¹ Zâu Yê-su ninyh clăngv quaix Yê-li-cô Stengv.” ² Yămz woa naih ah lanh ayx Sâub sôiv nyăngz munh, Nănh nyăngz bux hipd ayx Sa-zê. Nănh yâuc puv-quâyx nyăngz Munh.” ³ Nănh oix mangc jađ Zâu Yê-su six Năngđ laix, Six Sa-zê yâuc hav nzongf. Munh đungx tăng nănh, Nănh yâuc mangc max phătc.” ⁴ Tah claof songđ coonx tyuv ninyh đangc, stipx Zâu Yê-su, Nănh songđ lakb staox zâyz zah pungđ njăngx ninyh, Tex mangc Zâu Yê-su, wâyc nănh oix clăngv quaix woax tyuh jau.” ⁵ Zâu Yê-su ninyh tauv njăngx coonz zaub mynb mangc Sa-zê, Nănh coong, “Sa-zê lex! Nzac taih zef gôh, Nâyx zanyf yaz six zuc ninyh sec mâyh nyăngz pyau.” ⁶ Sa-zê numđ nyađ coonx nzac taih stipx nănh.” ⁷ Songx munh phătc songđ yônx nănh, Mangc geh lâyc tauh munh zâyf ninyh cloon Stoif-munh ayx toic nzof gôh.” ⁸ Sa-zê nyoongz quef bux Zâu coong, “Zâu lex! yaz naih nyăngz tax’ hungđ yaz oix zoz ah phănc taih tanb phunz munh zâuđ munh, Six coong yaz năngđ mauh toix laiv tauh nhlync, Yaz oix toiv pyâyz phănc clao nănh stiz.” ⁹ Zâu Yê-su bux nănh coong, “Nâyx noib Njâuv pôz taih tauv nâyx phănc munh gôh, Nâyx phănc munh yâuc ayx Apv-ra-ham nyăngz sây stunz. ¹⁰ Wâyc zuc yaz bamh munh nyăngz toonz six taih lov Njâuv gaih jêmh nyăngz Munh. ¹¹ Woax zanyf songx munh mungv nănh coong tyuh woac pây phunz nănh stiz, woax zanyf nănh ninyh cayx tauv Yê-lu-sa-lem Stengv, Munh laic Stăngz six phătc Tênb-Hungh taih ayx Zâu cun munh nyăngz săngx huđ seenz hynđ seetb taih naz đâux.” ¹² Zâu Yê-su songđ coong nâyx tyuh woac pây phunz nănh stiz mungv. Naih ah tauh quanz oix seetb côz nyăngz côkz ninyh stipx lanyf ayx Hungh, stipx tuz nănh năngx phunb đangz lauf. ¹³ Cayx ninyh woax zanyf, Nănh êu săpc lanh pâuz taih, Muif lanh nănh jaoz lanh săpc stynz nyanh phunz nănh stiz, “Nănh zăpx coong, “Nzâyz nâyx đomc nyanh ninyh ayx stany bâyx zu tauv yaz phunb đangz lauf bef!. ¹⁴ Woax tauh quanz nyăngz pec stingx hănđ nănh songđ paiđ munh lêpc nănh đangz ninyh cooux nănh coong, “Buz max oix nongc nâyx tauh ya munh ayx Hungh cun buz đêh.” ¹⁵ Six woax tauh quanz tuz stipx lanyf ayx Hungh phunb đangc nzof, Nănh songđ êu nănh phunz nyanh woax đomc pâuz taih tex mangc jađ nănh stiz ayx tuz gâyc buc laiv.” ¹⁶ Tah yeetx tauh taih bux nănh nyăngz Zâu coong, “Zâu lex! phunz yaz woa săpc Stynz nyanh, Yaz ayx tuz gâyf săpc Stynz nef. ¹⁷ Zâu Tauz, “Gongx gôh, Mâyh seenz nyâuđ zanyx nyăngz pâuz, Tikx cay tix ănz Stêu dlayc lêđ, Mâyh năngx lif tuz gongx nâyx, Yaz oix phunz mâyh cun săpc nomz Stengv.” ¹⁸ Tah nyâyc tauh pâuz taih nănh coong, “Zâu lex! mâyh phunz yaz woax stynz nyanh yaz ninyh ayx tuz gâyc pyaz Stynz. ¹⁹ Zâu bux nănh coong, “Yaz phunz mâyh pyaz nomz Stengv.” ²⁰ Năngx naih ah tauh pâuz taih nănh bux coong, “Zâu lex! nhlex mâyh phunz yaz woax đomc nyanh, Yaz nongc stab mynb buyx pêuz zaub ănz tync gongx nzongf.” ²¹ Yaz cumh nzav mâyh nzongf, Yaz pâyz tuz mâyh max sămv toix tauh, hănđ max zâyf mâyh nyăngz mâyh yâuc zoz, Mâyh max zuc seetb jab songx mâyh yâuc sâub. ²² Zâu bux nănh coong, “Mâyh lâyc tauh ya huđ nzongf nyăngz pâuz lex! Yaz cănh nongc mâyh nyăngz woac tingc mâyh nyăngz Stoif. Mâyh săngh laix pâyz tuz max zâyf yaz nyăngz yaz yâuc zoz? Mâyh wâyc săngh laix pâyz tuz yaz max Sămv mănv? Mâyh ayx laix pâyz tuz yaz max nzuf jab songx yaz yâuc tuz Sâub? ²³ Ha săngh laix mâyh max ayx lungđ yâuc max nzâyz yaz nyăngz nyanh ninyh