¹ Naih ah hâyđ woax đomc Sâub sôiv nyăngz munh cloon naih Stoif nyăngz munh oix taih Stătx mungv nănh nzaox gâyf. ² Pha-li-si munh cloon nzaox gâyf Stênx stengb yônx nănh coong, “Mangc geh! tah claof numđ nyađ Stipx naih Stoif nyăngz munh, Cloon sâub sôiv nyăngz munh cloon Nănh stiz songc hynh Nhlync năngv.” ³ Wâyc zuc năngđ nâyx, Zâu Yê-su songđ lănv nâyx tyuh woac pây phunz Nănh stiz mungv.” ⁴ Six coong năngđ naih ah lanh munh, bix naih ah pez tauh Pa-jiz yungh, bix naih ah tauh gaih, Nănh max zâyf quanyf woa zu săpc zu tauh ănz woa nhlync mađ bix ninyh lov woax tauh gaih jêmh mah? ⁵ Nănh ninyh lov pongh, Nănh ssenz numđ nyađ nzongf, Songđ zoz đamz ănz bah tauh lauf. ⁶ Tauv pyau Nănh êu nănh nyăngz njăngv sangc tinyh đoih taih stăngc nănh numđ nyađ, wâyc zuc nănh coong, “Yaz nyăngz Pa-jiz yungh gaih woax tauh ya yaz lov tuz pongh taih nzof gôh, ⁷ “Six yaz bux nyâuh, lauf năngđ naz, Naih ah lanh Stoif munh coi nyâuđ quanyf Stoif, Yămz Tênb-toongh woax đomc năngx numđ nyađ têx, woa đomc zu săpc zu lanh munh gongx max coi nyâuđ quanyf Stoif nef.” ⁸ “Mah six coong naih ah lanh munh nzif, naih săpc lepz nyanh bây ah lepz nyanh gaih, Nănh ayx laix? Nănh max zâyf pu toongz nzâux pyau quev lov tuz tauv pongh woax lepz nyanh mah? ⁹ Nănh lov tuz pongh, Nănh songđ êu njăngv sangc munh taih, bux nănh stiz coong, “Tinyh đoih Stăngc numđ nyađ gôh, wâyc zuc yaz nyăngz nyanh gaih, Yaz lov tuz pongh nzof gôh.” ¹⁰ Yaz lănv bux nyâuh, Six coong naih ah tauh Stoif-munh coi nyâuđ quanyf Stoif, Tênb-Hungh nyăngz Stynz-Munh lauf numđ nyađ nzongf.” ¹¹ Zâu Yê-su năngx lănv coong, “Naih ah lanh munh naih iz lanh toonz. ¹² Toonz đany ninyh bux nănh nyăngz Pha coong, “Pha lex! jođ Pha nâyx zanyf tanb yaz nyăngz jax toongx phunz yaz zec gôh, Nănh stiz Pha songđ zoz jax toongx taih njengx phunz nănh iz lanh sây.” ¹³ Quaix đangz max lauh, woax tauh toonz jeenz songđ dlonf Nănh nyăngz jax toongx taih maic pênx nyanh, Nzâyz seetb pitc đoif stâyz-phangz ninyh côz-côz ha, Yămz woa tinyh Phanv Nhlync blanf têu nănh nyăngz nyanh nzuf byăng ¹⁴ Nănh Nhlync têu nyanh nzuf woax zanyf, Yămz woax nomz stâyz-phangz yâuc toix zuc nyâuđ sab, Nănh nyăngz nyanh yâuc Nhlync nzuf taiv pengh.” ¹⁵ Nănh songđ ninyh lêpc woax nomz stâyz-phangz nyăngz lanh munh, ayx congz phunz ah lanh munh, woax tauh munh songđ Paiđ nănh ninyh woa jêmh jămđ tungf. ¹⁶ Jămđ lauh woax tauh nauf uyx tungf mangc phătc tungf Nhlync topc cub cuđ, Nănh seenz numđ ngoc nzongf. Six max naih mănv phunz laiv lungđ nănh Nhlync. ¹⁷ Cun lauh