¹ Kantu Jezus kaba di inxina kes kuza pa povu, E volta pa bila di Kafarnaum. ² Tenba un komandanti romanu ki tenba un sérvu ki staba duenti, kuazi ta móri. ³ Nton, kantu kel komandanti romanu obi kes kuza ki povu ta flaba sobri Jezus, e manda alguns gentis grandi di judeus, pa es ba pidi Jezus pa E ben kura se sérvu. ⁴ Kantu kes txiga, es fika ta inplora Jezus pa E volta ku es, y es fla-L: "Es komandanti romanu ta meresi pa Nhu djuda-l, ⁵ pamodi e ta gosta txeu di nos povu di Izrael, y foi el ki manda faze nos sinagóga". ⁶ Nton Jezus bai ku es. Má kantu és staba pértu di kaza di kaza, kel komandanti romanu manda alguns amigu pa ba inkontra ku Jezus na kaminhu, y es fla-L: "Sinhor, Nhu ka mesti inkomoda más, pamodi N ka meresi pa Nhu entra na nha kaza. ⁷ Asin, tanbe, N ta atxa ma N ka ta meresi bai inkontra ku Nho. Má, basta Nhu da un órdi y nha sérvu ta ser kuradu. ⁸ N sabe ma é asin, pamodi ami é ómi baxu di otoridadi di otus, y N ten soldadus di baxu di nha otoridadi tanbe. Basta N da órdi pa un soldadu bai, y e ta bai, y pa otu ben y e ta ben, y pa nha sérvu fazi keli y e ta faze-l.'" ⁹ Kantu Jezus obi kes kuza, E fika dimiradu ku kel komandanti. E rabida pa kel multidonki staba ta sigi-L, y E fla: "N ta fla nhos, nen na Izrael N ka atxa fé di grandi tamanhu sima ke-li". ¹⁰ Nton kes amigu di komandanti romanu volta pa kaza, es odja ma sérvu dja staba prontu san si saúdi. ¹¹ Na otu dia Jezus bai pa un bila txomadu Nain, djuntu ku ses disiplu, y un grandi multidon staba ta sigi-s. ¹² Kontisi ki kantu E staba ta ba entra na porton di bila, bira asin E odja un ntéru di un rapás ki staba ta sai. Kel difuntu éra úniku fidju matxu di un viúva y txeu algen di kel bila staba djuntu ku el na kel ntéru. ¹³ Kantu Sinhor odja pa kel viúva, E xinti txeu dór di el. Nton E fla-l: "Ka bu txora!" ¹⁴ Dipôs, E txiga pértu y E poi mon na maka. Nton, kes ómi ki staba ta karega kel maka para. Asin, Jezus fla: "Rápas, é Mi ki sa ta fla-u, labanta". ¹⁵ Y kel rapás mortu labanta y e xinta, y e kumesa ta pâpia. Nton Jezus torna integra kel rapás pa se mai. ¹⁶ Nton tudu algen xinti un grandi ruspetu, y es lova Déus ta fla: "Un grandi pruféta labanta na nos meiu" y "Déus ben vizita se povu". ¹⁷ Nton notísia sobri Jezus spadja pa tudu téra di judeus y na tudu kes téra na se ridor. ¹⁸ Y kes disiplu di Djon Batista konta-l tudu kuza ki Jezus staba ta fazi. ¹⁹ Nton Djon txoma dôs di ses disiplu y e manda-s pa es bai purgunta Jezus: "Abo é kel ki Djon fla ma staba pa ben, ô nu debi spéra otu algen. ²⁰ Kantu kes dôs disiplu di Djon txiga, es fla Jezus: "Djon Batista manda-nu purgunta-U si: 'Abo é kel ki Djon fla ma staba pa ben, ô nu debi spéra otu algen'" ²¹ Na kel mesmu mézmu óra, Jezus kura monti algen di duénsa, dór y spritu mau, y E da vizon pa txéu ségu. ²² Dipôs, Jezus rasponde kes disiplu y E fla-s: "Nhos bai y nhos fla Djon kes kuza ki nhos kaba di odja y obi: manera ki gentis ségu bira ta odja, gentis manku bira ta anda, gentis ku lépra fika kuradu, gentis surdu bira ta obi, gentis ki móri torna vive, y gentis póbri sa ta obi Notísia Sabi". ²³ Filis é kalker agen ki ka ta perdi se fé na Mi. ²⁴ Nton, kantu kes dôs disiplu di Djon Batista staba ta bai, Jezus kumesa ta pâpia ku multidon sobri Djon, y E fla: "Kantu nhos bai djobi Djon na dizértu, kuzé ki nhos pensa ma nhos staba ta atxa? Nhos pensa ma nhos staba ta atxa un padja ki béntu ta buli di un ládu pa