¹ Iniro, akọ nẹ ti siye su oworọnrọn abẹ na ni te be ti ouwa to iwu fura isinsin iwkpe aka ẹfunwẹnfunwẹn ẹka fẹnyan. Ni jọmọ ti ki gu ọnwọnwọn Osibina ọrọrẹ. ² Siye ọrẹ nẹ tọ! Eme su koro ọyere ne ti siye ẹga na. Ti me be koro ọyẹrẹ fuwa sa ka ti siye afọrẹmọ nẹ orokọyẹrẹ. ³ Gbe ka i me ni ka ẹ sẹn nọ ebe a wọrẹ ẹ ga ọnẹ. Ubaka ẹ tayẹ ga ẹ ka ni wo tọ uloko, ka ti di fo bile aka ti di wo ẹrọ bile. ⁴ I su ẹyẹrayen nẹ nọ, mọ ọkakara nẹ nọ diue gbodi. Bi fiye nu aka ibe ofunfun. I fiue aara aka ẹbenbẹn e si gbe ka ti wo ẹrọnanyẹn na. ⁵ Ọgbọna ti re Ẹmasidoniya na, ti iwuki eme su ẹyẹ ofilẹ. Kẹgankẹgan, bi gboon tu ọrẹ fẹnyan aka isusuna ọyẹn ọọ̀re aka ọrọrẹ ibe ọọrẹ. ⁶ Ama Osibina, e fun ẹnanẹ holo ibe na aka Ẹtayitos ọṣẹṣa. ⁷ Ama wọ yọ ọṣẹṣa ayarẹ Osibina e fun ti ibe. Ama ubaka ofunmibe nẹ Etayitos gba na i nọ ẹfa na. A ge nẹ tọ nọ univibe nẹ ni ya yẹn na, nọ ibobibe, aka nọ inisye nẹ mọ ọnẹbẹ uùba ẹbẹn bila amọ. ⁸ Esi gbe ka mo ikokori wọrẹ nọ bi ibe, i me luwe owo. Ámà ibluwe owo ọgbọna ẹ gba ka mọ ikokori be ni ibe fuwa na, ama nẹ ọgba keke. ⁹ Akana ẹ bẹn eme gbe ka ni bibe, ama ka nọ ibobe wọrẹ ka ni ro bila. Ne gba ėomẹna Osibina yọ ibobe wa na, ọnẹbẹ uùba eme su ẹkẹna nẹ fuwa ubaka atọ na. ¹⁰ Ubaka Osibina yọ ibobe a da fọ ororopila nẹ da fọ ọnafan sẹrẹ nẹ me su owoluwe na. Ẹrọ ibobe, ayẹ a da fọ ufo sa. ¹¹ Balẹ oloko o ṣile nẹ Osibina ibobe ọnẹ ṣoma i nobiwu na. Balẹ akọ uloko oṣile ayẹ siye gbodi ta na ka a yẹn ka nẹ wa ibọyẹrẹro. Gana no iwọkẹkan siye wa ta, nọ ọrọrẹ, nọ onini, nọ ini siye, aka nọ inini ka nẹ gba ka bi siye ọṣẹrẹ. Ẹpẹn fẹnyan nẹ fọ ni iwu yẹn ka ne ibọyerẹro ẹga ọnẹ. ¹² E si gbe ka e wọra nẹ nọ, i me kpẹrẹ idudunaro uùba wọra ẹ, amá wa nẹ ẹfẹna e je oya iduduna ayẹ na, ubaka nọ ini obaro to tu e di wa odidia nẹ nọ Osibina ayẹn. ¹³ Ọnẹ e gbe tu ulono. Bile i to ofunmibe, ti di ya nẹn bilamo ubaka Etayitos ẹbẹbẹn, ubaka yọ anọ fẹnyan sẹ yẹ ẹfunwẹnfunwẹn ṣina owowo. ¹⁴ Ma kpẹrẹ nọ uba siye akakara kẹ nẹ ya, epan anaa kọ mọ. Ọrẹ ọbẹn, akọ nẹ ẹpẹn fẹnyan nẹ tẹga nẹ nọ na siye wa ikuwa na, tọ okakara i no ẹpan nẹ Etayitos wa ikuwa. ¹⁵ Yọ univibe nẹ nọ e gbodi bile amọ akọ e siye a yẹn anọ fẹnyan ọ̀tọ mowọwọ na, akọ ne ni siye nẹ aka ọrọrẹ aka okpikperi na. ¹⁶ Ẹ bẹn ubaka i su ẹyẹranyẹn nẹ nọ boroboro.