¹ Ora Jesús biiya xtale binni que, Laabe gudxiba be lu dani; ora Laabe gurí be, ca discipulu xti be beeda ca ra nuu be. ² Laabe bixhale rua be ne bisiidi be laaca; Laabe guní be: ³ chona tiru guieche ca ni nanna caquiñe de Diuxi, ti xti cabe nga guenda runi mandar xti Diuxi. ⁴ Chona tiru guieche ca ni ruuna, ti laaca zuchaa Diuxi nisa nanda luu ca. ⁵ Chona tiru guieche ca ni nado', ti Diuxi zudii laaca guidubi naca guidxilayu'. ⁶ Chona tiru guieche ca ni canda'na ne ca ni caya'ti guni ni jneza, ti laacabe zadxa' ladxido' cabe. ⁷ Chona tiru guieche ca ni ria', ti zacaaca guenda ria'. ⁸ Chona tiru guieche ca ni nayaa ladxido', ti laaca zuuya ca Diuxi. ⁹ Chona tiru guieche ca ni ribaquidxi guendaridinde, ti laaca zaree' lá ca xiiñi Diuxi. ¹⁰ Chona tiru nayeche ca ni rizabinanda cabe laaca gúni guendaruni jneza , ti xti cabe nga guenda runi mandar xti Diuxi guibá'. ¹¹ Chona tiru guieche tu ora binni uguna didxa laatu ne zabinanda cabe laatu, o guiní xixa ni nadxaba luguiatu ni cadi dxandí guuni Naa. ¹² Laguieche xtale, ti naroba nga ni chiguiaxa tu guibá'. Ti zacá ca binni que guzabinandaca ca profeta ni bibani níru que laatu. ¹³ Laatu nga nacatu zidi xti guidxilayú di; ne pa zidi di guniti ni guenda na xii xti ni la?, ¿ximodo guixii ni xti tiru ya? Qui ziu'ru dxi guiquiñe ni, laga gusabi si cabe ni ne gutu ñee binni ni. ¹⁴ Laatu nga biani xti guidxilayú. Ti guidxi ni nuu lu dani que zanda guigaachi. ¹⁵ Ninca binni que rucagui ti biaani' ne ruguu ni xana ti dxumi, laga ruguu cani ndani ti ra randa biaani', ne ruzaani ni guira ni nu ndani yoo que'. ¹⁶ Lagudi biaani' xtitu guzaani neza lú guira binni ti ganda guya cabe ca ni nachahui ni runitu ne gusisaca cabe Bixhoze tu ni nuu guibá'. ¹⁷ Cadi guiní ique tu Naa zeda guxhaya ca diidxa bicaa Moises o ca ni bicaa ca' profeta; cadi zeda guxhaya cani, laga beeda gune ni ca' lú cani. ¹⁸ Ti dxandi'pe nga cayabe laatu dede dxi guiba' ne guidxilayú guiniti lú ca, nin ti diidxa ni jma nahuini que ziadxa de gaca ni cá lu xquichi Diuxi, dede guizaa guira ni nexhe chi gaca'. ¹⁹ Nga runi tutiica ni que guna neca ni jma nahuini de ca didxa ni bisana Diuxi ne gusiidi xcadxi guni ca ni la?, huaxie' zasaca ndani guenda runi mandar guiba'. Laga tutiica ni gúni ni ná ni ne gusiidi ní la?, zasaca xtale ndani guenda runi mandar guiba'. ²⁰ Ti Naa cayabe laatu pa ni jneza xtitu que tiidi ni lú ni jneza xti ca escriba ne ca fariseu la?, que zanda di chu' tu ndani guenda runi mandar ni nuu guibá'. ²¹ Laatu ma binadiagatu xi gudxi Diuxi ca binni guyuu dxique': 'CADI GÚTILU', ne 'tutiica guuti la? nu naxoo de gusaba ná ley.' ²² Ne Naa cayabe laatu de guira ni guidxichi ne bi'chi nu naxoo gusaba ná ley laa; ne tutiica ni gabi bi'chi: 'Lii que risaca lu.' Ziu naxoo idxiña lú justicia; ne tutiica ni guini': 'lii binnihuati! nuu naxoo de guilaa lu bele xti gabia. ²³ Nga runi pa lii neu ni quixhelu' lu mexa xti Diuxi, ne raque guietenaladxi lu bi'chi lu napa xiixa luguia lu la?, ²⁴ bisaana ni chi tixhelu' que rua mexa que, ne bigueta neza zeedu. Niru biene né bi'chi lu, ne raque ru' guda' ne bidii ni chi tixhelu' que. ²⁵ Naguenda guca né tobi si ne ni cudxiiba donda