4 ¹ A-đam cloon nănh nyăngz au Ê-wa songc nhlync yămz songđ naih stynb, nănh stengb tuz ah tauh toonz taih nănh oonz bux hipđ ayx Ca-in, nănh songđ coong, "Hâuđ Ye-hô-wa stăngc yaz songđ zâyx tuz ah tauh munh taih. ² Quaix đangz nănh năngx stengb tuz Ca-in nyăngz yâuf A-bên. A-bên lub taih nănh six yungf Pa-jiz yungh. nzof Ca-in six ayx njăngx ayx njingh. ³ Naih ah noib Ca-in nzâyz nănh nyăngz jengz zongx taih pungx hođ phunz Zâu Ye-hô-wa. ⁴ Six A-bên zoz nănh yungf woax đomc yungh zeetx gwâyc cloon mâyb taih pungx hođ, Zâu Ye-hô-wa songđ stipx A-bên congx nyăngz phănc. ⁵ Six Ca-in pungx hođ nyăngz phănc Tênb-Hungh max pong nyâuđ stipx, Ca-in songđ numđ nhleenx mynb nzămc mengh. ⁶ Zâu Ye-hô-wa naic Ca-in, mâyh săngh laix bix numđ nhleenx mynb nzămc mengh nâyx yeh? ⁷ Six coong mâyh năngđ ayx tuz hođ yaz six numđ nyađ stipx mâyh nyăngz muif hungđ, six mâyh ayx max hođ stoif songđ taih tapc tauv mâyh nyăngz jengh cah đangc, ênz mâyh ayx stoif, mâyh songđ zuc buc nănh." ⁸ Ca-in coong bux nănh nyăngz yâuf A-bên, pănh ninyh woa njingh gôh, stiz tauv woa njingh Ca-in songđ jâu nănh nyăngz yâuf tayx quanyf. ⁹ Zâu Ye-hô-wa naic Ca-in mâyh nyăngz yâuf A-bên lah? Ca-in tauz, yaz six max pâyz nef, yaz six zuc jămđ yaz nyăngz yâuf mah? ¹⁰ Zâu Ye-hô-wa coong ănz Ca-in, mâyh ayx lungđ dlayc nâyx yeh? mâyh yâuf nyăngz samđ tăng woa nib đi pumh staox taih cooux tauv yaz nzof gôh. ¹¹ Nâyx zanyf mâyh six zuc zaux, nib songđ moongz quef quaf nzeetx naz mâyh nongc puf tayx mâyh yâuf nyăngz samđ nzof gôh. ¹² Tăng nây staox ninyh mâyh ayx njăngx ayx njingh nib yâuc max bêux laiv hungđ phunz mâyh, mâyh six zuc pênx yâuh yangb nyăngz munh yâuh nây gungh đi. ¹³ Ca-in coong ănz Zâu Ye-hô-wa, mâyh tingc yaz nyăngz stoif niđ tuz nâyx yaz max nzâyz tuz đêh. ¹⁴ Mangc geh! tăng nâyx noib mâyh luiđ yaz gâyh nâyx cuyb nib tâyc, yâuh yangb jămc lâyc gungh đi ninyh gâyh mâyh nyăngz cah đangc, ninyh tauv laiv tix munh phătc yaz, nănh stiz songđ oix tayx yaz." ¹⁵ Zâu Ye-hô-wa tauz nănh, max woangb đêh, laiv lanh tayx Ca-in six zuc clao yônz nhlic hâyđ, Ye-hô-wa songđ tăpb yeenx ănz Ca-in nyăngz stynb hoouđ nănh, phunz laiv lanh phătc nănh songđ max jâu nănh. ¹⁶ Ca-in songđ wynb mynb ninyh gâyh Zâu Ye-hô-wa, ninyh yămz nôtv stâyz phangz, Ê-đen tongz phanx. Ca-in nyăngz sây stunz ¹⁷ Ca-in cloon nănh nyăngz au songc yămz, nănh nyăngz au songđ naih stynb. stengb tuz Hê-nokv, Ca-in zâyv ah nomz stengv, nănh oonz bux lêpc nănh nyăngz toonz hipđ ayx Hê-nokv. ¹⁸ Hê-nokv tuz ah tauh toonz hipđ six Y-ratv, Y-ratv ayx Mê-hu-da-ên nyăngz pha, Mê-hu-da-ên six Mê-tu-sa-ên nyăngz pha, Mê-tu-sa-ên six Lê-mekv nyăngz pha. ¹⁹ Lê-mekv zoz iz lanh au, ah lanh six hipđ ayx A-đa, ah lanh six hipđ ayx Si-la. ²⁰ A-đa stengb tuz Gia-bany. Gia-bany six yămz đupx njiuh yungf stanyh hauđ woax đomc munh nyăngz stung zez tâuh. ²¹ Gia-bany nyăngz yâuf Giu-bany six ayx queetb lanyh njămh cloon byom nzeetc stangc woax đomc munh nyăngz stung zez tâuh. ²² Si-la nyăngz phănc Tu-bany Ca-in six ayx stangc nyăngz munh, nongc tongh, cloon njab ayx muif hungđ, Tu-bany cloon Ca-in nyăngz ô bux six hipđ ayx Na-a-ma. ²³ Lê-mekv coong bux nănh iz lanh au A-đa cloon Si-la, nyâuh mungv yaz coong bef! yaz tayx ah lanh munh gunx, wâyc zuc nănh hoiđ yaz zuc sangf munz nzongf. ²⁴ Six coong Ca-in năngđ tuz clao yônz nhlic hâyđ, Lê-mekv six tuz clao yônz jeetx săpc jeetx hâyđ." Sêtv cloon Ê-nôkv ²⁵ A-đam cloon nănh nyăngz au songc yămz, nănh nyăngz au năngx stengb ah tauh toonz taih tymb, nănh oonz bux hipđ ayx Sêtv, nănh nyăngz au songđ coong, "Tênb-Hungh năngx phunz yaz naih ah lanh toonz taih stipx A-bên, zuc Ca-in tayx tayc woax tauh. ²⁶ Sêtv stengb tuz ah lanh toonz taih nănh oonz bux hipđ ayx Ê-notv, Tăng woax zanyf munh songđ caođ Ye-hô-wa nyăngz bux canyx bongc nănh. A-đam nyăngz sây stunz