¹ Woax zanyf naih ah đomc munh lănv bux Zâu Yê-su coong, “Naih ah đomc Ga-li-lê munh zuc Phi-latv tayx nănh stiz phunz samđ njâuc seetb taih lou zanb stanyb hauđ nyăngz samđ nongc ayx stanyb lanyh. ² Zâu Yê-su bux, “nyâuh laic stăngz six Ga-li-lê munh zuc tayx tayc woax đomc munh nyăngz Stoif năngx lub têx, woa pitc đomc Ga-li-lê munh nyăngz Stoif mah? ³ Max Zâyf đêh! Yaz lănv bux nyâuh, “Toix laiv tauh max coi nyâuđ quanyf Stoif, nyâuh lauf zuc mêtc năngđ nănh stiz nâyx.” ⁴ Cloon Si-lô-am Phan-thapv bengb lakb đăpx tayc woax đomc săpc pêtz lanh munh nec? nyâuh laic nănh stiz pamf Stoif năngx lub têx woax đomc Yê-lu-sa-lem Stengv Munh nyăngz Stoif mah?” ⁵ Songđ max zâyf, Yaz lănv bux nyâuh, “Six coong nyâuh max coi nyâuđ quanyf Stoif, nyâuh lauf zuc tayc năngđ nănh stiz nâyx gôh.” ⁶ Zâu Yê-su coong nâyx tyuh woac pâyz phunz nănh stiz mungv, “Nănh coong Naih ah lanh munh songx ah stungh vănx tauh njăngx ănz nănh nyăngz tungh côh lauđ wynb njaf, Nănh njynh leox ninyh tex lov zoz pyâu, yâuc max phătc naih laiv nomz pyâu.” ⁷ Nănh coong bux jămđ lauđ wynb nyăngz munh, mangc geh! lâyc zâyz vănx tauh njăngx, Songx tuz pôz nyăngv nzof, yaz taih lov max tuz laiv noomz pyâu, coix quanyf zef gôh, Cungb yămz lâyc nzymx nib tâyc ayx huđ lêđ đêh.” ⁸ Jămđ lauđ wynb nyăngz munh tauz coong, “Zâu lex! jođ mâyh njâuh ah nyăngv tymb! Yaz cayx ninyh witz nib lauf ongz coonz nongc ayx phănx. ⁹ Tauv đomz nyăngv nănh săngh pyâu gongx gôh, Năngđ coong max săngh săngh têx Zâu nzof mănc coix quanyf. ¹⁰ Naih ah nomz tingc congz noib, Zâu Yê-su yămz woa huyđ-toongh nzaox munh.” ¹¹ Yămz woa naih ah tauh munh bôf, Zuc manđ wâyb clai tuung tuz săpc pêtz nyăngv, Max hayh stâuđ tuz zac.” ¹² Zâu Yê-su phătc songđ êu tah bôf taih yâuc bux nănh coong, “Côx lex! mâyh nyăngz gumc tuz gongx nzof gôh. ¹³ Zâu Yê-su tăpx puf ănz yâuc lupc nănh, Songđ lênh dlih gongx hayh stâuđ tuz zac., songđ tanv Tênb-Hungh." ¹⁴ Cun Huyđ-toongh nyăngz munh côx coong bux songx munh, Naih joz noib cah njaf ayx cumh pâuz zany gumc, Max hopđ zuc zany gumc toix tingc congz noib nef.” ¹⁵ Zâu Yê-su tauz, “nyâuh đomc pâyh zac nyâuđ ngokx nyăngz munh lex! tingz congz noib, nyâuh max zay ngoongh maf pungx ninyh hopb womz mah? ¹⁶ Nâyx tauh Apv-ra-ham nyăngz sây-stunz, zuc Sax-tanx stayb tuz săpc pêtz nyăngv nzof, nongc tingc congz noib zay pungx nănh seetb ninyh max tuz mah? ¹⁷ Zâu Yê-su tauz coong naz, cloon Nănh tix nzengz woax đomc yâuc numđ nyayz, nzof songx Munh yâuc numđ nyađ oix mungv, yâuc phătc njingc nănh ayx nyăngz dlayc.” ¹⁸ Zâu Yê-su naic jađ! Tênb-Hungh nyăngz côkz six năngđ lungđ? Yaz cayx nongc toix lungđ pây tuz zuc nâyv? ¹⁹ Woax nomz Côkz six năngđ ah nomz njayz jaix nhlimb, Naih ah lanh