¹ Zâu Yê-su lănv ah tyuh woac pây bux Stâyb-Sây buz, “Nănh coong naih lanh puv quâyx munh, Nănh naih ah tauh congz munh taih cooux bux nănh nyăngz Zâu coong, “Mâyh nyăngz cun congz munh tinyh Phanv têu mâyh nyăngz nyanh nzuf. ² Nănh songđ êu Nănh nyăngz cun congz munh taih naic, “Yaz numđ munh lănv coong mâyh nâyx đomc dlayc săngh laix? zoz nzuf mâyh nyăngz zaix tanz taih yaz tex mangc jađ! Blătc nây ninyh mâyh max tuz cun yaz nyăngz congz munh nzof gôh. ³ Woax tauh cun congz munh yămz nyâuđ nyâyh, Yaz cayx ayx laix? Yaz nyăngz Zâu max nongc yaz ayx congz nzof, Vitz nib gôh yâuc max naih jab, Jođ nhlync gôh yâuc numđ nyayz.” ⁴ Ah yaz pâyz tuz hopđ zuc năngđ laix ayx, Blătc nây nâyx hungđ congz yaz max tuz ayx nzof, Six lauf năngx naih ah đomc munh stipx yaz yămz nănh stiz nyăngz pyau. ⁵ Nănh songđ êu Sămv nănh nyăngz Zâu woax đomc zaix munh săngh lanh săngh lanh têx taih naic, naic tah yeetx lanh, Mâyh sămv yaz nyăngz Zâu nyăngz zaix buc laiv? ⁶ Woax tauh tauz, Yaz sămv pêtz pez tongđ Ca-lanv-yâuh, Cun congz munh bux nănh coong, “Stâyv nzac zoz mâyh nây zaix tanz zany ayx stâyx pez tongđ tuz nzof gôh.” ⁷ Nănh năngx naic tah nyâyc tauh, ha mâyh sămv buc laiv? Woax tauh tauz, ah pez tayh blauh zayz zub.” “Cun congz munh bux nănh coong, stipx zoz mâyh nây zaix tanz zany ja ayx pêtz pez tayh tuz nzof gôh. ⁸ Woax tauh puv quâyx munh songđ tanv nyâuđ max zanyx woax tauh cun congz munh. ayx tuz lemđ nzongf, Songđ wâyc yămz nây gungh-đi cloon nănh stiz woax peob munh, yămz nzămc nyăngz munh ayx năngx lemđ têx woax đomc yămz gwăngz nyăngz Munh.” ⁹ Zâu Yê-su năngx coong yaz lănv bux nyâuh, six zuc nongc yămz nây bamh canz max pengh stymz nyăngz nyanh stynh tauc tinyh quênx munh, Tauv nyanh nzuf woax dlih, nyâuh nzăngđ tuz stipx muf yămz Stâyv quâyx nyăngz pyau.” ¹⁰ Toix tauh ayx tuz cumh pâuz stăm zanyx, Njynh cumh pâuz lub nănh lauf ayx tuz zanyx. Toix laiv tauh ayx cumh pâuz stămz max zanyx, njynh cumh pâuz lub lauf ayx max tuz zanyx.” ¹¹ Six coong nyâuh cun bamh canz nyăngz stynh nyanh max tuz zanyx têx, Naih lănv năngx nzađ phunz nyâuh cun seenz nyanh coh? ¹² Six coong nyâuh cun pitc tauh nyăngz tax’ hungđ max zanyx têx, nyâuh hopđ zuc tuz nyăngz tax’ hungđ naih mănv oix phunz nyâuh?” ¹³ Max naih mănv hayh ayx tuz iz tauh Zâu nyăngz cumh pâuz, Năngđ naz nănh hayh oix hănđ nâyx tauh Stăngz woax tauh, Max zâyf nănh hayh oix mangc stam nâyx tauh, Pâuh woax tauh. nyâuh max hayh toongx ah dlih ayx Zâu Tênb-Hungh nyăngz cumh pâuz, yâuc ayx nyanh nyăngz cumh pâuz yămz nây bamh canz đêh.” ¹⁴ Pha-li-si munh stăngz nyanh nzongf, Nănh stiz numđ Zâu Yê-su coong nâyx đomc woac, Nănh stiz seenz numđ cuyb jeetx nănh.” ¹⁵ Nănh bux nănh stiz, “nyâuh ayx nyăngz dlayc phunz bamh munh laic stăngz Six nyâuh ayx tuz hopđ. Six Tênb-Hungh pâyz tuz nyâuh nyăngz nyâuđ, wâyc zuc âyz bamh Munh stunx Six