¹ Zâu Yê-su năngx nongc nâyx tyuh woac pây nzaox stâyb sây buz six zuc muif dlih clo-Zâu max cuyb nyâuđ nămx. ² Naih ah nomz stengv naih ah tauh stămc stoif quanz, Nănh max cumh nzav Tênb-Hungh, yâuc max pyac toix laiv Tauh.” ³ Yămz woa naih ah tauh munh bôf qua, Muif dlih ninyh lov woa tauh stămđ stoif quanz, Nănh coong, “Naih munh cooux yaz, Jođ mâyh nongc pengh stymz nyăngz gâyf stăngc yaz pob.” ⁴ Jođ lauh nzongf, Stămđ stoif quanz yâuc max canx stăngc, “Caoz lauh nănh yămz nyâuđ nyâyh, Yaz max cumh nzav Tênb-Hungh yâuc max mangc toix laiv tauh nyăngz mynb.” ⁵ Six yaz zuc nongc pengh stymz nyăngz gâyf stăngc nănh pob zef, Năngđ max têx, Nănh cungb muif dlih taih sêu zănv yaz wâyb munh.” ⁶ Zâu năngx coong, “nyâuh mungv lâyc tauh max pengh stymz stămđ stoif quanz nyăngz woac geh!” ⁷ Tênb-Hungh muif-dlih oix sađ pengh stymz nyăngz gâyf phunz Nănh nyăngz pec stingx, pec stingx muif noib muif munf sâuh coouv nănh, Nănh max oix ngaih max tauz nănh stiz jođ nyăngz woac nef?.” ⁸ Nănh songđ oix coonx nongc pengh stymz stăngc bênc, Six yaz bamh munh nyăngz toonz phunb đangz taih woa noib, hayh lov tuz nây gungh đi naih tix lanh zeen yaz max?” ⁹ Naih ah đomc munh cănh tanv nănh stiz six ayx munh gongx munh, mangc stam cah synh munh, “Zâu Yê-su songđ coong nâyx tyuh woac pây phunz nănh stiz mungv.” ¹⁰ Nănh lănv coong, “Naih iz lanh munh ninyh woa miuc clo Zâu, Naih ah lanh six Pha-li-si munh, ah lanh six sâub sôiv nyăngz munh.” ¹¹ Pha-li-si munh stâuđ woa clo-Zâu coong, “Tênb-Hungh lex! yaz hâuđ mâyh, wâyc zuc yaz max năngđ pitc đomc munh, yâuc max ayx nyâuđ jaz, max mauh tax’ hungc, max ayx stac max ayx pongz lauh, Naih phanx munh ayx nâyx đomc dlayc six max zâyf yaz, Yaz hâuđ mâyh, yaz yâuc max năngđ woax đomc sâub sôiv nyăngz munh.” ¹² Muif tuônh yaz njif iz noib max nhlync laiv hungđ săpc phănc yaz yâuc stungx ah phănc phunz mâyh. ¹³ Six woax tauh sâuđ sôiv nyăngz munh stâuđ woax đangđ phanx Côz-côz ha, njynh max nzađ zaub pyây mangc gungh, Nănh numđ stauh nzongf, “Songđ nyumb puf tô cah lapc yâuc coong, “Zâu Tênb-Hungh lex! Yaz seenz pamf stoif lub yongb gôh, Jođ mâyh hâuđ lênh yaz!” ¹⁴ Zâu Yê-su coong, “Yaz bux nyâuh, “Tauv nzuf stâyv nyăngz săngx huđ, max zâyf Pha-li-si munh tuz quanyf stoif, Six sâub sôiv nyăngz munh tuz quanyf stoif, Toix tauh cănh zanyb ayx lub, Six zuc sămc nzac hav, Toix tauh cănh nhlimc ayx jeenz, woax tauh tuz pâuh staox njăngb.” ¹⁵ Naih ah đomc munh ênz nănh stiz nyăngz sây taih lov Zâu Yê-su, oix nongc nănh tăpx puf ănz pou woac phunz, Six stâyb-Sây buz phătc nâyx đomc dlayc songđ coong nănh stiz.” ¹⁶ Zâu Yê-su êu nâyx đomc munh sây taih yâuc bux nănh stiz coong, “Phanv phunz munh sây taih lov yaz geh! Max nongc câmx nănh stiz đêh! Wâyc zuc toix tauh nongc Tênb-Hungh ayx Zâu cun nănh songđ năngđ nâyx đomc munh sây nâyx gôh.” ¹⁷ Six yaz coong seenz bux nyâuh, “Toix tauh max nongc Tênb-Hungh ayx Zâu cun nănh, nănh songđ max năngđ nâyx đomc munh sây, Nănh stâyv quâyx max tuz nzac Tênb-toongh nyăngz Côkz đêh.” ¹⁸ Naih ah tauh ayx quanz nyăngz puv quâyx munh taih naic Zâu Yê-su coong, “Pengh stymz nyăngz stênx stengb lex! Yaz six zuc ayx toix laiv hungđ nzăngđ tuz stypx stâyv quâyx nyăngz mengc loz?” ¹⁹ Zâu Yê-su naic nănh, wâyc săngh laix mâyh bix hipđ yaz ayx pengh stymz nyăngz munh? seetb nzuf Tênb-Hungh max naih pitc tauh pengh stymz đêh. ²⁰ Nzof mâyh yâuc pâyz tuz Đoouc-lif gâyf max tuz tayx munh, max tuz stymz lub ayx pongz lauh, Max tuz ayx stac, Max tuz ayx za zanyx jênx hoiđ munh. six zuc jâuz mâyh nyăngz nzif Pha.” ²¹ Woax tauh ayx quanz munh tauz coong, “Nâyx đomc gâyf, Yaz tăng năngx jeenz jâuz tauv nâyx zanyf nzof gôh.” ²² Zâu Yê-su numđ nănh năngđ nâyx coong, “Nănh songđ bux woax tauh munh, “năngx naih ah hungđ mâyh max zengx ayx, six zuc muf maic mâyh nyăngz tax’ hungđ, bix nzâyz woax đomc nyanh ninyh patz phunz munh zâuđ munh, ayx năngđ ha mâyh nzăngđ naih sâub saix nyăngz tax’ hungđ, ănz woa Tênb-Toongh. ayx nzuf bix taih nây lêpc yaz gôh.” ²³ Woax lanh munh numđ nâyx đomc woac, Nănh seenz numđ stauh nzongf, wâyc zuc nănh six puv quâyx munh.” ²⁴ Zâu Yê-su phătc nănh stauh nzongf songđ lănv bux nănh, Puv quâyx munh nzac Tênb-Hungh nyăngz côkz seenz zâuđ nzongf.” ²⁵ Loh toh seenb quaix Stymb bluyc năngx hâyđ hêx, puv quâyx munh nzac Tênb-Hungh nyăngz tênb-Toongh côkz nef.” ²⁶ Naih ah đomc munh numđ Zâu Yê-su coong naz, “Nănh stiz songđ naic, ha six mănv tuz Njâuv?” ²⁷ Zâu Yê-su tauz, “Toix lungđ bamh munh max hayh ayx, Tênb-Hungh hayh ayx tuz nzuf.” ²⁸ Phê-e-rơ coong, “Mangc geh! Buz quanyf nzuf muif hungđ taih lêpc stâyb-Pha.” ²⁹ Zâu Yê-su coong bux nănh stiz, “Yaz coong seenz bux nyâuh, Toix tauh wâyc Tênb-Hungh nyăngz côkz, quanyf pyau munh au sây, yâuf-pez Nzif Pha, ³⁰ Tăng nâyx stâyv nănh oix tuz năngx đungx quaix sax phănc, đangz phanx nănh yâuc năngx tuz Stâyv quâyx nyăngz mengc.” ³¹ Zâu Yê-su ênz nănh săpc nyâyc lanh stâyb sây buz ninyh lanyc ah tix lănv bux nănh stiz coong, “Pănh nâyx zanyf ninyh tauv Yê-lu-sa-lem Stengv, Tâuc woac munh ja coong lănv tauv yaz bamh munh nyăngz toonz yeetx stong dlayc songđ seetb taih toix nzuf gôh.” ³² Tauv woa yaz zuc munh zoz jaoz phunz đâuf, zuc munh jeetx, zuc munh coong peo, yâuc zuc nzuv nzanh womz topz ănz yaz. Nănh stiz oix nongc pya bopc nănh, Yâuc tayx nănh quanyf. ³³ Six tauv tah stamz noib, Nănh năngx săngh phunb stengb taih.” ³⁴ Stâyb sây buz max saz nâyx đomc woac six coong lungđ, Nănh stiz max saz tuz âyz gâyf six coong lungđ, wâyc zuc hongh Muôngh om nănh stiz songđ max saz tuz nănh coong nyăngz woac.” ³⁵ Zâu Yê-su ah yađ ninyh tauv Yê-li-cô stengv, Naih ah lanh mâyc buđ munh, stâyv woa jau synh jođ nhlync.” ³⁶ Numđ munh quaix jau nănh naic coong, “Munh ayx lungđ nâyx loz? ³⁷ Munh coong bux nănh, “Na-sa-letv Muôngf nyăngz Yê-su pitb nây lêc đêh.” ³⁸ Woax tauh mâyc buđ munh songđ êu coong, “Đa-vitv Hungh nyăngz sây stunz Yê-su lex! Jođ hâuđ lênh yaz đôih!” ³⁹ Ninyh đangc woax đomc munh mađ nănh coong, “max cuyb nyaoc đêh! Six nănh seetb jab hamv năngx lub têx! Đa-vitv nyăngz sây stunz lex! Jođ hâuđ lênh nef!” ⁴⁰ Zâu Ye-su songđ yămc woa, Bux woax đomc munh ninyh ênz nănh taih tauv stătx, Zâu Yê-su songđ naic nănh, ⁴¹ “Mâyh oix nongc yaz stăngc mâyh toix lungđ? Nănh tauz, “jođ phunz yaz hayh mangc tuz phătc gwăngz! ⁴² Zâu Yê-su bux nănh, “Nâyx zanyf mâyh mangc tuz phătc nzof gôh, wâyc mâyh zeen yaz mâyh nyăngz mâyc songđ tuz gongx.” ⁴³ Nănh lênh dlih hayh mangc tuz phătc songđ lêpc Zâu Yê-su ninyh. Songx munh phătc nâyx đomc dlayc songđ tanv Tênb-Hungh.”