¹ Gudi'di si ngue Jesús yené Espiritu xti Diuxi laa ndani desiertu para guquiinde binidxába laabe. ² Ne ra laabe yeiní' ne be Diuxi ne que ñó be chu'pa late gande dxí ne gueela, bindaana be. ³ Ni beda uquiinde laabe que beeda ne gudxi laabe: " Pa lii nga xiiñi Diuxi, gudxi ca guie ca gaca ca ni pan". ⁴ Peru Jesús bicábi ne gudxi laabe: "Cá lu gui'chi' , 'CADI NE PAN SI NGA SABANI BINNI, NE LACA DE GUIRÁ DIIDXA NI RIREE RUAA DIUXI'." ⁵ Ne de raqué binidxaba yene laabe ndaani guidxi nandxo' ne bidxiiba laabe ra jma nasoo xti yu'du', ⁶ ne gúdxi laabe: "Pa lii nga xiiñi Diuxi, guyuubi' xaguete cá, purti ca' lu xqui'chi' Diuxi: 'LAABE ZUSEENDA BE CA ÁNGEL XTI BE TI GAPÁ LII,' ne, 'ZANDISA CA LII LU NÁ' CA, TI ZACÁ CADI IRENDA ÑEELU LU GUIE'" ⁷ JESUS GUDXI LAABE: "laca cá 'CADI GUQUIINDE LU SEÑOR DIUXI XTIU'." ⁸ Xti tiru, binidxaba yené laabe ti ra nasoo ne bilui' laabe guira guidxi ro' xti guidxilayu ne guira guenda sicarú xti ca ní. ⁹ Laabe gudxibe laa: "guira xixe ndi' zudiee lii, pa gusuxibilu xa ñee, ne gusizacalu naa." ¹⁰ Raque ru' Jesús gudxi laabe: "¡biree de rari', Binidxaba! Purti ca lu xqui'chi' Diuxi: ZUSISACA LU' SEÑOR DIUXI XTILU' NE LAA SI NGA ZUZUUBALU XTIIDXA'". ¹¹ Raque ru' bisaana binidxaba que laabe, ne raque ru', beeda ca angel ne bidii ca ni gudó be. ¹² Ora Jesús binadiaga ma gunaaze cabe Juan, bigueta be Galilea. ¹³ Biree be de Nazaret ne yebi' be Capernaúm, ni nuu gaxha de nisado' xti Galilea, lu layú xti ca ni zá de Zabulón ne Neftalí. ¹⁴ Ne ndi' guca ti ma gáca casi diidxa biree de profeta Isaias: ¹⁵ "¡GUIDXI XTI ZABULÓN, NE GUIDXI XTI NEFTALÍ, NEZA ZÉ NISADO', CHERICA GUIIGU JORDÁN, GALILEA RA NABEZA XTALE NI CADI JUDIU! ¹⁶ CA BINNI NI BIBAANI LU GUELACAHUI MA BIIYA CA' TI BIAANI RÓ, NE CA NI BIBAANI GAXHA, NE LU BANDA' XTI GUENDA GUTI, BIASA TI BIAANI BIZAANI LAACABE." ¹⁷ Ne de ca dxi qué Jesús bizulú byuí xtidxa Diuxhi ne ná: "La gusaana ca guenda ruché', ti ma zeda dxiña dxí guni mandar Diuxi." ¹⁸ Laga sizá be uria nisado' xti Galilea, biiya be chupa hombre bi'chi ca', Simón ni lá Pedru, ne bi'chi be Andrés, cuchiaa ca' ti doo ndaani nisado', ti binni guuze' laaca. ¹⁹ Jesús gudxi laaca: "La ta' ne la sá nanda naa, ne naa zune laatu guuze de binni". ²⁰ Ne oraqueca bisaana cabe ca doo que ne sinanda ca' laabe. ²¹ Laga ziree Jesús de raque biiya be xhupa bi'chi', Jacobo xiiñi Zebedeu, ne Juan, bi'chi'. Laaca nuu né ca bixhoze ca Zebedeu ndaani ti balaaga; laacabe cayuni chaahui ca doo xti ca. Laabe bicá ridxi be laaca, ²² ne oraqueca bisaana ca balaaga qué, ne bixoze ca, ne sinanda ca laabe. ²³ Jesús guzá guidubi naca Galilea, ne cana gusiidi ndaani ca yu'du huiini xti cabe'. Cana yuí' be diidxa xti guenda runi mandar xti Diuxi, cana gusianda be guira xixe guenda huara ne guira xixe yuuba xti ca binni qué. ²⁴ Bire'che ni cayuni Jesús guidubi naca Siria, ne ca binni que beda né ca ra nuu be guira ca ni huara, intiica ni cayaca ca ne intiica yuuba, ne ca ni nuu binidxaba laa, ni rudii ataque laa ne ca ni ma qui rizá. Ne Jesús cusiánda laaca. ²⁵ Xtale binni zinanda laabe de Galilea, Decápolis, Jerusalén, Judea, ne de cherica gui'gu' Jordán.