¹ Blătc woa quaix đangz, Zâu sên jeetb săpc lanh stâyb sây, Paiđ nănh stiz ninyh săngh toix săngh toix têx, Nănh hangf oix quaix laiv tix ninyh, nănh songđ paiđ nănh stiz ninyh đangc.” ² Nănh bux stâyb-sây buz coong, Jengz zongx đungx, Six congz munh stoc, wâyc năngđ nâyx, six zuc jođ Tênb-Hungh paiđ congz munh năngx đungx, ninyh stăngc sâub nănh nyăngz jengz-zongx.” ³ Ninyh gôh! Nâyx zanyf yaz paiđ nyâuh seetb ninyh six cayx năngđ pungx Pa-jiz yungh. nzac njab clô đungc cah njaf.” ⁴ Seetb jau max tuz nzâyz nyanh tic, max tuz tapc stuđ, ninyh bah đămx jau pongh munh, max tuz lănv tih pongh woac. ⁵ Nyâuh nzac toix laiv sênz pyau, Six coong nâyx đomc woac, six zuc jođ pengh oonz phunz woax sênz pyau đangc.” ⁶ Six coong yămz woa năngđ naih tix lanh munh oix tuz pengh oonz nyăngz munh têx, nyâuh jođ nyăngz pengh oonz Nănh songđ tuz stipx, Six năngđ max naih mănv oix tuz pengh oonz nyăngz munh Têx, Six zuc sâub nyâuh jođ nyăngz pengh oonz phunb đangz lauf. ⁷ Nyâuh sec toix laiv sênz pyau, Nănh stiz bênc toix lungđ nyâuh phanv Nhlync, phanv hopb, wâyc zuc congz munh jic tuz stipx nănh stiz nyăngz congz stynh. Yâuc max nongc tăng nâyx sênz pyau stuyf ninyh yămz pitc sênz pyau.” ⁸ Nyâuh nzac toix nomz Muôngf, Phătc naih munh stipx nyâuh, Munh bênc toix lungđ nyâuh phanv nhlync Phanv hopb. ⁹ Six zuc yămz woax nomz Muôngf zany gumc phunz Munh, yâuc lănv bux nănh stiz coong, “Tênb-Hungh ayx Zâu cun munh nyăngz săngx huđ taih tauv stătx nyâuh nzof gôh.” ¹⁰ Six coong toix nomz Muôgf nyăngz Munh max stipx nyâuh têx, six zuc ninyh jămc jau tauh lănv coong, “ ¹¹ Njynh nyâuh nâyx nomz Muôngf nyăngz nib bungb blaz buz nyăngz staux, buz yâuc oix zuc boongf ănz nây, wâyc ayx zanyf manyf phunz nyâuh pâyz tuz nyâuh ayx longđ, yâuc zuc săngx lănv tauv coong, “Tênb-Hungh ayx Zâu munh nyăngz săngx huđ taih tauv stătx nyâuh nzof gôh.” ¹² Six yaz bux nyâuh, Tauv stămđ stoif woax noib, Sô-đôm stengv zuc tingc stoif năngx sâub têx nâyx nomz Muôngf.” ¹³ Cô-la-sin Muôngf, Cloon Bêtv-sai-đa Muôngf lex! nyâuh cayx pongh zuc Zâuđ gôh, yămz nyâuh lâyc ayx woax đomc Jix-caox njingc nyăngz dlayc, Năngđ Zâyf yămz Ti-rơ cloon Sai-đôn Muôngf ayx têx, Nây iz nomz Muôngf nyăngz munh bêc pâyb đôc buyx nyootb stâyv woa saiđ-đuiz coi nyâuđ quanyf stoif lauh nzof gôh.” ¹⁴ Tauv stămđ Stoif woax noib, Ti-rơ cloon Sai-đôn Muôngf zuc tingc Stoif năngx sâub têx nyâuh.” ¹⁵ Ca-bê-na-um Muôngf lex! Mâyh cayx cănh pâuz mâyh staox