¹ Lauf toongx woax noib Zâu Yê-su ninyh gâyh woax sênz pyau, songđ ninyh stâyv woa wăngx synh. ² Songx munh hongđ nzongf taih nzomf woa quib nănh nzêux nzuf, nănh songđ nzac đangđ ninyh stâyv woa, songx munh songđ stâuđ woa wăngx synh. ³ Zâu Yê-su songđ nongc woac pây nzaox nănh stiz đungx hungđ jau, nănh coong, “naih ah lanh munh seetb ninyh hav nhlimb. ⁴ Hav woax dlih, naih po nhlimb tuih zuc jau đămc, noc songđ taih ston nhlinc nzuf. ⁵ Naih ah phanx nhlimb tuih nzac njauz waz njaf, max naih nib phănx huv, nhlimb bêux nyah cănh. ⁶ Bah noib seetb taih phaib njengh nzuf, wâyc zuc max nzac đungh đôz. ⁷ Naih ah po tuih nzac nzim plungz, nzim lub taih songđ nzymx nzuf. ⁸ Naih ah po nhlimb tuih toix nib gongx, bêux taih săngh tuz nyauh. ah phanx sâub tuz ah pez phănc. ah phanx sâub guf săpc, ah po sâub tuz stamx săpc phănc. ⁹ Toix tauh naih bah noomh six zuc nzaz bah nomh mungv năngx gongx. ¹⁰ Stâyb sây buz taih naic Zâu Yê-su, “ săngh laix stâyb Pha bix nongc woac pây nzaox nâyx đomc munh? ¹¹ Nănh tauz, nyâuh tuz Zâu sađ phunz nyâuh pâyz tuz Tênb-Côkz pinyx vâyv nyăngz dlayc, six nănh stiz max tuz pâyz. ¹² Songđ wâyc laiv tauh naih six oix pâu phunz đungx staox yâuc naih yăngc, six laiv tauh max naih, nănh naih ah tix, yâuc zuc zoz nzâyz seetb ninyh nzuf. ¹³ Wâyc nây, yaz nongc woac pây nzaox phunz nănh stiz, hănđ mangc yâuc max phătc, hănđ mungv yâuc max numđ max saz. ¹⁴ Ê-sai stênx-stengb, coong woax đomc woac six toix nănh stiz nzuf, Nănh coong, “nyâuh hănđ mungv buc laiv yâuc max saz, hănđ mangc buc laiv yâuc max phătc. ¹⁵ Wâyc zuc woax đomc pec stingx stymz nyâuđ bi, bah nomh đao, yâuc nzipx mâyc, năngđ max têx, nănh stiz nyăngz mâyc hayh mangc tuz phătc, bah noomh hayh mungv tuz numđ, nănh stiz nyăngz nyâuđ hayh đyub, phunz yaz zany gongx nănh stiz. ¹⁶ Six pou phunz nyâuh nyăngz mâyc hayh mangc tuz phătc, bah noomh yâuc hayh mungv tuz numđ. ¹⁷ Yaz Coong seenz bux nyâuh, naih đungx lanh tôuc woac munh, cloon munh gongx, mungc oix tuz phătc, nyâuh phătc nyăngz dlayc, nănh stiz max tuz phătc. oix mungv nyâuh numđ nyăngz gâyf, yâuc max tuz numđ. ¹⁸ Nyâuh mungv bex, hav nhlimb nyăngz woac pây âyz gâyf six năngđ laix. ¹⁹ Hav nhlimb tuih zuc jau đămc woax đomc, six pây năngđ munh numđ Tênb-toongh Côkz nyăngz cuđ-jeenx, yâuc max saz, cuđ-jeenx yămz nănh stiz nyăngz nyâuđ cah njaf, zuc sax-tanx taih zab zoz nzâyz ninyh nzuf. ²⁰ Hav tuih zuc toix njauz staiz poz woax đomc nhlimb, six pây tauv woax đomc munh numđ cuđ-jeenx yâuc numđ nyađ coonx stipx ²¹ Six cuđ-jeenx nzac đungh max đôz zeen max lauh, pongh zuc dlayc, zuc munh ayx peo, songđ taux woa quengx Zâu. ²² Nhlimb tuih nzac nzim