¹ Zâu Yê-su êu nănh nyăngz săpc nyâyc tauh stâyb sây taih dlonf woa, jaoz lokc jangx Phunz nănh stiz hayh luiđ tuz muif hungđ manđ seetb, Yâuc hayh zany tuz gumc gongx.” ² Nănh paiđ nănh stiz ninyh lănv Tênb-Hungh ayx Zâu cun munh nyăngz Cuđ jeenx, yâuc hayh zany gongx munh nyăngz gumc. ³ Nănh zăpx coong, “seetb jau max tuz nzâyz tax’ hungđ tungh zăngc, pya pyac, tic ănz nyanh, Nzu, max tuz nzâyz gwuyz quav wănc. ⁴ nyâuh sec toix laiv sênz pyau, six zuc sec năngx tauv nyâuh seetb ninyh. ⁵ Six coong munh năngđ max stipx nyâuh nec têx, nyâuh six zuc seetb woax nomz stengv, yâuc boongf blaz Staux nyăngz nib bungb quanyf ănz woa wâyc ayx zanyx manyf Phunz Nănh stiz pâyz tuz nănh stiz ayx longđ. ⁶ Stâyb sây buz songđ seetb ninyh nzêux muif tyuh njăngv, Muif nomz stengv lănv Tênb-Hungh ayx Zâu cun munh nyăngz Cuđ jeenx, Yâuc zany gongx gumc munh đotf zuy đoif.” ⁷ Woax zanyf Hê-lôtv Hungh numđ lănv nâyx đomc dlayc seetb taih, nănh nyâyh max pâyz six seenz toix laiv tauh, Naih phanx coong, “Stăngc munh ayx quaix womz nyăngz gâyf woax tauh Giăng tayc blătc bix năngx săngh phunb stengb taih. ⁸ Naih phanx coong, “Ê-li-ya, hynđ seetb taih, Năngx naih ah phanx coong, “lâyc tauh six lôx noib nyăngz tâuc woac munh năngx săngh taih. ⁹ Hê-lôtv Hungh coong, “Ha Giăng nyăngz pyây yaz six êu pengz ninyh cumv tuih nzof wec! Ha yaz numđ lănv ayx nâyx đomc dlayc woax tauh six toix laiv tauh? Hê-lôtv songđ oix lov congv pongh Zâu Yê-su.” ¹⁰ Stâyb-sây buz Phunb đangz lauf lănv nzuf nănh stiz ayx nyăngz muif hungđ dlayc bux phunz Zâu Yê-su mungv, Nănh songđ ênz stâyb-sây buz ninyh tauv ah nomz stengv bux hipđ ayx Bêtv-sai-đa.” ¹¹ Six songx munh numđ lănv coong Zâu Yê-su taih cayx tauv gôh naz, Nănh stiz songđ lêpc Nănh ninyh, Nănh songđ stypx Nănh stiz, yâuc lănv Tênb-Côkz nyăngz Cuđ jeenx Phunz nănh stiz mungv, toix laiv tauh sămv zuc zany gumc, nănh yâuc zany gongx phunz.” ¹² Tauv gungh cayx nzămc, Stâyb-sây buz taih coong bux Zâu Yê-su, oix zuc bux êu nâyx đomc munh muf gôh, bux Nănh stiz ninyh woax đomc naih njăngv nyăngz tync, Lov tync sec naih njănv nyăngz tync maif nhlync, wâyc zuc nây six jêmh stymz. ¹³ Six Zâu Yê-su bux nănh stiz, “nyâuh cănh zuc lov Phunz nănh stiz nhlync zec!” Nănh stiz tauz, Buz ayx laix hayh maif tuz caux buc lâyc săngb Munh nhlync neh? Buz nây cungb năngx naih pyaz nomz nzu cloon iz tauh byauf lêđ. ¹⁴ Yămz woa nyăngz munh toonz naih bengc pyaz tynb lanh, Zâu Yê-su bux stâyb-sây