¹ Woax dlapc, cun Ga-li-lê stengv woax tauh Hê-lôtv Hungh numđ lănv Zâu Yê-su nyăngz jau. ² Nănh songđ bux stynb synh munh, “nâyx tauh ayx laix yâuc zâyf Giăng quaix womz nyăngz gâyf woax tauh săngh phunb stengb lêc, nănh nzăngđ hayh ayx tuz lâyc đomc jix caox njingc nyăngz dlayc. ³ Wâyc nănh nyăngz yâuf Phi-lipv nyăngz au Hê-rô-đia, Hê-lôtv Hungh songđ zoz Giăng sukc ănz nzac nzauh. ⁴ Wâyc zuc Giăng muif dlih coong ănz Hê-lôtv Hungh: "mâyh max naih gâyf nongc Hê-rô-đia, ayx mâyh nyăngz au. ⁵ Hê-lôtv Hungh jau đaic oix tayx Giăng, six nănh cumh nzav pec stingx, songđ wâyc Yiu-tai munh mangc Giăng ayx ah lanh stênx stengb munh. ⁶ Tauv Hê-lôtv Hungh nyăngz stengb nyeetx noib, Hê-lô-đêtc nyăngz sab yămz songx munh cah đangc, tyuh loongc, Hê-lôtv seenz numđ zuc stymz. ⁷ Hungh Songđ tauz woac phunz woax tauh sab coong, “mâyh oix nongc laiv lungđ yaz nyunc phunz mâyh. ⁸ Nâyx tauh sab âyz stiz nzif bux nyăngz woac jođ coong, “jođ nâyx zanyf zoz stăngc munh Quaix womz nyăngz gâyf woax tauh Giăng nyăngz pyây ănz buônh nzâyz taih nây phunz yaz. ⁹ Hê-lôtv Hungh numđ stauh nzongf, six wâyc zuc nănh toongx songx nyunc woac nzuf nzof, nănh songđ zuc seetb lanyf ayx âyz woax tauh sab jođ nyăngz woac. ¹⁰ Nănh êu munh ninyh woa nzauh njaf cumv Giăng nyăngz pyây. ¹¹ Zoz pyây tăpx ănz woa buônh pâuh lauf phunz woax tauh sab, woax tauh sab songđ jaoz phunz nănh nyăngz nzif Hê-rô-đia. ¹² Giăng nyăngz stâyb sây songđ ninyh zoz nănh nyăngz stynb stayđ nzâyz ninyh zaub nzof, nănh stiz songđ ninyh bux Zâu Yê-su. ¹³ Zâu Yê-su numđ lănv nâyx đomc dlayc, nănh songđ nzac đangđ ninyh gâyh woax nomz tync, ninyh lanyc tync yămz, songx munh pâyz, songđ tăng nănh stiz nyăngz stengv pec staux yăngh lêpc nănh ninyh. ¹⁴ Zâu Yê-su seetb đangđ taih phătc munh đungx nzongf, nănh songđ hâuđ lênh, songđ zany gumc phunz nănh stiz tuz gongx nzuf. ¹⁵ Tauv cayx nzămc, Stâyb sây buz taih bux Yê-su, gungh cayx nzămc gôh, nây jêmh stymz, bux êu songx munh muf gôh, phunz nănh stiz ninyh laiv tix tync naih njăngv maif nhlync lêđ. ¹⁶ Zâu Ye-su tauz, “nănh stiz max zâuđ ninyh đêh, nyâuh cănh lov phunz nănh stiz nhlync lêc. ¹⁷ Stâyb sây buz coong, “buz cungb năngx naih pyaz nomz nzu cloon iz tauh byauf lêc. ¹⁸ Zâu Yê-su coong, “nzâyz taih phunz yaz ! ¹⁹ Nănh bux êu songx munh stâyv nzac mađ mync ninyh nzof, nănh songđ zoz woa pyaz nomz nzu cloon iz tauh byauf taih, zaub mynb mangc staox gungh ninyh, sâuf Tênb-Hungh tuz nzof, nănh songđ jaoz phunz stâyb sây buz, nzâyz ninyh patz phunz songx munh nhlync. ²⁰ Songx munh nhlync pêu nzuf, stâyb sây buz ninyh sâub woax đomc nzu yăngc năngx tuz săpc nyâyc đanz pong. ²¹ Woax noib Nhlync nzu nyăngz munh, cox naih bengc pyaz tynb lanh munh pha, munh nzif cloon sây max stunx. ²² Zâu Yê-su nzeenc stâyb sây buz nzac đangđ ninyh clangv quaix woax nganc lepb wăngx synh ninyh đangc, nănh yămz đangz bux êu songx munh đanv muf pyau nzuf. ²³ Songx munh đanv nzuf, Yê-su staox woa zoongz ninyh clo Zâu, tauv gungh nzămc nănh cănh ah lanh yămz woa. ²⁴ Woax zanyf đangđ gâyh wăngx synh côz nzongf, zuc nzaox sâyb womz boomf phatb đangđ, wâyc zuc nzaox sâyb phunb đangz njoongh nzongf. ²⁵ Tauv gungh cayx gwăngz cox pôz muf joz săngx huđ waox dlih, Zâu Yê-su yăngh womz mync ninyh stâyb sây woa. ²⁶ Stâyb sây stiz phătc nănh yăngh womz mync taih, nănh stiz numđ cumh nzav, songđ hamv coong, “Ê! Zungb lêc sta? ²⁷ Zâu Yê-su lênh dlih coong bux, “phanv pungx stymz, yaz lêc đôih! năngx gâyf cumh nzav. ²⁸ Phê-e-rơ coong, “Zâu lex! Năngđ seenz zâyf mâyh, bix ayx phunz yaz hayh yăngh womz mync ninyh mâyh woa.' ²⁹ Yê-su tauz, “taih geh! Phê-e-rơ songđ seetb đangđ yăngh womz mync ninyh Zâu Yê-su woa. ³⁰ Six Phê-e-rơ phătc nzaox lub, nănh numđ cumh nzav, songđ sêmh nzac womz ninyh, nănh coonx hamv coong, “Zâu lôix! Njâuv yaz nef!" ³¹ Zâu Yê-su lênh dlih stungb puf nzauf nănh. yâuc coong, “mâyh zeen tuz hanyb nâyx yeh? Mâyh săngh laix bix nyâuđ plungh plănb” ³² Yê-su cloon Phê-e-rơ japc nzac đangđ ninyh, nzaox lênh dlih jac nzuf. ³³ Yămz woa đangđ njaf woax đomc tinyh đoih songđ paix Zâu yâuc coong, “stênx stengb lex! Mâyh seenz zâyf Tênb-Hungh nyăngz toonz gôh. ³⁴ Nănh stiz clăngv ninyh tauv woax nganc wăngx synh, ninyh tauv Cê-nê-sa-lêtv stâyz phangz. ³⁵ Yămz woax nomz stengv nyăngz munh saz tuz Zâu Yê-su songđ pungx woac ninyh nzêux muif tyuh njăngv, munh songđ ênz yeetx stong săngh gumc munh taih tauv Zâu Yê-su woa. ³⁶ Nănh stiz cungb jođ phunz gumc munh ninyh clatc nănh nyăngz gwuyz saz, laiv lanh clatc zuc nănh nyăngz gwuyz saz six tuz gumc gongx nzuf.