zaub ănz yaz nyăngz nyanh coh, Tauv yaz lauf yâuc tuz nyanh coonz, yâuc tuz nyanh gâyc? ²⁴ Zâu coong bux stâuđ cah synh woax đomc munh, Zoz nănh woax Stynz nyanh nzâyz ninyh phunz naih săpc Stynz woax tauh zef!” ²⁵ Woax đomc munh coong, “Zâu lex! Nănh stiz six naih săpc stynz nzec! ²⁶ Woax tauh Hungh tauz, “wâyc zuc toix laiv tauh naih six tuz pâuz, Six toix laiv tauh max naih, Nănh hănđ naih ah tix yâuc zuc zoz nzâyz ninyh nzuf.” ²⁷ Six max oix nongc yaz ayx Hungh woax đomc munh, Nzâyz taih yaz nây cah đangc tayx quanyf năngx nzuf zec!” ²⁸ Zâu Yê-su lănv nzuf nâyx đomc woac, Nănh songđ ninyh Yê-lu-sa-lem stengv đangc stâyb sây buz.” ²⁹ Ninyh tauv cah-lanv zoongz, Bêtv-pha-ni, cloon Bê-ta-ni njăngv gâyh max côz, Nănh songđ paiđ iz lanh stâyb-sây buz ninyh đangc yâuc zăpx nănh stiz. ³⁰ Nănh bux coong, “nyâuh ninyh tauv lâyc cah đangc tyuh ya njăngv, nzac njăngv ninyh songđ phătc pang ah tauh maf-li-jeenz ănz woa, Max zengx naih mănv zâyh quaix bix zay zoz jinđ lauf nây phunz yaz.” ³¹ Six coong năngđ naih munh naic coong zay maf-lih jeenz nongc ayx lungđ? bix bux nănh stiz coong, “Zâu sămv zuc nongc nănh.” ³² Nănh stiz songđ ninyh phătc muif hungđ toix nzuf nănh coong nyăngz woac.” ³³ Năh stiz zay maf-lih jeenz woax zanyf, maf-lih Zâu naic coong, “nyâuh zay maf-lih jeenz nongc ayx lungđ? ³⁴ Nănh stiz tauz, “Zâu sămv zuc nongc nănh. ³⁵ Nănh stiz songđ jinđ maf-lih lauf phunz Zâu Yê-su, Yâuc zoz nănh stiz nyăngz gwuyz lub timc maf-lih cah tănf, Pâuh Zâu Yê-su staox ninyh zâyh.” ³⁶ Zâyh ninyh woax zanyf, Songx munh zoz nănh stiz nyăngz gwuyz pâub ănz woa jau đămc. ³⁷ Zâu Yê-su ninyh tauv stătx Yê-lu-sa-lem Stengv nzac cah-lanv zoongz woax zanyf, songx stâyb sây buz tih đoih numđ nyađ, Nongc stingb hamv lub tanv Tênb-Hungh. Wâyc zuc nănh stiz phătc quaix nâyx đomc njingc nzongf nyăngz dlayc, ³⁸ “Jođ sađ Pôz phunz tingz Zâu nyăngz bux taih woax tauh Hungh. Tênb-toongh naih pengh oonz, Yămz njăngb quaix nyăngz tync naih Gwăngz-eng.” ³⁹ Yămz woa naih đomc Pha-li-si Munh coong bux Zâu Yê-su, Stênx stengb lex! zăpx mâyh lâyc đomc Stâyb-sây buz êu năngx gâyf nyaoc.” ⁴⁰ Zâu Yê-su tauz, Yaz bux nyâuh, Six coong nănh stiz năngđ max nyaoc, lâyc đomc njauz pyây lauf hamv staox taih năngđ nâyx.” ⁴¹ Zâu Yê-su ninyh tauv stătx Yê-lu-sa-lem Stengv, mangc phătc stengv, nănh songđ haoh wâyc woax nomz stengv. ⁴² Nănh coong, “Nâyx noib naih lungđ hayh phunz nyâuh naih buc laiv pengh oonz! Six nâyx zanyf nâyx đomc pinyx nyăngz dlayc tăng nyâuh nyăngz mâyc mangc max phătc tuz.” ⁴³ Six săngx huđ oix tauv, Mâyh nyăngz Yônz-zaz witz cotb wâyb mâyh nyăngz pyâyz phangz đipc mungh. ⁴⁴ Njynh mâyh cloon yeetx stong yămz stengv cah njaf nyăngz munh songđ zuc mêtc nzuf. njynh nax naih ah nomz njauz pyây tinyh clapb tăpx lâyc, wâyc zuc nyâuh max saz tuz Tênb-Hungh taih ayx Zâu cun munh nyăngz săngx huđ tauv.” ⁴⁵ Nănh nzac congx toongh ninyh, Luiđ maif maic nyăngz munh seetb ninyh.” ⁴⁶ Yâuc bux nănh stiz coong, “Canyx-Stâub naih ja coong, “Yaz nyăngz pyau munh oix hipđ ayx jođ pôz nyăngz pyau. Six nyâuh nongc ayx stac munh mem nyăngz cotb.” ⁴⁷ Nănh muif-noib yămz woa layf paix pyau nzaox munh, Stayb-munh pyây cloon nzaox gâyf Stênx stengb, Cloon cun pec Stingx nyăngz munh côx oix tayx nănh” ⁴⁸ Six nănh stiz max hayh ayx laix layx, wâyc zuc songx munh tinyh đoih oix cayx mungv nzaox nyăngz woac.”