buz, Bux êu songx munh stâyv nzac ayx săngh nzomb, Muif nzomb ngâuf Săpc lanh. ¹⁵ Stâyb-sây buz âyz nâyx đomc woac ayx, Songx munh songđ stâyv nzac. ¹⁶ Zâu Yê-su zoz nâyx đomc pyaz nomz nzu cloon iz tauh byauf taih zaub mynb mangc staox gungh ninyh, Sâuf Tênb-Hungh nzuf nzăngđ watz phunz stâyb sây buz nzâyz ninyh patz phunz songx munh nhlync.” ¹⁷ Songx munh Nhlync pêu nzuf, Stâyb-sây buz ninyh sâub Nhlync yăngc woax đomc nzu năngx tuz Săpc nyâyc đanz pong.” ¹⁸ Naih ah hâyđ, Zâu Yê-su cănh yămz lanyc nyăngz tync clo-Zâu, Stâyb-sây buz yâuc cloon nănh yămz. Nănh naic coong, “nyâuh tongh yaz six toix mănv? ¹⁹ Stâyb-sây buz tauz, “Naih đomc coong, “Mâyh six stăngc munh ayx quaix womz woax tauh Giăng. Naih đomc coong, “Mâyh six ( ê-li-ya ) Năngx naih đomc coong, “Mâyh six lôx noib nyăngz ah tauh tâuc woac munh năngx săngh taih.” ²⁰ Zâu Yê-su coong, “ha nyâuh coong yaz six toix mănv? Phê-e-rơ tauz, “Stâyb-Pha six Tênb-Hungh paiđ Taih nyăngz Njâuv-Zâu.” ²¹ Zâu Yê-su Câmx Stâyb-sây buz, Max phunz lănv nâyx đomc dlayc bux toix laiv lanh.” ²² Nănh bux coong, “Yaz bamh munh nyăngz toonz zuc jiuc đungx hungđ zâuđ nanc, Munh côx cloon stayb munh pyây, Cloon nzaox gâyf Stênx stengb oix nzêmh yaz, yâuc nzâyz yaz ninyh tayx, Six tauv tah stamz noib yaz năngx săngh phunb stengb taih.” ²³ Nănh bux coong, “Six coong toix lauh tauh oix lêpc yaz ninyh têx, six zuc quanyf nzuf hungđ, Muif noib cănh đamz nyâuh nyăngz săpc đăngc zax lêpc yaz ninyh.” ²⁴ Toix laiv lanh cungb nyâyh oix tuz Njâuv nănh nyăngz mengc woax tauh six zuc quanyf mengc, Six toix laiv tauh wâyc yaz bix zuc quanyf mengc, woax tauh six tuz Njâuv.” ²⁵ Toix laiv tauh tuz nzuf nây Gungh-đi nyăngz tax’ hungđ bix zuc mêtc, Six naih nhleenz tâuv săngh nongc?” ²⁶ Toix tauh nyayz yaz nzaox nyăngz woac, Yaz bamh munh nyăngz toonz, cloon yămz gwăngz-eng nyăngz tync, nzangc Pha nyăngz cah đangc woax zanyf, Yaz cloon Đăngb-zengh nyăngz Stynz-Munh lauf nyayz woax tauh.” ²⁷ Yaz coong seenz bux nyâuh, Yămz nây nyăngz munh naih Phanx quaix Stâyv max zengx nzuf, Songđ tuz Phătc Tênb-Hungh nyăngz Côkz.” ²⁸ Cox yeetc noib cah đangz, Zâu Yê-su nzaox nâyx đomc woac songf, Nănh songđ ênz Phê-e-rơ, Cloon Giăng, Cloon Gia-cơ staox woa zoongz ninyh clo-Zâu.” ²⁹ Zâu Yê-su clo-Zâu woax zanyf, Nănh nyăngz mynb pyênv nzuf, Nănh nyăngz gwuyz quav pyênv phangb pec woa. ³⁰ Lênh dlih naih iz lanh munh hynđ seetb taih cloon Zâu Yê-su coong woac, Mô-sê cloon ê-li-ya.” ³¹ Nănh