¹ Zâu Yê-su nzaox stâyb-sây buz coong, “jaf munh pamf stoif nyăngz dlayc,* ayx laix yâuc zuc naih seetb taih, Six jaf munh pamf stoif woax tauh songđ lauf zuc zâuđ.” ² Zoz njauz mac đyux ănz nănh nyăngz clangz đi pungx ănz coiđ gwâyf ninyh six năngx gongx têx, Phunz nănh jaf nâyx đomc ah lanh munh sây stăm pamf stoif. ³ Nyâuh oix zuc stêu stymz, “Six coong nyâuh nyăngz Yâuf pez ayx peo nyâuh, nyâuh six zuc ninyh bux nănh, “Six coong nănh năngđ coi nyâuđ quanyf Stoif, six zuc quanyf stoif phunz Nănh. ⁴ Năngđ coong ah noib nănh ayx peo Nhlic hâyđ, muif hâyđ nănh taih nhlimc coong yaz ayx longđ, nyâuh lauf zuc quanyf phunz nănh. ⁵ Stâyb-sây buz taih bux Zâu coong, “Jođ Pâu phunz buz naih seenz Stymz!” ⁶ Zâu bux coong, “Six coong nyâuh nyăngz seenz stymz năngđ naih lomc ah nomz njayz jaix nhlimb têx, nyâuh songđ hayh bux êu lâyc zâyz bah nzâux njăngx njynh đungđ stuiđ ninyh songx yămz woax đif coiđ cah njaf jađ naz, Lâyc zâyz njăngx songđ mungv nyâuh nyăngz woac gôh.” ⁷ Six coong nyâuh năngđ naih tauh pâuz ninyh njayh njingh mah six ninyh zu yungh, Tăng jêmh lauf tauv, nyâuh songđ bux nănh coong, “phanv stâyv lâyc nhlync năngv gôh naz mah six? ⁸ Max zâyf đêh, nyâuh songđ oix bux nănh coong, “Zâu zef njayz năngv năngx Suđ bix bênc taih phunz yaz nhlync zef. Six zuc bongc phunz yaz nhlync hopb năngx pêu nzof mâyh mănc nhlync đangz. zâyf max?” ⁹ Pâuz âyz Zâu nyăngz woac ayx, Zâu songđ max zâyf oix hâuđ nănh mah? ¹⁰ Nyâuh songđ năngđ ha, nyâuh ayx săngh paiđ taih nyăngz congz six zuc coong, “Buz cungb ayx pâuz, Nâyx đomc cumh pâuz hopđ six zuc phunz buz ayx.” ¹¹ Zâu Yê-su ninyh Yê-lu-sa-lem Stengv, Nănh yăngh clăngv quaix Sa-ma-li cloon Ga-li-lê Stâyz-phangz căpx caix ninyh.” ¹² Ninyh nzac ah tyuh njăngv jeenz woax zanyf, Naih săpc lanh săngh maoh pongz gumc nyăngz munh, Taih stipx Zâu Yê-su, Six nănh stiz max Nzađ ninyh stătx, Stâuđ woa côz-côz ha.” ¹³ Êu Zâu Yê-su coong, “Zâu lex! Jođ hâuđ lênh buz đôih!” ¹⁴ Nănh phătc songđ bux nănh stiz coong, “nyâuh ninyh phunz stayb munh Zah Mangc nyâuh nyăngz stynb, “Nănh stiz jămc jau ninyh woax zanyf, Nănh stiz nyăngz gumc bêc gongx nzuf nzof gôh.” ¹⁵ Woa săpc lanh naih ah lanh numđ nănh nyăngz Stynb gumc gongx nzuf, nănh songđ phunb đangz lauf yâuc nongc stingb hamv Tanv Tênb-Hungh.” ¹⁶ Lauf tauv Zâu Yê-su nyăngz cah Synh songđ quâyc nzac hâuđ nănh, nâyx tauh munh six Sa-ma-li munh. ¹⁷ Zâu Yê-su naic nănh coong, “Max zâyf njynh woa săpc lanh tinyh đoih gongx nzuf nzof mah? ha woa đuh lanh nec? ¹⁸ Ha săngh laix jangx cungb tuz nâyx stingx