woax đomc nhlync nzu nyăngz munh, cox naih pyâyz tynb lanh munh toonz, munh nzif cloon munh sây max stunx. ³⁹ Songx munh muf nzuf, Zâu Yê-su songđ nzac đangđ ninyh Ma-ga-đan stâyz phangz. Munh jođ jix houđ mangc (Makv 8:11-13; Lu-ca 12:54-56)