16 ¹ Naih ah đomc Pha-li-si munh, cloon Sa-đu-si munh taih stâyv Zâu Yê-su, stiz êu Nănh ayx ah hungđ jix-caox njingc tăng gungh nzac taih phunz nănh stiz mangc. ² Zâu Yê-su tauz, tauv gungh cayx nzămc nyâuh phătc gungh coonz njaox stib, nyâuh songđ coong, “săngx đoomz gungh stingc gôh. ³ Bah đoomz tonx njâu, nyâuh phătc vănx stiz cloon vănx jaz staox, nyâuh songđ Coong, “nâyx noib hayh naih bungc nzaox gôh, nyâuh năngx hayh nyâyh tuz seetb gungh nyăngz stakb, ha yâuc max saz nâyx yeenv stâyv jix-caox njingc nâyx yeh? ⁴ Nâyx yeenh stâyv munh nyâuđ huđ nzongf! Nyâuh oix mangc jix-caox njingc nyăngz dlayc tăng gungh nzac taih, six seetb blătc Yô-na nyăngz jix-caox njingc, pitc hungđ nyâuh max tuz phătc. Zâu Yê-su songđ gâyh nănh stiz quaix pitc đoif ninyh. Zuc buôngh Pha-li-si munh Cloon Sa-đu-si munh nyăngz nzu piny (Makv 8:14-21) ⁵ Stâyb-sây buz clăngv quaix woax nganc glangh synh ninyh, yâuc nyâuđ cob max nzâyz nzu ninyh. ⁶ Zâu Yê-su bux nănh stiz, “năngđ cayb buôngh Pha-li-si, cloon Sa-đu-si munh nyăngz nzu piny bef! ⁷ Stâyb-sây buz lanh coong ănz lanh, Stâyb-Pha coong nâyx six wâyc pănh max nzâyz nzu taih. ⁸ Zâu Yê-su pâyz tuz nănh stiz sangv ayx laix, Nănh songđ naic, săngh laix nyâuh bix zâyf sangv tauv max nzâyz nzu taih? ⁹ Ha nyâuh lauf max zengx manyh pec, pya nomz nzu uyx pyaz tynb lanh munh mah? Năngx yăngc woax đomc nyâuh ninyh sâub tuz sax đanz? ¹⁰ Yâuc max săngx woax hâyđ nhlic nomz nzu, uyx pyâyz tynb lanh munh mah? Nhlync năngx yăngc woax đomc nyâuh ninyh sâub tuz sax đanz? ¹¹ nyâuh săngh laix bix max zengx pâyz? Yaz max zâyf coong seenz nzu, six yaz coong zuc buôngh Pha-li-si cloon Sa-đu-si munh nyăngz nzu piny. ¹² Woax zanyf stâyb-sây buz nzăngđ pâyz Zâu Yê-su max zâyf coong nzu piny nongc ănz văn, six zuc buôngh Pha-li-si cloon Sa-đu-si munh coong nyăngz woac. Phê-rơ nhlimc Yê-su ¹³ Zâu Yê-su ninyh tauv Sê-sa-rê, Phi-lipv stâyz phangz, yămz woa Nănh naic stâyb-sây buz coong, “Munh coong yaz bamh munh nyăngz toonz six toix laiv tauh? ¹⁴ Naih ah phanx coong, “mâyh six ayx quaix womz woax tauh Giăng, ah phanx coong mâyh six Ê-li, năngx naih ah phanx Coong, “Yê-lê-mi, mah six pitc tauh tâuc woac munh. ¹⁵ Nănh năngx naic, “ha nyâuh wec? Nyâuh coong yaz six toix laiv tauh? ¹⁶ Si-môn phê-rơ tauz, Mâyh six Tênb-Hungh nyăngz Toonz ayx Njâuv Zâu naih mengc săngh woax Tauh. ¹⁷ Zâu