¹ Nâyx đomc Săngx huđ, Naih săngh tynb lanh munh đungx taih mungv Zâu Yê-su, lanh zaiđ lanh, Zâu Yê-su songđ coong bux nănh nyăngz stâyb-sây buz đangc. six zuc năngđ cayb buôngh Pha-li-si Munh nyăngz nzu piny, cloon Nănh stiz nyăngz pâyh zac nyâuđ ngokx.” ² Max naih laiv lungđ hayh sămx tuz max hynđ yangh. Yâuc max naih lungđ pinyx tuz munh max pâyz.” ³ Nyâuh yămz nzămc zoongz bux munh nyăngz woac, Munh yămz gwăngz Zoongz hayh mungv tuz numđ. nyâuh yămz nzămc pinyx coong nyăngz woac sapb, yâuc oix naih munh yămz pyau tungx đany lănv bux munh.” ⁴ Yaz nyăngz yâuc pez lex! nyâuh max nongc cumh nzav hayh tayx tuz pănh nyăngz stynb tayc woax tauh, quaix đangz yâuc max hayh ayx laiv hungđ hoiđ nyâuh. ⁵ Yaz lănv bux phunz nyâuh pâyz tuz hopđ zuc cumh nzav woax tauh six toix laiv tauh, six zuc cumh nzav hayh tayx tuz stynb tayc, quaix đangz yâuc naih quyênh quanyh ănz đic nyokc tâuf coiđ woax tauh.” ⁶ Pyaz saz noc câyc maic tuz iz nomz tongh stynh max zâyf mah? Six Tênb-Hungh lôx max hayh nyâuđ cob ah saz nâyx đomc noc câyc nef.” ⁷ Njynh nyâuh nyăngz pyây đongz nănh lauf stauđ nzuf nzof gôh, nyâuh max nongc cumh nzav đêh, nyâuh songđ năngx saix têx noc câyc.” ⁸ Yaz bux phunz nyâuh pâyz, Toix laiv tauh toongx pitc lanh munh nyăngz cah đangc Nhlimc yaz bamh munh nyăngz toonz, Yaz bamh munh nyăngz toonz, yămz Tênb-Hungh Stynz-munh nyăngz cah đangc, lauf nhlimc woax tauh.' ⁹ Six toix laiv tauh max toongx songx nhlimc yaz, Yaz bamh munh nyăngz toonz, yaz yămz Tênb-Hungh nyăngz Stynz-munh cah đangc, lauf max nhlimc woax tauh đêh. ¹⁰ Toix laiv tauh coong peo yaz bamh munh nyăngz toonz, Tênb-Hungh lauf năngx quanyf nănh nyăngz Stoif. Six toix laiv tauh coong peo Singx-lingh, Tênb-Hungh max quanyf nănh nyăngz Stoif đêh.” ¹¹ Nănh stiz nzâyz nyâuh ninyh tauv quanz pâu, Cloon nzauf quyênh nyăngz Munh cah đangc, nyâuh max nongc numđ Stauh, Tauz ayx laix, coong ayx laix.” ¹² Tauv woax zanyf, Singx-lingh cănh nzaox nyâuh coong ayx laix. ¹³ Yămz woax peob munh naih lanh taih bux coong, “Stênx stengb lex, Jođ bux yaz nyăngz tah tanb ah phănc jax-toongx phunz yaz jađ.” ¹⁴ Zâu Yê-su tauz woax lanh munh coong, “Yâuf lex! Toix mănv oonz yaz ayx zanyx manyf tanb jax toongx phunz mâyh? ¹⁵ Nănh coong bux Songx munh,” six zuc stêu Stymz buôngh, Max nongc ayx stymz lub mauh munh nyăngz toix lungđ, Max cunv hănđ tăng laiv puv quâyx, seenz mengc yâuc max zâyf yămz nâyx đomc tax’ hungđ đêh.” ¹⁶ nănh coong nâyx tyuh woac pây bux nănh stiz, “Naih ah lanh puv quâyx munh Naih Njingh tâyc gongx nzongf, Yâuc songx tuz naih jengz zongx đungx nzongf.” ¹⁷ Woax tauh puv quâyx munh nyâyh taih nănh oix ayx laix? Yaz sâub taih nyăngz jengz zunb, yâuc nax naih tync ănz tuz Tongf. ¹⁸ Nănh năngx nyâyh coong ah yaz six zuc zeb yaz nyăngz lôx njămf ayx quengx, bix ayx săngb nyăngz năngx lub têx, Mănc sâub zoz yaz nyăngz tax hungđ blauh mâyđ nzâyz ninyh ănz woa. ¹⁹ Nănh năngx nyâyh coong ah yaz nyăngz mengc seenz gongx nzongf, muif-hungđ gongx nyăngz yaz yâuc naih caux Nhlync caux hopb