¹ Dipôs, Jezus entra na Jerikó y E ba ta trabesa kel bila. ² Na kel bila, tenba un ómi ku nómi di Zakeu, ki éra xéfi di kobradoris di inpostu, y el éra mutu riku. ³ E kreba odja ken ki éra Jezus, má e ka podeba, pamodi tenba un multidon na se frénti, y el éra un ómi pikinoti. ⁴ Nton e kóre pa frénti di Jezus, y e subi na pé di un figera brabu, pa e ta podeba odja-L, pamodi e sabeba ma Jezus staba ta ba pasa pa la. ⁵ Óra ki Jezus txiga na kel lugar, E djobi pa riba, y E fla Zakeu: "Zakeu! Dixi gósi li! Pamodi, oji é nisisáriu pa N fika na bu kaza". ⁶ Nton, Zakeu dixi pa txon, y e rasebe Jezus ku alegria na se kaza. ⁷ Má tudu algen ki odja es kuza kumesa ta rasmunga kóntra Jezus, y es fla: "E entra pa diskansa na kaza di un ómi pekador". ⁸ Asin, Zakeu fika sakédu y e fla Sinhor: "Odja, Sinhor! N ta da metadi di nhas bens pa póbri. Y pa kel algen ki N ingana, N ta torna paga-l kuatu bês más". ⁹ Nton, Jezus fla-l: "Oji, salvason ben es kaza, pamodi es ómi é fidju di Abron tanbe, ¹⁰ y pamodi Fidju di Ómi ben pa buska y salva kes ki sta perdedu". ¹¹ Un multidon staba atentu ta obi kes kuza ki Jezus staba ta fla. Nton, E faze-s un konparason, pamodi E staba kuasi ta txiga na Jeruzalen, y asin povu ta pensaba ma Reinu di Déus staba kuasi ta txiga. ¹² Nton E fla: "Tenba un sértu ómi, di un família inportanti, ki viaja pa un téra lonji pa ser koruadu kómu rei, pa e volta kómu rei. ¹³ Ántis di e bai, e txoma dés di ses sérvu, y e da un muéda di oru pa kada un. E fla-s: 'Nhos faze es dinheru rende más txeu, ti ki N volta'. ¹⁴ Má povu di se téra tenba ódiu di kel ómi, y es manda un kumison tras di el, ku un rekadu ta fla ma es ka kreba pa kel ómi ser koruadu ses rei. ¹⁵ Mézmu asin, e volta koruadu kómu ses rei. Asin, e manda txoma kes dés sérvu, ki e tinha dadu kes muéda di oru, pa e sabe kantu lukru ki es konsigi. ¹⁶ Primeru sérvu ben y e fla: 'Sinhor, N faze bu muéda di oru rende dés bês más'. ¹⁷ Y kel rei fla-l: 'Bu faze mutu dretu! Bu é un bon sérvu! Pamodi bu foi fiel na kuza pikinoti, N ta da-u dés sidadi pa bu governa'. ¹⁸ Dipôs sigundu sérvu ben y e fla: 'Sinhor, N faze bu muéda di oru rende sinku bês más'. ¹⁹ Nton kel rei fla es sérvu tanbe: 'N ta da-u sinku sidadi pa bu governa'. ²⁰ Nton ben otu sérvu y e fla: 'Sinhor, ali-l li, bu muéda di oru. N guarda-l ben guardadu, maradu na un lénsu, ²¹ pamodi N tenba medu di bo. N sabe ma bu é un ómi duru, ki ta toma kel ki bu ka poi, sima algen ki ta korta undi ki e ka símia'. ²² Y kel rei rasponde-l: 'N ta julga-u ku bus própi palavra, sérvu mau. Si bu sabeba ma mi é un ómi duru, ki ta toma kel ki N ka poi, sima algen ki ta korta undi ki e ka símia, ²³ nton pamodi ki bu ka poi nha muéda di oru na banku? Asin, kandu N volta, N podeba rasebe-l ku lukru'. ²⁴ Y kel rei fla kes otu ki staba la ku el: 'Nhos tra-l kel muéda di oru, y nhos da-l pa kel sérvu