2 ¹ Gungh nib, cloon naih mengc săngh nyăngz muif hungđ nănh zâyx tuz naih dloih nzuf. ² Tauv tah jeetb noib, Tênb-Hungh sec Nănh ayx nyăngz muif hungđ cumh pâuz, tah jeetb woax noib songđ sec nănh ayx nyăngz cumh pâuz hitb conv. ³ Tênb-Hungh sađ pôz phunz toix tah jeetb woax noib, phunz woax noib pênx đăngb jengh nyăngz noib, wâyc zuc Nănh ayx tuz dloih nzuf nănh nyăngz cumh pâuz, nănh songđ sec hitb conv. Zeetx lanh bamh munh ⁴ Nây six Zâu Tênb-Hungh zâyx gungh zâyx nib nyăngz woac six năngđ nâyx, Zâu Ye-hô-wa, zâyx gungh zâyx nib woax zanyf. ⁵ Nib mync max zengx naih munh ayx njăngx ayx njingh, mađ yâuc max zengx bêux nyah, wâyc zuc Zâu Ye-hô-wa Tênb-Hungh max zengx phunz bungc lub nây nib mync. ⁶ Six cungb phunz bungc đay lunc nzêux nây nib mync. ⁷ Zâu Ye-hô-wa Tênb-Hungh zoz nib bungb taih neen pênx tauh bamh munh. yâuc pyom siv ănz nzac bah zoongz ninyh phunz nănh naih mengc săngh. ⁸ Zâu Ye-hô-wa Tênb-Hungh songx ah nomz Ê-đên đah wynb yămz woa tongz puôngz, yâuc zoz Nănh zâyx taih woax tauh munh jaoz phunz nănh yămz woa. ⁹ Zâu Ye-hô-wa Tênb-Hungh yâuc phunz muif hungđ njăngx tăng nib đi bêux seetb taih săngh pyâu quai nzongf, nhlync yâuc cuđ, yămz woa đah wynb mungh tongx naih iz zâyz njăngx pyâu, naih ah zâyx six yungf mengc nyăngz pyâu, naih ah zâyz nhlync six hayh phunz munh pâyz tuz gongx pâyz tuz huđ. ¹⁰ Yămz woa Ê-đên stâyz phangz naih ah nomz coiđ womz njâuc nzac woa Ê-đên đah wynb cah njaf ninyh, zav săngh pyâyz nomz coiđ. ¹¹ Tah yeetx nomz coiđ six hipđ ayx Bi-sôn, nây nomz coiđ njâuc nzêux Ha-vi-la stâyz phangz. Yâuc naih sămz. ¹² Woax nomz stâyz phangz nyăngz sămz yâuc gongx nzongf, yâuc naih cloon njăngx stungz đangz, năngx naih cloon poou zâuz saix yămz woa. ¹³ Tah nyâyc nomz coiđ zav six hipđ ayx Gi-hôn coiđ, njâuc nzêux nzuf Cu-sơ stâyz phangz. ¹⁴ Tah stamz nomz coiđ zav bux six hipđ ayx Ti-gơ, njâuc nzac tongz phanx A-su-gơ stâyz phangz, tah stâyx nomz coiđ six hipđ ayx Ơ-phơ-ratv. ¹⁵ Zâu Ye-hô-wa Tênb-Hungh songđ zoz nănh zâyx taih woax lanh munh phunz nănh yămz woa jămđ Ê-đên đah wynh. ¹⁶ Zâu Ye-hô-wa Tênb-Hungh yâuc zăpx bux nănh coong, "Yămz nây đah wynb cah njaf muif zâyz njăngx pyâu mâyh nhlync tuz. ¹⁷ Six woax zâyz njăngx pyâu nhlync bix hayh phunz munh pâyz tuz gongx, pâyz tuz huđ woax zâyz six max tuz nhlync, six coong mâyh năngđ nhlync têx, naih ah noib mâyh six zuc tayc. Zeetx lanh munh sab ¹⁸ Zâu Ye-hô-wa Tênb-Hungh năngx coong, "Ah lanh munh cănh yămz six mâux max vâyc, yaz năngx oix zâyx ah lanh taih phanf nănh ayx toic. ¹⁹ Zâu Ye-hô-wa Tênb-Hungh songđ zoz nib taih zâyx pênx muif hungđ stanyb hauđ yămz jêmh, cloon muif hungđ đuz noc yămz đamx gungh. Nzâyz taih phunz tauh munh mangc, phunz nănh stăngc nâyx đomc muif hungđ oonz bux, nâyx đomc zuy njiênf songđ tuz oonz bux phunz nănh stiz tuz naih ah nomz bux hipđ. ²⁰ Bamh munh songđ oonz bux phunz muif hungđ stengb hauđ, cloon muif hungđ stayz nêuf njămh nzongh yămz đamx gungh, yâuc phătc bamh munh ah lanh cănh yămz six mâux max naih mănv phanf nănh ayx toic. ²¹ Zâu Ye-hô-wa Tênb-Hungh songđ ayx phunz tauh bamh munh mâyc njoomh đôz, zoz nănh ah stynz lauđ tam stung seetb taih, yâuc ayx phunz nănh nyăngz lauđ tam stung tync a stăngb đipc mungh. ²² Zâu Ye-hô-wa Tênb-Hungh nongc nănh zoz tăng tauh munh baox seetb taih woax stynz lauđ tam stung zâyx săngh ah tauh munh sab, năngx ênz ninyh tauh munh baox woa phunz nongc phanf nănh ayx toic. ²³ Woax lanh munh baox songđ coong, "Stung six yaz nyăngz stung, a six yaz nyăngz a, mâyh six tuz bux hipđ ayx munh sab (nhlangz). wâyc zuc munh sab six tăng tauh baox seetb taih. ²⁴ Wâyc năngđ nâyx tauh munh baox gâyh nănh nyăngz nzif pha cloon nănh nyăngz au căpx taih six săngh ah lanh. ²⁵ Nây tauh munh baox cloon tauh munh sab tinyh đoih blănf stynb yămz, six nănh stiz lanh max numđ nyayz lanh. Bamh munh max mungv woac