stiz hynđ yangh yămz Gwăngz-eng nyăngz cah njaf, Yâuc yămz woa cloon Zâu Yê-su coong woac, Lănv tauv nănh max lauh six zuc tayc yămz Yê-lu-sa-lem Stengv nyăngz dlayc seetb taih toix nzuf.” ³² Woax zanyf, Phê-e-rơ cloon woa iz lanh Stâyb-sây Mâyc nyuiv oix mâyc njoomh nzongf, Six tauv Nănh stiz đyub sting taih, Phătc gwăngz-eng nyăngz Zâu Yê-su cloon woa iz lanh munh stâuđ woa. ³³ Woax đomc iz lanh munh, Mô-sê, cloon ê-li-ya cayx gâyh toic woax zanyf, Phê-e-rơ coong ănz nănh, stâyb-Pha lex, Buz yămz nây seenz Vâyc nzongf, jođ Phunz buz ayx pôz sênz njiuh, ah sênz phunz mâyh, ah sênz Phunz Mô-sê, ah sênz Phunz ê-li-ya.” Phê-e-rơ, yâuc max pâyz tuz nănh coong lungđ.” ³⁴ Woax zanyf nănh stiz năngx coong woac, Naih ah tâu Vănx nzac taih plongz Nănh stiz yămz woax Vănx cah njaf, Nănh stiz seenz cumh nzav nzongf.” ³⁵ Yâuc numđ naih woac yămz woa Vănx cah njaf coong, “Nây six yaz stăngz nyăngz sây, Yaz sên taih woax tauh, mungv* Nănh nyăngz woac bef!” ³⁶ Coong nzuf nâyx đomc woac, Cungb phătc naih Zâu Yê-su ah lanh yămz woa, Stâyb sây buz yâuc pinyx nănh stiz Phătc seetb taih nâyx đomc dlayc max zengx lănv bux toix tauh mungv.” ³⁷ Tah nyâyc noib, Nănh stiz tăng woa zoongz nzac lauf, Naih ah peob munh đungx taih stipx nănh.” ³⁸ Woax peob munh naih ah tauh munh Pha êu coong, “Stênx-stengb lex! jođ Mâyh stăngc mangc yaz nyăngz sây, Yaz cungb naih ah lanh đokc sây lêđ.” ³⁹ Nănh zuc manđ ayx, Muif hâyđ nănh hamv ngatz têx nzof nzăngđ glinyf nzac nib ninyh stoong tuz puf staux jong nzuf, Yâuc seetb nzanh blaof pumh-pumh têx, Manđ muif dlih ayx nănh Zâuđ nzongf. Mangc cayx năngđ six max pungx tuz Nănh.” ⁴⁰ Yaz jođ êu mâyh nyăngz Stâyb-sây buz luiđ manđ seetb, Six nănh stiz luiđ manđ max seetb tuz đêh. ⁴¹ Zâu Yê-su bux songx munh, nyâuh nâyx yeenv Stâyv munh lex, nyâuh seenz max zeen, yâuc bah noomh đao nzongf, Yaz oix zuc cloon nyâuh yămz yeenv nyâuh tauv laiv zanyf? nzâyz mâyh nyăngz sây taih nây zef!” ⁴² Ênz nâyx tauh nauf jeenz taih tauv woax zanyf, Manđ watc nănh glinyf nzac nib ninyh Zâuđ nzongf, Zâu Yê-su Mađ luiđ woax tauh stanyv manđ, Yâuc zany gongx nâyx tauh nauf jeenz jaoz phunz nănh nyăngz pha.” ⁴³ Songx munh phătc njingc nzongf, Tênb-Hungh nyăngz quyênh. Songx munh yâuc nyâyh ganc Zâu Yê-su ayx nyăngz dlayc. Nănh songđ bux woax đomc stâyb-sây buz.” ⁴⁴ Nyâuh mungv năngx gongx yaz nâyx zanyf bux nyâuh nâyx đomc woac, yaz bamh munh nyăngz toonz, oix zuc jaoz phunz yămz Stoif-munh nyăngz puf