¹ Zâu Yê-su zaub mynb mangc phătc puv quâyx munh ănz pungx hođ nyanh, ănz woa layf paix pyau nyăngz pungx hođ hoomh.” ² Nănh yâuc phătc au qua zâuđ zomc taih tăpx ănz iz nomz tongh Stynh stib.” ³ Zâu Yê-su coong bux nănh stiz, “Yaz coong bux nyâuh, “Nâyx tauh au qua nyăngz pungx hođ nyanh, Seenz năngx đungx têx muif lanh munh nyăngz.” ⁴ Wâyc zuc woax đomc munh naih nyanh đungx, Nănh stiz cungb pungx ah tix nyanh đany, Six nâyx tauh au qua zâuđ zomc Nănh nzâyz njynh yungf Mengc nyanh taih ănz nzuf.” ⁵ Naih ah đomc munh tanv Canyx Tênb-Hungh nyăngz pyau zoongz tuz Vâyc nzongf. nongc njauz pyây vâyc zâyv taih, yâuc nongc munh pungx hođ nyăngz nyanh zoongz taih vâyc nzongf, Six Zâu Yê-su bux Coong, ⁶ "Nyâuh phătc lâyc đomc tax’ hungđ, naih ah noib six zuc lakb huđ nzuf, Njynh max naih ah nomz Njauz pyây tih clapb tăpx ănz lâyc.” ⁷ Nănh stiz naic Zâu Yê-su coong, “Stênsx stengb lex! nâyx đomc dlayc tauv laiv zanyf nzăngđ seetb taih? Oix seetb taih woax zanyf, Naih toix lungđ ayx jix-houđ? ⁸ Zâu Yê-su tauz, “oix zuc stêu stymz Buôngh, Max nongc phunz toix tauh jaf zuc nyâuh, Hayh naih munh đungx oix nongc yaz nyăngz bux taih coong, “Yaz six Njâuv Zâu, Max six coong, “Săngx huđ tauv nzof gôh, Yâuc max nongc lêpc nănh stiz.” ⁹ Nyâuh numđ munh panx zax, Cloon stâyz-phangz lunc nyăngz jeenx, yâuc max nongc cumh nzav, wâyc zuc nâyx đomc dlayc hănđ six ayx laix yâuc zuc naih dlayc seetb taih đangc, Six stêtb mâyh nyăngz noib lauf max zengx tauv đêh.” ¹⁰ Zâu Yê-su năngx coong, “Nâyx Stingx oix cloon woax stingx tih bopc zax, Nâyx nomz Côkz oix cloon woax nomz côkz panx zax. ¹¹ Năngx naih lauh đoif gungh nib tongf lub nzongf, lauh nomz Stâyz-phangz, nyâub sab năngv. Cloon tumx staiz nanc nyăngz gumc, Cloon Jix-caox njingc nyăngz dlayc tăng woa gungh hynđ seetb taih cumh nzav nzongf. ¹² Nâyx đomc dlayc nyăngz noib lav max zengx seetb taih, Munh oix zoz nyâuh ninyh ayx peo hoiđ nyâuh, yâuc phunz nyâuh zuc ninyh yămz nzauh, nyâuh zuc ninyh yămz songx Hungh pâu nyăngz quanz cah đangc, wâyc zuc nyâuh ayx yaz nyăngz stâyb-sây.” ¹³ Nyâuh nzăngđ naih congv lănv cuđ jeenx ayx zanyx manyf. ¹⁴ Nyâuh yâuc max nongc numđ stauh tauv woax zanyf six coong laix.” ¹⁵ Wâyc zuc yaz oix phunz nyâuh nyăngz nzeetx naih njaiz, Naih tongb-manyh, phunz nyâuh nyăngz Yônz zaz max naih woac coong tuz Hingh nyâuh. yâuc max naih woac tauz.” ¹⁶ Nyâuh nyăngz Nzif Pha Yâuf-pez jeenb, oix maic nyâuh, naih phanx nyâuh zuc nănh stiz tayx tayc. ¹⁷ Wâyc yaz songx munh oix hănđ nyâuh.” ¹⁸ Six nyâuh nyăngz pyây đongz yâuc max wangb ah stynz stâyb.” ¹⁹ Nyâuh năngđ tanyđ tuz tauv tauh, nyâuh nyâuh nyăngz mengc songđ tuz Njâuv” ²⁰ Nyâuh phătc pengh wâyh Yê-lu-sa-lem Stengv woax zanyf, nyâuh songđ pâyz tuz stengv cayx zuc mêtc stutc nzuf nyăngz săngx huđ tauv gôh. ²¹ Woax zanyf yămz Yu-đê Stengv woax đomc oix zuc tyuv staox zoongz, yămz Stengv cah njaf oix zuc tyuv seetb stengv cungh ngwoaic, Yămz stengv cungh ngwoaic woax đomc max tuz nzac Stengv lauf.” ²² Wâyc zuc nâyx đomc six tingc stoif nyăngz noib tauv, oix phunz muif hungđ seetb taih toix nzuf Canyx-Stâub coong nyăngz woac. ²³ Yămz woax đomc noib, Munh nzif naih stynh cloon naih sây stăm hopb nu nyăngz munh nzif seenz dlauc wâyb nzongf gôh. Nâyx nomz stâyz-phangz zuc staiz nanc wâyb, yâuc zuc Tênb-Hungh hănđ, songđ tingc nâyx đomc munh nyăngz Stoif.” ²⁴ Naih đomc zuc nzuc đao tayx tayc, Naih đomc zuc gutb nzâyz ninyh tauv manf Côkz, Yê-lu-sa-lem Stengv zuc đâuf zaic tuz tauv nănh stiz nyăngz săngx huđ pong stâuv.” ²⁵ Woax zanyf bah noiđ lav stingz tau, oix hynđ seetb jix-caox, Gungh-đi manf stingx munh stauh tuz tauv tay, nyâyh max plongx laiv, coiđ yâuc toc pumh tuz buib nzongf. ²⁶ Munh cumh nzav tuz muôngf nzuf, Nănh stiz cumh nzav yămz Gungh-đi seetb taih nyăngz dlayc, wâyc zuc yămz gungh naih jab naih lanyf nyăngz tync yâuc đănz tongc nzuf.” ²⁷ Woax zanyf nănh stiz songđ phătc yaz bamh munh nyăngz toonz, Naih jab naih lanyf cloon Gwăngz-eng tăng woa Vănx hynđ nzac taih. ²⁸ Nyâuh phătc nâyx đomc dlayc quef coonz seetb taih, nyâuh seenz zuc nyoongz quef stâuđ năngx zac zaub mynb mangc staox Gungh ninyh. Wâyc suc nyâuh nyăngz săngx huđ tauv stătx nzof gôh.” ²⁹ Zâu Yê-su năngx coong nâyx tyuh woac pây phunz Nănh stiz mungv. Nănh lănv coong, “Mangc bef! Vănx tauh njăngx cloon muif hungđ njăngx!” ³⁰ Phătc njăngx seetb tunb goib noomh gunx, nyâuh songđ pâyz tuz cayx tauv hakc quayx gôh.” ³¹ Lauf năngđ naz, nyâuh phătc nâyx đomc dlayc seetb taih, nyâuh songđ pâyz tuz Tênb-Hungh taih ayx Zâu munh nyăngz noib tauv stătx gôh.” ³² Yaz coong seenz bux nyâuh, Nâyx nzêuh munh quaix stâyv max zengx nzuf, Nâyx đomc dlayc songđ seetb taih gôh.” ³³ Gungh cloon nib oix quaix nzuf, Six yaz nyăngz woac stâyv quâyx yămz.” ³⁴ Seenz zuc canyz nyâuđ buôngh, Max nongc nyâyh nhlync pêu hopb bynz, yâuc wâyc stâyv sangc nyăngz jau quenđ nyâuđ, Cumh nzav woax noib oix lênh dlih taih tauv năngđ langb ploz nâyx tekb nyâuh. ³⁵ wâyc zuc woax noib six tauv nzêux Nây gungh munh muif đoif.” ³⁶ Nyâuh six zuc muif dlih buôngh Stymz clo Zâu zu, jođ sađ pôz Phunz nyâuh naih jab hayh tanyđ tuz Hingh seetb taih nyăngz dlayc. yâuc Stâuđ wăn yămz bamh munh nyăngz toonz cah đangc.” ³⁷ Zâu Yê-su bah noib zax Nănh six yămz woa layf paix toongh nzaox munh, six tauv gungh nzămc, Nănh seetb stengv cungh ngwoaic ninyh yămz woa ô-liu zoongz.” ³⁸ Muif noib gungh Gwăngz songx munh quef njâu ninyh layf paix pyau mungv nănh nzaox.”