¹ Quaix max ănz nzu piny nyăngz stêtz, Naih ah nomz bux hipđ ayx pyeenv Mengc stêtz.” ² Stayb munh pyây cloon nzaox gâyf Stênx stengb oix pinyx lov jau zoz Zâu Yê-su tayx, Six nănh stiz cumh nzav songx Munh.” ³ Woax zanyf Sax-tanx nzac Yu-đatc nyăngz nyâuđ, woax tauh Yu-đatc Munh hipđ ayx I-sa-ca-li-ôtv, woax đomc săpc nyâyc tauh stâyb-sây ah tauh. ⁴ Yu-đatc songđ ninyh lov stayb munh pyây cloon leđ layf paix pyau woax đomc pengz sangv gwoangh, ayx laix hayh zoz Zâu Yê-su jaoz phunz nănh stiz.” ⁵ Woax đomc munh seenz numđ nyađ nzongf, nănh stiz songđ nhlimc nzeetx phunz nyanh nănh.” ⁶ Yu-đatc songđ lov congv păngc songx munh max yămz nyăngz năngx huđ zoz Zâu Yê-su paoz phunz nănh stiz.” ⁷ Quaix max ănz nzu piny nyăngz pyeenv mengc stêtz, six zuc tayx pa-jiz yungh nhlync woax tonf năngv nyăngz stêtz.” ⁸ Zâu Yê-su paiđ Phê-e-rơ sloon Giăng ninyh, “Bux nănh stiz coong, “nyâuh ninyh bênc pyeenv mengc stêtz nyăngz năngv phunz pănhstiz tinyh đoih nhlync bef!” ⁹ Nănh stiz naic, “Stâyb pha oix nongc buz yămz laiv tix nhlync? ¹⁰ Nănh tauz, “nyâuh nzac stengv ninyh cănh naih ah lanh munh nzif đamz ah nomz nib engz womz, woax tauh munh nzac toix sênz pyau, nyâuh bix lêpc nănh nzac woax sênz pyau gôh.' ¹¹ Yâuc zuc naic pyau Zâu, “Stênx stengb naic, Nănh cloon nănh nyăngz stâyb sây buz, yămz laiv hoongv pyau bênc nhlync pyeenv mengc stêtz tuz loz? ¹² Pyau Zâu cănh yeenv nyâuh ninyh nuz ah hoongv pyau quăng nzongf, muif hungđ naih dloih, Đaih mâyf tăngx, nyâuh bix yămz woa bênc nhlync gôh. ¹³ Nănh stiz ninyh songđ phătc muif hungđ dlayc seetb taih toix nzuf Zâu Yê su coong nyăngz woac. Nănh stiz songđ yămz woa bênc nhlync quaix pyeenv mengc stêtz.” ¹⁴ Tauv nhlync woax zanyf, Zâu Yê-su cloon Nănh nyăngz Stâyb-sây buz songđ staox hynh nhlync năngv.” ¹⁵ Nănh coong bux stâyb-sây buz, “Yaz max zengx zuc zanyc zâuđ, Yaz seenz oix cloon nyâuh songc nhlync nâyx tonf năngv đangc. ¹⁶ Yaz lănv bux nyâuh, blătc nây ninyh yaz max nhlync quaix pyeenv mengc stêtz nyăngz năngv nzof gôh. zu tauv nâyx tonf năngv nyăngz seenz gâyf tuz clakx-clunh nzuf, Six Tênb-Hungh taih ayx Zâu cun munh nyăngz săngx huđ, Yaz nzăngđ năngx tuz nhlync. ¹⁷ Coong nzuf, “nănh zoz zan taih sâuf Zâu yâuc coong, “Stipx nâyx nomz zan ninyh tinyh tanb hopb lanh tikx. ¹⁸ Yaz bux nyâuh, Blătc nây yaz max hopb nây tungh côh womz nzof gôh, zu tauv Tênb-Hungh taih ayx Zâu cun munh yaz nzăngđ hopb. ¹⁹ Nănh zoz nomz nzu taih