14 ¹ Woax dlapc, cun Ga-li-lê stengv woax tauh Hê-lôtv hungh numđ lănv Zâu Yê-su nyăngz jau. ² Nănh songđ bux stynb synh munh, “Nâyx tauh munh ayx laix yâuc zâyf Giăng ayx quaix womz nyăngz gâyf woax tauh săngh phunb stengb lêc, Nănh nzăngđ hayh ayx tuz lâyc đomc jix caox njingc nyăngz dlayc nâyx lêc đêh. ³ Wâyc nănh nyăngz yâuf Phi-lipv nyăngz au Hê-rô-đia, Hê-lôtv hungh songđ zoz Giăng clangđ ănz nzac nzauh ninyh. ⁴ Wâyc zuc Giăng muif dlih coong ănz Hê-lôtv hungh: "Mâyh max naih gâyf nongc Hê-rô-đia, ayx mâyh nyăngz au. ⁵ Hê-lôtv hungh jau đaic oix tayx Giăng lauh, six nănh cumh nzav pec stingx, songđ wâyc Yiu-thai munh mangc Giăng six ayx ah lanh stênx stengb munh. ⁶ Tauv Hê-lôtv hungh nyăngz stengb nyeetx noib, Hê-lô-đia nyăngz sab yămz songx munh cah đangc, tyuh loongc, Hê-lôtv seenz numđ zuc stymz. ⁷ Hungh songđ coong bux woax tauh sab, “Mâyh oix nongc laiv lungđ yaz nyunc phunz mâyh. ⁸ Nâyx tauh sab songđ âyz stiz nzif bux nyăngz woac jođ coong, “jođ nâyx zanyf zoz stăngc munh quaix womz nyăngz gâyf woax tauh Giăng nyăngz pyây ănz buônh nzâyz taih nây phunz yaz. ⁹ Hê-lôtv hungh numđ stauh nzongf, six wâyc zuc nănh toongx songx nyunc woac nzuf nzof, nănh songđ zuc seetb lanyf ayx âyz woax tauh sab jođ nyăngz woac. ¹⁰ Nănh êu munh ninyh woa nzauh njaf cumv zoz Giăng nyăngz pyây. ¹¹ Zoz pyây tăpx ănz woa buônh pâuh lauf phunz woax tauh sab, woax tauh sab songđ jaoz phunz nănh stiz nzif Hê-rô-đia. ¹² Giăng nyăngz stâyb sây buz songđ ninyh zoz nănh nyăngz stynb stayđ nzâyz ninyh zaub nzof, nănh stiz songđ ninyh lănv bux Zâu Yê-su. Yê-su uyx pyaz tynb lanh munh (Makv 6:30-44; Lu-ca 9:10-17; Giăng 6:1-14) ¹³ Zâu Yê-su numđ lănv nâyx đomc dlayc, Nănh songđ nzac đangđ ninyh gâyh woax nomz tync, ninyh lanyc tync yămz, songx munh pâyz songđ tăng nănh stiz nyăngz stengv pec staux yăngh lêpc Nănh ninyh. ¹⁴ Zâu Yê-su seetb đangđ taih phătc naih munh đungx nzongf, Nănh songđ hâuđ lênh, songđ zany gumc phunz nănh stiz tuz gongx nzuf. ¹⁵ Tauv cayx nzămc, Stâyb-sây buz taih bux Yê-su, gungh cayx nzămc gôh, nây six jêmh stymz, bux êu songx munh muf gôh, phunz nănh stiz ninyh laiv tix tync naih njăngv maif nhlync lêc. ¹⁶ Zâu Yê-su tauz, “Nănh stiz max zâuđ ninyh đêh, nyâuh cănh lov phunz nănh stiz nhlync lêc. ¹⁷ Stâyb-sây buz coong, “Buz cungb năngx naih pyaz nomz nzu cloon iz tauh byauf lêc. ¹⁸ Zâu Yê-su coong, “Nzâyz taih nây phunz Yaz! ¹⁹ Nănh songđ bux êu songx munh stâyv