3 ¹ Zâu Ye-hô-wa Tênb-Hungh zâyx taih nyăngz muif hungđ six nangz năngx lemđ quaix muif hungđ. Nangz taih naic tauh munh sab coong, "Zâu Ye-hô-wa Tênb-Hungh zăpx bux nyâuh yămz nây đah wynb cah njaf muif hungđ njăngx pyâu nyâuh max tuz nhlync naz mah? ² Woax tauh munh sab tauz nangz coong, "Yămz nây đah wynb cah njaf muif hungđ njăngx pyâu buz nhlync tuz lêc. ³ Six Zâu Ye-hô-wa Tênb-Hungh zăpx bux buz coong, "Yămz woa đah wynb mungh tongx woax zâyz njăngx pyâu nyâuh max tuz nhlync, yâuc max tuz tongf tauv, nyâuh năngđ tongf zuc nyâuh six zuc tayc. ⁴ Nangz coong bux tauh munh sab, nyâuh max tayc đêh. ⁵ Wâyc zuc Zâu Ye-hô-wa Tênb-Hungh pây tuz nyâuh năngđ nhlync, nyâuh six hayh nyâyh tuz tongb, hayh pâyz tuz gongx, pâyz tuz huđ năngđ Zâu Tênb-Hungh nâyx. ⁶ Woax tauh munh sab mangc woax zâyz njăngx pyâu songđ phătc quai nzongf, nănh nyâyh taih, six coong năngđ nhlync bix lemđ têx, yaz songđ nhlync, nănh songđ zoz taih nhlync, yâuc clôc phunz cloon nănh nyăngz langh nhlync. ⁷ Nănh stiz nhlync blătc, songđ hayh nyâyh tuz tongb, nănh stiz songđ pâyz tuz blănf stynb yămz, nănh stiz songđ zoz njăngx noomh taih nongc tăng stynb. ⁸ Woax noib gungh cayx nzămc, nănh stiz numđ Zâu Tênb-Hungh taih coong woac yăngh woa đah wynb cah njaf quaix ninyh quaix lauf, woax tauh munh baox cloon nănh nyăngz au tyuv nzac woa njăngx plungz ninyh mem Zâu Ye-hô-wa Tênb-Hungh. ⁹ Zâu Ye-hô-wa Tênb-Hungh songđ êu tauh munh baox, nănh naic coong, "Sây lex mâyh yămz laiv? ¹⁰ Woax tauh munh baox tauz, buz numđ Mâyh coong woac yămz nây đah wynb cah njaf, buz numđ cumh nzav, buz bix tyuv mem, wâyc zuc buz six blănf stynz yămz. ¹¹ Tênb-Hungh naic, mănv bux bây nyâuh pâyz nyâuh blănf stynb yămz? sangx đâuc nyâuh nhlync zuc yaz zăpx max phunz nyâuh nhlync woax zâyz njăngx pyâu nzof gôh stađ? ¹² Woax tauh munh baox tauz coong, "Mâyh ênz taih phunz cloon yaz yămz nây woax tauh munh sab, nănh phunz woax zâyz njăngx pyâu yaz, yaz bix nhlync blătc nzof gôh. ¹³ Zâu Ye-hô-wa Tênb-Hungh naic woax tauh munh sab coong, "Mâyh ayx lungđ dlayc nâyx yeh? woax tauh munh sab tauz coong, "woax tauh ya nangz jaf yaz, yaz bix nhlync nzof gôh."* Tênb-Hungh tingc stoif ¹⁴ Zâu Ye-hô-wa Tênb-Hungh coong bux woax tauh nangz, "Mâyh săngh laix bix ayx năngđ nâyx yeh? mâyh six zuc zaux, yeetx stong stanyb hauđ yămz nây jêmh, six cungb mâyh zuc nongc nyâuđ lunb quaix nây minc, mâyh năngx săngh sax stoiz, mâyh six zuc nhlync nib bungb. ¹⁵ Yaz six phunz mâyh cloon nâyx tauh munh nzif săngh tinyh hănđ, yâuc cloon nănh nyăngz sây stunz săngh yônz zaz. Nănh nyăngz sây stunz six oix bopc mâyh pyây yungc nzuf, nzof mâyh yâuc oix tăpc nănh stiz nyăngz staux nzengz. ¹⁶ Tênb-Hungh coong bux woax tauh munh sab, tauv mâyh naih stynb nyăngz săngx huđ yâuc zuc tanyđ zâuđ, nzof tauv đutb stynb nyăngz săngx huđ yâuc zuc tanyđ munz, mâyh yâuc zuc mungc mâyh nyăngz langh cun mâyh." ¹⁷ Tênb-Hungh coong ănz A-đam, "Wâyc zuc mâyh mungv mâyh au nyăngz woac, nhlync yaz zăpx max phunz nhlync woax zâyz njăngx pyâu, nib songđ zuc zaux wâyc mâyh, mâyh ah stâyv munh six zuc pangc nib ayx cumh pâuz zâuđ nzăngđ tuz nhlync. ¹⁸ Nib songđ wâyc mâyh seetb mađ nzym. mâyh yâuc zuc nhlync tăng nib bêux seetb taih nyăngz njayz mađ mengz. ¹⁹ Mâyh yâuc năngx zuc ayx cumh pâuz zâuđ seetb hănđ nzăngđ tuz nhlync, ayx tuz tauv mâyh nzuf stâyv phunb đangz muf clao nib, wâyc zuc mâyh six nib pênx taih, mâyh yâuc năngx zuc pênx ah hâyđ nib. ²⁰ A-đam oonz bux phunz nănh nyăngz au hipđ ayx Ê-wa. **Wâyc zuc nănh six ayx gungh đi munh nyăngz nzif. ²¹ Zâu Ye-hô-wa Tênb-Hungh nongc stanyb hauđ đupx ayx gwuyz quav phunz A-đam cloon nănh nyăngz au Ê-va zuz. A-đam cloon Ê-va zuc luiđ seetb đah wynb ²² Zâu Ye-hô-wa Tênb-Hungh năngx coong, "Nâyx zanyf woax lanh munh six cayx năngđ pănh nâyx, pâyz tuz gongx pâyz tuz huđ, yaz songđ max phunz nănh stiz stungb puf lumz zoz săngh mengc nyăngz pyâu nhlync. ²³ Zâu Ye-hô-wa Tênb-Hungh songđ luiđ nănh stiz seetb Ê-đen đah wynb cungh ngwoaic ninyh ayx njăngx ayx njingh, six nongc zâyx nănh taih woax đomc nib. ²⁴ Zâu Ye-hô-wa Tênb-Hungh luiđ nănh stiz seetb ninyh blătc, Phunz Zê-lu-bim leđ woa tongz phanx nyăngz Ê-đen đah winb jengh. năngx naih ah zungz tâuf nzuc đao leđ woa pyâyz phangz jau max phunz nănh stiz nzac ninyh zoz săngh mengc nyăngz pyâu nhlync. Zeetx sênz pyau munh