¹ Nton, tudu lídiris di judeus labanta kontra el y es traze-l pa Pilatus. ² Es kumesa ta akusa-l ta fla: Nu nkontra es ómi ta preverti nos nason, ta pruibi paga inpostu pa Séza, ta diklara ki El mé é Misías, un rei. ³ Pilatus purgunta-l: Abo é Rei di Judeus. ⁴ Y Jezus rasponde-l: Bo bu fla. Y Pilatus fla pa xefis di saserdótis y multidon: N ka atxa ninhun kuza mariadu nes ómi. ⁵ Ma es insisti, ta fla: E sa ta ajita povu, ta inxina pa tudu pruvínsia di Judeia, di kumesa désdi Galileia ti li. ⁶ Nton Pilatus obi keli y E purgunta si kel ómi éra galileu. ⁷ Kantu é diskubri ki E staba riba otoridadi di Érodis, e manda-l pa el, ki tanbe staba na Jeruzalen na kes dia. ⁸ Kantu Eródis odja Jezus, e ri txeu, pamodi, tenba txeu tenpu, E diseja odja-l. E obi fala di Jezus y e tenba diseju odja un milagri rializadu pa El. ⁹ Eródis interoga Jezus ku txeu palavra, má El nada ka raspond. ¹⁰ Kes xefis di saserdóti ku skribas labanta, ta akusa-l fórti. ¹¹ Eródis, ku ses soldadu dispreza-l y es zomba del, y es bisti-l ku un kapa bazofu, y, dipôs, es leba-l di vólta pa Pilatus. ¹² Pilatus y Eródis torna amigu na kel dia. Antis di kel li es éra inimigu. ¹³ Nton, Pilatus, konvoka kes xefis di saserdóti, otoridadi di povu y multidon, ¹⁴ y E fla-s: Nhos traze-m es ómi sima algen ki sta leba povu pa rabela, má nhos odja: ami, n interoga-l dianti di nhos, n ka atxa ninhun kulpa nes ómi a respetu di kuzas sobri kes ki nhos sa akusa-l. ¹⁵ Nen mézmu Eródis, pamodi E manda-l di vólta. Nhos odja ma El nada e fazi pa meresi morti. Ami, purtantu, ¹⁶ N ta kastigá-l y N ta soltá-l. ¹⁷ Pilatus éra obrigadu a solta un présu pa judeus duranti festa (Es virsíkulu ka sta skritu na kópia más antigu). ¹⁸ Má es grita tudu djuntu, ta fla: Sai di li ku es ómi y soltanu Barabás!. ¹⁹ Barabás éra un ómi ki staba presu pamodi un rebelion na sidadi y tanbe pa asasinatu. ²⁰ Otu bes Pilatus fla, ta diseja solta Jezus. ²¹ Má es grita, ta fla: Krusifika-L, krusifika-L. ²² Y pa triséru bes, E fla: Pamodi Ki kuza mariadu es ómi fazi N ka atxa nada nel ke meresi pena di mórti. Lógu, ki n kastiga-L, n ta libera-L. ²³ Má es grita insintentimenti, ta pidi pe ser krusifikadu. Y gritu di multidon konvensi Pilatus. ²⁴ Nton, Pilatus disidi konsedi ses izigÊncia. ²⁵ E solta kel kes pidi, kel ki staba na kÂdia pa motin y asasinatu. Má, e ntrega Jezus pa ses vontadi. ²⁶ Inkuantu es leba-l di la, es pega un Simon, di pruvínsia di Sireni, ki staba ta binha di kanpu, es poi kruz riba del pa karega, ta sigi Jezus. ²⁷ Un grandi multidon di povu y di mudjeris ta lamentaba y ta txora pa El ta sigi-L. ²⁸ Má Jezus volta pa es, y E fla-s: Fidjus di Jeruzalen, ka nhos txora pa Mi; má nhos txora pa nhos kabésa y pa nhos fidju. ²⁹ Ta ben dias ki ta fla-du: Filis kes ki ka da fidjus, y kes ki ka da mama. ³⁰ Nton, ta kumesadu ta fla pa monti: Kai riba nós, y montanha: Nhos kubri-nu. ³¹ Pamodi, si es fazi keli kantu arvi inda staba verdi, kuzé ki ta kontisi se sta séku. ³² Kes otu ómi, dÔs kriminosu, lebadu ku Jezus pa ser mortu. ³³ Kantu es txiga txomadu Kavera, ala es krusifika-L, sima es dÔs kriminosu, un na sé dréta y ótu na sé skérda. ³⁴ Jezus fla: Pai, pÊrdua-s, es ka sabi kuzé kes sa ta fazi. Y es lansa sotri, ta dividi ses ropa. ³⁵ Povu fika odja inkuantu kes otoridadi tanbe ta ridikulariza-L, ta fla: E salba otus gentis, dexa ke salba sé kabesa, si El é Misías, skodjedu di Déus. ³⁶ Kes soldadus tanbe zonba del, ta oferesi vinagri, ³⁷ ta fla-l: Si bo e Rei di judeus, salba bu kabesa. ³⁸ Tenba tanbe un inskrison sobri el: KELI É REI DI JUDEUS. ³⁹ Un di kes kriminosu ki foi krusifikadu, insultal-L ta fla: Abo ka é Misías Salba bu kabesa y nos tanbe. ⁴⁰ Má kelotu rasponde-L y, raprende-L, fla-L: Bu ka ta ruspeta Déus, bu sta na mézmu kondenason ⁴¹ Nos, di fatu, nu sta li justamenti, pamodi nu rasebi kel ki nu meresi pa nos atitudi. Má es ómi ka fazi nada mariadu. ⁴² Y E akrisenta: Jezus, lenbra di mi, ó ku ta entra na bu reinu. ⁴³ Jezus fla-l: Na verdadi n ta flo-u, ma oji mé bu ta sta ku mi na paraizu. ⁴⁴ Dja éra más ou menos meiu dia, y staba skuridon sobri téra ti trés óra di tardi, ⁴⁵ pamodi sol dexa di limia y kortina di tenplu ratxa dentu meiu. ⁴⁶ E, kantu e grita rixu, Jezus fla: Pai, na bu mon n ta ntrega nha spritu. Kantu e fla kela, e móri. ⁴⁷ Kantu komandanti romanu odja tudu kuza ki kontisi, e da glória Déus, ta fla: Es ómi éra justu mé. ⁴⁸ Kantu tudu multidon ben pa odja kuzas ki kontisi, dipÔs kes odja, es volta ta bati na petu. ⁴⁹ Má tudu kunhesidu di Jezus, y kes mudjeris ki sigi-L désdi pruvínsia di Galileia permanesi di lonji, ta odja kes kuza. ⁵⁰ Tenba un menbru di konselhu di judeus txomadu Juzé, ómi bon y justu, ⁵¹ di Arimateia, un sidadi judia. E sa ta speraba pa Reinu di Déus (e ka konkordaba ku disizon y ason di Konsedju). ⁵² Es ómi, bai na Pilatus, e pidi korpu di Jezus. ⁵³ E dixi-L, e nvolve-L nun lensol di linhu finu y E pô-l na un koba kavadu na rotxa, undi ningén podu antis. ⁵⁴ Éra dia di Priparason, y Sábadu staba pa kumesa. ⁵⁵ Kes mudjeris ki andaba ku El désdi di pruvínsia di Galileia odja kel koba y módi ki se korpu pÔdu la. ⁵⁶ Es volta y pripara isensias y purfumis. Nton, na sábadu es diskansa sima na mandamentu.