sax nyăngv, phâyx Nhlync Phâyx hopb yâuc numđ nyađ ayx đaoc.” ²⁰ Tênb-Hungh naic nănh coong, “Munh oongx lex! Nâyx munf mâyh năngđ tayc, Mâyh sâub taih nyăngz tax, hungđ, Six săngh toix tauh nyăngz? ²¹ Toix tauh cungb oix sâub tax’ hungđ njâuh nănh cănh nongc, Bix max naih phănc yămz Tênb-Hungh six năngđ nâyx tauh munh oongx nâyx gôh.” ²² Zâu Yê-su bux Stâyb-sây buz coong, “Yaz coong bux nyâuh, “năngx gâyf wâyc stâyv sangc nyăngz Nhlync hopb yungf Mengc mah six Stynb sangc gwuyz quav quenđ nyâuđ. ²³ Mengc yâuc năngx saix têx Nhlync hopb, Stynb stayđ yâuc năngx Saix têx gwuyz quav.” ²⁴ Nyâuh mangc yămz gungh nyăngz noc, Nănh Stiz max songx zunb, Max sâub zunb, max naih zub Njămf, six Tênb-Hungh cănh yungf Nănh stiz, Six nyâuh songđ năngx Saix têx noc max pâyz buc laiv.” ²⁵ Nyâuh toix laiv tauh wâyc quenđ nyâuh bix hayh pou tuz mengc đao? ²⁶ Nâyx đomc ănz stêu dlayc jeenz six lôx max ayx tuz, Max zâuđ đamv tauv woax đomc pitc hungđ dlayc lub?.” ²⁷ Nyâyh mangc jađ! Gungf gonf phăngh năngđ laix Săngh! Phăngh max ayx cumh pâuz, max pengz njaub, Max đătx njaub, Six yaz bux nyâuh, Njynh Sa-lô-môn Hungh hănđ six tăng laiv puv quâyx, yâuc max naih zoongz zuz tuz quai năngđ ah nyun phăngh nef.” ²⁸ Jêmh sangc nyăngz mađ Phăngh nâyx noib goib, Săngx đomz caođ zuc tâuf Pu, Six Tênb-Hungh six lôx năngx zoongz tuz vâyc nâyx, Năngđ naz, nănh songđ oix zoongz nyâuh năngx quai têx, nyâuh seenz zeen tuz hanyb nzongf.” ²⁹ Nyâuh yâuc max nongc muif dlih numđ stauh quenđ nyâuđ cayx Nhlync hopb toix lungđ.” ³⁰ Gungh-đi manf Stingx Munh max zeen Tênb-Hungh woax đomc muif-dlih cungb numđ stauh lov nâyx đomc tax’ hungđ, Six nyâuh nyăngz Tênb-toongh Pha songđ pâyz tuz nyâuh sămv zuc nongc nâyx đomc tax’ hungđ.” ³¹ Six zuc phunz Tênb-Hungh ayx Zâu cun nyâuh đangc. nâyx đomc yeetx stong dlayc Nănh songđ oix sađ pâu phunz nyâuh” ³² Nyâuh lâyc đomc munh sây stăm nyăngz munh lex! nyâuh max nongc cumh nzav, nyâuh nyăngz Tênb-Toongh Pha songđ oix zoz nănh nyăngz Côkz sađ phunz nyâuh.” ³³ Six zuc maic nzuf nyâuh nyăngz jax toongx bix nzâyz nyanh ninyh patz phunz munh zâuđ munh, oix zuc lov Stâyv quâyx max hayh dlêtc nyăngz nyanh coh tăpx ănz tax’ hungđ yămz woa Tênb-toongh. Yămz woa stac munh max hayh taih nymc, Yâuc max hayh zuc jengz tăpc huđ.” ³⁴ Nyâuh sâub saix ănz laiv, nyâuh nyăngz nyâub stâyv quâyx săngx yămz woa.” ³⁵ Nyâuh six zuc zoongz stynb muif dlih pu toongz zu.” ³⁶ Năngđ pâu zu nănh nyăngz Zâu ninyh tayđ coonx hynh năngx phunb đangz lauf tauv pyau êu pâuz buz songđ lênh dlih coib jengh phunz.” ³⁷ Zâu lauf phătc pâuz buz năngđ nâyx canyz nyâuđ zu, Nănh stiz songđ naih oonz loc, Yaz coong seenz bux nyâuh, Zâu songđ wănc gwuyz êu nănh stiz cloon Zâu songc hynh nhlync năngv bokc dlic nănh stiz.” ³⁸ Max cun woax tauh Zâu hănđ six đămx munf, mah six đămx munf quaix zayh lauf tauv phătc pâuz năngđ nâyx canyz nyâuđ zu, Nănh stiz songđ seenz oonz loc” ³⁹ Nyâuh six zuc pâyz săngx nâyx đomc dlayc, Six coong pyau Zâu pâyz tuz Stac munh toix laiv dlih oix taih, Nănh