saix, Six âyz Zâu Tênb-Hungh mangc six max naih lungđ stuyh muc.” ¹⁶ Mô-sê nyăngz gâyf cloon tâuc woac munh ja taih nyăngz Stâub, Cungb tuz lănv tauv Giăng, “Blătc woa taih lănv Tênb-Hungh nyăngz Cuđ jeenx munh nzăngđ tinyh zab nzac Tênb-Toongh Côkz.” ¹⁷ Gungh nib quaix ninyh, Năngx hâyđ têx, coi wănc Đoouc-lif gâyf ah wec, ah matb đăngc.” ¹⁸ Toix tauh munh Pha gâyh Nănh nyăngz au năngx ninyh zoz Săngb au, woax tauh six pamf Stymz lub nyăngz Stoif, Six toix laiv tauh ninyh zoz woax tauh Munh nzif, woax tauh munh Pha lauf pamf pongz lauh nyăngz Stoif.” ¹⁹ Zâu Yê-su lănv coong, “Naih ah tauh puv quâyx munh, cungb zuz nhliêuf Gwuyz quav vâyc, Muif-noib nhlync A hopb tyu gwoanb loc nzongf.” ²⁰ Năngx naih ah tauh zâuđ Nanc munh, Bux hipđ ayx La-sa-rơ, Săngh cah luv, Săngh claix pong Stynb nzuf. Munh muif dlih ênz nănh ninyh tauv woax tauh puv quâyx munh nyăngz pyau jengh cah đangc. ²¹ Zu năngv stăm tuih Nhlync, Clô yâuc taih clêmf Nănh stynb seetb nyăngz Paz.” ²² Woax tauh Zâuđ nanc munh tayc, Stynz-Munh taih stipx Nănh muf cloon Nănh nyăngz claof jex Apv-ra-ham yămz woa, Blătc woa woax tauh puv quâyx munh lauf tayc nzâyz ninyh plopx.” ²³ Nănh muf tauv yămz pâu đic ngokc zuc tanyđ munz tanyđ zâuđ, nănh zaub mynb mangc phătc Apv-ra-ham buz yămz woa côz-côz ha, Yâuc phătc cloon La-sa-rơ yămz woa.” ²⁴ Nănh songđ êu Apv-ra-ham coong, “Claof lex! jođ hâuđ-lênh yaz, Stăngc yaz bux La-sa-rơ Nongc bah đoz nokx womz taih nekx ănz yaz nyăngz byeetc. năngx Stingx ah tix, wâyc zuc yaz yămz nâyx zuc tâuf pu munz zâuđ nzongf. ²⁵ Apv-ra-ham tauz nănh coong, “Stunz lex! Mâyh six zuc săngx tauv mâyh yămz woa yangh stâyv woax zanyf mâyh muif hungđ tuz naih gongx zongf, Six La-sa-rơ cungb tuz huđ cungv, Nâyx zanyf La-sa-rơ tuz gongx vâyb nzongf, tauv nâyx zanyf Mâyh six zuc tanyđ zâuđ nanc. ²⁶ Yâuc năngx naih nomz cotb đôz nzongf nzez pănh, Pănh toix tauh oix tăng nâyx phanx clăngv muf woax phanx, Tăng woax phanx clăngv lauf nâyx phanx, yâuc max hayh quaix lauf tuz nef. ²⁷ Woax tauh puv quâyx munh coong, “claof lex! Jođ mâyh bux êu La-sa-rơ muf bux yaz nyăngz pha nyăngz pyau munh. ²⁸ Yaz năngx naih pyaz lanh pâuf-pez yămz woa, Jođ phunz La-sa-rơ muf bux Nănh stiz. Max phunz nănh stiz lauf yaz nây tanyđ zâuđ nyăngz tync.” ²⁹ Apv-ra-ham tauz nănh, “Nănh stiz songđ lauf năngx naih Mô-sê cloon tâuc woac munh nyăngz stâub nzof, Mâyh nyăngz Yâuf-pez six zuc mungv nănh stiz nyăngz woac. ³⁰ Puv quâyx munh năngx tauz Apv-ra-ham, claof lex! buc nâyf max zengx caux đêh, Năngđ coong naih ah lanh munh tayc blătc năngx săngh taih, bix ninyh tauv nănh stiz woa, Nănh stiz songđ oix coi nyâuđ quanyf stoif. ³¹ Apv-ra-ham tauz coong, “six coong nănh stiz max mungv Mô-sê cloon tâuc munh nyăngz woac, hănđ six naih munh tayc blătc năngx săngh phunb stengb taih ninyh tauv nănh stiz woa, bux nănh stiz lauf max zeen đêh.”