¹ Inkuantu Jezus staba na Témplu, E odja gentis riku ta poi ses kontribuison na kaxa di oférta. ² Tanbe, E odja un sértu viúva póbri ki poi dôs muéda di kóbri pikinoti na kel mézmu kaxa. ³ Nton Jezus fla: «Na verdadi, N ta fla-nhos: es viúva póbri da más ki tudu kes otu. ⁴ Pamodi, tudu kes gentis riku da ses oférta di kel sóbra ki es ten, má es viuva, na se pobréza, e da tudu kel ki e tenba pa vive.» ⁵ Alguns diciplu di Jezus staba ta pâpia sobri Ténplu, ta dimira kes pédra bunitu y kes oférta ki gentis da pa Déus, pa infeita Ténplu. Má Jezus fla: ⁶ «Dias ta ben kandu tudu kes kuza, ki nhos sa ta odja li, ta ser ronbadu, y nen sikér un pédra ka ta fika riba di otu.» ⁷ Nton, es purgunta Jezus: "Méstri, na kal ténpu ki kes kuza ta ben ser? Y kal ki ta ser sinal, ki ta mostra ma kes kuza sta kuasi ta kontise ?" ⁸ Y Jezus fla-s: "Nhos ten kudadu pa nhos ka ser inganadu, pamodi txeu algen ta ben na nha nómi, y es ta fla: ' Ami é Misías' y 'Fin di ténpu sta pértu'. Má ka nhos sigi-s. ⁹ Kandu nhos obi notísia sobri txeu géra y ravoluson, ka nhos xinti medu. Pamodi, é nisisáriu pa kes kuza kontisi primeru, má fin ka sta sin di txiga." ¹⁰ Dipôs Jezus fla-s: "Un nason ta labanta kóntra otu nason, y reinu kóntra reinu. ¹¹ Na txeu lugar, téra ta ben treme ku txeu forsa, y ta ten grandi fómi ku txeu duénsa ki ta spadja. Ta ten kontisimentus ki ta spanta gentis, y grabdis sinal na séu. ^{12 13} Má ántis di tudu kes kuza, es ta prende-nhos, e ta pirsigi-nhos, es ta intrega-nhos pa ser julgadu na sinagógas, es ta bota-nhos na kâdia, y nhos ta ser labadu pa ser julgadu dianti di reis y governadoris, tudu purkauza di nha nomi. Tudu kes kuza ta da-nhos oportunidadi di ser nhas tistimunha. ¹⁴ Purtantu, nhos fika disididu pa nhos ka priokupa, ántis di óra, ku kuza ki nhos ta fla pa difende nhos kabésa. ¹⁵ Pamodi, N ta da-nhos palavras y sabedoria, ki ka pode ser nagadu, nen dirotadu, pa ninhun di kes ki sta kóntra nhos. ¹⁶ Ti nhos pais, nhos irmon, nhos parentis, y nhos amigus, ta intrega-nhos na mon di kes ki ta mata alguns di nhos. ¹⁷ Y tudu algen ta odia-nhos, purkauza di nha nómi. ¹⁸ Kontudu, ninhun fiu di nhos kabélu ka ta perde. ¹⁹ Nhos fika firmi, y nhos ta ser salvu." ²⁰ Dipôs Jezus fla: " Kandu nhos odja sidadi di Jeruzalen ta ser serkadu ku trópas, nhos ta sabe ma ténpu di se distruison dja txiga. ²¹ Na kel ténpu, kes ki sta na Judéia debe fuji pa montanhas, kes ki sta déntu di sidadi debe sai di el, y kes ki sta na kanpu ka debe entra na sidadi. ²² Pamodi kes dia ta ser dias di kastigu, pa kunpri tudu kuza ki Skrituras ta fla. ²³ Koitadu di kes mudjer ki sta ku fidju na bariga, ô ku fidju ki ta mama, na kes dia. Pamodi, un grandi sufrimentu ta kai riba di es téra, y un kastigu riba di es povu. ²⁴ Es ta ser matadu ku spada, y es ta ser lebadu prézu pa tudu nason. Y kes ki ka é judeu ta smaga Jeruzalén baxu ses pé, ti ki ténpu ta kunpri pa kes ki ka é judeu. ²⁵ Ta ben ten sinal stranhu na sól, na lua y na strélas y tudu nason ta fika angustiadu y dizorientadu ku rabolisu di óndas na mar. ²⁶ Ómis ta ben dismaia purkauza di grandi medu y presentimentu di kes kuza ki ta ben kontisi na téra, pamodi kes astru na séu ta ser sakudidu di ses lugar. ²⁷ Dipôs nhos ta odja Fidju di Ómi ta ben na un núven, ku puder y grandi glória. ²⁸ Kuandu kes kuza kumesa ta kontise, nhos fika firmi na kanéla y nhos labanta nhos kabésa pa séu, pamodi nhos salvason sta sin di txiga na nhos." ²⁹ Nton Jezus faze-s un konparason: "Nhos rapara figera y tudu kes otu arvi. ³⁰ Kandu nhos odja ma kes fódja nobu dja sai, nhos própi ta sabe ma veron ta txiga. ³¹ Di mézmu manera, óra ki nhos adja kes sinal ki N konta-nhos, nhos ta sabe ma Reinu di Déus sta sin di txiga. ³² N ta fla-nhos, na verdadi, es jerason ka ta pasa, ántis ki tudu kes kuza kontise. ³³ Séu ku téra ta dexa di izisti, má nha palavras ka ta disaparese nunka." ³⁴ Dipôs Jezus fla: "Nhos ten kudadu ku nhos kabésa, pa nhos kurason ka fika karegadu ku paródia, bebedera, y priokupason ku kuzas di es bida. Asin, kel dia ta ben dirapenti, ³⁵ y e ta panha-nhos di surpréza, sima un armadilha. Pamodi kel dia ta ben riba di tudu algen, na tudu párti di mundu. ³⁶ Nhos mante sénpri atentu, y nhos fika ta ora pa nhos pode skapa di tudu kes kuza ki ta ben kontise, y ki nhos pode fika di pé dianti Fidju di Ómi." ³⁷ Asin, Jezus pasa tudu dia ta inxina povu na Ténplu. Má di notinhu, E ta saíba di Jeruzalen pa pasa noti na Monti di Olivera. ³⁸ Tudu gentis ta labantaba sédu pa ba obi kes kuza ki Jezus ta inxinaba na Ténplu.