¹ Naih ah noib, nănh năngx yămz woa layf paix toongh nzaox munh, yâuc lănv Cuđ-jeenx, Stayb-munh pyây cloon nzaox Gâyf Stênx stengb cloon munh côx taih naic Nănh coong, ² “Jođ Stênx stengb bux bây buz pâyz, Stênx stengb naih toix lungđ gâyf ayx lâyc đomc dlayc? Toix laiv tauh phunz nâyx đomc gâyf mâyh? ³ Nănh tauz, “Ha yaz lauf oix naic nyâuh ah zâux, nyâuh lauf zuc bux Phunz yaz pâyz.” ⁴ Ha toix mănv phunz Giăng naih gâyf Stăngc munh ayx quaix womz nyăngz gâyf? Tênb-Hungh mah six bamh munh?” ⁵ Nănh stiz songđ lanh cloon lanh sangv Gwoangh, Pănh cayx tauz coong laix? six coong pănh năngđ tauz coong Tênb-Hungh phunz taih, Nănh yâuc hayh coong, “Ha săngh laix nyâuh yâuc max zeen Giăng?” ⁶ Six coong pănh năngđ tauz coong, “Bamh munh phunz taih, Songx munh yâuc oix zoz njauz ôx pănh tayc, wâyc zuc songx munh stunx Giăng six săngh ah tauh tâuc woac Munh.” ⁷ Nănh stiz songx tauz, “Buz max pâyz tuz toix tauh phunz nănh đêh.” ⁸ Zâu Yê-su bux nănh stiz, ha yaz lauf max lănv bux phunz nyâuh pâyz tuz yaz naih toix lungđ gâyf ayx nâyx đomc dlayc đêh!” ⁹ Zâu Yê-su lănv nâyx đomc woac pây phunz songx munh mungv, Nănh coong, “Naih ah lanh munh songx ah tungđ tungh côh pyâu, Nănh câux munh tex jămđ, Songđ seetb Stâyz-phangz ninyh ah dlapc lauh-lauh ha.” ¹⁰ Tauv pyâu suc nyăngz săngx huđ, Nănh songđ paiđ nănh nyăngz pâuz ninyh lov jămđ lauđ wynb nyăngz munh zoz nănh nyăngz phănc pyâu, Six woax đomc jămđ lauđ wynb nyăngz munh zoz woax đomc pâuz taih bopc luiđ Nănh stiz phătb puf phunb đangz lauf.” ¹¹ Lauđ wynb-Zâu năngx paiđ nănh nyăngz pâuz ninyh, Six jămđ lauđ-wynb nyăngz munh lauf năngx bopc ayx Peo ănz nănh stiz, Phunz nănh stiz zuc nyayz, yâuc năngx luiđ nănh stiz phatb puf phunb đangz lauf.” ¹² Lauđ-wiynb Zâu năngx paiđ tah stamz tauh pâuz ninyh, jămđ lauđ wynb nyăngz munh năngx bopc nănh stiz tuz sangf nzongf, đănx seetb lauđ wynb cungh ngwoaic ninyh quanyf.” ¹³ Laub wynb Zâu songđ coong, “ax yaz cayx ayx laix? Yaz cănh paiđ yaz Stăngz nyăngz toonz ninyh, naih dlih Nănh stiz sangx đâuc nyangc yaz nyăngz toonz baz. ¹⁴ Six jămđ lauđ wynb nyăngz munh jenx phătc Zâu nyăngz toonz taih, nănh stiz songđ lanh bux lanh, Yec! Stipx nâyx nomz lauđ wynb nyăngz munh six lâyc tauh ya gôh yec! Taih pănh zoz nănh tayx quanyf, Nănh nyăngz jax toongx songđ săngh pănh nyăngz nzuf gôh.” ¹⁵ Nănh stiz songđ nyopz zoz nănh đănx seetb lauđ wynb cungh ngwoaic ninyh tayx quanyf.” Zâu Yê-su naic coong, “Năngđ naz lauđ wynb Zâu cayx ayx laix phunz tex lauđ wynb nyăngz munh?” ¹⁶ Lauđ wynb Zâu max zâyf cayx ninyh tayx nănh stiz quanyf nzuf, bix phunz pitc đomc munh cun mah. Songx munh numđ nâyx đomc woac, Nănh stiz coong, “tuz mungc max hayh naih lâyc đomc dlayc seetb taih lêc?” ¹⁷ Zâu Yê-su mangc nănh stiz yâuc naic, “Canyx-Stâub ja nâyx đomc woac naih nhleenz tâuv âyz gâyf? Ayx pyau stangc nzêmh zoz seetb taih woax nomz njauz pyây, Nongc ănz woa pyau joongz max zâyf năngx gongx têx mah? ¹⁸ Toix laiv tauh zoomc zuc woax nomz njauz pyây six lunc nzuf, Nzof woax nomz njauz pyây tuih bomf zuc toix laiv tauh six zuc mynh nzuf.” ¹⁹ Stayb munh pyây cloon nzaox gâyf Stênx stengb pâyz tuz Zâu Yê-su coong nâyx đomc woac pây six paz zuc nănh stiz, woax zanyf nănh stiz seenz oix nyopz zoz nănh nzongf, Six nănh stiz cumh nzav songx munh.” ²⁰ Nănh stiz oix setx mangc nănh, Songđ paiđ munh ninyh ayx dlayc năngđ munh gongx munh, Six sănh stiz oix stiv Zâu Yê-su phunz nănh coong woac saih, nzăngđ hayh zoz nănh jaoz phunz Lô-ma Hungh quanz.” ²¹ Nănh stiz naic Zâu Yê-su, “Stênx