ki tem dés muéda di oru'. ²⁵ Má es raklama: 'Sinhor, dja e ten dés muéda di oru!' ²⁶ Nton kel rei rasponde-s: 'N ta fla-nhos, tudu algen ki ten, ta dadu más. Má di kel algen ki ka ten, mézmu kel poku ki e ten ta ser tomadu. ²⁷ Má pa nhas inimigu, ki ka kreba pa N ser ses rei, nhos traze-s li y nhos mata-s nha dianti'". ²⁸ Dipôs ki Jezus faze es konparason, E kontínua ta subi na se kaminhada pa Jeruzalen. ²⁹ Kontise ki, kandu Jezus txiga pértu di kes bila di Betifajé ku Betânia, na monti ki ta txomadu Monti di Olivera, E envia dôs di ses disiplu, ³⁰ y E fla-s: "Nhos bai pa kel bila ki ta fika na nos frénti. Óra ki nhos entra, nhos ta atxa un burinhu maradu, ki inda ningen ka monta. Nhos dismara-l, y nhos traze-M el. ³¹ Y si algen purgunta-nhos: 'Pamodi ki nhos sa ta dismara es burinhu?', nhos fla: 'Sinhor meste-l'". ³² Kes dôs ómi bai, móda Jezus manda-s, y es atxa tudu talikual Jezus fla-s. ³³ Timenti es staba ta dismara kel burinhu, ses donu fla-s: "Pamodi ki nhos sa ta dismara nos burinhu?" ³⁴ Y es rasponde: "Sinhor mestel". ³⁵ Nton es leba kel burinhu di Jezus, y dipôs ki es poi ses kapa riba di kel burinhu, es djuda Jezus monta-l. ³⁶ Timenti Jezus staba ta bai, montadu na kel burinhu, povu staba ta stende ses kapa na kaminhu. ³⁷ Óra ki Jezus txiga pértu di dixida di Monti di Olivera, pa Jeruzalen, tudu kel multidon di disiplus fika konténti, y es kumesa ta lova Déus ku vós altu purkauza di tudu kes milagri di Jezus ki es odja. ³⁸ Y es ba ta fla: "Bensuadu é rei ki ben na nómi di Sinhor! Pas na séu, y glória na kel lugar ki sta di riba tudu!" ³⁹ Nton, alguns farizeu, ki staba la na meiu di kel multidon, es fla Jezus: "Méstri, raprende bus disiplu". ⁴⁰ Má Jezus rasponde y E fla-s: "N ta fla-nhos, si es kala, kes pédra na kaminhu ta kumesa ta aklama". ⁴¹ Óra ki Jezus txiga pértu di Jeruzalen, y E odja sidadi, E txora pa Jeruzalen, ⁴² y E fla: "Ai, Jeruzalen! Si apénas bu daba kónta, mézmu na es dia li, di kuza ki bu meste pa trase-u pas. Má gósi li, bus odju ka ta konsigi odja kel pas. ⁴³ Asin Jeruzalen, dias ta ben riba di bo, óra ki bus inimigu ta faze barikada na bu vólta. Es ta serka-u ku un multidon ki ta perta-u di tudu ladu, ⁴⁴ y es ta ronba-u riba di bus morador. Es ka ta dexa nen sikér un di bus pédra riba di kel otu, pamodi bu ka da kónta di ténpu ki Déus ben pa salva-u". ⁴⁵ Óra ki Jezus entra na Ténplu di Jeruzalen, E kumesa ta spulsa kes kumersianti ki staba ta faze nogósi la, ⁴⁶ y E fla-s: "Sta skritu: 'Nha kaza ta ser un lugar di orason, má nhos bira-l na un kavérna di ladron'". ⁴⁷ Y tudu dia, Jezus ta inxinaba povu na Ténplu. Má kes saserdóti prinsipal, dotoris di lei, tal kómu kes otus xéfi di povu judeu, es staba ta buska manera di pega Jezus pa mata-L. ⁴⁸ Kontudu, es ka konsigi atxa manera, purkauza di kel povu ki staba rodiadu na El, ku gana di obi tudu kuza ki E ta pâpia.