¹ Jizus txoma ses duzi disiplus i E da-s puder ku otoridadi riba di tudu dimonius i tanbe pa kura duensas. ² E nvia-s pa prega Reinu di deus i kura duentis. ³ Jizus fla-s: Ka nhos leba nada pa viaji, nen po, nen bolsa, nen dinheru, nen mas un ropa. ⁴ Na kaza ki nhos resebedu, nhos fika lá ti ki nhos bai pa otu kau. ⁵ Si es ka resebe nhos, ora ki nhos sai di kel sidadi, nhos sakudi puera di nhos pé pa tistimunhu kontra es. ⁶ Nton, disiplus bai pa vilas, ta anunsia nutisia sabi i ta kura pesoas pa tudu lugar. ⁷ Erodis, tetrarka, obi di tudu ki staba ta kuntisi i fika perpleksu, pamodi uns staba ta flaba ki Djon Batista tenba risusitadu di mortu. ⁸ Otus staba ta flaba ki Ilias parseba di nobu, i otus inda, staba ta flaba ki un di kes prufeta di antigu testamentu tenba voltadu pa vida. ⁹ Ma Erodis fla: Djon é mi ki manda sapa-l kabesa, nton di kenha ki N sa ta obi ki sa ta faze tudu es kuza? I Erodis tenta atxa algun manera di odja Jizus. ¹⁰ Kantu kes dózi apóstlu di Jezus volta di kel viaji, es konta Jezus tudu kuza kes fazi. Dipôs Jezus leba ses apóstlu pa un sidadi ki ta txomada Betisaida, ¹¹ ma kantu kes monti algen obi, es bai tras di Jizus. Jizus resebe-s es tudu, papia-s sobri Reinu di Deus i kura kes ki staba ta mesteba di kura. ¹² Kantu staba ta skureseba, kes duzi disiplus txiga na el i fla-l: Manda kes monti gentis li, i asi es pode bai na un zona mas pertu o un poku mas baxu, i es pode atxa kau deta ku kumida, pamodi lugar undi ki nu sta é izuladu. ¹³ Ma Jizus risponde-s: Nhos da-s a nhos algun kuza pa es kume. Disiplus rabida fla-l: Nu ka tini mas ki sinku pon ku dos pexi, anonser si nu sai i bai kunpra kumida pa tudu es monti algen. ¹⁴ [Staba serka di sinku mil ómi lá]. Nton Jizus fla ses disiplus: Nhos pui genti xinta di grupu di serka di sinkuenta pesoas kada. ¹⁵ Nton es faze sima Jizus fla-s kes algen xinta. ¹⁶ E pega kes sinku pon ku dos pexi, e labanta odju pa seu i e bensua-s, i dipos e parti-s na padas i e dá pa ses disiplus distribui pa tudu algen ki staba la. ¹⁷ Tudu algen kume ti ki farta, i inda es intxi duzi balai ku restu ki sobra. ¹⁸ Kuntise ki Jizus staba ta ora na partikular djuntu ku ses disiplus, nton Jizus purgunta-s: Kenha ki multidon ta fla ma ami é? ¹⁹ I es rasponde: Uns ta fla ma anho é Djon Batista, otus ta fla ma nho é Ilias, i otus inda ta fla ki anho é un di kes prufeta di antigu testamentu ki dja volta vida. ²⁰ Jizus purgunta-s: Ma anhos, kenha ki nhos ta fla ma ami é? Pedru rabida rusponde: Anho é Kristu di Deus. ²¹ Nton Jizus alerta-l i instrui-s pa es ka fla ningen. ²² Dipos Jizus fla-s: Fidju di Ómi meste sufri txeu kuzas, ser rejeitadu pa gentis grandi, pa xefis di saserdotis ku skribas, i ser mortu, ma na triseru dia é ta ser resusitadu. ²³ Si algen kre ben ku mi, nton e meste nega si kabesa, toma si krus tudu dia i sigi-m. ²⁴ Kel ki ta dizeja salva si vida, ta perde-l, ma, kel ki perde si vida pa nha kauza, ta salva-l. ²⁵ Pamodi, kuze ki ta bali un algen ganha mundu interu, i dipos ben perde o kaba ku si kabesa? ²⁶ Kel ki xinti burgonha di Mi i di nhas palavras, Fidju di òmi tanbe ta xinti burgonha di el ora ki E ben na Si Glória, na glória di si Pai i di santus anjus. ²⁷ Dimidivera N ta fla nho, ten uns di nhos ki sta li ki ka ta pasa pa morti ti ki es odja reinu di Deus. ²⁸ Kuntise ki, oitu dias dipos di fla es palavra, Jizus leba Pedru, Djon i Tiagu pa subi munti pa ora. ²⁹ Timenti E staba ta ora, aparensia di si rostu muda, ses ropa bira branku albu i ta brilha. ³⁰ I dos omi staba ta papiaba ku El, Muzes ku