plungz, pây munh numđ Cuđ-jeenx, six wâyc queenđ nyâuđ stâyv sangc nyăngz jau, cloon nyanh stynh plongz cuđ-jeenx nyăngz nhlimb songđ max jauh. ²³ Hav tuih zuc nib gongx woax đomc nhlimb, six pây tauv munh numđ Cuđ- jeenx, yâuc pyac nyâuđ, six pây woax đomc nhlimb săngh tuz nyauh, ah phanx sâub tuz ah pez phănc, ah phanx tuz guc săpc phănc, ah phanx tuz stamx săpc phănc. ²⁴ Zâu Yê-su năngx coong pitc tyuh woac pây phunz songx munh mungv, Tênb-toongh Côkz six pây năngđ ah lanh munh seetb ninyh hav nhlimb ănz woa njăngx njaf. ²⁵ Songx munh phâyx nzuf woax dlih, nănh nyăngz yônz zaz nzâyz za blauh ninyh hav zanb, songđ tyuv mem. ²⁶ Tauv blauh lub taih seetb blauh nomz, songđ saz tuz za blauh zanb. ²⁷ Cumh pâuz munh ninyh naic njăngx Zâu, “tah lex! mâyh max zâyf hav seenz blauh nhlimb ănz woa njăngx njaf haz? Săngh laix za blauh tăng laiv tix taih yeh? ²⁸ Njăngx Zâu tauz, nây six yônz pyăy ayx lêc, pâuz naic nănh, “ha mâyh oix nongc buz ninyh pengz ayx quengx max? ²⁹ Njăngx Zâu tauz, “năngx gâyf pengz, săngx max đanyf hayh pengz zuc cloon seenz blauh. ³⁰ Dluyh pyenz nănh stiz lub taih đangc, tauv sâub zunb nyăngz săngx huđ, yaz mănc bux cumh pâuz munh ninyh quănf za blauh đangc, stayb ayx săngh ploc pu , nzof mănc sâub seenz blauh ănz yaz nyăngz njămf. ³¹ Zâu Yê-su năngx coong ah tyuh woac pây phunz nănh stiz mungv tymb, Tênb-Hungh ayx Zâu cun munh nyăngz âyz gâyf pây năngđ njayz jaix nhlimb, naih ah lanh munh nzâyz ninyh songx ănz nănh nyăngz njăngx njaf. ³² Muif hungđ nhlimb six njayz jaix nhlimb năngx stăm quaix, six songx bêux taih nănh năngx lub têx pitc , hungđ njayz, songđ săngh njăngx, yămz gungh noc yâuc năngx taih ayx njaof yămz nănh nyăngz quah. ³³ Zâu Yê-su năngx coong pitc tyuh woac pây tymb, “Tênb-Hungh ayx Zâu cun munh six năngđ nzu piny nâyx, naih ah lanh munh nzif zoz tikc cay nzu piny lou ănz pôz tongđ văn, nâyx đomc văn songđ phutx nzuf gôh. ³⁴ Zâu Yê-su cungb nongc woac pây nzaox songx munh, blătc nzuf woac pây nănh max nongc pitc hungđ nzaox nănh stiz. ³⁵ Nănh ayx năngđ nây, wâyc phunz toix nzuf tâuc woac munh coong nyăngz woac. Yaz zuc nongc woac pây nzaox, “yaz zoz tăng cah lof zuyx gungh zuyx nib, max zengx plongx yangh nyăngz dlayc nzônh phunz nănh stiz mungv. ³⁶ cloon songx munh coong woac nzuf, Zâu Yê-su songđ nzac pyau muf, stâyb sây buz zâyf taih naic nănh, “jođ stâyb-pha pob manyf yămz njăngx njaf za blauh nyăngz woac pây phunz buz mungv. ³⁷ Zâu Yê-su tauz, “hav seenz blauh six yaz bamh munh nyăngz toonz. ³⁸ Njăngx tâyc six bamh canz, blauh nhlimb gongx six Tênb-toongh Côkz nyăngz pec stingx, za blauh six okx njangh nyăngz pec stingx. ³⁹ Hav za blauh nhlimb woax