¹ Ne ca dxi que Juan ni rigú' nisa beeda ne cana yui' xtiidxa Diuxi lu ca layú ndá xti Judea ne ná: ² La gusaana ni cadi jneza, ti ma gaxha nuu guenda runi mandar ni zeeda de guiba'. ³ Ti de laabe nga guní' profeta Isaías, dxi ná "RIDXI XTII TUUXA CUCAA RIDXI LU CA YU NDÁ, LA CUAQUI' CHAAHUI' NEZA XTI SEÑOR, NE LACUEE RA NAPANDU LU CA NEZA XTI BE." ⁴ Yanna la? Juan nacu lári de guidi laadi cameyu, ne xi' ti cinturón de guidi ndaani be, ne ni roobe ngá gusú ne dxiña yaga. ⁵ Ne ca binni de Jerusalén, ne guidubi naca Judea, ne de guiraa ca guidxi dxaaga guiigu Jordán beeda ca' ra nuu be. ⁶ Ne guyuu nisa cabe ra guiigu Jordán, gulee ruaa cabe diidxa' de guirá ni ma bichee cabe. ⁷ Ne ra bi'ya be xtale de ca Fariseu ne ca Saduceu cayeedaca' ra nuu be ti chú nisa ca, laabe rabi be laaca': "laatu ca ni zaa de beenda ni nadxaba, ¿tu gulaquiná laatu ti guxhooñe tu de xiana ni gueeda? ⁸ La gudii cuananaxhi ni gusihuinni ma bisaaná tu ni cadi jneza. ⁹ Ne cadi guiní' ique tu guiní' saa tu: "laadu napadu Abraham de bixhooze du." Laga naa zabe laatu Diuxi la zanda guindisa be ca xiiñi Abraham neca de lade ca guie di'. ¹⁰ Ma nexhe chaahui Jacha ti uga' xcú ca yaga. Nga' runi guirá yaga ni cadi cudii cuananaxhi cha'hui la? zagá ne zalá lu bele. ¹¹ Naa caguaa nisa laatu ne nisa ti guihuini ma bisaana tu guenda ruche' xti tu. Huaxa ni gueeda deche ca la? jmá nandxó' be que naa ne naa que risaca dia' para chiniaa guela guidi xti be. Laabe zugú nisa be laatu ne Espíritu Santu ne bele. ¹² Ma naaze be orqueta ni rusa'bi ne be guixi ti gusia be dede ra bidúbi layú xti be ra ma bibí semia' ne guidopa ca semia' chee troja. Ne Laabe zuza'qui be ca guixi que lu bele ni que ziuu dxi guizuí'. ¹³ Ne de raque' biree Jesús de Galilea beeda ra guiigu Jordán ti cu' nisa Juan Laabe. ¹⁴ Ne Juan nuu ru gucueeza Laabe ne na': "Naa nga caquiñee cu' nisa lu naa, ¿ne laga lii zeedu ra nuaa la?" ¹⁵ Bicabi' Jesús laabe ne na': "Bidii ga'cani yanna ti jneza para laanu guninu' guiraa ni jneza xti Diuxi." Ne oraquee ru guná Juan. ¹⁶ Ne gudiidi si Laabe guyu' nisa be la?, Jesús biree nague'nda de ndaani nisa, ne raque, bixheele guiba' para laabe. Laabe biiya be Espíritu xti Diuxi zeda yete casi ti paloma ne bia'na luguia be. ¹⁷ Ne rarii beeda ti ridxi de guiba' na': "Ndii nga Xiiñe ni nadxiee ne guizá' nayeche' nuaa ne Laabe."