¹ Te ni ka ni din, tọ oda Osibina, ese nẹ a ne iṣọṣi na nẹ wọ Ẹmasidoniya na. ² Ẹrọnanyẹn yọ ọmabale ọkẹka, ebenben ọkẹka aka akọ bi siye wọọbiwaro na bi su arọn aka osiye ikwa. ³ Ọnẹ isu ubedi ka bi ya fọ ova ọyọyọ ọnẹ bi di siye, aka bilọ nẹ bi di ye siye, aka bile akọ ọnẹ bi siye kibe kibe na. ⁴ Bẹ tẹ yẹtọ ekwin aki ikuwa nẹ anfani bi su kati ruwa utun mọ nẹ nẹ wọ Osibina ẹka nẹ ero ọnwọnwọn. ⁵ Ọnẹ ama fi wu yẹn ẹgan akọ ti siye fayẹn yẹrẹ, ama bẹ tayẹ fọ bi wu nọ Idu aka nẹ tọ Osibina yi be opin. ⁶ Ama ti mi pẹrẹ Ẹtitus, ọnẹ tọmẹ utun ma yẹbemiya siye inetin nẹ utun ese. ⁷ Ama nẹ fọrẹ ẹpẹn fẹyan - ọnawọ, ẹga ọgẹgẹ, odindin, osisiye, oboro, bilọ nọ nẹtọ. Nẹ gba ka ni su afọrẹ ese osisiye. ⁸ Ẹgọ ọnẹ ama ka buru na. Akan, ẹga ọnẹ ka iya ma nọ balẹ ini ikwa aka nọ unini ti ya ma balẹ iniwu ọpẹ pan nọ ero ẹbẹn. ⁹ Ubaka ani din ese nẹwọ Idu Ijisọs Ẹkraist ẹkana. Esi gbe ka esu arọn, nẹ nuba eṣina iwo ro, ni din wi yọ iwaro ni ṣin nọ arọn ro. ¹⁰ Ẹga ọnẹ ma fo ẹkpẹrẹ ne ke go wubana nẹwọ. Ẹyẹn nọ ọyẹrẹ wa urun, eme si gbe ka inẹ tọmẹ osisiye, ama ni suga wọ ibe ka ni siyẹ. ¹¹ Akana siye vẹpan. Akọnẹ siye su ẹlakata ti siye akọ inini, arọn muro akọ ni ke di siye. ¹² Ubaka ne su ẹṣana ka ne siye ọnẹ, arọn, ediya wọ ẹpẹn nẹ bẹ ná na. Eke wọ ẹkẹna oro su, ama wọ ẹkẹna oro eme su na. ¹³ Ọnẹ ama wa nọ ọbẹrẹ nẹ ero ẹbẹn akọ ẹrọnanyẹn nẹ nọ. Ọnẹbẹ uba ka e siye akọ e siye rọn na. ¹⁴ Nọ ọyọyọ ọgba ọnẹ aka fọ ẹkẹna bi ni na nẹnọ, ọnẹ bi la mọ bọ ọyọyọ aka vanọ ẹkẹnẹ ni nina edi wa akọ esiye bọwọ na. ¹⁵ Ewo akọ siye wọrẹ na: "Ọnẹ su ọyọyọ na eme su kẹna kide wije nẹ ku, ọnẹ su keke na eme su ẹkẹna ku ya na." ¹⁶ Ama tẹ gan mọ Osibina ẹba nẹ ye wọ Ẹtitus uloko nẹ ọbalẹ isu nẹ na. ¹⁷ Eme yi si waka anotọ ọbẹlẹ, ama ayẹ bẹ ba asọ ọkpẹ Aṣa to wu iyibe opin. ¹⁸ Ti filẹ bi lọ ọda nẹ be yeyi Iṣọṣi fẹnyan nẹ yi utun na ẹpẹn pan nọ oboro. ¹⁹ Ama wa ọnẹ ayarẹ ama bi tiye Ẹṣọṣi fẹnyan ka awọ ẹfẹnẹ eke jejẹn kẹ yọ bilọ e siye utun, ọnẹ te siye, ne yọ ugbugbodd Idu ẹbẹba bilọ tọ eboro. ²⁰ Ti me ni ka ti su ẹfẹna eke ki hun hunu na nọ osisiye otiteyi uba ọnẹ te siye ayẹn na. ²¹ Tẹ sọlọn ka ti siye oboro, ama wa nọ Idu, ẹrẹn ayayẹrẹ, ama ika erokoro ẹrẹn. ²² Ti diye file tọda ọbẹn bile bi wu. Te ma ba balẹ ọrọ ọyọyọ tẹ gba ka e siye akọ iwu fẹnyan nọ utun ọyọyọ. Esu iwu opẹnpan akana nọ kọ uloko o siye ẹpẹn nẹ esu nẹ nọ. ²³ Nọ Ẹtitus tọ obawọ ya aka mutun ro nẹ nọ. Nẹ tọ tẹda abẹ bẹ wo to ofi li tun ro nẹ Ẹṣọṣi. Ugbugbodi bẹ wa nọ Ẹkraist. ²⁴ Nẹfọ nọ unini yẹn ba, akq ni di ya yẹn nọ Ẹṣọṣi ẹkẹ na wọrẹ rẹ rọn mowo inẹga.