¹ Staba kuazi ta txiga fésta di pon sen furmentu ki ta txomadu Páskua. ² Y kes saserdóti prinsipal, ku dotoris di lei, staba ta tenta atxa un manera disfarsadu pa kaba ku Jezus, pamodi es tenba medu di povu. ³ Nton, Satanas entra na Júdas, kel ki si nómi éra Iskariótis, un di kes dozi apóstlu. ⁴ Nton, Júdas ba pâpia ku kes saserdóti prinsipal, y kes komandanti di guardas di Ténplu, pa konbina manera ki e podeba intrega Jezus na ses mon. ⁵ Es fika mutu konténti ku ajuda di Júdas, y es promete paga-l ku muéda di prata. ⁶ Júdas konkorda ku es, y e fika ta spéra midjór oportunidadi pa trai Jezus, óra ki E ka tenba un multidom na se vólta. ⁷ Agóra, txiga dia di fésta di pon sen furmentu, dia ki ta meste faze sakrifísiu di karneru nobu pa Páskua. ⁸ Nton, Jezus manda Pedru ku Djon, y E fla-s: "Nhos bai, y nhos kume-l." ⁹ Es purgunta-L: "Undi ki Nhu krê pa nu pripara seia?" ¹⁰ Jezus fla-s: " Óra ki nhos entra na sidadi di Jeruzalen, nhos ta inkontra ku un ómi ta karega un póti di agu. Nhos sigi-l ti kel kaza undi ki e entra. ¹¹ Nton nhos fla donu di kel kaza: ' Méstri manda purgunta-u: Undi ki ta fika salon di óspri, pa N pode kume seia di Páskua ku nhas disiplu?' ¹² Y kel ómi ta ba mostra-nhos un grandi salon, ku mobília, na andar di riba. Purtantu, nhos faze priparason pa nhos Páskua la." ¹³ Nton, es bai, y es atxa tudu kuza móda Jezus konta-s. Asin, es pripara seia di Páskua. ¹⁴ Kandu txiga óra pa seia di Páskua, Jezus toma se lugar na méza, djuntu ku ses apóstlu. ¹⁵ Dipôs E fla-s: "Dja dura ki N ten txeu vontadi di kume es seia di Páskua ku nhos, ántis di nha sufrimentu. ¹⁶ Pamodi, N ta fla-nhos: N ka ta kume es seia di Páskua nunka más, ti ki se siginifikadu ta ben kunpri na Reinu di Déus." ¹⁷ Jezus toma un Kálisi, E agradese Déus, y E fla: "Nhos toma, y nhos raparti-l entri nhos tudu. ¹⁸ Pamodi, N ta fla-nhos: N ka ta bebe di es fruta di vinha nunka más, ti ki Reinu di Déus ta ben." ¹⁹ Dipôs Jezus toma pon, E agradese Déus, E parti-l, y E raparti-l ku es. Y Jezus fla-s: "Kel-li é nha korpu, ki é intregadu pa nhos. Nhos faze kel-li pa lenbransa di Mi." ²⁰ Di mézmu manera, dipôs ki es kume seia, Jezus toma kálisi, y E fla: "Es kálisi é nobu kontratu na nha sangi, ki é diramadu pa nhos." ²¹ Dipôs Jezus fla: " kontudu, nha traidor sta li, y e sa ta djunta se mon ku Mi na es méza. ²² Pamodi, na verdadi, Fidju di Ómi ta sigi kaminhu konfórmi dja foi diterminadu. Má ai di kel ómi ki seta trai-L." ²³ Nton disiplu kumesa ta diskuti entri es ki podeba faze es kuza. ²⁴ Tanbe, labanta un diskuson entri disiplu sobri kal entri es éra más inportanti. ²⁵ Nton, Jezus fla-s: "Reis di mundu ta dumina sobri ses povu, y kes otoridadi ki ta faze asin, es ta fla ma é pa ben di povu. ²⁶ Má entri nhos, ka pode ser asin. Okontráriu, kel más grandi na nhos meiu debe ser sima kel más pikinoti, y kel ki ta governa debe ser sima kel ki ta sirbi. ²⁷ kenha ki é más inportanti, kel ki foi dadu lugar na méza kel ki ta sirbi méza, ô kel ki ta sirbi méza? Klaru ki é más inportanti, kel ki foi dadu lugar na méza. Más, na nhos meiu, Ami é sima kel ki ta sirbi. ²⁸ Anhos é kes ki permanese ku Mi na nhas tentason. ²⁹ Purtantu, sima nha Pai da-M direitu di governa, N ta da-nhos es direitu tanbe. ³⁰ Asin, nhos ta ben kume y bebe na nha méza, na nha Reinu, y nhos ta ben xinta na tronus, pa julga kes dozi tribu di Izrael." ³¹ Dipôs Jezus fla Pedru: " Simon! Simon! Ala-l la, Satanas pidi pa prova-nhos, sima labrador ku se pó ta sipara karépa di fijon. ³² Má N ora pa bo, Simon, pa bu fé ka fadja. Asin, kuandu bu volta pa Mi, djuda bus irmon bira más fórti tanbe." ³³ Má Pedru fla Jezus: "Sinhor, N sta prontu pa bai ku Nho ti prison, y mézmu pa mórti. ³⁴ "Nton Jezus fla-l: " Pedru, N ta fla-u, na es noti li, ántis di galu kanta, bu ta fla três bês ma bu ka ta konxe-M." ³⁵ Dipôs Jezus purgunta ses