Sâuf hâuđ watz phunz stâyb sây buz yâuc coong, “Nây six yaz nyăngz stynb a, wâyc nyâuh yaz zuc stêtb mengc, nyâuh six zuc năngđ nâyx ayx wâyc săngx tauv yaz.” ²⁰ Nhlync nzu tuz, Nănh nzauf nomz zan tungh côh womz zan taih coong, “Nâyx nomz zan womz six nongc yaz nyăngz samđ njăpc quaix săngb nhlengc woac, Six wâyc nyâuh yaz zuc njâuc samđ seetb taih. ²¹ Six oix maic yaz woax tauh, Cloon yaz tăpx puf songc nây đaih mâyf cah zâyc.” ²² Yaz bamh munh nyăngz toonz oix zuc âyz Tênb-Hungh tingc taih nyăngz gâyf quaix stâyv, Six maic yaz woax tauh lauf zuc zâuđ." ²³ Stâyb sây buz lanh naic lanh jađ, Nănh stiz toix tauh ayx nâyx đomc dlayc seetb taih. ²⁴ Stâyb sây buz nzengz mangc jađ, Yămz nănh stiz mungh tongx toix tauh tuz ayx năngx lub têx.” ²⁵ Zâu Yê-su bux nănh stiz, Đâuf nyăngz Hungh, ayx quanz cun pec Stingx woax đomc, Pec stingx hipđ nănh stiz ayx stăngc munh nyăngz munh.” ²⁶ Six nyâuh max hopđ zuc ayx năngđ nâyx, nyâuh toix tauh ayx năngx lub quaix woax tauh, Six năngđ ayx năngx stăm quaix woax tauh, toix tauh ayx pyây six năngđ ayx cumh pâuz nyăngz munh nâyx.” ²⁷ Ah lanh stâyv woa hynh, ah lanh bênc năngv phunz, Nâyx iz tauh toix tauh ayx năngx lub têx? Stâyv woa Nhlync năngv woax auh max zâyf mah? Six yaz yămz nyâuh mungh tongx bokc dlic nyâuh cayx năngđ nâuh munh nâyx.” ²⁸ Yaz pongh zâuđ nyâuh yâuc cloon yaz yămz max quanyf yaz. ²⁹ Yaz nyăngz Pha, Năngđ laix zoz nomz Côkz jaoz phunz yaz, Yaz yâuc năngđ woa nâyx zoz nomz côkz jaoz phunz nyâuh. ³⁰ Six wâyc phunz nyâuh yămz yaz nyăngz côkz cloon yaz songc hynh nhlync năngv, Nzof nyâuh songđ tuz stâyv săpc nyâyc nomz đaih mâyf Stămđ săpc nyâyc stingx I-sa-la-ên Munh.” ³¹ Si-môn lex! Si-môn! Mungv bef! Sax-Tanx naic stâyv nyâuh, cayx năngđ munh nyumv byauh zayz zub nâyx. ³² Six yaz songđ stăngc nyâuh clo Zâu phunz nyâuh naih seenz stymz stâuđ tuz wăn, Phunb đangz taih lov yaz. Nyâuh six zuc stăngc tauv nyâuh nyăngz Yâuf pez hayh zeen tuz wăn.” ³³ Six tah claof tauz coong, “yaz nyunc cloon Zâu songc yămz nzauh, Yaz yâuc nyunc cloon mâyh zuc tayc." ³⁴ Zâu Yê-su coong, “Phê-e-rơ lex! Yaz bux mâyh, Nâyx munf zayz max zengx ayx caix, Mâyh quanyf yaz pôz hâyđ. Mâyh pyeenv coong mâyh max pâyz yaz pôz hâyđ” ³⁵ Zâu Yê-su naic stâyb sây buz, “Yaz paiđ nyâuh ninyh woax zanyf, nyâuh max tuz nzâyz nyanh tic, Max tuz tapc Stub, nyâuh năngx sămv toix lungđ max? Nănh stiz tauz, “Max sặmv lungđ nzof gôh.” ³⁶ Nănh zâyf bux, “Six nâyx