stengb lex! buz pâyz tuz mâyh coong nyăngz woac cloon nzaox nyăngz gâyf six hopđ, Mâyh yâuc max pyac toix laiv tauh, Tênb-Hungh nyăngz jau mâyh yâuc nzaox tuz seenz.” ²² Ha mâyh bix bux phunz buz pâyz gôh, “Buz seetb sôiv phunz Sê-sa Hungh longđ gâyf max?” ²³ Nănh pâyz tuz sănh stiz ayx pâyh zac nyâuđ ngokx nănh songđ naic, ²⁴ “Zoz ah lepz nyanh taih phunz yaz mangc geh! Nây six toix mănv nyăngz hanyh, cloon toix tauh nyăngz bux?” Nănh stiz tauz, “Sê-sa nyăngz.” ²⁵ Zâu Yê-su bux coong, “Toix laiv lungđ Sê-sa nyăngz six zuc phunz Sê-sa. toix laiv hungđ Tênb-Hungh nyăngz six zuc phunz Tênb-Hungh.” ²⁶ Toongx songx munh nănh stiz max phătc nănh coong saih toix lungđ, Nănh stiz numđ nănh coong nyăngz woac njingc nzongf songđ max nzađ nyaoc, Taux woa stinyb njâuh tyuv.” ²⁷ Naih ah đomc Sa-đu-si munh taih lov Zâu Yê-su. Sa-đu-si woax jau munh, max zeen munh tayc năngx hayh săngh phunb Stengb taih.” ²⁸ Nănh stiz naic, “Stênx stengb lex! Mô-sê lănv nâyx tyuh gâyf taih phunz buz, Six coong naih ah lanh munh zoongz pyau quaix, bix max zengx naih sây nănh yâuc tayc nzof, Nănh nyăngz yâuf yâuc zuc nongc nyamz qua ayx au, phunz nănh sây, Nongc stipx tah nyăngz six miuh.” ²⁹ Lôx noib naih đomc nhlic lanh Yâuf-pez, Tah coonz zoongz pyau max zengx naih sây nănh yâuc tayc nzof.” ³⁰ Yâuf lauđ nyâyc, nongc nyamz qua ayx au, Max zengx nănh sây nănh lauf tayc.” ³¹ Yâuf lauđ stamz lauf năngx tayc, Nâyx đomc nhlic Yâuf pez nongc nănh quaix nzuf, Max zengx naih sây lauf tinyh đoih tayc nzuf. ³² Quaix đangz woax tauh munh nzif lauf tayc nzof.” ³³ Năngđ naz munh tayc tauv năngx săngh taih woax moib, woax tauh munh nzif Stunx săngh toix tauh nyăngz au?” wâyc zuc nănh stiz nhlic Yâuf pez nongc nănh nzêux nzuf nzof.” ³⁴ Zâu Yê-su tauz nănh stiz, “Yămz nây stâyv sangc nyăngz munh, zoz au zoz langh.” ³⁵ Six woax đomc tayc blătc bix năngx hayh tuz săngh taih, Six max zuc nongc au nongc langh nzof gôh.” ³⁶ Nănh Stiz max hayh tayc, Nănh stiz six năngđ Tênb-Hungh nyăngz Stynz-Munh. Nănh stiz yâuc ayx Tênb-Hungh nyăngz Nam-nyâuf, wâyc zuc nănh stiz tayc Blătc năngx săngh taih.” ³⁷ Mô-sê lănv coong, “Munh tayc năngx săngh taih, wâyc zuc nănh coong tâuf sac njăngx Plungz woax tyuh jau, Nănh hipđ Zâu ayx Apv-ra-ham, nyăngz Tênb-Hungh, I-sakv, nyăngz Tênb-Hungh, Ya-côpv nyăngz Tênb-Hungh. ³⁸ Tênb-Hungh six munh săngh nyăngz Tênb-Hungh, Max zâyf munh tayc nyăngz Tênb-Hungh đêh. âyz Tênb-Hungh mangc, Six max naih laiv tauh tayc.” ³⁹ Naih ah đomc nzaox gâyf nyăngz Stênx stengb coong, “Stênx stengb lex! mâyh seenz tauz tuz hođ gôh.” ⁴⁰ Coong nzuf nănh stiz max naih mănv nzađ naic nănh toix laiv hungđ.” ⁴¹ Zâu Yê-su naic nănh stiz, “ha săngh laix munh bix hipđ njâuv Zâu ayx Đa-vitv Hungh nyăngz sây-stunz? ⁴² Wâyc zuc yămz nzungz-đăngb stâub Đa-vitv cănh ja coong, “Zâu coong bux yaz nyăngz Zâu, “Stâyv yaz nyăngz byaoh phanx.” ⁴³ Zu yaz phunz mâyh nyăngz Yônz-zaz nzac mâyh nyăngz staux đi.” ⁴⁴ Đa-vitv cănh hipđ nănh ayx Zâu, “ha năngđ laix Njâuv Zâuv hayh ayx Đa-vitv nyăngz Sây-stunz?” ⁴⁵ Songx munh năngx yămz woa mungv Zâu Yê-su bux Stâyb-sây buz. ⁴⁶ Six zuc năngđ cayb buôngh nzaox gâyf Stênx-Stengb, Nănh stiz cungb oix zuz gwuyz đao Vâyc, Yăngh woa caiz sangb quaix ninyh quaix lauf oix nongc munh đeh nănh stiz woa caiz sangc, Ninyh huyđ-toongh yâuc oix lov tync gongx stâyv, ninyh coonx hynh yâuc oix sên hynh coonz stâyv.” ⁴⁷ Nănh stiz jaf au qua nyăngz jax toongx nhlinc, yâuc cah đanyc ayx clo Zâu đao jaf munh. Nâyx hungđ ya munh zuc tingc stoif năngx niđ quaix.”