disiplu: "Kandu N envia-nhos, sen kartera, sen troxa N y sen otu par di sandália, purakazu falta-nhos algun kuza? "Y es raspondi: "Nau! Ka falta nada." N ³⁶ ton Jezus fla-s: " Má gósi li, kel ki ten kartera, e debe leba-l, y troxa tanbe. Y kel ki ka ten spada, e bende se kapa pa e pode kunpra un. ³⁷ Pamodi, N ta fla-nhos, ta mesti kunpri na Mi, es kuza ki skrebedu na Skrituras Sagradu: 'E foi kontadu djuntu ku kriminozu.' Sin, tudu kuza ki prufétas skrebe sobri Mi, ta ben kunpri." ³⁸ Asin disiplus fla Jezus: "Odja Sinhor, ali dôs apada!" Y Jezus fla-s: "Dja basta!" ³⁹ Komu éra se kustumu, Jezus sai di sidadi pa ba pa Monti di Olivera, ses disiplu bai ku El. ⁴⁰ Kuandu es txiga na kel lugar, Jezus fla-s: "Nhos ora pa nhos ka kai na tentason." ⁴¹ Nton Jezus afasta di es un distánsia di un tiru di pédra. E duedja y E kumesa ta ora asin: ⁴² "Pai, si é bu vontadi, tra-M es kálisi di sufrimentu. kontudu, pa ka ser fetu nha vontadi, má sin bu vontadi." ⁴³ Asin, parse un anju di séu pa da-L forsa. ⁴⁴ Jezus staba angustiadu. Nton, E ora ku más forsa ainda, y se suor bira sima góta di sangi ki staba ta pinga na txon. ⁴⁵ Kuandu Jezus labanta di se orason, E volta pa ses disiplu, y E odja ma kansasu di tristéza pôs ta durmi. ⁴⁶ Nton Jezus fla-s: "Pamodi ki nhos sa ta durmi? Nhos labanta, y nhos ora pa nhos ka kai na tentason." ⁴⁷ Timenti Jezus staba ta pâpia, un multidon txiga. Kel ki ta txomadu Júdas, un di kes dozi disiplu, staba ta gia-s, y e txiga na Jezus pa da-L un beijinhu na róstu. ⁴⁸ Má Jezus purgunta-l: "Júdas, é ku un beijinhu ki bu ta trai Fidju di Ómi?". ⁴⁹ Kantu kes gentis ki staba na roda di Jizus odja kuze ki staba ta kuntise, es fla: Sinhor, nu debe korta-s ku spada? ⁵⁰ Nton un di es fri servu di sumo saserdoti i korta-l si oredja ndreta i fulha. Jizus fla-l: Dja txiga, deixa-s. ⁵¹ I Jizus toka-l na oredja i pu-l el di volta na lugar. ⁵² Jizus fla pa prinsipal di saserdotis, xefis di tenplu i gentis grandi di judeu ki ben kontra El: Nhos ben sima ladron, ku spada i bara pau pa nhos ben prende-m. ⁵³ Timenti N sta tudu dia ku nhos na tenplu, ka nhos ka pui nhoss mon na mi. Ma, kel é nhos ora i ora di trevas dumina. ⁵⁴ Nhos prende-L, nhos leba-L i nhos traze-L pa kaza di sumu saserdoti. Ma Pedru, fika di lonji, ta sigi-s. ⁵⁵ Mas tardi, es sende un fogera na meiu di patiu i es xinta, i Pedru xinta djunta ku es. ⁵⁶ Un kriada odja Pedru ki staba xintadu bera fogera, odja-l dretu i fokalizadu, rabida fla: A el tanbe e staba ku El. ⁵⁷ Ma Pedru nega, ta fla: Mudjer, ami N ka konxe-L. ⁵⁸ Un tenpu dipos, otu algen odja Pedru i fla: Abo tanbe é un di es. Ma Pedru fla-l: Omi, ami nau. ⁵⁹ Un ora dipos, un otu algen insisti na fla: Dimidivera, es ómi li tanbe staba ku El, pamodi el é galileu. ⁶⁰ Ma Pedru rabida fla: Omi, ami N ka sabe di kuze ki bu sa ta papia. I na kel ora me, timenti Pedru staba ta papiaba, galo kanta. ⁶¹ Sinhor bira i odja pa Pedru, i Pedru lenbra di palvra ki Sinhor falaba el, kantu E fla-l: Oji, anti ki galu kanta, bu ta nega-m tres bes. ⁶² Nton, Pedru sai i kumesa ta txora ku txeu amargura. ⁶³ Nton omis ki staba ku Jizus, staba ta faze trosa di el i ta dadji na el. ⁶⁴ Es tapa ses odjos, i es fika ta purguntal, ta fla: Prufetiza go! Dibinha kenha ki sa ta dadji na bo? ⁶⁵ Es blasfema ta papia monti kuza kontra El. ⁶⁶ Na faxi ki dia manxi, gentis grandi di judeu riuni ku prinsipal di saserdotis i ku skribas. Es leba Jizus pa Konselhu di Judeus, ⁶⁷ i es fla-L: Si Abo é Kristu, fla-nu. Jizus bira fla-s: Si N fla nhos, nhos ka ta akredita, ⁶⁸ i si N faze nhos un purgunta, nhos ka ta rusponde. ⁶⁹ I di gosi pa dianti, Fidju di Omi ta sta xintadu na ndreta di Deus poderozu. ⁷⁰ Tudu algen rabida fla: Nton, Abo é Fidju di Deus? Jizus rusponde-s: Nhos ki sa ta fla ki Ami é. ⁷¹ Es fla: Pamodi ki inda nu meste di tistimunha? Dja nu obi di si própi boka.