¹ Cun dlayc munh tinyh đoih nyoongz quef nzâyz Zâu Yê-su ninyh tauv Phi-latv woa.” ² Yămz woa nănh stiz cooux Zâu Yê-su, Nănh stiz coong, “Buz phătc nâyx tauh munh jaf buz nyăngz pec stingx ayx longđ, Nănh yâuc coong bux nănh stiz max Zâuđ seetb sôiv Stynh phunz Lô-ma nzêuh Hungh, yâuc năngx nzađ coong Nănh ayx Njâuv Zâu yâuc ayx Hungh. ³ Phi-latv naic Zâu Yê-su coong, “Tah mâyh seenz zâyf ayx Yiu-tai munh nyăngz Hungh yaz? Zâu Yê-su tauz, “Toix gôh songđ năngđ mâyh coong nâyx.” ⁴ Phi-latv songđ bux songx munh cloon stayb munh pyây, “Yaz zah max seetb nâyx tauh munh ayx longđ toix laiv hungđ đêh. ⁵ Six nănh stiz seetb jab hamv coong, “Nâyx tauh munh nzaox nyăngz gâyf ayx Phunz songx munh lunc nzuf, Nănh nzaox nzêux Yu-đê Stengv, Quef coonz tăng Ga-li-lê Stengv songđ nzaox tauv nâyx zanyf.” ⁶ Phi-latv numđ Nănh stiz coong năngđ nâyx, Nănh songđ naic, “Ha nâyx tauh munh nyăngz coonz six yămz Ga-li-lê yaz?” ⁷ Phi-latv pâyz tuz Zâu Yê-su Six ayx Hê-lôtv Hungh nyăngz pec-stingx, nănh songđ stungx Zâu Yê-su ninyh Hê-lôtv Hungh woa, woax zanyf Hê-lôtv Hungh năngx yămz Yê-lu-sa-lem stengv.” ⁸ Hê-lôtv Hungh sangđ phătc Zâu Yê-su, Nănh seenz numđ nyađ nzongf, wâyc zuc nănh cungb numđ munh lănv, Six nănh max zengx tuz phătc quaix laiv hâyđ, Nănh songđ mungc oix mangc Zâu Yê-su ayx jix caox njingc nyăngz dlayc.” ⁹ Hê-lôtv Hungh naic Zâu Yê-su đungx hungđ, Six nănh max tauz ah zâux.” ¹⁰ Stayb munh pyây cloon nzaox gâyf Stênx stengb nyoongz quef stâuđ woa seetb jab cooux Zâu Yê-su.” ¹¹ Hê-lôtv cloon nănh nyăngz pengz songđ mangc phătc nănh stam yâuc mađ nănh, Zoz ah byenđ nhlêuf gwuyz pâyb ănz nănh, Songđ stungx nănh ninyh Phi-latv woa.” ¹² Tăng lôx noib Phi-latv cloon Hê-lôtv Hungh, Six tinyh hănđ, Six tăng woax hâyđ staox ninyh nănh stiz nzăngđ ayx banf.” ¹³ Phi-latv êu stayb munh pyây cloon nzaox gâyf stênx-stengb, cloon quanz pâu cloon pec stingx taih căpx dlonf. ¹⁴ Coong bux nănh stiz, “nyâuh nzâyz nâyx tauh munh taih tauv yaz nâyx cooux nănh, “nyâuh coong nănh hox pec stingx lunc nzuf naz, “Nâyx zanyf nănh yămz nyâuh nây cah đangc, Yaz zah nzuf nyâuh cooux nănh woax đomc dlayc, Six max phătc nănh longđ toix lungđ nef.” ¹⁵ Hê-ôtv Hungh lauf zah max phătc nănh pamf toix lungđ, songđ stungx nănh phunb đangz lauf nây, nyâuh phătc nănh pamf Stoif, Six yaz max phătc nănh pamf lungđ jic tuz tayc nef." ¹⁶ Ha yaz phunz pengz bopc songđ pungx nănh.” ¹⁷ Muif nyăngv tauv pyeenv mengc stêtz, Phi-latv naih gâyf pungx ah tauh Stoif munh phunz pec stingx.” ¹⁸ Songx munh tinyh đoih songc ah zâux woac hamv coong, “Tayx lâyc tauh ya quanyf, Bix pungx Ba-ra-ba phunz