songđ leđ max phunz stac munh nzac pyau taih.” ⁴⁰ Nyâuh yâuc songđ zuc muif dlih bênc săngh zu, wâyc zuc nyâuh max săngx tauv woax dlih, yaz bamh munh nyăngz toonz songđ taih tauv gôh.” ⁴¹ Phê-e-rơ naic, “Zâu lex! Nâyx đomc woac pây six coong ănz buz, mah six coong ănz songx munh neh?” ⁴² Zâu tauz, “Toix laiv tauh ayx nyâuđ zanyx Tongb-manyh nyăngz pâuz, pyau Zâu oix paiđ jămđ Nănh nyăngz pyau, yâuc âyz săngx huđ zoz hopđ zuc tuz nyăngz Nhlync hopb jaoz Phunz pâuz buz max zâyf max? ⁴³ Zâu lauf phătc nâyx đomc pâuz ayx tuz Zanyx, Pâuz buz songđ oonz loc.” ⁴⁴ Yaz coong seenz bux nyâuh, Zâu songđ oix Phunz nănh cun nzuf pyau Zâu nyăngz jax toongx.” ⁴⁵ Six coong woax tauh nyâuđ huđ nyăngz pâuz songđ yămz nyâuđ nyâyh, ê-yaz nyăngz Zâu max zengx lauf căn,’ Nănh songđ tongf puf bopc pâuz toonz pâuz sab, yâuc Nhlync pêu hopb bynz. ⁴⁶ Pâuz max săngx tauv noib, max săngx tauv dlih, Nănh nyăngz Zâu lauf tauv, Zâu oix tingc nănh nyăngz stoif niđ nzongf.* Yâuc luiđ nănh ninyh cloon max zeen nyăngz munh yămz.” ⁴⁷ Toix laiv tauh pâuz max pâyz bênc nyâuđ, mah six max ayx âyz Zâu bux nyăngz woac, woax tauh songđ zuc tingc stoif năngx nic têx!” ⁴⁸ Six toix laiv tauh pâuz max pâyz tuz Zâu oix nănh ayx năngđ laix, Nănh ayx nyăngz dlayc, Songđ zuc bopc năngx stoc têx! toix laiv tauh tuz đungx six zuc seetb năngx đungx têx! jaoz phunz toix laiv tauh tuz đungx nănh six zuc naic đungx.” ⁴⁹ Yaz taih phunz tâuf sac nây bamh canz, Sac tuz buc laiv, Bix nâyx zanyf sac zef gôh.” ⁵⁰ Six yaz cayx zuc ayx quaix womz nyăngz gâyf, max zengx ayx blătc woax hungđ dlayc yaz numđ nyâuđ max gwoanb.” ⁵¹ Nyâuh laic stăngz six yaz taih ayx phunz bamh canz taiv pengh mah? Yaz coong seenz bux nyâuh, Max zâyf đêh! Yaz taih phunz đanv bamh canz.” ⁵² Blătc nây ninyh, Naih ah phănc munh pyaz lanh, Six phunz đanv ayx iz lanh, iz lanh cloon pôz lanh tinyh nzengz, Pôz lanh cloon iz lanh tinyh nzengz. ⁵³ Ayx phunz Pha cloon toonz max tinyh zuc, Toonz cloon Pha max tinyh hođ, Nzif cloon sab yâuc max tinyh Zuc. bôf cloon bongf yâuc max tinyh zuc, bôf cloon bongf phunz đanv nzuf.” ⁵⁴ Blătc woa Zâu Yê-su nzaox songx munh coong, “nyâuh phătc stez phanx staox ah tâu vănx, nyâuh coong bungc cayx lub gôh, Six seenz toix.” ⁵⁵ Nyâuh numđ nzaox tăng namh phanx sâyb taih, nyâuh coong nâyx noib njih toc joomz, seenz lauf joomz.” ⁵⁶ Pâyh zac nyâuđ ngokx nyăngz Munh lex! nyâuh hayh tongh tuz Gungh nib nyăngz stăkb toix, Six nyâuh max saz nâyx yeenh Stâyv nyăngz dlayc.?” ⁵⁷ Săngh laix nyâuh yâuc max pâyz tuz pănh ayx toix max toix?” ⁵⁸ Six Ccong năngđ naih munh oix cooux nyâuh, oix ênz nyâuh ninyh stămđ stoif tync, Ninyh tauv bah đămx jau, nyâuh six zuc cloon nănh coong năngx hopđ đangc. Năngđ max têx, Nănh oix ênz nyâuh ninyh tauv stămđ Stoif quanz, Stămđ Stoif quanz songđ oix zoz nyâuh jaoz phunz pengh, Hungh pengh songđ oix nzâyz nyâuh ninyh clăngđ ănz nzauh.” ⁵⁹ Yaz bux nyâuh, nyâuh songđ zuc yămz nzauh tuz tauv clao zaix songf nzuf max yiêmv ah nomz tongh Stynh nzăngđ tuz pungx seetb Taih.”