Yê-su bux nănh coong, “Giăng nyăngz toonz Si-môn lex! Poou phunz mâyh naih oonz loc gôh, nây six max zâyf laiv lanh bamh munh bux mâyh, six yămz woa Tênb-toongh woax tauh Nzangc pha phunz mâyh pâyz. ¹⁸ Six yaz bux mâyh Phê-rơ lex! Yaz six zuc njăpc Huyđ đăngb ănz nây njauz pyây cah zâyc, yămz pâu zuc tayc nyăngz jab six max hayh hingh tuz quaix Huyđ đăngb. ¹⁹ Yaz zoz Tênb-toongh Côkz nyăngz ja zâyh jaoz phunz mâyh, yămz nây gungh đi mâyh stayb laiv hungđ, yămz woa Tênb-toongh Côkz lauf stayb woax hungđ, yămz nây gungh đi mâyh coib laiv hungđ, woa Tênb-toongh Côkz lauf coib woax hungđ. ²⁰ Zâu Yê-su bux stâyb-sây buz coong, “Năngx gâyf lănv bux bây munh pâyz Nănh six Njâuv Zâu. Yê-su coong quaix đangc nănh zuc tayc nyăngz jau (Makv 8:31; 9:1-Lu-ca 9:22-27) ²¹ Tăng woax zanyf, Zâu Yê-su songđ lănv bux phunz stâyb-sây buz pâyz tuz Nănh ninyh tauv Ye-lu-sa-lem, six zuc zoz jaoz phunz yămz stayb-munh nyăngz puf đi, cloon munh côx, năngx cloon Yiu-thai munh nyăngz nzaox gâyf stênx stengb. Wâyb nănh caux nzuf muif hungđ, yâuc năngx zuc munh tayx tayc, six pôz quaix đangz, nănh năngx săngh phunb stengb taih. ²² Phê-rơ jinb Nănh seetb ninyh gâyh lanyc ah tix songđ cangđ nănh coong, ”Zâu lex! Jođ Tênb-Hungh hâuđ lênh Njâuv Mâyh, stâyv quâyx max phunz pongh zuc nâyx đomc dlayc seetb taih. ²³ Zâu Yê-su wynb lauf coong ănz Phê-rơ, Sax-tanx lex! Tyuv gâyh yaz năngx côz zef, mâyh max nyâyh âyz Tênb-Hungh nyăngz jau. Cungb nyâyh âyz bamh munh nyâyh nyăngz dlayc. ²⁴ Zâu Yê-su bux stâyb-sây buz coong, “Laiv lanh oix lêpc yaz, six cănh zuc sez mengc đamz nănh nyăngz săpc đăngc zax lêpc yaz ninyh. ²⁵ Laiv lanh cungb tâuh cănh tuz nzâux nănh nyăngz mengc, woax tauh six zuc quanyf mengc, laiv lanh wâyc yaz quanyf nănh nyăngz mengc, woax tauh six tuz mengc săngh. ²⁶ Laiv lanh tuz nzuf nây gungh đi muif hungđ, bix zuc stâyb nănh nyăngz mengc hoonh, bix naih lungđ lôif? Nănh naih laiv lungđ hayh tayv tuz nănh nyăngz mengc hoonh lauf? ²⁷ Wâyc zuc bamh munh nyăngz toonz, cloon Stynz-munh yămz nănh stiz nyăngz pha gwăngz-eng cah njaf, woax zanyf, nănh stiz âyz songx munh ayx nyăngz cumh pâuz sađ sâuđ nyâyc phunz nănh stiz. ²⁸ Yaz coong seenz bux nyâuh, stâuđ nây nyăngz munh, naih ah phanx max zengx quaix stâyv songđ tuz phătc Yaz muf tauv Yaz nyăngz Côkz gôh. Yê-su cloon Mô-sê, Ê-li coong woac (Makv 9:2-13; Lu-ca 9:28-36)