nănh nzăngđ Săngx tauv, Yaz nyăngz pha nyăngz pâuz buz max pâyz sax lanh yămz yaz nyăngz Pha nyăngz pyau ayx cumh pâuz, Muif tonf tuz Nhlync Pêu, yâuc năngx naih yăngc, Yaz zuc yămz nây tanyđ nyâuđ sab tayc gôh. ¹⁸ Yaz six zuc quengx nây muf bux yaz nyăngz Pha coong, “Pha lex! Yaz seenz zađ Stoif cloon gungh cloon Pha gôh. ¹⁹ Blătc nây yaz max payh tuz Pha hipđ yaz ayx toonz, Jođ Pha stunx yaz năngđ ah tauh pâuz.” ²⁰ Nănh songđ nyoongz quef muf nănh nyăngz Pha woa.” lauf gâyh batz côz nănh nyăngz Pha jenx phătc, Saz tuz nănh nyăngz toonz, seenz numđ hâuđ-lênh nănh nzongf, songđ coonx tyuv ninyh tauv woa jom Nănh nyăngz toonz tomz.” ²¹ Nănh nyăngz toonz coong, “Pha lex! Yaz zađ stoif cloon gungh cloon Pha, nâyx zanyf Yaz max jic tuz Pha năngx hipđ yaz ayx mâyh nyăngz toonz nzof gôh. ²² Six Nănh nyăngz bux nănh nyăngz pâuz buz coong, “Căn coonx zoz gwuyz đao vâyb taih zuz phunz Nănh, zoz bah đoz quinb taih tăngh ănz nănh nyăngz puf, Zoz stub taih tapc phunz nănh.” ²³ Ninyh zoz ngoongh jeenz cunc lauf tayx bênc năngv Nhlync hâuđ Nănh!” ²⁴ Wâyc zuc yaz nyăngz toonz jeenz tayc blătc năngx săngh phunb stengb taih, ninyh gaih yâuc năngx lov tuz pongh phunb đangz lauf. songx munh songđ tinyh đoih taih nhlync hâuđ Nănh!” ²⁵ Woax zanyf toonz lub tăng woa jêmh đi ayx cumh pâuz lauf tauv pyau synh, Numđ munh pyom blungh blex, Boz nzuv boz loh ayx nzungz tyuh longc. ²⁶ Nănh songđ êu tauh pâuz taih naic, “Lâyc pyau ayx nhleenz tâuv? ²⁷ Woax tauh pâuz bux coong, “Nauf nyăngz yâuf lauf nzof, Nauf nyăngz Pha êu buz ninyh zoz ngoongh jeenz cunc lauf tayx bênc nhlync hâuđ mâyh nyăngz yâuf pengh oonz yămz zoongx phunb đangz lauf.” ²⁸ Toonz lub siv nhleenx nzongf max canx nzac pyau, Nănh nyăngz Pha songđ ninyh quinb nănh nzac pyau muf.” ²⁹ Toonz lub coong, “Mangc geh! Yaz năngđ tauh nâuh Stăngc Pha ayx pumh pâuz max pâyz sax nyăngv tauv nâyx zanyf, max naih laiv hâyđ yaz max mungv Pha nyăngz woac nef. Pha lôx max sez tuz phunz laiv tauh yungh jeenz yaz, tayx cloon lax pyeoz ayx đaoc nhlync nef. ³⁰ Six nâyx zanyf Pha lâyc tauh yaf stanc đay, Nzâyz Pha nyăngz nyanh ninyh maif munh sab blanc têu Nhlync nyanh nzuf, phunb đangz lauf lâyc, Pha năngx zoz ngoongh jeenz cunc lauf tayx nhlync hâuđ nănh nhlex!. ³¹ Nănh stiz Pha tauz coong, “Toonz lub lex! mâyh muif dlih cloon yaz yămz, muif hungđ six Săngh mâyh nyăngz nzuf.” ³² Six pănh zuc nhlync hâuđ mâyh nyăngz yâuf, wâyc zuc mâyh nyăngz yâuf, Tayc blătc năngx săngh phunb stengb taih, gaih ninyh yâuc năngx lov tuz pongh phunb đangz lauf nzof.