đi“ ⁴⁵ Six stâyb sây buz max saz nâyx Zâux woac nyăngz âyz gâyf, wâyc zuc hongh Muôngh om Nănh stiz, Songđ cumh nzav max nzađ naic nănh toix lungđ.” ⁴⁶ Stâyb sây buz yămz nănh stiz mungh tongx, Nzengz mangc jađ toix tauh tuz ayx năngx lub têx. ⁴⁷ Six Zâu Yê-su pâyz tuz nănh stiz yămz nyâuđ nyâyh ayx laix, Nănh songđ Jinđ tauh munh sây jeenz taih Stâuđ nănh stiz nyăngz cah synh. ⁴⁸ Yâuc coong bux nănh stiz, “toix laiv tauh tingz yaz nyăngz bux stpx tauh munh sây năngđ nâyx tauh, woax tauh yâuc stipx yaz, Toix laiv tauh stipx yaz, yâuc stipx cloon paiđ yaz taih woax tauh. năngđ naz yămz nyâuh mungh tongx congv, Toix tauh ayx năngx jeenz quaix woax tauh six tuz pâuh ayx năngx lub quaix.” ⁴⁹ Giăng coong, “Stâyb-Pha lex! Buz phătc naih ah lanh munh, nongc mâyh nyăngz bux luiđ manđ, Six buz câmx max phunz Nănh ayx, wâyc zuc nănh max zâyf cloon pănh ayx ah peob.” ⁵⁰ Zâu Yê-su tauz nănh, “Max nongc cangđ nănh đêh, wâyc zuc toix tauh max cloon pănh tix nzengz, woax tauh six stăngc pănh gôh.” ⁵¹ Zâu Yê-su cayx tuz stipx staox Tênb-Toongh nyăngz noib tauv stătx, nănh songđ tingc nyâuđ ninyh Yê-lu-sa-lem stengv.” ⁵² Nănh paiđ đomc munh ninyh đangc, Nănh stiz ninyh nzac ah tyuh njăngv, Thôkc Sa-ma-li njăngv. oix Stăngc bênc tync phunz Zâu Yê-su.” ⁵³ Six songx munh yămz woa max canx stipx nănh, wâyc zuc nănh stiz oix ninyh Yê-lu-sa-lem Stengv. ⁵⁴ Zâu Yê-su nyăngz stâyb-sây Giăng cloon Gia-cơ Phătc năngđ nâyx, Nănh stiz iz lanh coong, “Zâu lex! Mâyh oix nongc buz êu tâuf tăng gungh tuih nzac taih pu nănh stiz max?”* ⁵⁵ Six Zâu Yê-su wynb lauf mađ nănh stiz. ⁵⁶ Nzof nănh stiz năngx ninyh pitc tyuh njăngv.” ⁵⁷ Nănh stiz jămc jau ninyh, Naih ah lanh munh taih coong ănz Zâu Yê-su, max cun Stênx stengb hănđ ninyh laiv tix yaz lauf lêpc ninyh.” ⁵⁸ Zâu Yê-su coong bux Nănh, “njab Clô naih bengx ngamh yămz, Noc naih Njauf yămz. Six bamh munh nyăngz toonz max tync nzomx pyây.” ⁵⁹ Zâu Yê-su Năngx bux Pitc lanh munh, lêpc yaz ninyh gôh, woax tauh munh tauz coong, “Zâu lex! Yaz cayx jođ muf plopx yaz nyăngz Pha đangc gôh. ⁶⁰ Zâu Yê-su bux nănh, “dluyh pyenz munh tayc cănh plopx munh tayc, Mâyh phanv lêpc yaz ninyh lănv Tênb-Toongh Côkz nyăngz Cuđ-jeenx. gôh.” ⁶¹ Năngx naih pitc tauh tymb, coong ănz Zâu Yê-su, Zâu lex! Yaz lauf cayx lêpc mâyh ninyh, Six jođ phunz yaz muf bux pyau munh đangc.” ⁶² Zâu Yê-su bux coong, “toix tauh nzauf tungh njayh, Bix năngx wynb phunb đangz, Six max jic tuz yămz Tênb-Toongh Côkz.”