¹ Woax zanyf, naih ah đomc Pha-li-si munh, tăng Yê-lu-sa-lem stengv taih lov Zâu Yê-su naic nănh. ² Ha săngh laix mâyh nyăngz stâyb sây buz bix ayx longđ stongz zez tâuh nyăngz gâyf? Nănh stiz max đaox puf đangc nzăngđ nhlync năngv? ³ Zâu Yê-su Coong, “ha săngh laix nyâuh bix quanyf Tênb-Hungh nyăngz đoouc lif gâyf, bix cănh âyz nyâuh nyăngz stongz zez tâuh nyăngz gâyf? ⁴ Wâyc Zâu Tênb-Hungh bux Coong, “nyâuh hopđ zuc jâuz nyâuh nyăngz nzif Pha, laiv lanh zaux nănh nyăngz nzif Pha six zuc tayx tayc. ⁵ Six nyâuh Coong, “laiv lanh Coong ănz nyâuh nyăngz nzif Pha, “laiv hungđ yaz stăngc tuz nzif Pha, six yaz pungx hođ phunz Zâu Tênb-Hungh nzof gôh. ⁶ Woax tauh munh max zuc jâuz nănh nyăngz nzif Pha nzof gôh, six nyâuh quanyf Zâu Tênb-Hungh nyăngz đoouc lif gâyf, bix cănh âyz nyâuh stongz zez tâuh nyăngz gâyf ayx. ⁷ Pâyh zac nyâuh ngokx nyăngz munh lex! Ê-sai stênx stengb ja lănv tauv nyâuh seenz toix gôh, ⁸ Nănh Coong, “nâyx đomc munh nongc nzeetx pâuh yaz, six nănh stiz nyăngz nyâuđ gâyh yaz côz nzongf. ⁹ Nănh stiz congx yaz six max naih lungđ phănc, stiz cungb pangc yaz nyăngz gâyf ayx coonz, bix zoz bamh munh njăpc taih nyăngz gâyf nzaox." ¹⁰ Zâu Yê-su êu songx munh taih, songđ lănv bux nănh stiz Coong, “nyâuh cayb mungv bix saz yaz Coong nâyx đomc woac. ¹¹ Nhlync nzac nzeetx ninyh nyăngz tax hungđ, six max hayh wâyx munh, six laiv hungđ tăng munh nzeetx coong seetb taih, nzăngđ hayh ayx wâyx munh." ¹² Stâyb sây buz, taih Coong ănz Yê-su, stênx-stengb mâyh pâyz tuz mâyh Coong đomc woac, Pha-li-si munh max phuc tuz max? ¹³ Zâu Yê-su tauz Coong, “toix laiv zâyz njăngx max zâyf Tênb-toongh pha songx, six zuc pengz cloon đungh seetb taih. ¹⁴ Dluyh pyenz stiz gôh; Nănh stiz ayx yeenv jau munh, six mâyc blâuf, six coong mâyc blâuf jinđ mâyc blâuf munh, six zuc iz lanh tuih cotb nzuf. ¹⁵ Phê-e-ơ Coong, “jođ Stênx stengb pob manyf nâyx đomc woac pây phunz buz mungv. ¹⁶ Zâu Yê-su naic, ha nyâuh lauf max zengx pâyz naz? ¹⁷ Nyâuh max pâyz nhlync nzac nzeetx ninyh six nzac nyâuđ muf, blătc quaix đangz nzăngđ pungx seetb taih mah? ¹⁸ Nzeetx coong laiv hungđ six tăng nyâuđ nyâyh seetb taih, nzăngđ ayx phunz munh naih wâyx. ¹⁹ Songđ wâyc munh yămz nyâuđ nyâyh ayx huđ nyăngz jau, tayx munh, caoz munh, ayx pongz lauh, ayx stac, ayx za zanyx jênx, ayx peo munh. ²⁰ Nâyx đomc dlayc nzăngđ ayx phunz munh naih wâyx, max zâyf nhlync năngv max đaox puf đangc bix hayh naih wâyx đêh. ²¹ Zâu Yê-su seetb ninyh gâyh woax nomz tync, năngx ninyh Ty-ơ, cloon Sai-đôn stâyz phangz. ²² Naih ah tauh Ca-na-an nyăngz munh nzif taih êu Coong, “paix Zâu! Đa-vitv Hungh nyăngz