buz” ¹⁹ Nâyx tauh Ba-ra-ba zuc yămz nzauh six wâyc nănh sêu stengv lunc, Yâuc tayx munh.” ²⁰ Phi-latv naih nyâuđ oix pungx Zâu Yê-su, Nănh songđ hamv bux songx munh.” ²¹ Six songx munh tinyh đoih zâyf hamv năngx lub têx coong, “Nzâyz nănh ninyh tingz ănz săpc đangc zax zef!” ²² Phi-latv năngx naic tah stamz hâyđ, Ha nănh ayx longđ toix lungđ Stoif?” yaz zahmax phătc nănh pamf lungđ stoif jic tuz tayx tayc đêh, yaz six phunz pengz bokc đonf songđ pungx nănh." ²³ Six songx munh songc stingb hamv năngx lub têx, ‘Nzâyz Zâu Yê-su ninyh tingz ănz săpc đăngc zax zef!” ²⁴ Phi-latv songđ zuc âyz songx munh jođ nyăngz woac ayx.” ²⁵ Nănh songđ zuc pungx sêu Stengv lunc yâuc tayx munh woax tauh phunz nănh stiz, “Năngx zoz Zâu Yê-su jaoz phunz pengz dluyh nănh stiz ayx.” ²⁶ Nănh stiz nzâyz Zâu Yê-su seetb jau ninyh woax zanyf, Pongh zuc tauh Si-den Munh, Tăng woa jêmh nzac Stengv lauf, Pengz songđ zoz Zâu Yê-su nyăngz săpc đăngc zax tăpx ănz Si-môn nyăngz bah tauh yac nănh đamz lêpc Zâu Yê-su ninyh." ²⁷ Yâuc Naih munh đungx lêpc Zâu Yê-su ninyh, Naih đomc munh nzif seenz haoh tuz caux stâuv, wâyc zuc nănh stiz hâuđ lênh nănh nzongf. ²⁸ Zâu Yê-su wynb đangz lauf coong, “Yê-lu-sa-lem Stengv nyăngz munh nzif lex! nyâuh max nongc haoh wâyc yaz đêh! nyâuh six zuc cănh haoh wâyc nyâuh nyăngz sây stunz tuz gôh.” ²⁹ Wâyc zuc săngx huđ oix tauv, Munh hayh coong, “Pou phunz max hayh yungf sây, cloon max naih sây, cloon woax đomc max naih sây hopb nu woax đomc munh nzif naih oonz loc gôh.” ³⁰ Tauv woax zanyf munh oix coong bux zoongz zâyc, “lakb taih đăpx buz zef gôh! Yâuc năngx êu zoongz zâyc lakb taih plopx buz zef gôh!” ³¹ Six coong njăngx mengz nănh stiz bix năngx ayx năngđ nâyx, Năngđ coong njăngx caođ pâyz six săngh laix gôh? ³² Nănh stiz năngx nzâyz iz tauh Stoif-munh ninyh cloon Zâu Yê-su.” ³³ Nănh stiz ninyh tauv nomz tync bux hipđ ayx pyây cub tync, Pengz zoz Zâu Yê-su tingz ănz săpc đăngc zax, Năngx tingz iz lanh stac munh ănz nănh iz lepb cah synh, Staix phanx ah lanh, byaoh phanx ah lanh.” ³⁴ Zâu Yê-su clo Zâu coong, “Pha lex! Jođ Pha quanyf nănh stiz ayx nyăngz Stoif, wâyc zuc nănh stiz max pâyz nănh stiz ayx toix lungđ.” Nănh stiz zoz Zâu Yê-su nyăngz Gwuyz taih tâu mangc jađ toix tauh zoz tuz nănh nyăngz gwuyz.” ³⁵ Songx munh stâuđ woa mangc, Six ayx lub woax đomc stayb munh jeetx nănh, “Nănh stiz coong, “Nănh hayh njâuv tuz Munh, “Six coong nănh năngđ zâyf Tênb-Hungh sên taih woax tauh jix-tuz bix cănh Njâuv nănh geh!” ³⁶ Njynh woax đomc pengz lauf Pib nănh tinyh năngđ, Songđ ninyh stătx zoz tungh côh tyu stuib phunz nănh hopb.” ³⁷ Yâuc coong mâyh năngđ seenz zâyf Yiu-tai munh nyăngz Hungh, Bix cănh Njâuv mâyh geh!” ³⁸ Yămz woa săpc đăngc zax yămz woa pyây cah zâyc ja woax đomc đăngc coong, “Nây Six Yiu-tai Munh nyăngz Hungh.” ³⁹ Cloon Zâu Yê-su zuc tingz woa iz tauh Stoif-munh naih ah tauh coong pib Zâu Yê-su, “Mâyh max zâyf ayx tauh Njâuv Zâu mah? Njâuv mâyh cloon buz geh!” ⁴⁰ Six naih ah tauh mađ nănh coong, “Mâyh max cumh nzav Tênb-Hungh haz? Pănh tinyh đoih zuc tingc Stoif tayc six jic tuz gôh.” ⁴¹ Pănh jic tuz zuc tingc Stoif, wâyc pănh nyăngz Stoif, Six nâyx tauh Nănh lôx max ayx saih lungđ nec.” ⁴² Nzof nănh năngx coong bux Zâu Yê-su, Tauv mâyh nzac tauv Tênb-Côkz woax zanyf jođ săngx tauv yaz.” ⁴³ Zâu Yê-su bux nănh coong, “Yaz coong seenz bux mâyh, “Nâyx noib mâyh seenz tuz cloon yaz nzac Tênb-Toongh côkz gôh.” ⁴⁴ Anx têx tauv đămx noib woax zanyf, Lomc woax nomz stâyz phangz nzămc mengh nzuf, Tuz tauv pôz săngx huđ cayx nzămc.” ⁴⁵ Wâyc zuc bah noib lenf max syux Gwăngz, Yămz woa layf paix pyau woax lepz pongz zengh buyx byaif săngh iz phanx đotf cah đi.” ⁴⁶ Zâu năngx êu ah stingb lub coong, “Pha lex! Yaz zoz yaz nyăngz mengc hoonh jaoz yămz Pha nyăngz puf pongđ njaf. coong nzuf songđ siv seetc.” ⁴⁷ Naih ah tauh pengz pyây yămz woa phătc nâyx đomc dlayc seetb taih songđ tanv Tênb-Hungh coong, “Lâyc tauh seenz zâyf munh gongx gôh.” ⁴⁸ Căpx dlonf mangc nâyx đomc dlayc nyăngz songx munh phătc nâyx đomc dlayc seetb taih nănh stiz seenz numđ stauh nzongf, Songđ nyumb puf tô cah lăpc phunb đangz muf.” ⁴⁹ Cloon Zâu Yê-su tinyh zuc woax đomc munh, Năngx cloon yămz Ga-li-lê lêpc Zâu Yê-su taih woax đomc munh nzif stâuđ woa gâyh Côz-côz ha mangc nâyx đomc dlayc. ⁵⁰ Naih ah tauh munh gongx munh, Bux hipđ ayx Yô-sepv, Nănh ayx Yiu-tai munh nyăngz hôif đôngh. ⁵¹ Nănh muif dlih lêpc gongx Tênb-Hungh, yâuc zu Tênb-Hungh taih ayx Zâu cun munh nyăngz săngx huđ tauv, Nănh yâuc max cloon woax đomc cun dlayc munh sangv gwoangh ayx huđ, Zengv Zâu Yê-su, Nănh yămz A-li-ma-Thê Stengv.” ⁵² Yô-sepv ninyh lov Phi-Llatv Jođ Zâu Yê-su nyăngz quătx Stêtz.” ⁵³ Jođ tuz songđ ninyh zoz Quătx Stêtz nzac taih zoz săngb đôc buyx pêuz, nzâyz ninyh plopx ănz nomz nzăngđ stuc tuz taih nyăngz săngb stâu ngamh, max zengx ănz quaix munh tayc.” ⁵⁴ Woax noib six toix bênc tingc congz noib. nyăngz Săngx huđ tauv.” ⁵⁵ Yămz Ga-li-lê lêpc Zâu Yê-su taih woax đomc munh nzif lêpc Yô-sepv ninyh mangc stâu, yâuc mangc jađ ănz Zâu Yê-su nyăngz Stynb Stayđ ayx laix.” ⁵⁶ Mangc nzuf Nănh stiz songđ muf bênc Yâuh đangz, oix nzâyz ninyh njămh ănz Zâu Yê-su nyăngz Stynb stayđ. Tauv tingc congz noib nănh stiz songđ âyz Đoouc-lif gâyf ayx.”