¹ Ma na prumeru dia di simana, na madrugada dentu, mudjeris bai pa sipulkru, i es leba djuntu ku es prufumus ki es tenba priparadu. ² Es atxa pedra di sipulkru tradu, ³ ma kantu es entra, es ka atxa korpu di Sinhor Jizus. ⁴ Timenti es staba spantadu ta pensa na kuza ki kuntise, dos omis parse djuntu di es ku ropa ta lumia. ⁵ Mudjeris fika ku txeu medu, i kes dos omi bira rostu pa txon, fla pa kes mudjeris: Pamodi ki nhos sa ta djobe na meiu di mortus, Kel ki sta vivu? ⁶ E ka sta li, dja E rusisita. lenbra di kuze ki e fla nhos kantu inda e staba ku nhos na Galileia, ⁷ ki e fla ma Fidju di Omi ta intregadu na mon di omis pekadoris i ta ser krusifikadu i ki na triseru dia E ta rusisita. ⁸ Nton mudjeris lenbra di kes palavras ki Jizus flaba es. ⁹ I es rabida di sipulkru, i es konta tudu ki es kuzas ki kuntise pa onzi disiplus i pa tudu algen ki sta la tanbe. ¹⁰ Maria Madalena, Juana i Maria, mai di Tiagu, ku otus mudjeris ki tanbe staba ku es, konta es kuzas pa apostulu. ¹¹ Ma apóstulu ka akredita na kes mudjeris, pamodi kuzas ki mudjeris konta-s parse sima un diliriu. ¹² Pedru, fadigadu, labanta i dá un karera pa sipulkru. E arma spreta pa dentu di sipulkru, e odja so panu di linhu. I e volta pa kaza spantadu ku kuzas ki staba ta kuntise. ¹³ Na kel dia me, dos di disiplus, staba ta baba pa un zona ki ta txomadu di Imaus, ki ta fikaba sasenta stádiu lonji di Jeruzalen. ¹⁴ I es staba ta bai ta papiaba sobri kuzas ki tenba akontesidu. ¹⁵ Kuntise ki, timenti es staba ta diskuti i papiaba, Jizus parse na ses meiu i kumesa ta anda ku es. ¹⁶ Ma ses odjus staba inpididu di rakonhese ki era Jizus djuntu ku es. ¹⁷ Jizus purgunta-s: Di kuze ki nhos sta so ta papia na kaminhu? Ntos es para ku txeu tristeza, ¹⁸ i un di kes dos ki txomaba Kliopas rusponde: Abo é uniku viajanti ki inda ka sabe kuze ki pasa na Jiruzalen es dia? ¹⁹ Jizus purgunta-s: Ki kuzas?. Es rusponde: Kuzas ki kuntise ku Jizus di Nazare, ki era un prufeta ku txeu puder na obra i na palavra, dianti di Deus i di tudu povu, ²⁰ i moki ki xefis di saserdotis ku nos otoridadis ntrega-L pa ser kondenadu pa morti i ser krusifikadu. ²¹ Nu ta speraba ma era El ki ta libertaba Israel, ma, infilismenti, desdi ki kuzas kuntise, oji dja sta na triseru dia. ²² É verdadi ki alguns mudjeris ki ta sta djuntu ku nos, suprende-nu, kantu ki di madrugada es bai pa sipulkru. ²³ I es ka atxa korpu di Jizus lá, es ben i es konta-nu ki es teve un vizon di anjus, ki fla-s ma Jizus sta bibu. ²⁴ Alguns ki staba ku nos bai pa sipulkru pa kunfirma kuzas ki mudjeris konta, mas es ka atxa Jizus. ²⁵ Jizus nton fla-s: Omis sen juis na kabesa i ku kurason ki ta dura pa akredita na tudu ki prufetas dja flaba. ²⁶ Ka sta skrebedu ma Kristu mesteba sufri tudu kes kuzas li i dipos entra na si gloria? ²⁷ Nton, Jizus kumesa pa livrus di Muzes i dipos uza tudu livrus di prufetas, ta splika-s, moki tudu skritura ta flaba sobri El me. ²⁸ Kantu és txiga pertu di undi ki es staba ta baba, Jizus dexa-s ba ta bai si dianti. ²⁹ Ma es insisti ku el, ta fla-L: fika ku nos, pamodi dja sta tardi i dia sta kuazi ta kaba. Nton Jizus entra pa fika ku es. ³⁰ Kantu E staba na meza ku es, Jizus pega pon, bensua, parti i da-s. ³¹ Nton, ses odjus abri i es rakonhese ma era Jizus ki staba tudu kes tenpu ku es, i Jizus dizaparese di ses odju. ³² Es fla pa kunpanheru: Nos kurason ka staba ta kemaba timenti E staba ta papiaba ku nos na kaminhu i kantu E staba ta splika-nu skritura? ³³ Na kel ora me, es labanta i es volta pa Jiruzalen. Es atxa onzi riunidu djuntu ku gentis ki staba ku es, ³⁴ i es fladu: Dimidivera Sinhor rusisita i e parse pa Simon. ³⁵ Nton, es tanbe es konta kuzas ki kuntise ku es na kaminhu di Imaus i moki ki es rakonhese Jizus kantu E parti pon. ³⁶ Timenti es staba ta falaba es kuzas, Jizus parse na ses meiu i fla-s mantenha: Ki pas steja ku nhos. ³⁷ Es fika asustadu i ku medu, ta pensa ma es sa ta odjaba spritu. ³⁸ Ma Jizus fla-s: Pamodi ki nhos sta spantadu? Pamodi ki sa ta surji munti dúvidas na nhos kurason? ³⁹ Nhos odja nha mon ku nhas pe, é ami própri. Nhos ben toka-m i nhos odja. Un spritu ka ten karni ku osu sima nhos pode odja ki ami N ten. ⁴⁰ I dipos di fla-s tudu kel li, Jizus mostra-s mon ku pe. ⁴¹ I sime es ka akredita, pamodi es fika rei di konteti i uma maravilhadu, nton Jizus fla-s: Nhos tini algun kuza pa nhos da-m pa N kume? ⁴² Es da-l un padas di pexi asadu. ⁴³ Jizus toma-l i kume-l ses dianti. ⁴⁴ Jizus fla-s: Kantu N staba ku nhos, N fla nhos: Ta mesteba ki kunpriba tudu kuzas ki staba skrebedu serka di mi na Lei di Muzes, na livrus di Prufetas i na Salmus. ⁴⁵ Nton, odju di intendimentu abri-s pa es pode konprendi skritura. ⁴⁶ I Jizus fla-s: Asi ki sta skritu ki Kristu ta sufreba i ta rusisitaba dentu di mortus na triseru dia, ⁴⁷ i ki, na si nomi, ta pregadu rapendimentu i purdon di pekadus pa tudu nason, i ki ta kumesa pa Jiruzalen. ⁴⁸ Anhos é tistimunha di tudu es kuzas. ⁴⁹ N sa ta nvia nhos prumesa di Nha Pai riba nhos, ma nhos spera na sidadi ti ki nhos ser bistidu di puder di riba lá. ⁵⁰ Nton, Jizus leba-s pa fora ti pertu di Betania. I, e labanta ses mon, e bensua-s. ⁵¹ I timenti e ta bensua-s, e ba ta afasta di es i e foi lebadu pa seu. ⁵² Nton, es adora-L i es volta pa Jiruzalen ku grandi alegria. ⁵³ Es staba tudu ora na tenplu, ta ngaba Deus.