¹ Un dia Jezus staba na bera di lagu di Jenezaré, y multidon staba ta perta-L, pamodi es kreba obi palavra di Déus. ² Y Jezus odja dôs bóti la na bera di lagu. Kes piskador dja dixaba di kes bóti, y es staba ta laba ses redi. ³ Nton, Jezus entra na un di kes bóti, ki éra di Simon, y E pidi-l pa e afasta-L un bokadinhu di téra. Dipôs E xinta y E kumesa ta inxina multidon di la di ekl bóti. ⁴ Kantu Jezus kaba di pâpia, E fla Simon: "Bai pa kel ladu más fundu, y nhos bota redi pa piska". ⁵ Simon rasponde-L y e fla: "Méstri, dja nu trabadja rixu duranti tudu es noti li, y nada nu ka panha. Má, pamodi é Bo ki fla, N ta ba lansa redi". ⁶ Kantu kes fazi asin, es panha tantu pexi ki redi kumesa ta ratxa. ⁷ Nton es fazi sinal pa kunpanherus ki staba na ótu bóti pa es ben djuda-s. Kantu es txiga, es intxi tudu kes dôs bóti, y kuazi ki es staba ta bai pa fundu. ⁸ Kantu Simon Pedru odja es kuza, e duedja na pé di Jezus, y e fla: "Fika lonji di mi, Sinhor, pamodi mi é un ómi pekador". ⁹ Simon, ku tudu kes ki staba djuntu kual, es fika spantadu, purkauza di grandi kuantidadi di pexi ki es panha. ¹⁰ Kes sósiu di Simon, Tiagu y Djon, fidjus di Zebedeu, es fika spantadu tanbe. Y Jezus fla Simon: "Ka bu xinti medu, di oji-en-dianti bu ta ser piskador di ómi". ¹¹ Dipôs ki es rasta ses bóti na praia, es dexa tudu y es sigi Jezus. ¹² Kontisi ki, inkuantu Jezus staba na un sidadi, un ómi xeiu di lépra odja-L. Y bira asin, kel leprozu txiga na Jezus, e da ku duedju na txon, y e inplora: "Sinhor, si Bu krê, Bu pode purifika-m pa N fika kuradu". ¹³ Nton, Jezus stende se mon, E toka-l y E fla-l: "N krê. Fika linpu!" Y lógu, na kel mumentu, lépra sai di korpu di kel ómi. ¹⁴ Nton Jezus da-l órdi: "Ka bu konta ningen! Má bai dexa saserdóti izamina-u, pa bu podi fazi un sakrifísiu di tistimunu ma bu sta linpu, móda lei di Moizes ta manda". ¹⁵ Má fama di Jezus staba ta spadja inda más, y txeu multidon staba ta djunta pa obi-L y pa ser kuradu di ses duénsa. ¹⁶ Má Jezus staba ta djobi kes lugar izoladu undi ki E fikaba ta ora. ¹⁷ Na un di kes dia, kantu, Jezus staba ta inxina povu, uns farizeu y dotoris di lei staba xintadu la. Es ben di tudu bila di kes pruvínsia di Galiléia ku Judéia, y tanbe di sidadi di Jeruzalen. Y puder di Déus staba ku Jezus pa E kura gentis duenti. ¹⁸ Nton, kontisi ki uns ómi txiga ki staba ta karega un ómi paralizadu na un stera. Es staba ta djobi manera di entra ku el na kaza, pa pô-l dianti di Jezus pa E kura-l. ¹⁹ Má es ka atxa manera di leba-l, purkauza di multidon. Nton es subi na tedjadu, y pa un abertura di tedja, es rea kel ómi na stera, dianti di Jezus, na meiu di tudu algen. ²⁰ I kantu ki Jizus odja ses fé, fla-s: Omi, bus pekadus dja sta purduadu. ²¹ Nton skribas ku farizeus kumesa ka kistiona, ta fla: Kel li, a el é kenha pa papia es blasfemia? So Deus ki pode purdua pekadu. ²² Ma Jizus, persebe kuze ki es staba ta pensaba, risponde-s i rabida fla-s: Pamodi ki nhos sa ta kistiona kel li na nhos kurason? ²³ Kuze ki é mas fasil fla: Bus pekadus sta purduadu, o, labanta bu anda? ²⁴ Ma, pa nhos fika ta sabe ma Fidju di Ómi ten puder na tera pa purdua pekadus, N ta fla-u: Labanta, pega bu kama i bu bai pa bu kaza. ²⁵ Na kel ora me, e labanta dianti di es, e pega si kama ki e ta viveba detadu na el i e bai pa si kaza ta ngaba Deus. ²⁶ Tudu algen fika adimiradu, ta ngaba Deus, ku txeu temor, ta fla: Oji nu odja kuzas grandi. ²⁷ Dipos di kel akontesimentu li, Jizus sai di lá i odja un kobrador di inpostu ki txomaba Livi, xintadu na kau ki ta kobradu inpostu. Nton Jizus fla-l: ben ku mi. ²⁸ Livi larga tudu, labanta i sigi-L. ²⁹ Nton Livi pripara un grandi festa pa Jizus na si kaza. Monti kobradoris di inpostu i otus algen staba ku El, inklinadu na meza ta kume. ³⁰ I farizeus ku skribas kumesa ta dá disiplus di Jizus kexa, ta fla: Pamodi ki nhos ta kume i bebe ku kobradoris di inpostu i otus pekadoris? ³¹ Jizus responde-s: Kes ki tini saudi ka meste di médiku, so kes ki sta duenti ki meste. ³² Ami N ka ben txoma justu, ma N ben txoma pekadoris pa rapende. ³³ Es fla-L: Disiplus di Djon sta senpri ta faze jijun i ta ora, disiplus di farizeus tanbe. Ma bus disiplus ta manxi ta bebe i ta kume. ³⁴ Jizus fla-s: Nhos atxa ma algen pode faze kunbidadus di un kazamentu faze jijun timenti noivu stá ku es? ³⁵ Ma, ta txiga kel dia ki noivu ta tradu di es, i na kel dia es ta faze jijun. ³⁶ Nton Jizus konta-s un konparason: Ningen ka ta tra padas di ropa nobu pa txapa un roba bedju, pamodi si e faze kel la, ropa nobu ta fika ratxadu i padas ki e tra di ropa nobu ka ta kunbina ku ropa bedju. ³⁷ Ningen ka ta pui vinhu nobu pa furmenta na pipa bedju. Si e faze asi, vinhu nobu ta rabenta kel pipa i ta lansa, i pipa ta fika distruidu. ³⁸ Ma vinhu nobu debe pudu na pipa nobu. ³⁹ Ningen, dipos di toma vinhu bedju, ta dizeja toma vinhu nobu, pamodi e ta fla: Vinhu bedju ki e bon vinhu.