¹ Naih ah nomz tingc congz noib, Zâu Yê-su ninyh tauh ayx quanz Pha-li-si Munh nyăngz pyau nhlync năngv, Munh oix setx mangc nănh.” ² Naih tauh munh săngh ( gumc omx ) Taih yămz nănh woa cah đangc. ³ Zâu Yê-su naic Pha-li-si munh cloon nzaox gâyf Stênx stengb coong, “nongc tingc congz noib zany gumc longđ gâyf max? ⁴ Six sănh stiz max nyaoc, Zâu Yê-su songđ zany gongx gumc Munh, Bux êu nănh muf.” ⁵ Nănh naic woax đomc Pha-li-si Munh cloon nzaox gâyf Stênx Stengb coong toix tingc congz noib nyâuh đomc naih ah tauh sây, Mah six ngoongh ninyh tuih cotb nyâuh max zâyf lênh dlih ninyh zoz nănh seetb taih mah? ⁶ Six nănh stiz max hayh tauz nănh laiv Zâux woac.” ⁷ Zâu Yê-su phătc đomc zeb munh taih, Naih ah phanx sên hynh coonz stâyv, Nănh songđ lănv nâyx tyuh woac pây phunz nănh stiz mungv.” ⁸ Nănh coong, “munh tinyđ nyâuh ninyh coonx hynh max nongc sên hynh coonz stâyv, Cumh nzav pyau-Zâu tinyđ taih nyăngz zeb munh naih ah phanx Năngx lub têx nyâuh max pâyz. ⁹ Pyau Zâu tinyđ nyâuh iz lanh taih, Nănh oix bux nyâuh, mâyh zuc nyangc tync phunz nâyx tauh stâyv nây, pănh songđ zuc stuyđ ninyh stâyv cah đi Phanx.” nyâuh songđ numđ nyayz. ¹⁰ Nzac hynh woax zanyf, nyâuh six zuc stâyv cah đi phanx đangc, pyau Zâu nzăngđ bux nyâuh coong, pyeoz lex! Staox woa cah Zâyc phanx hynh muf Stâyv, Cloon nyâuh ayx zeb woax đomc Songđ tinyh đoih nyangc tync phunz nyâuh.” ¹¹ Toix tauh pâuh cănh ayx lub, woax tauh six zuc tuih nzac ayx jeenz stâyv tync lanz, Toix tauh cănh Nhlimc ayx jeenz woax tauh six tuz pâuh staox njangb.” ¹² Zâu Yê-su bux tinyđ nănh taih nyăngz pyau-Zâu. nyâuh toix dlih mâyh tinyđ zeb Munh taih nhlync đămx noib năngv mah six bah nzămc năngv, năngx tinyđ lôx pyeoz toic, pyau Munh, Mah six yâuf pez jeenb njăngv sangc puv quâyx munh. Max đanyf nănh stiz hayh tinyđ nyâuh ninyh clao. ¹³ Nyâuh bênc năngv tinyđ zeb munh, six zuc tinyđ munh zâuđ munh, Munh puf staux quac, cloon mâyc buđ nyăngz munh.” ¹⁴ Năngđ naz, “nyâuh nzăngđ tuz Hônb-hiđ, wâyc zuc nănh stiz max hayh naih lungđ clao nyâuh, Zu tauv munh gongx, năngx tuz săngh phunb stengb taih woax noib, nzăngđ tuz clao phunz mâyh.” ¹⁵ Naih ah lanh munh cloon nănh songc hynh Nhlync năngv nyăngz munh numđ nâyx đomc woac, Songđ coong bux Zâu Yê-su, Toix laiv tauh tuz yămz Tênb-Hungh nyăngz Côkz Nhlync woax hynh năngv seenz naih oonz loc nzongf.” ¹⁶ Zâu Yê-su lănv bux woax lanh Munh, Naih ah lanh munh bênc ah tonf năngv lub yâuc tinyđ zeb Munh taih đungx.” ¹⁷ Tauv Nhlync năngv nyăngz săngx huđ, Nănh êu nănh nyăngz pâuz ninyh bux êu zeb munh coong, “ninyh gôh, Muif-hungđ bênc săngh nzuf nzof gôh.” ¹⁸ Six woax đomc Munh tuib woac aox, Tah yeetx lanh coong, “Yaz nzăngđ maif ah cuyb njingh yaz cayx ninyh tex mangc. Muf bux mâyh nyăngz Zâu coong, “yaz max hênh ninyh đêh.” ¹⁹ Tah nyâyc lanh tôix woac coong, “Yaz nzăngđ maif tuz pyaz tauh ngoongh, yaz lauf cayx ênz ninyh njayh zangđ mangc, Yaz max hênh ninyh đêh, bênc săngh six gongx gôh.” ²⁰ Tah stamz lanh tôix coong, “Yaz nzăngđ zoz săngb au lauf max hayh ninyh đêh. ²¹ Pâuz lauf lănv nâyx đomc woac bux nănh nyăngz Zâu, pyau Zâu siv nhleenx nzongf, Songđ bux êu nănh nyăngz pâuz phanv ninyh woa caiz sangc jau zav njăngv sangc lov munh zâuđ munh, cloon mâyc Blâuf munh puf staux quac nyăngz munh ênz taih nzuf.” ²² Blătc woa woax tauh pâuz taih bux pyau Zâu coong, “Tah lex, yaz âyz mâyh zăpx nyăngz woac ayx nzuf nzof six lauf năngx naih tync cungv lêc đêh. ²³ Woax tauh pyau Zâu bux nănh nyăngz pâuz coong, “Mâyh six zuc jămc lâyc jau tauh, jau mâyv ninyh lov phătc sax lanh bix yac nănh stiz nzac yaz nyăngz pyau taih nzăngđ tuz munh pong hynh. ²⁴ Yaz lănv bux nyâuh, Yaz tinyđ đangc nyăngz munh, max naih toix tauh tuz cloon yaz songc hynh nhlync năngv đêh.” ²⁵ Songx munh lêpc Zâu Yê-su ninyh batz hongđ, Nănh wynb đangz lauf nzaox nănh stiz coong, “ ²⁶ Toix tauh taih lêpc yaz, Bix stăngz nănh nyăngz au sây nzif Pha pyau munh ô Stayx, njynh cănh stăngz nyăngz mengc năngx đungx têx stăngz yaz, woax tauh max hayh ayx tuz yaz nyăngz Stâyb sâyb đêh.” ²⁷ Toix laiv tauh max cănh đamz tuz nănh nyăngz săpc đăngc zax lêpc yaz ninyh, woax tauh max ayx tuz yaz nyăngz stâyb-sây.” ²⁸ Six coong nyâuh naih toix laiv lanh oix ayx ah sênz pyau, Nănh max zâyf zuc stâyv nzac stunx nyanh mangc đangc, nyanh six caux mah max caux? ²⁹ Nănh năngđ max stunx quaix đangc têx, ayx tauv đămx cănv nyanh nzuf quengx ănz woa ayx max săngh têx, toix laiv tauh munh phătc six jeetx nănh gôh. ³⁰ Nănh stiz coong lâyc tauh ya munh max hayh stunx nănh ayx max đotc gôh. ³¹ Six coong năngđ naih ah tauh Hungh, oix ninyh cloon pitc tauh Hungh panx zax, Nănh max zâyf zuc ninyh stâyv mangc đangc jađ! Nănh nyăngz ah panc pengz hayh bopc tuz Hingh woax tauh Hungh nyăngz iz panc pengz six Hingh mah max hingh? ³² Stunx taih ănx mungv năngđ bopc max hingh tuz têx, woax đomc iz panc pengz lauf năngx yămz côz, Nănh six zuc paiđ munh ninyh jođ coong năngx hođ đangc.” ³³ Lauf năngđ ha, “nyâuh yâuf-pez toix tauh max cănh sez tuz quanyf nyâuh nyăngz Mengc, Nănh lauf max ayx tuz yaz nyăngz stâyb-sây.” ³⁴ Đau six gongx, “Six coong đau nyăngz mic năngđ toiv stam, ayx laix hayh ayx tuz nănh đaih taih? ³⁵ Ayx phănx ănz njingh yâuc max săngh nongc, Six cungb zuc taox ayx quengx cungv, toix laiv lanh naih bah noomh, six zuc nzaz bah noomh mungv năngx gongx.”