zanyf nyâuh toix laiv tauh naih nyanh tic lungđ six zuc nzâyz ninyh, Toix tauh max naih nzuc đao, six zuc Zay cungh ngwoaic yămc gwuyz maic nongc maif ah zungz nzuc.” ³⁷ Canyx-Stâub ja coong, “Nănh zuc stunx cloon Stoif -munh tinyh năngđ. (Ê-Sai 53:12) Yaz bux nyâuh, Nâyx zâux woac oix yămz yaz seetb taih. Songđ seenz seetb taih gôh." ³⁸ Stâyb-sây buz coong, “Mangc geh! Nây năngx naih iz zungz nzuc đao. Zâu Yê-su tauz, “caux nzof gôh.” ³⁹ Zâu Yê-su seetb stengv ninyh woa cah-lanv zoongz, Stâyb sây buz yâuc lêpc nănh ninyh.” ⁴⁰ Tauv woa nomz tync, Zâu Yê-su bux Nănh stiz, “nyâuh six zuc Clo Zâu Tênb-Hungh, Max nongc phunz nyâuh pongh zuc stâyv nyăngz dlayc.” ⁴¹ Coong nzuf, “Nănh cănh ninyh ah đoif tync cayx năngđ munh ôx ah đitb njauz Côz-côz ha, Songđ quâyc nzac Clo Zâu. Nănh coong, ⁴² “Pha lex! Six coong âyz Pha nyăngz âyx, Jođ Pha zoz seetb yaz zuc hopb woax nomz tanyđ Zâuđ nyăngz zan gâyh yaz, Six max tuz âyz yaz nyăngz âyx. six zuc âyz Pha nyăngz âyx. ⁴³ Naih ah tauh Stynz-munh hynđ seetb taih pâu jab phunz pănh.” ⁴⁴ Woax zanyf nănh numđ Stauh stymz nzongf, Songđ seetb jab clo Zâu, Nănh seetb hănđ nekx nzac nib ninyh săngh nomz săngh nomz têx, Năngđ samđ nâyx. ⁴⁵ Clo Zâu pac, nănh phunb đangc lauf phătc stâyb sây buz mâyh njoomh nzuf, wâyc zuc nănh stiz numđ stauh nzongf.” ⁴⁶ Nănh bux stâyb-sây buz, nyâuh săngh laix bix Năngx phâyx lâyc mâyc njoomh nâyx yeh? nyoongz quef clo Zâu max phunz nyâuh pongh zuc stâyv nyâuđ nyăngz dlayc.” ⁴⁷ Nănh coong woac max zengx pac, Yu-đatc ênz ah peob munh đungx taih tauv woa, Săpc nyâyc tauh stâyb sây ah tauh, Nănh nyăngz bux hipđ ayx Yu-đatc, Nănh taih tauv stătx tomz Zâu Yê-su.” ⁴⁸ Six Ye-su naic coong Yu-đatc lex! Mâyh tomz yaz bamh munh nyăngz toonz, wâyc cayx zoz yaz maic mah?” ⁴⁹ Cloon Zâu Yê-su yămz woa cah synh woax đomc Stâyb sây buz phătc nâyx đomc dlayc seetb taih nănh stiz songx naic coong, “Zâu lex! Lutz nzuc đao taih cumv nănh stiz tuz nzof sta? ⁵⁰ Woax đomc munh yămz woa lutz nzuc đao cumv zuc stayb munh nyăngz nâuh ah nomz byaoh bah noomh seetc tuih.” ⁵¹ Zâu Yê-su bux coong, “dluyh gôh! nongx gâyf cumv gôh! Nzof nănh lupc zany stayb munh nâuh nyăngz bah noomh gongx phunz nănh.” ⁵² Six Zâu Yê-su bux taih zoz nănh woax đomc stayb munh, Cloon cun Hungh tync nyăngz pengz pyây cloon munh côx, nyâuh phătc yaz năngđ stac munh nyâuh bix nzâyz nzuc đao cloon njăngx cănv taih zoz yaz mah? ⁵³ Yaz muif noib cloon nyâuh