Sa-ma-li munh phunb đangz lauf hâuđ tanv Tênb-Hungh nâyx yaz? ¹⁹ Zâu Yê-su năngx coong bux woax lanh munh, nyoongz quef muf gôh, wâyc zuc mâyh zeen yaz, Mâyh nyăngz gumc songđ tuz gongx nzuf.” ²⁰ Naih ah đomc Pha-li-si munh Taih naic Zâu Yê-su coong, “Tênb-Hungh tauv laiv zanyf nzăngđ taih ayx Zâu cun munh loz? Zâu Yê-su tauz, “Tênb-Hungh taih ayx Zâu cun munh max zâyf mâyc mangc tuz phătc đêh. ²¹ Max naih laiv tauh bux coong, “mangc geh! Tênb-Côkz yămz nây mah six yămz woa, wâyc zuc nâyx zanyf Tênb-Hungh nyăngz côkz six yămz nyâuh nyâuđ njaf ayx Zâu cun nyâuh.” ²² Zâu Yê-su năngx nzaox nănh nyăngz stâyb sây buz, nyâuh mungc oix tuz Phătc Yaz bamh munh nyăngz toonz nyăngz noib taih tauv, Six nyâuh max tuz phătc.” ²³ Naih munh oix bux nyâuh coong, “Mangc geh Nănh yămz nây mah six yămz woa, Max nongc lêpc Nănh stiz ninyh lov.” ²⁴ Yaz bamh munh nyăngz toonz nzac taih woax noib, “gwăngz năngđ bungh bytc tâuf nâyx, Tăng nâyx phanx gungh ninyh woax phanx gungh.” ²⁵ Six Yaz bamh munh nyăngz toonz zuc tanyđ đungx hungđ zâuđ nanc, yâuc zuc nâyx yeenh stâyv munh nzêmh.” ²⁶ Nô-ya woax nzêuh năngđ laix, Yaz bamh munh nyăngz toonz taih woax noib lauf năngđ woa nâyx gôh.” ²⁷ Nô-ya woax nzêuh munh cungb oix nhlync hopb, Pungx sab stypx bongf, “ayx coonx hynh, Tauv Nô-ya nzac Đangđ woax noib, Yămz đangđ cungh ngwoaic nyăngz munh yeetx stong songđ zuc womz yămx tênb yaf munh tayc stutc nzuf.” ²⁸ Lotv woax nzêuh munh lauf năngđ nga, “Munh cungb oix maif maic zâyv pyau.” ²⁹ Six tauv Lotv seetb Sô-đôm Stengv woax noib, Naih bungc tâuf cayx năngđ wuôngh tâuf nâyx tăng Gungh tuih nzac taih pu mêtc nzuf nănh stiz zuy njênf.” ³⁰ Yaz bamh munh nyăngz toonz tynđ seetb taih woax noib lauf năngđ woa nâyx. ³¹ Woax noib toix tauh yămz pyau tungx, Njynh max tuz nzac pyau njaf lauf zoz tax’ hungđ, Toix tauh yămz jêmh đi yâuc max nongc lauf pyau zoz stongz stayz.” ³² Six zuc săngx Lotv nyăngz au!” ³³ Toix tauh nyâyh tâuh cănh Njâuv nănh nyăngz mengc, woax tauh Six zuc quanyf mengc. Toix tauh nyunc quanyf nănh nyăngz mengc wâyc yaz, woax tauh songđ tuz mengc săngh.” ³⁴ Yaz bux nyâuh, woax munf naih iz lanh munh songc zâuv Phâyx, ah lanh tuz Stipx ninyh, quengx ah lanh ănz woa.” ³⁵ Naih iz lanh munh nzif yămz woa mah nungh mâyf, ah lanh tuz stipx ninyh, quengx ah lanh yămz woa.” ³⁶ Naih iz lanh yămz woa jêmh ah lanh tuz stipx ninyh, Quengx ah lanh yămz woa. ³⁷ Stâyb-Sây buz naic, “Stâyb-pha lex! Nâyx đomc dlayc oix yămz laiv tix seetb taih? Zâu Yê-su tauz, “Tax’ hungđ tayc yămz laiv, Clang lub six yămz woa.”