¹ Naih ah noib Zâu Yê-su yămz ah nomz tync, clo Zâu, clo Zâu pac, Naih ah tauh Nănh nyăngz Stâyb-sây buz taih bux nănh coong, “Zâu lex! Jođ bux buz clo-Zâu, Năngđ Giăng nzaox nănh nyăngz Stâyb-sây buz nâyx. ² Zâu Yê-su bux nănh stiz coong, “nyâuh laiv zanyf clo-Zâu oix zuc coong năngđ nâyx, “buz nyăngz tênb toongh Pha lex! jođ phunz munh pâuh mâyh nyăngz đăngb-zengh bux, jođ phunz mâyh ayx Zâu cun munh nyăngz noib taih tauv căn. ³ Buz muif-noib sămv zuc nyăngz nhlync hopb, Jođ phunz buz ah noib naih caux ah noib Nhlync. ⁴ Jođ quanyf buz ayx longđ nyăngz stoif, Wâyc zuc toix laiv tauh ayx peo buz, buz lauf quanyf Stoif phunz nănh stiz. Max nongc phunz buz pongh zuc stâyv nyâuđ nyăngz dlayc. ⁵ Zâu Yê-su năngx bux nănh stiz coong, “Six coong nyâuh đomc năngđ naih toix tauh đămx munf bix ninyh tauv ah tauh pyeoz toic nyăngz pyau êu nănh coong, “pyeoz lex! jođ mâyh phunz yaz ca pôz nomz nzu jađ gôh naz.” ⁶ Yaz woa pyau naih ah tauh lax pyeoz toic, clăngv jau săngx tauv yaz, Taih tex yaz, Six yaz yâuc max naih lungđ phunz nănh Nhlync. ⁷ Yămz pyau njaf woax tauh tauz, “Max tuz taih Sêu yaz nzof gôh, Buz quanz jengh, pyau munh yâuc phâyx mâyc njoomh nzuf nzof, Yaz max hayh quef zoz laiv hungđ phunz mâyh nzof gôh. ⁸ Yaz bux nyâuh, Max zâyf wâyc nănh stiz six ayx tinyh quyênx munh, nzof nzăngđ zuc nyoongz quef zoz tax’ hungđ phunz nănh đêh, wâyc nănh jođ tuz nhlâuh nzongf, nzof pyau Zâu nzăngđ zuc quef zoz sămv zuc nyăngz tax’ hungđ phunz nănh lêđ đêh.” ⁹ Năngđ naz yaz lănv bux nyâuh, six zuc jođ songđ tuz, six zuc lov nzăngđ phătc, six zuc nzoz jengh, jengh nzăngđ goib. ¹⁰ Wâyc zuc toix laiv tauh lov six tuz phătc, Toix laiv tauh nzoz jengh, Jengh six goib phunz nănh. ¹¹ Nyâuh toix laiv tauh tuz ayx Pha nyăngz munh, Sây jođ byauf, nyâuh bix Phunz nangz nănh max? ¹² Nyâuh nyăngz sây jođ jaux, nyâuh yâuc phunz stăpb max?” ¹³ Nyâuh hănđ tăng laiv huđ nyăngz munh lauf năngx pâyz phunz gongx nyăngz tax’ hungđ nyâuh nyăngz Sây. Six nyâuh nyăngz Tênb-toongh Pha nănh max zâyf oix sađ Singx-lingh Phunz jođ nănh nyăngz munh mah?.” ¹⁴ Naih ah hâyđ Zâu Yê-su luiđ ah tauh manđ oongx seetb gâyh munh nyăngz stynb, manđ seetb blătc woax tauh munh nzăngđ hayh coong woac, Songx munh seenz nyâyh ganc nzongf.” ¹⁵ Six naih ah đomc munh coong, “tah claof six cungb nongc ( Bê-ên-sê-bun ) manđ Hungh nyăngz lanyf luiđ manđ seetb lêc đêh. ¹⁶ Năngx naih ah đomc oix stâyv Zâu Yê-su songđ jođ nănh phunz nomz tăng Tênb-toongh nzac taih nyăngz jix-hođ. ¹⁷ Six nănh pâyz tuz nănh stiz nyăngz Stymz nyâuđ nyâyh ayx năngđ naz, Nănh bux coong, “Toix nomz Côkz sangc munh phunz đanv ayx sax peob, cănh tinyh bopc zax, Woax nomz Côkz six zuc stutc nzuf, toix sênz pyau Munh cănh tinyh bopc zax, woax sênz pyau jax’ toongx six paic nzuf. ¹⁸ Six coong Sax-tanx nyăngz Côkz cănh phunz đanv ayx sax peob, Nâyx peob cloon woax peob cănh panx zax, Sax-tanx nyăngz Côkz ayx laix hayh yămz tuz wăn? nyâuh coong yaz nongc ( Bê-ên-sê-bun ) Manđ Hungh nyăngz lanyf luiđ manđ seetb.” ¹⁹ Six coong yaz coouv ( Bê-ên-sê-bun ) Manđ Hungh nyăngz lanyf luiđ manđ, ha nyâuh