bengc toongz gungh mah? Mâyh songđ zuc stayb quanyf nzac yămz-pâu.” ¹⁶ Toix tauh mungv nyâuh, Nănh yâuc mungv yaz, Toix tauh nzêmh nyâuh, nănh lauf nzêmh yaz, yâuc nzêmh cloon paiđ yaz taih woax tauh.” ¹⁷ Woax đomc jeetb săpc lanh stâyb sây numđ nyađ phunb đangz lauf lănv bux Zâu Yê-su, Zâu lex! Buz nongc mâyh nyăngz bux zăpx manđ, manđ yâuc mungv buz nyăngz woac.” ¹⁸ Zâu Yê-su bux nănh stiz coong, “Yaz phătc Sax-tanx tăng Tênb-toongh Côkz tuih nzac taih năngđ bungh bitc tâuf nâyx. ¹⁹ Mungv bef! Yaz phunz nyâuh naih quyênh zaic tuz nangz, Zaiđ tuz săpc nyâyc găn jengz, yâuc hingh quaix yônz zaz, yâuc max naih laiv hungđ hoiđ tuz nyâuh.” ²⁰ Six max nongc numđ nyanđ manđ mungv nyâuh nyăngz woac, six zuc numđ nyađ nyâuh nyăngz bux tuz ja yămz woa Tênb-toongh.” ²¹ Woax zanyf, Singx-lingh phunz Zâu Yê-su numđ nyađ nzongf, Nănh songđ coong, “Pha lex! Gungh nib nyăngz Zâu lex! Yaz tanv mâyh, wâyc nâyx đomc dlayc Pha sămx max phunz Tongb-manyh munh cloon hođ đăngc njăngb nyăngz munh pâyz. six phunz max hođ đăngc njăngb nyăngz munh pâyz, ax Pha lex! nây six ayx tuz hopđ Pha nyăngz nyâuđ. ²² Pha zoz muif hungđ dlayc jaoz phunz yaz. seetb blătc Pha max naih laiv tauh pâyz tuz sây, seetb nzuf sây yâuc max naih laiv tauh pâyz Pha. seetb nzuf sây năngđ max payb phunz pâyz, yâuc max naih mănv pâyz tuz Pha.” ²³ Nzof Zâu Yê-su wynb lauf cănh coong ănz stâyb-sây buz, nyâuh tuz phătc nâyx đomc dlayc, nyâuh seenz Hônb-hiđ gôh. ²⁴ Yaz lănv bux phunz nyâuh pâyz, Naih đungx tauh tâuc woac munh cloon đungx tauh Hungh, Mungc oix tuz Phătc nâyx zanyf nyâuh tuz phătc nyăngz dlayc, yâuc max tuz phătc, oix numđ nyâuh tuz numđ nyăngz woac, yâuc max tuz numđ.: ²⁵ Naih ah tauh nzaox Gâyf Stênx-Stengb nyoongz quef stâuđ woa, oix stâyv Zâu Yê-su songđ naic coong, “Stênx stengb lex! Yaz six zuc năngđ laix ayx nzăngđ tuz stâyv quâyx nyăngz Mengc?” ²⁶ Zâu Yê-su tauz coong, “Đoouc-lif Gâyf Stâub ja coong laix? mâyh toc woax đomc Đoouc-lif Gâyf nyăngz âyz gâyf lănv coong laix? ²⁷ Tah claof tauz coong, “six zuc nongc nzuf jab, nongc nzuf zux ix, nongc nzuf Tongb manyh nongc nzuf Mengc Hoonh, Stăngz Zâu mâyh nyăngz Tênb-Hungh. Yâuc zuc stăngz cah synh munh năngđ stăngz pănh nyăngz stynb nâyx.” ²⁸ Zâu Yê-su bux tah claof coong, “Mâyh tauz tuz toix gôh, Phanv ayx năngđ ha six tuz Mengc săngh gôh.” ²⁹ Woax tauh stênx stengb cayx ta cănh zanyb nănh ayx munh pengh stymz, năngx lov jau cah đanyc naic Zâu Yê-su coong, “Ha