ique lu laga zeeru tu neza ra nuu justicia, ne zandaca ni cudxiiba donda ique lu gusana lii lu ná juez, ne juez gudii lii xaique lidxi guiiba, ne zanda ca zundá cabe lii ndani lidxi guiiba. ²⁶ Dxandipe cayabe laatu, que ziu dxi guiree lu de raca dede que quixe lu guira xixé bidxichi ni nuzaabi lu. ²⁷ Laatu huayunadiaga tu maca nuu ti diidxa: 'CADI CHU' NEU NI CADI XHEELU.' ²⁸ Laga Naa cayabe guira ni guyadxi ti gunaa ne guluíla'dxi laabe la? mapeca biche' ndani ladxido' casi ñaca guyuu né pe laabe. ²⁹ Ne pa neza ndiga guie lú lu' uquiinde lii guché lu la?, guxha ni ne bisaabi ni zitu; ti jmá jneza guiree ni lii guiniti tindaa de lii, que guidubi naca lu' chee gabia. ³⁰ Ne pa neza ndiga ná lu' uquiinde lii guché lu la?, bichuugu ni ne bisaabi ni zitu, ti jmá jneza guiree ni lii guini ti nda de lii, que guidubi naca lu' che gabia. ³¹ 1Laca maca nuu diidxa: 'TUTIICA GUILAA NE XHEELA LA? GUDII LAABE TI GUI'CHI NI GUINÍ MA GULAA XQUENDA XHEELA CABE.' ³² Laga Naa cayabe laatu guira ni guila' ne xheela, pa cadi gucani ra guyú né be xtobi ni cadi xheela be la?, laa cayuni laabe ti gunaa zacasi; ne tutiica ni guichagana laabe ra ma gula' ne be xheelabe la? cayú né ni cadi xheela. ³³ Xti tiru, laatu ma bina diaga tu xhi guní' cabe dxiqué: 'CADI GUDII XTIDXA LU ZU'NU XIIXA NE CADI DXANDI NI LII, HUAXA NI MA BIDII XTIDXA LU SEÑOR ZU'NU LA? BIINI NI.' ³⁴ Huaxa cayaabe lii, cadi gudii xtidxa lu pur gaxti; ni pur guibá', ti naca ni ra ribí Diuxi para guni mandar; ³⁵ nin pur guidxilayú, ti racá nga bangu' ra ribaqui ñee be; nin pur Jerusalén, ti ngá nga GUIDXI XTI REY NI NANDXO'. ³⁶ Laca cadi gudii xtiidxa lu pur ique lu, ti que zanda guni lu ti guicha ique naquiichi o nayase. ³⁷ Huaxa ni guiní' lu ca gacani, 'pa ya' la? ya' o 'pa co' la? co'. Guira ni guiré chu' de ndi la? zeeda ni de binidxaba. ³⁸ Ma binadiaga lu guni' cabe: 'PA GAXHA CABE TI BIZALÚ LU LA? GUXHA TI BIZALÚ CABE, NE PA GAXHA CABE TI LAYA LU LA? GUXHA TI LAYA CABE.' ³⁹ Huaxa naa cayabe lii, cadi gucabi lu ni gucálu lii; laga nga la?, tutiica capa xhaga lu ladu ndiga la?, bidii ca laabe xtobi ca'. ⁴⁰ Ne pa tuuxha gacagaladxi chine' lii ra nu justicia, ne gaxha lii lari dxaa xtiilu', bidii ca laabe chine be lari nanda deche lu'. ⁴¹ Ne ni guca lii chee lu ti kilometru, yené laabe chupa. ⁴² Bidii guira binni ni guinaba lii xiixa, ne cadi gudxii deche lu' ni gacaladxi qui'ñe lii. ⁴³ Ma binadiagatu guní' cabe: 'GANAXHII LU NI DXA'GA LU, NE ZACA NANALADXI LU NI RUCA LÚ LII.' ⁴⁴ Huaxa cayabe laatu, laganaxhi cani nanaladxi laatu ne laguini' ne Diuxi pur ca ni rizabinanda laatu, ⁴⁵ ti ganda gaca tu xhiiñi bixhozenu ni nuu guibá'. Ti Laabe nga runi be guiree gubidxa luguia ca ni nadxaba ne ca ni nacha'hui, ne rusaba be nisa guie luguia ca ni runi jneza ne ca ni que runi jneza. ⁴⁶ Pa ranaxhii tu ca ni nadxii si laatu la?, ¿xhi ga nga guica' tu ya? ¿cadi zacaca nga runi ca ni ruquixhe impuestu la? ⁴⁷ Ne pa ca bi'chi si tu rugapadiuxi tu ¿xhi runi tu jma que ca xcaadxi ca ya? ¿cadi zacaca nga runi ca ni cadi Judiu ni que ruzuuba ca xtiidxa Diuxi? ⁴⁸ Nga runi cadi gapa tu ra guidiñe yú tu, casi ca Bixhoze tu ni nuu guibá' que gapa ra guidiñe yú.