nyăngz Stâyb-sây coouv toix tauh luiđ manđ seetb? nyâuh nyăngz Stâyb-sây ayx nyăngz dlayc phunz nyâuh longđ nzuf gôh. ²⁰ Six coong yaz năngđ zâyf nongc Tênb-Hungh nyăngz quyênh lanyf luiđ tuz manđ seetb têx, nyâuh six zuc pâyz tuz Tênb-Hungh taih yămz nyâuh mungh tongx ayx Zâu cun nyâuh.” ²¹ `Six coong năngđ naih ah tauh munh zoongx munh, Bênc dloih tungh zangc nongc zu nănh nyăngz jax toongx têx, Nănh nyăngz jax-toongx six tuz pengh oonz yămz.” ²² Six coong năngđ naih pitc tauh zâyf năngx zoongx têx woax tauh, Nănh nzăngđ hayh zab tuz hingh woax tauh, Zoz tuz nănh nyăngz jax-toongx nzâyz ninyh tinyh Phunz. ²³ Toix tauh max lêpc yaz, Six cloon yaz tinyh tămx, Toix laiv tauh max stăngc yaz sâub dlonf, Nănh six ayx sêu lunc. ²⁴ Naih ah đomc stanyv Manđ tăng munh nyăngz stynb seetb taih woax dlih, nănh yâuh ninyh woax Stâyz-Phangz blănf lov tync sec, Six manđ lov lauh ngăngf max tuz tync sec, Manđ songđ coong, “ax yaz oix muf tex yaz nyăngz lôx pyau yămz zec lêc.” ²⁵ Nănh songđ lauf tex mangc Nănh nyăngz lôx pyau phătc nzâux dlăngc wayh woa.” ²⁶ Woax tauh manđ songđ Ninyh lov nhlic tauh manđ năngx huđ têx nănh lauf cloon nănh nzac woax tauh munh nyăngz stynb, woax tauh munh songđ năngx dlauc wâyb têx cah đangc noib.” ²⁷ Zâu Yê-su năngx coong woac woax zanyf, woax peob munh naih ah lanh munh nzif hamv coong bux nănh, Poux phunz yungh mâyh, Năngx phunz nu mâyh hopb tuz lub woax tauh munh nzif naih oonz loc gôh. ²⁸ Nănh tauz, “Poux Phunz mungv numđ Tênb-Hungh nyăngz woac, yâuc âyz ayx woax đomc munh, Năngx naih oonz loc têx tymb đev!” ²⁹ Munh cun taih pâu cun đungx staox taih căpx dlonf yămz woa woax zanyf, Zâu Yê-su coong bux nănh stiz, “nyâuh nâyx yeenv stâyv munh seenz nyâuđ huđ nzongf, Nănh stiz cungb oix jođ mangc jix-caox njingc nyăngz dlayc, seetb blătc Yô-Na nyăngz Jix-caox njingc, pitc hungđ yaz max phunz nyâuh mangc đêh.” ³⁰ Yô-Na pênx ah nomz njih-houc Phunz Ni-na-ve munh mangc, Six yaz bamh munh nyăngz toonz, Lauf pênx ah nomz jix-caox njingc phunz nâyx yeenh stâyv munh mangc.” ³¹ Tauv Tênb-Hungh stămđ Stoif woax noib, Yămz namh phanx woax tauh Hungh nzif nyoongz quef taih cooux nâyx yeenh stâyv Munh, wâyc zuc woax tauh Hungh nzif tăng gungh coonz taih mungv Sa-lô-môn Hungh nyăngz Tongb-manyh woac, Mangc geh! yămz nây naih ah tauh ayx năngx lub têx Sa-lô-môn Hungh.” ³² Tauv stămđ Stoif woax noib, Ni-na-ve Munh lauf nyoongz quef stâuđ woa cooux nâyx yeenh stâyv munh, wâyc zuc Yô-na-ninyh nzônh cuđ-jeenx nănh stiz songđ coi nyâuđ quanyf Stoif, Mangc geh! Yămz nây naih ah tauh ayx năngx lub têx Yô-na. ³³ Max naih laiv tauh pu tuz toongz sac, Bix nzâyz ninyh zaub, Mah six zoz tongc zoom. Toongz pu tuz sac six tăpx ănz toongz nzanc, Syux gwăngz phunz pyau njaf munh phătc jau Yăngh.” ³⁴ Nyâuh nyăngz mâyc six pây Stynb nyăngz toongz, Six coong nyâuh nyăngz mâyc gwăngz njynh Stynb six gwăngz nzuf, Six coong nyâuh nyăngz mâyc năngđ max Gwăngz têx, six njynh Stynb nzămc nzuf.” ³⁵ Nyâuh six zuc buôngh, max nongc phunz nyâuh nyăngz Stynb nyăngz gwăngz nzămc.” ³⁶ Six coong nyâuh yâuf-pez nyăngz stynb