yămz woa layf paix toongh, nyâuh yâuc max zoz yaz? Six nâyx zanyf nyâuh nyăngz Săngx huđ tauv, Nzămc nyăngz jab taih cun nyâuh gôh.” ⁵⁴ Nănh stiz zoz Zâu nănh nzâyz ninyh tauv stayb munh nyăngz pyau, Phê-e-rơ yâuc lêpc ninyh gâyh Côz-côz ha.” ⁵⁵ Yămz woa singh cah njaf mungh tongx woax đomc pengz cuyx ah đauc tâuf tinyh đoih nzomf woa siz tâuf, Phê-e-rơ yâuc ninyh cloon Nănh stiz yămz woa siz tâuf.” ⁵⁶ Naih ah tauh munh nzif pâuz phătc Phê-e-rơ Stâyv woa tâuf đauc synh, tâuf Gwăngz eng zuc Phê-e-rơ, woax tauh munh nzif pâuz mangc phătc nănh yâuc coong, “Lâyc tauh ya munh, lauf cloon woax tauh ya munh yămz.” ⁵⁷ Six Phê-e-rơ pyeenv coong, “ô lex! Yaz max pâyz woax tauh munh đêh.” ⁵⁸ Ah zanyf têx, Pitc lanh taih phătc Phê-e-rơ Nănh coong, “Mâyh lauf cloon woax tauh ya ayx ah peob đev! Six Phê-e-rơ tauz coong, “max zâyf đêh!.” ⁵⁹ Ah săngx huđ quaix, Năngx naih ah tauh taih coong, “lâyc tauh ya seenz zâyf cloon woax peob munh ah lanh, wâyc zuc nănh six Ga-li-lê munh.” ⁶⁰ Six Phê-e-rơ tauz, “Mâyh lâyc tauh ya munh lex! Yaz seenz max pâyz tuz mâyh coong lungđ. woax zanyf Phê-e-rơ năngx coong woac, Zayz songđ ayx caix.” ⁶¹ Zâu songđ wynb lauf mangc Phê-e-rơ, nănh songđ săngx tauv Zâu coong quaix đangc nyăngz woac, “Nâyx munf zayz max zengx ayx caix mâyh quanyf yaz pôz hâyđ.” ⁶² Phê-e-rơ songđ seetb cungh ngwoaic ninyh haoh tuz caux Stâuv.” ⁶³ Jămđ Zâu Yê-su woax đomc munh, Jeetx nănh yâuc bopc Nănh.” ⁶⁴ Nănh stiz pongz nănh nyăngz mâyc yâuc naic nănh coong, “ayx stênx stengb bix tongh jađ! Toix mănv bopc mâyh? ⁶⁵ Nănh stiz năngx coong đungx hungđ woac peo nănh.” ⁶⁶ Gungh gwăngz woax zanyf, Yiu-tai munh côx, Cloon stayb munh pyây, Cloon nzaox Gâyf Stênx Stengb căpx dlonf sangv gwoangh, nzâyz Zâu Yê-su ninyh yămz nănh stiz nyăngz huyđ-toongh cah đangc.” ⁶⁷ Nănh stiz coong, “Six coong mâyh năngđ seenz zâyf Njâuv Zâu bix lănv bux buz geh! Zâu Yê-su tauz, “Six coong yaz hănđ lănv lungđ bux nyâuh, nyâuh lauf max zeen yaz.” ⁶⁸ Six coong yaz hănđ naic nyâuh ah zâux woac nyâuh lauf max tauz yaz.” ⁶⁹ Six blătc nây yaz bamh munh nyăngz toonz songđ tuz stâyv naih quyênh woax tauh Tênb-Hungh nyăngz byaoh phanx.” ⁷⁰ Nănh stiz tinyh đoih naic coong, “Mâyh ayx Tênb-Hungh nyăngz toonz naz mah? Zâu Yê-su tauz, “Toix gôh. songđ năngđ nyâuh coong nâyx gôh” ⁷¹ Nănh stiz tinyh đoih coong, “Max zâuđ nongc toix lungđ ayx zanyx manyf nzof gôh. Pănh cănh numđ nănh nyăngz nzeetx coong nzuf nzof.”