tuh yônz zaz six manđ Hungh, quănf blauh nyăngz săngx huđ six pây bamh canz nyăngz stêtb mâyv noib, quănf blauh woax đomc six Stynz-munh. ⁴⁰ Stynz-munh ayx laix quănf za blauh ănz tâuf pu, bamh canz nyăngz stêtb mâyv lauf năngđ woa nâyx. ⁴¹ Yaz bamh munh nyăngz toonz, paiđ Stynz-munh ninyh zoz yeetx stong jaf munh longđ stoif, cloon ayx huđ nyăngz munh sâub dlonf lauf. ⁴² Bomf ănz tâuf coiđ, phunz nănh stiz yămz woa pungx stingb haoh yâuc tăpc nyah tanyđ. ⁴³ Laiv lanh zeen gongx Tênb-Hungh, songđ tuz nzangc pha nyăngz côkz năngđ bah noib nâyx syux gwăngz. Laiv lanh naih bah noomh bix mungv năngx gongx bex. ⁴⁴ Tênb-Hungh ayx Zâu cun munh six năngđ sămz nyanh plopx ănz woa njăngx njaf nâyx, naih ah lanh munh ninyh pongh nănh songđ coonx pinyx, numđ nyađ muf maic nănh nyăngz jax toongx, nzâyz nyanh ninyh maif woax tootz njăngx. ⁴⁵ Tênb-Hungh ayx Zâu cun munh six năngđ stenyb âyx munh ninyh lov pou zâuz. ⁴⁶ Lov tuz pongh pou zâuz saix, nănh songđ muf maic nzuf muif hungđ nzâyz nyanh ninyh maif woax nomz zâuz. ⁴⁷ Tênb-Hungh ayx Zâu cun munh six năngđ munh pungh leđ nzac coiđ ninyh gutb tuz muif hungđ byauf. ⁴⁸ byauf pong leđ nzuf, ayx byauf munh đănx seetb wăngx synh taih, stâyv woa sên byauf gongx zoz ănz tongđ, byauf huđ zoz wătc quengx. ⁴⁹ Bamh canz nyăngz stêtb mâyv noib, lauf năngđ woa, Stynz-munh taih zoz munh gongx cloon munh huđ phunz tinyh gâyh. ⁵⁰ Zoz woax đomc munh huđ wătc ănz tâuf coiđ, phunz nănh stiz yămz woa pungx stingb haoh yâuc tăpc nyah tanyđ. ⁵¹ Zâu Yê-su naic stâyb sây buz: “nyâuh tinyh đoih saz nâyx đomc woac max? Nănh stiz tauz, “ Saz lêx” ⁵² Zâu Yê-su coong, “naz” muif lanh nzaox gâyf Stênx-stengb tuz hođ quaix Zâu Tênb-Hungh nyăngz seenz gâyf, six năngđ ah lanh pyau Zâu tăng njămf zoz lôx nyăngz tax hungđ cloon săngb nyăngz seetb taih nâyx. ⁵³ Zâu Yê-su coong nzuf nâyx đomc woac pây, nănh songđ ninyh gâyh woax nomz jêmh. ⁵⁴ Nănh songđ phunb đangz lauf lôx stâyz phangz, yămz woa Huyđ toongh nzaox munh, songx munh numđ njingc nzongf nănh stiz songđ naic, nănh tăng laiv tix tuz nâyx đomc Tongb-manyh cloon jix-caox njingc nâyx loz? ⁵⁵ Nănh max zâyf njăngx stangc woax tauh nyăngz toonz mah? Ma-li-ya max zâyf nănh nyăngz nzif mah? Gia-cơ, Yô-sepv, Si-môn, cloon Yu-đa max zâyf nănh nyăngz yâuf mah? ⁵⁶ Nănh nyăngz muc max zâyf tinyh đoih cloon pănh yămz nây mah? Ha naz nâyx đomc muif hungđ jix-caox njingc nănh tăng laiv tix tuz nâyx yeh? ⁵⁷ Stiz songđ nzêmh nănh gôh, “Six Zâu Yê-su coong, “tâuc woac munh ninyh tauv laiv tix naih munh pâuh, six cungb cănh phangz munh, cloon pyau njaf munh nzêmh lêc. ⁵⁸ Wâyc munh max zeen, tăng woa nănh songđ max ayx jix-caox njingc đungx.