naih Gwăngz pong nzuf, yeetx stong songđ Gwăngz năngđ toongz Nâyx. Six nyâuh yâuf-pez nyăngz stynb songđ gwăngz nzuf.” ³⁷ Zâu Yê-su coong nâyx đomc woac pac, Naih ah tauh Pha-li-si munh taih êu Zâu Yê-su ninyh cloon nănh Nhlync năngv, Nănh songđ nzac ninyh stâyv woa hynh Nhlync năngv. ³⁸ Pha-li-si Munh Phătc Zâu Yê-su max đaox puf đangc nzăngđ nhlync năngv, nănh stiz phătc njingc nzongf. ³⁹ Zâu bux nănh stiz coong, “nyâuh đomc Pha-li-si Munh, đaox zan, đaox banh, cungb đaox cungh ngwoaic dlăngc, Six nyâuh cah njaf sangh pong mauh tuz taih nyăngz tax’ hungđ okx njangh bah lotb dlayc.” ⁴⁰ Nyâuh lâyc cađ munh oongx lex! Zâu Zâyx cungh ngwoaic, max Zâyf Zâyx njynh cah njaf mah? ⁴¹ Six zuc zoz yămz nyâuh cah njaf woax đomc tax’ hungđ stungx phunz munh zâuđ Munh, nyâuh nzăngđ tuz dlangc njynh cah njaf cloon cungh ngwoaic.” ⁴² Nyâuh Pha-li-si Munh lex! nyâuh cayx pongh zuc Zâuđ gôh, nyâuh nzâyz lauđ wynb njayz đangz yênz-stiz cloon mađ đunz, săpc phănc nzâyz ah phănc nzâyz ninyh pungx hođ phunz Tênb-Hungh, Six pengh stymz cloon stăngz munh nyăngz jau nyâuh max nođ ayx, nyâuh hopđ zuc ayx woax hungđ.” ⁴³ Pha-li-si Munh lex! nyâuh cayx pongh zuc zâuđ gôh, Ninyh huyđ-toongh nyâuh yâuc sên tync gongx stâyv, Yămz woa caiz sangc yâuc oix nongc munh đeh bongc nyâuh.” ⁴⁴ Nyâuh cayx pongh zuc zâuđ gôh, nyâuh six cayx năngđ munh tayc stâu bix max Naih Jix-houc nâyx, Munh zaiđ zuc nzăngđ pâyz tuz munh tayc stâu. ⁴⁵ Naih ah tauh nzaox gâyf Stênx stengb coong, “Stênx stengb lex! Mâyh coong đomc woac peo buz đev.” ⁴⁶ Zâu Yê-su tauz, “nyâuh nzaox gâyf Stênx stengb lauf zuc zâuđ, nyâuh lov toix laiv lungđ nic zâuđ phunz munh ayx âyz, Six nyâuh max ayx âyz nef. ⁴⁷ Nyâuh seenz pongh zuc zâuđ, nyâuh zâyv nyâuh nyăngz claof jex buz cănh tayx woax đomc tâuc woac munh nyăngz stâu.” ⁴⁸ Năngđ nâyx nyâuh cănh numđ nyađ lănv nyâuh claof jex buz ayx nyăngz dlayc, woax đomc tâuc woac munh six nănh stiz tayx tayc, Six nyâuh yâuc zâyv stâu Phunz woax đomc tâuc munh.” ⁴⁹ Wâyc zuc Tênb-Hungh nongc nănh nyăngz Tongb-manyh woac coong, “Yaz paiđ yaz nyăngz tâuc woac munh cloon cumh pâuz munh ninyh tauv nyâuh lâyc, Naih đomc nănh stiz zuc nyâuh tayx tayc, Naih đomc nănh stiz zuc nyâuh ayx peo.” ⁵⁰ Năngđ naz nâyx yeenh stâyv munh songđ zuc tingc stoif six wâyc nănh Stiz nyăngz claof jex buz tayx songx tâuc woac munh, Phunz samđ njâuc seetb tăng cah lof zâyx Gungh zâyx Nib taih tauv nâyx zanyf.” ⁵¹ Tăng A-bên zuc tayx woax stâyv munh, Năngx tauv Sê-ca-li-ya zuc tayx tayc, Yămz woa Đăngđ-zengh nyăngz congx toongh mungh tongx congv, Yaz coong bux nyâuh, Nâyx yeenh stâyv Munh zuc tingc Stoif six wâyc woax đomc tayx munh nyăngz dlayc bix zuc tingc stoif.” ⁵² Nyâuh nzaox Gâyf Stênx stengb lauf zuc zâuđ, Nyâuh zoz coib hođ Tênb-Hungh nyăngz bănh-sangz nyăngz ja zâyh zaub, nyâuh cănh max oix hođ lêđ, Munh oix nzac nyâuh yâuc câmx max phunz nzac.” ⁵³ Zâu Yê-su ninyh gâyh woax tix tync, Nzaox Gâyf Stênx stengb cloon Pha-li-si munh, oix lov jau naic nănh nzengz đungx hungđ jau.” ⁵⁴ Oix hox nănh coong woac sai, Cănh nongc nănh nyăngz woac cooux nănh.”