Ilias, ³¹ ki parse pa El ku grandi brilhu. Es staba ta papiaba sobri si partida di Jiruzalen, ki staba kuazi ta txiga ora. ³² Pedru ku kes otu dos disiplus ki staba ku el, staba karegadu di sonu, ma kantu es korda, es odja gloria di Jizus i kes dos omi ki staba ku El. ³³ I kantu kes dos omi bai ta afasta di Jizus, Pedru rabida fla: Mestri, é bon nu sta li. Nu faze tres baraka, un pa bo, un pa Muzes i otu pa Ilias, ma Pedru ka sabia kuze ki e staba ta flaba. ³⁴ Timenti e staba ta flaba es kuza, un nuven dixi i nvolve-s ku si sonbra, es fika ku medu kantu es entra na nuven. ³⁵ Un vos sai di dentu nuven, ta fla: Kel li é nha Fidju, ki N skodje, nhos obi-L. ³⁶ Kantu vos para, Jizus staba el so. Disiplus fika na silensiu i na kes dias es ka fla nada pa ningen sobri kuzas ki es odja. ³⁷ Kuntise ki, na kel otu dia, un grandi multidon nkontra-L kantu es staba ta dixi di munti. ³⁸ Un omi di multidon klama ta fla: Mestri, N ta inplora-u pa bu odja pa nha fidju, pamodi el é uniku fidju ki N ten. ³⁹ I spritu ta apodera di el, ki brisi e ta grita, ta kunvulsiona ti ta spuma pa boka. Kel spritu li difisilmenti ta sai del, i ora ki sa ta dexa-l tudu satadjadu. ⁴⁰ N pidi bus disiplus para spulsa-l kel spritu li, ma es ka kunsigi. ⁴¹ Jizus rasponde-s, ta fla: Jerason inkredula i mau, ti ki tenpu N ta sta ku nhos i N ta suporta nhos? Traze bu fidju ti mi. ⁴² Timenti mininu staba ta ben, dimoniu baza-l na txon i kunfulsiona-l. Ma Jizus reprendi spritu xuxu, kura mininu i ntrega-l pa si pai. ⁴³ Tudu algen fika spantadu ku grandeza di Deus. I timenti gentis staba adimiradu ku tudu ki Jizus faze, Jizus rabida fla pa ses disiplus: ⁴⁴ Nhos pui es palavra na nhos obidu: Fidju di Ómi ta ntregadu na mon di omis. ⁴⁵ Ma disiplus ka ntende siginifikadu di es palavra, pamodi es inkubridu el pa es ka ntende, i es staba tudu ku medu di pergunta pa Jizus siginifikadu di kel diklarason. ⁴⁶ Nton disiplus kumesa ta diskuti es ku es sobri kual di es era mas inportanti. ⁴⁷ Ma Jizus, ki konxeba kuze ki es staba ta pensaba na ses kurason, panha un kriansa pui na ses meiu ⁴⁸ i fla-s: Si algen resebe es kriansa na nha nomi, el tanbe e ta resebe kenha ki nvia-m, pamodi kenha ki for mas pikinoti na nhos meiu, a el é ki é mas inportanti. ⁴⁹ Djon nton fla-L: Mestri, nu odja algen ta spulsa dimoniu na bu nomi i nu pruibi-l, pamodi e ka ta anda ku nos. ⁵⁰ Ma Jizus fla-l: Ka bu inpedi-s, pamodi kenha ki ka é kontra nhos é a favor di nhos. ⁵¹ Kuntise ki, kantu staba pertu dia di Si asenson, E toma disizon di bai pa Jiruzalen ⁵² i e nvia mensajerus dianti di el. Es entra na un zona di samaritanu pa pripera pa Jizus txiga. ⁵³ Ma só ki pesoas di la ka resebe-L, pamodi si rostu staba sima di algen ki sa ta baba pa Jiruzalen. ⁵⁴ Nton kantu ses disiplus Tiagu ku Djon odja kel la, es fla: Sinhor, bu ka kre pa nu manda dixi lumi di seu pa kema-s es fepu? ⁵⁵ Ma Jizus bira pa es i reprende-s. ⁵⁶ Nton es bira i es bai pa otu zona. ⁵⁷ Timenti es staba ta bai pa kaminhu, algen fla-L: Ami N ta sigi-u pa undi ki bu bai. ⁵⁸ Jizus fla-l: rapozas ten ses toka i pasarinhus di seu ses ninhu, ma Fidju di Ómi ka ten nen lugar di pui kabesa. ⁵⁹ Nton E fla pa otu algen: Sigi-m. Ma kel algen responde: Sinhor, dexa-m prumeru ntera nha pai. ⁶⁰ Ma Jizus fla-l: Dexa mortus ta ntera ses mortus, mas abo, bai i bai anunsia na tudu kau, reinu di Deus. ⁶¹ Otu algen tanbe fla-l: N ta sigi-u Sinhor, ma dexa-m prumeru dispidi di gentis di nha kaza. ⁶² ma Jizus fla-l: Ningen ki dja pui mon na aradu i ta fika ta odja pa tras, é apitu pa Reinu di Deus.