¹ Jezus volta di Riu Jurdon xeiu di Spritu Santu, y Spritu Santu gia-L pa dizértu. ² undi ki diabu tenta-L duranti korénta dia. Duranti tudu kes dias Jezus ka kume nada, y kant kes dia kaba, E xinti fómi. ³ Nton, diabu fla-L: "Si bu é Fidju di Déus, manda manda es pédra bira pon". ⁴ Ma Jezus rasponde-l: "Sta skritu na Palavra di Déus: 'Ómi ta mesti más di pon pe vivi'". ⁵ Dipôs, diabu leba Jezus pa un lugar mutu altu y na un mumentu e mostra-L tudu nason di mundu. ⁶ Y diabu fla-L: "N ta da-U tudu puder di es nason, y tudu ses glória, pamodi N dadu es, y N ta da-s pa ken ki N krê. ⁷ Purtantu, si Bu duedja nha dianti pa adora-m, tudu es é di bo". ⁸ Y Jezus rasponde-l y E fla-l: "Sta skritu na Palavra di Déus: 'Bu ta adora Sinhor bu Déus, y sô El bu ta sirbi'". ⁹ Nton diabu leba-L pa Jeruzalen y pô-L na lugar más altu di Ténplu y e fla-l: "Si bo é fidju di Déus, bua di li pa baxu. ¹⁰ Pamodi sta skritu na Palavra di Déus: 'Déus ta manda ses anju pa guarda-U, ¹¹ y pa puluta-U, pa bu pé ka da topada na ninhun pédra.'" ¹² Má Jezus rasponde-l y E fla-l: "Tanbe sta skritu na Palavra di Déus: 'Ka bu tenta Sinhor bu Déus'". ¹³ Y kantu diabu kaba di tenta Jezus di tudu manera, e dexa-L ti otu ténpu oportunu. ¹⁴ Jezus volta pa pruvínsia di Galileia na puder di Spritu Santu, y se fama kóre pa tudu kel zóna. ¹⁵ E ta inxinaba na kes sinagóga la, y tudu algen staba ta pâpia ben d'El. ¹⁶ Kantu Jezus txiga na bila di Nazaré, na pruvínsia di Galiléia, lugar undi ki E kria, E entra na sinagóga na sabadu, móda era di kustumi, y E labanta pa lé. ¹⁷ Nton, es da-L livru ki antigu pruféta Izaías skrebe. Kantu E abri livru, E atxa lugar undi ki staba skritu: ¹⁸ "Spritu di Sinhor sta riba di Mi, pamodi E skodje-M pa N konta Notísia Sábi pa póbris. E manda-M pa N pruklama liberdadi pa kes ki sta maradu na korenti, pa N poi ségu bira ta odja, pa N libra kes ki sta smagadu, ¹⁹ y pa N anúnsia ma ténpu txiga kantu Déus ta salva se povu". ²⁰ Dipôs Jezus fitxa livru, y E da-l pa rasponsável di kel raunion. Nton, E xinta, y tudu odju na kel sinagoga fika fikisadu na Jezus. ²¹ Nton Jezus Kumesa ta pâpia ku es, y E fla-s: "Oji, es parti di Skritura Sagradu kunpri, timenti nhos staba ta obi-l". ²² Y tudu algen fika ta pâpia ben di El y es fika spantadu ku kes palavra sábi ki E staba ta fla. Y es fika ta purgunta: "Es-li.«, El ka é fidju di Juzé?". ²³ Y Jezus fla-s: "Ku sertéza nhos ta lenbra-N kel ditadu: 'Dotor, kura bu kabesa. Y nhos ta fla-M tanbe: Fazi li na bila undi ki bu kria, tudu kes milagri ki nu obi ma bu faze na Kafarnaum'". ²⁴ Jezus kontínua y E fla: "Má N ta fla nho, na verdadi: Ninhun pruféta é resebedu dretu na bila undi ki e kria. ²⁵ N ta fla nhos, na verdadi, tenba txeu viúva na Izrael na ténpu di antigu pruféta Elías, kantu txuba ka kai pa três anu y meiu, y un grandi fómi kai riba tudu zóna di Izrael. ²⁶ Má Deus ka manda Elías pa djuda ninhun di kes viúva di povu di Izrael. Invês di ke-li, Déus manda-l sô pa bila di Saréptia, ki ta fika pértu di sidadi di Sidon, pa e bai djuda un viúva ki ka éra judeu. ²⁷ Tanbe, tenba txeu judeu na Izrael ki tenba lépra na tenpu di pruféta Elizeu, má ninhun des ka fika kuradu, sô Naaman, un ómi di pruvínsia di Síria, ki ka éra judeu". ²⁸ Y tudu kes ki staba na sinagóga fika xeiu di raiba kantu ki es obi kes kuza. ²⁹ Nton, es labanta y es rasta Jezus pa fóra di bila di Nazaré. Es leba-L ti altu di monti, undi ki Nazaré ta fikaba, pa es podi pintxa-L di la pa baxu. ³⁰ Kontudu, Jezus pasa na meiu di kel multidon y E ba se kaminhu. ³¹ Nton, Jezus dixi pa bila di Kafarnaum, na pruvínsia di Galileia. Y na sabadu, E staba ta inxina povu la. ³² Y tudu algen fika spantadu ku ses inxinamentu, pamodi se palavra tenba puder. ³³ Na sinagóga, tenba un ómi ki staba kontroladu pa un dimóni, un spritu mau, y kumesa ta grita ku vós altu: ³⁴ "Uai! Kuzé ki Abo ten ku nos, Jezus di Nazaré? Abo ben pa kaba ku nos? N sabe dretu ken ki bo é. Abo é Kel ki é santu di Déus!". ³⁵ Má Jezus raprende-l Y E fla: "Fika kétu! Sai fóra des ómi!". Y dimóni fulha kel ómi na txon na meiu di tudu algen, y e sai d'el sen faze-l mal. ³⁶ Tudu algen fika spantadu y es fika ta fla es-ku-es: "Kuzé? Kal palavra é keli? Pamodi, ki otoridadi y puder, E ta da órdi pa spritu mau, y es ta sai". ³⁷ Y fama di Jezus spadja pa tudu lugar na ridor di tudu zóna. ³⁸ Dipôs ki Jezus sai di sinagóga, E ba entra na kaza di Simon. Kómu sógra di Simon staba ta súfri ku txeu fébri, es pidi Jezus pe djuda-l. ³⁹ Nton Jezus ba fika di pé na ladu di se kama, y E genge pa kel mudjer. E raprende kel fébri, y fébri sai d'el. Y na kél óra mê, sógra di Simon labanta y e kumesa ta kuida d'es. ⁴⁰ Kantu sól kanba, povu kumesa ta traze Jezus tudu ses duenti ki tenba tudu tipu di duénsa. Jezus poi se mon riba di kada un des, y E kura-s. ⁴¹ Tane, dimóni staba ta grita ta fla: "Abo é fidju di Déus!" Má Jezus raprende-s, y E ka dexa-s pâpia, pamodi es sabeba ma El éra Misías. ⁴² Kantu manxe, Jezus sai di kel bila y E bai pa un lugar izoladu. Má kes multidon fika ta buska-L. Óra ki es atxa-L, es tenta inpidi-L, pa E ka dexa-s. ⁴³ Má Jezus fla-s: "É nisisáriu pa N ba konta Notísia Sábi di Reinu di Déus pa gentis na otus sidadi tanbe, pamodi é pa es propózitu ki Déus manda-M". ⁴⁴ Nton, Jezus sai pa konta Notísia Sabi na tudu sinagóga na pruvínsia di Judeia.