sây stunz lex! Jođ hâuđ lênh yaz, yaz nyăngz sab zuc manđ wâyb seenz zâuđ nzongf. ²³ Six Zâu Yê-su max tauz tah bôf ah zâux tiny stăngv, stâyb sây buz nzăngđ taih bux nănh, stâyb Pha lex! Bux êu tah bôf muf zef gôh, wâyc zuc nănh hamv haoh lêpc pănh cah đangz taih. ²⁴ Zâu Yê-su tauz, Zâu Tênb-Hungh paiđ yaz taih, six taih wâyc I-sa-la-ên munh nyăngz stâyz phangz, pa-jiz yungh gaih jêmh. ²⁵ Woax tauh munh nzif nzăngđ quâyc nzac nănh nyăngz cah đangc ninyh paix nănh yâuc jođ Coong, “Zâu lêx! Jođ mâyh stăngc Njâuv yaz. ²⁶ Zâu Yê-su tauz Coong, “max hopđ zuc zoz sây nyăngz năngv phunz clô nhlync. ²⁷ Tah bôf tauz Coong, “toix gôh Zâu lex! Clô taih yămz Zâu nyăngz nzoongf đi zu sây ayx năngv stăm tuih nhlync lec. ²⁸ Zâu Yê-su numđ Coong naz songđ bux nănh, ô lex! Mâyh seenz zeen tuz gongx nzongf, âyz mâyh nyăngz oix six tuz gôh! Toongx woax zanyf, woax tauh munh nzif nyăngz sab tuz gumc gongx nzuf. ²⁹ Zâu Yê-su ninyh gâyh woax nomz tync, nănh lêpc Ga-li-lê coiđ synh, songđ staox woa zoongz ninyh stâyv woa. ³⁰ Songx munh tinyh ênz ninyh lov nănh hongđ nzongf, munh nzâyz gumc quac, mâyc buđ, oongx max hayh coong woac, năngx cloon đungx hungđ gumc munh taih tăpx ănz Zâu Yê-su nyăngz staux synh ninyh, nănh songđ zany tuz gongx nzuf phunz nănh stiz. ³¹ Songx munh phătc njingc nzongf, munh quac hayh yăngh jau, munh oongx hayh coong woac, munh mâyc buđ hayh mangc tuz phătc jau yăngh, nănh stiz songđ tanv I-sa-la-ên munh nyăngz Tênb-Hungh. ³² Zâu Yê-su êu stâyb sây buz taih bux nănh stiz Coong, “yaz seenz numđ hâuđ lênh nâyx đomc munh nzongf, nănh stiz taih cloon yaz yămz nây tuz pôz noib nzof, yâuc max naih laiv lungđ phunz nănh stiz nhlync, yaz yâuc max oix phunz nănh stiz tanyđ nyâuđ sab muf pyau, sangx max đanyf hayh nyâuđ sab đoonh glinyf jămc lâyc bah đămx jau ninyh. ³³ Stâyb sây buz Coong, “pănh yămz nây jêmh stymz, pănh ayx laix hayh lov tuz laiv hungđ caux phunz buc nâyc săngb lanh munh nhlync neh? ³⁴ Zâu Yê-su naic, “ha nyâuh năngx naih sax nomz nzu weh? Nănh stiz tauz, buz cungb năngx naih nhlic nomz nzu cloon iz tauh byauf jeenz lêđ đêh. ³⁵ Zâu Yê-su bux êu songx munh stâyv woa nib ninyh. ³⁶ Nănh nzauf woa nhlic nomz nzu cloon iz tauh byauf sâuf Tênb-Hungh tuz nzof, nănh nzăngđ watz nzu jaoz phunz stâyb sây buz nzâyz ninyh patz phunz songx munh nhlync. ³⁷ Songx munh nhlync pêu nzuf, nănh stiz ninyh sâub woax đomc nzu yăngc, năngx tuz nhlic đanz pong. ³⁸ Woax đomc nhlync nzu nyăngz munh, cox naih pyâyz tynb lanh munh toonz, munh nzif cloon munh sây max stunx. ³⁹ Songx munh muf nzuf, Zâu Yê-su songđ nzac đangđ ninyh Ma-ga-đan stâyz phangz.