nzac mađ mync ninyh nzof, Nănh songđ zoz woa pyaz nomz nzu cloon iz tauh byauf taih, zaub mynb mangc staox gungh ninyh, hâuđ Tênb-Hungh tuz nzof, Nănh songđ jaoz phunz stâyb-sây buz nzâyz ninyh patz phunz songx munh nhlync. ²⁰ Songx munh nhlync pêu nzuf, stâyb-sây buz ninyh sâub woax đomc nzu yăngc năngx tuz săpc nyâyc đanz pong. ²¹ Woax noib nhlync nzu nyăngz munh, cox naih bengc pyaz tynb lanh munh pha, munh nzif cloon sây max stunx. Yê-su yăngh womz mync (Makv 6:45-52; Giăng 6:15-21) ²² Zâu Yê-su nzeenc stâyb-sây buz nzac đangđ ninyh clăngv quaix woax nganc lepb wăngx synh ninyh đangc, Nănh cănh yămz đangz bux êu songx munh đanv muf pyau nzuf. ²³ Songx munh đanv nzuf, Yê-su staox woa zoongz ninyh đoouc coouv Zâu, tauv gungh nzămc Nănh cănh ah lanh yămz woa. ²⁴ Woax zanyf đangđ gâyh woa wăngx synh côz nzongf, zuc nzaox sâyb womz boomf phatb đangđ, wâyc zuc nzaox pan longh njoongh nzongf. ²⁵ Tauv gungh cayx gwăngz cox pôz muf joz săngx huđ woax dlih, Zâu Yê-su yăngh jămc womz mync ninyh stâyb-sây buz woa. ²⁶ Stâyb-sây buz phătc Nănh yăngh quaix womz mync taih, nănh stiz numđ cumh nzav songđ hamv coong, “Ê! zungb lêc sta? ²⁷ Zâu Yê-su lênh dlih coong bux, “Phanv pungx stymz, yaz lêc đôih! năngx gâyf cumh nzav. ²⁸ Phê-rơ coong, “Zâu lex! Năngđ seenz zâyf Mâyh, bix ayx phunz yaz hayh yăngh quaix womz mync ninyh Mâyh woa geh.' ²⁹ Yê-su tauz, “taih geh! Phê-rơ songđ seetb đangđ yăngh quaix womz mync ninyh Zâu Yê-su woa. ³⁰ Six Phê-rơ phătc nzaox lub, nănh numđ cumh nzav songđ sêmh nzac womz ninyh, nănh coonx hamv coong, “Zâu lôix! Njâuv yaz đôih!" ³¹ Zâu Yê-su lênh dlih stungb puf nzauf nănh. yâuc coong, “mâyh seenz zeen tuz hanyb nâyx yeh? Mâyh săngh laix bix nyâuđ plungh plănb” ³² Yê-su cloon Phê-rơ japc nzac đangđ ninyh, nzaox lênh dlih jac nzuf. ³³ Yămz woa đangđ njaf woax đomc munh tinyh đoih songđ paix Zâu yâuc coong, “Stênx stengb lex! Mâyh seenz zâyf Tênb-Hungh nyăngz Toonz gôh. Yê-su yămz Na-sa-letv zany gumc (Makv 6:53-56) ³⁴ Nănh stiz clăngv ninyh tauv woax nganc wăngx synh, ninyh tauv Cê-nê-sa-lêtv stâyz phangz. ³⁵ Yămz woax nomz stengv nyăngz munh saz tuz Zâu Yê-su songđ pungx woac ninyh nzêux muif tyuh njăngv, munh songđ ênz yeetx stong săngh gumc munh taih tauv Zâu Yê-su woa. ³⁶ Nănh stiz cungb jođ phunz gumc munh ninyh clatc nănh nyăngz gwuyz saz, laiv lanh clatc zuc nănh nyăngz gwuyz saz six tuz gumc gongx nzuf. Stu stongz nyăngz gâyf (Makv 7:1-13)