munh nzâyz ninyh songx ănz nănh nyăngz lauđ wynb. Nhlimb bêux seetb taih pênx ah Stuungh njăngx, yămz gungh nyăngz noc Yâuc năngx taih ayx njauf ănz nănh nyăngz quah.” ²⁰ Zâu Yê-su naic jađ cayx nongc laiv hungđ pây Tênb-toongh Côkz nâyv? ²¹ Six năngđ nzu piny nâyx, naih ah lanh munh nzif nzâyz nâyx đomc nzu piny ninyh lou ănz pôz tongđ Văn, waox đomc văn songđ phutx nzuf.” ²² Zâu Yê-su ninyh Yê-lu-sa-lem Stengv woax zanyf, nănh stunb jămc njăngv jămc Stâyz-phangz ninyh nzaox Munh.” ²³ Naih munh naic coong, “Stênx stengx lex! max zâyf munh stoc tuz Njâuv mah? Zâu Yê-su tauz nănh stiz, ²⁴ “Six zuc bengx nzac hipđ nyăngz jengh, Six yaz bux nyâuh, “Naih munh đungx hănđ oix nzac, yâuc nzac max tuz nec. ²⁵ Pyau Zâu nyoongz quef ninyh conz jengh, nyâuh songđ oix zuc yămz woa cungh ngwoaic boz jengh êu coong, “Tah lex! coib jengh phunz buz đôih, “Six Nănh oix tauz coong, ”Yaz max pâyz tuz nyâuh yămz laiv tix taih đêh.” ²⁶ Nyâuh yâuc oix tauz coong, ”Buz tuz cloon mâyh songc hynh nhlync hopb quaix nzof wef! nzof mâyh yâuc yămz buz nyăngz caiz sangc nzaox buz quaix nzof nec.” ²⁷ Six nănh năngx tauz coong, “Yaz bux nyâuh, “Yaz seenz max pâyz tuz nyâuh six yămz laiv tix taih nec. Munh huđ munh lex! tyuv gâyh yaz zef gôh!” ²⁸ woax zanyf nyâuh songđ tuz phătc Apv-ra-ham, cloon I-sakv, cloon Ya-côpv, Yămz woa Tênb-côkz, Six nyâuh zuc luiđ yămz woa cungh ngwoaic pungx Stingb pungx haoh yâuc zuc tăpc nyah tanyđ.” ²⁹ Munh oix yămz tongz namh stayz păkx puôngz taih yămz Tênb-Hungh nyăngz Côkz songc hynh Nhlync năngv.” ³⁰ woax zanyf yămz cah đangc woax đomc six zuc yămz cah đangz, yămz cah đangz woax đomc six tuz yămz cah đangc.” ³¹ Woax zanyf naih đomc Pha-li-si Munh taih lănv bux Zâu Yê-su, “Mâyh oix zuc pyeenv ninyh yămz pitc nomz tync, wâyc zuc Hê-lôtv Hungh oix tayx mâyh đev.” ³² Zâu Yê-su tauz, “nyâuh ninyh lănv bux woax tauh njab clô coong, “Nâyx noib săngx đomz yaz năngx zany gumc yâuc luiđ manđ, Six tauv tah stamz noib yaz songđ ayx săngh cumh pâuz.” ³³ Six hănđ ayx laix nâyx noib săngx đomz yaz yâuc năngx zuc seetb jau ninyh Yê-lu-sa-lem Stengv, wâyc zuc toix laiv tauh ayx tâuc munh max hopđ zuc tayx tayc yămz Yê-lu-sa-lem Stengv cungh ngwoaic.” ³⁴ Yê-lu-sa-lem Stengv lex! Yê-lu-sa-lem Stengv! Mâyh tayx tâuc woac Munh, yâuc zoz njauz pyây ôx Tênb-Hungh paiđ ninyh nyâuh lâyc nyăngz Munh, max pâyz sax hâyđ yaz oix sâub dlonf nyâuh năngđ zayz nyâyf puc jeenz yămz nănh nyăngz đatz đi, Six nyâuh max canx phunz yaz ayx. ³⁵ Mangc geh mâyh nyăngz pyau songđ zuc quanyf pênx pyau buf, yaz lănv bux nyâuh, Blătc nây max naih laiv tauh tuz phătc yaz nzof gôh, Zu tauv nyâuh coong, ‘tingz Zâu nyăngz bux jođ sađ Pôz phunz buz woax Tauh.* nyâuh nzăngđ Tuz Phătc Yaz.”