otu? ²⁵ Ô ki tipu di ómi ki nhos ba djobi? Nhos ba djobi un ómi bistidu ku ropa finu? Obi li, kes ki ta bisti bazófu, y ta vive na sabura, es ta vive na kes palásiu. ²⁶ Nton, kuzé ki nhos sai pa ba odja? nhos ba odja un pruféta? Sin! N ta fla nhos ma Djon é más ki un pruféta. ²⁷ É sóbri Djon ki sta skritu na Skrituras Sagradu: 'Ala-l la, N ta manda nha mensajeru na bu frénti, pa pripara-U kaminhu'. ²⁸ Y N ta fla nhos, ma di tudu kes ki nase di mudjer, ka ten ningen más grandi ki Djon. Mézmu asin, kel ki é menus importanti na Reinu di Déus, é más grandi ki el". ²⁹ Tudu algen ki obi ses palavra, ti kobradoris di inpostu, es rakonhesi ma kaminhu di Déus éra justu, móda es tinh setadu batizmu di Djon. ³⁰ Má farizeus ku dotoris di lei, es ka seta batizmu di Djon, y es néga planu di Déus pa es. ³¹ Jezus kontínua y E fla: "Modi ki gentis é, des jerason di oji? Ku kuzé ki N podi konpara-s? ³² Es é sima minís ki ta brinka na rua, y es ta grita pa ses kunpanheru ta fla: 'Nu toka múzika alégri di kazamentu, má nhos ka badja. Nu kanta kantiga tristi di ntéru, má nhos ka txora'. ³³ Di mézmu manera, kantu Djon Batista ben, e fazi jijun y e ka bebe vinhu, y asin nhos fla: 'E ten dimóni'. ³⁴ Má dipôs, Fidju di Ómi ben, ta kumi y ta bebi, y asin nhos fla: 'Ala-l la, El é kumedor y bebedor, y El é amigu di kobradris di inpostu y otus pekador!' ³⁵ Má justifika son di sabedoria é mostradu na bida di tudu kes ki ta sigi-l". ³⁶ Un dia, un farizeu, ku nómi di Simon, konbida Jezus pa E bai djanta ku el. Nton Jezus bai pa kaza di kel farizeu, E entra y E toma se lugar na méza pa kume. ³⁷ Bira asin, un mudjer di ma-vida di kel bila, ki obi ma Jezus staba ta djanta na kaza di kel farizeu, ³⁸ e parse pa tras na pé di Jezus. E leba un frasku di alabastru, ki staba xeiu di un purfumu rédi karu. E staba ta txora, y ses lágua kumesa ta modja pé di Jezus. Nton e linpa-L pé ku ses kabélu, y e fika ta beja-L pé y unji ses pé ku kel purfumu. ³⁹ Kantu ki kel farizeu, ki kunbida Jezus, odja kes kuza, e fla déntu del: "Si és ómi éra un pruféta, E ta sabeba kenha, y ki tipu di mudjer, ki sa ta toka-L, pamodi es mudjer ten bida di pekador". ⁴⁰ Nton Jezus bira pa kel farizeu y E fla-l: "Simon, N ten un kuza pa fla-u". Simon rasponde-L: Fla, Méstri!". ⁴¹ Jezus fla-l: "Un bês tenba dôs ómi ki tenba dívida ku un ómi kredor. Un tenba dívida di kinhentus muéda di prata, y kel otu tenba dívida di sinkuénta muéda di prata. ⁴² Má ninhun di kes dôs ómi tenba dinheru pa paga, y asin, kel ómi kredor pêrdua tudu dôs ses dívida. Purtantu, kal di kes dôs ómi ta ama kel ómi kredor más txeu?" ⁴³ Simon rasponde Jezus y E fla-L: "Parse-m má é kel ki perduadu dívida má grandi". Jezus fla-l: "É sima bu fla". ⁴⁴ Nton Jezus bira pa kel y E fla Simon: "Bu sa ta odja es mudjer li? N entra na bu kaza, má nen agu pa laba pé bu ka da-M. Má es mudjer modja nhas pé ku ses lágua y e linpa-s ku ses kabélu. ⁴⁵ Bu ka resebe-M ku beju, má désdi ki N txiga es mudjer ka para di beja-M pé. ⁴⁷ Bu ka unji nha kabésa ku azeti, má es mudjer unji nhas pé ku purfumu. ⁴⁶ Purtantu, N ta fla-u: Purkauza di perdon di ses monti pekadu, es mudjer ta ama txeu. Má kel algen ki ta perduadu, e ta ama poku. ⁴⁸ Nton Jezus fla kel mudjer: "Bus pekadu dja sta perduadu". ⁴⁹ Nton, kes ki staba na méza ku Jezus, es kumesa ta fla kunpanheru: Es ómi é kenha, ki ti pekadu E ta pêrdua? ⁵⁰ Má Jezus fla kel mudjer: "Bu fé dja salva-u. Bai ku pas".