yaz hopđ zuc stăngz toix tauh cah synh nyăngz munh?” ³⁰ Zâu Yê-Su tauz coong, “Naih ah tauh munh tăng Yê-lu-sa-lem stengv ninyh Yê-li-cô Stengv, Ninyh tauv bah đămx jau zuc stac munh bopc zab zoz gwuyz quav nzâyz ninyh stynb blănf nzuf, Bopc nănh phanx sti Phanx stengb quanyf ănz woa jau synh songđ tyuv.” ³¹ Max laic nyâyh woax zanyf, Jangx toix naih ah tauh stayb munh pyây nănh six Yiu-Tai munh, quaix jau mangc Phătc woax tauh zuc munz nyăngz munh Glinyf woa jau synh songđ pitb quaix cah synh ninyh blătc. ³² Năngx naih ah tauh Li-vi munh, lauf năngđ ha, ninyh tauv woa phătc nzuf lauf Pitb vanh quaix cah synh ninyh blătc. ³³ Six năngx tauh Sa-ma-li munh quaix ninyh tauv woa phătc zuc stac munh bopc munz woax tauh munh glinyf woa, Nănh seenz hâuđ lênh nzongf! ³⁴ Ninyh tauv woa tex mangc nzuf, Songđ zoz yâuh cloon tungh côh tyu hâuh ănz zuc munz nyăngz tync, Yâuc zoz buyx pêuz, Năngx pâuh staox Sa-ma-li munh nyăngz maf lih cah tănf ninyh. jinđ ninyh tauv sênz zeb munh nyăngz pyau songđ ănz woa, Poc woa zany Nănh.” ³⁵ Tauv tah nyâyc đomz, woax tauh Sa-ma-li munh năngx zoz tuz iz nomz tongh stynh clôc phunz pyau Zâu yâuc bux nănh coong, “Mâyh stăngc yaz tex nâyx tauh ya munh năngx gongx, Zu tauv yaz phunb đangz lauf tauv nây mangc jađ mâyh nongc zuc buc laiv yaz mănc clao Mâyh.” ³⁶ Zâu Yê-su năngx naic, “Ha nâyx đomc pôz lanh munh, Six toix laiv tauh stăngz cah synh munh cloon woax tauh zuc stac bopc nyăngz munh ? ³⁷ Nzaox gâyf Stênx stengb tauz coong, “Stăngz zuc stac munh bopc woax tauh ya. Zâu Yê-su bux Nănh, ha mâyh phanv ayx năngđ woax tauh stăngz zuc stac munh woax tauh.” ³⁸ Zâu Yê-su cloon nyăngz Stâyb-sây buz yăngh jau ninyh tauv ah tyuh njăngv, woax tyuh njăngv naih ah tauh munh sab bux hipđ ayx Ma-thê, Numđ nyađ taih đeh stipx Zâu Yê-su sec nănh nyăngz zeb pyau. ³⁹ Ma-thê naih ah tauh stayx, bux hipđ ayx Ma-li-ya. hayh oix stâyv Zâu nyăngz staux synh mungv nănh nzaox gâyf.” ⁴⁰ Ma-thê bongc zeb ayx cumh pâuz đungx, nyăpx nyau nzongf, Nănh taih coong Zâu lex! Mâyh nyâyh mungv jađ hođ max? Yaz nyăngz stayx quengx cumh pâuz phunz yaz cănh ayx, Jođ mâyh bux nănh taih Stăngc yaz ayx ah tix jađ nec.” ⁴¹ Zâu Yê-su tauz, :Ma-thê lex! Ma-thê! Mâyh nyâyh đungx hungd cumh pâuz taih hoiđ mâyh nef.” ⁴² Six hopđ zuc ayx nyăngz naih ah hungđ đokc, Năngx gongx quaix woax hungđ, Ma-li-ya yâuc Sên Nzuf nzof gôh. Yâuc max naih toix laiv tauh hayh zoz tuz nănh nyăngz phănc seetb ninyh gôh.”