¹ Agóra, Jezus faze un konparason pa inxina ses disiplu ki es meste ora sénpri, sen perde speransa. ² Nton E fla-s: "Tenba un tal juís, na un sértu sidadi, ki ka ta daba ónra pa Déus, y e ka ta ruspetaba ningen. ³ Agóra, Tenba un viúva na kel mézmu sidadi tanbe. Kel viúva ta baba sénpri pa kel juís pa pidi-l: 'Nhu faze-m justisa kóntra nha adiversáriu'. ⁴ Má pa txeu ténpu kel juís ka trata di kazu di kel viúva. Dipôs, kel juís fla se kabésa: 'Mézmu ki N ka ta da ónra pa Déus, y N ka ta ruspeta ningen, ⁵ N ta ben faze justisa pa kel viúva, pamodi e ka ta para di purturba-m, y ku más ténpu, N pode fika fadigadu'". ⁶ Dipôs Jezus fla:" Nhos prende lison di es stória sóbri kel juís ki ka era justu. ⁷ Nton Déus gó, E ka ta faze justisa pa se povu ki ta txoma pa El, dia ku noti? Purakasu, E ta pô-s fika ta spéra txeu? ⁸ N ta fla-nhos ma Déus ta faze justisa pa es diprésa. Má mézmu asin, kandu Fidju di Ómi ta torna ben, inda E ta atxa fé li na téra?". ⁹ Y pa kes algen ki tenba kunfiansa na ses própi bondadi, y ki ta disprezaba tudu otus algen, Jezus faze-s es konparason. ¹⁰ "Dôs ómi subi pa Ténplu pa ora. Un di es éra farizeu y kel otu éra un kobrador di inpostu. ¹¹ Kel farizeu fika sakédu, y e ora asin, el sô: 'Déus, N ta agradese-U, pamodi ami ka é trapaseru, pekaminosu ô infiel na kazamentu, sima otus ómi. Tanbe N ta agradese-U, pamodi N ka é sima es kobrador di inpostu li. ¹² N ta jijua dôs bês pa sumana y N ta da dízimu di tudu kel ki N ta ganha'. ¹³ Má kel kobrador di inpostu staba sakédu na un distánsia di farizeu, y e ta xintiba ma e ka podeba nen labanta odju pa séu. E staba ta bati na se petu, ta fla: 'Ó nha Déus, ten mizerikórdia di mi, pamodi ami é pekador'". ¹⁴ Dipôs Jezus fla: "N ta fla-nhos, foi kel kobrador di inpostu ki volta pa kaza justifikadu diandi di Déus, y nau kel farizeu. Pamodi tudu algen ki ta ngrandese se kabésa ta ser umilhadu, má kel algen ki ta rabaxa se kabésa ta ser ngrandesidu ¹⁵ Agóra, povu tanbe staba ta traze ses minís pikinoti pa Jezus, pa E pô-s mon pa bensua-s. Má óra ki disiplus odja kel-li, es raprende kes algen ki traze ses minís. ¹⁶ Má Jezus txoma tudu minís pa txiga na El, y E fla: "Nhos dexa minís txiga na Mi, y ka nhos stroba-s, pamodi Reinu di Déus ta pertense kes ki e sima es. ¹⁷ Na verdadi, N ta fla-nhos, kalker algen ki ka ta rasebe Reinu di Déus sima un kriansa, e ka ta entra na el nunka". ¹⁸ Un governanti judeu purgunta Jezus: "Bon Méstri, kuzé ki N ten di faze pa ganha bida itérnu?" ¹⁹ Y Jezus fla-l: "Pamodi ki bu ta txoma-M bon? Sô Déus é bon y ningen más. ²⁰ Bu konxe mandamentus: 'Ka bu kometi adultériu; ka bu mata; ka bu furta; ka bu da tistimunhu falsu; y ruspeta bu pai ku bu mai'". ²¹ Kel governanti judeu fla: "Désdi pikinoti ki N ta obidese tudu es mandamentu li". ²² Kandu Jezus obi se raspósta, E fla-l: "Inda ten un kuza ki ta falta-u. Bende tudu kuza ki bu ten. Raparti kel dinheru di bénda ku gentis póbri, y asin bu ta ten tizoru na séu. Dipôs, ben sigi-M". ²³ Óra ki kel ómi obi kes kuza, e fika mutu tristi, pamodi el éra mutu riku. ²⁴ Kandu Jezus odja ma kel ómi fika mutu tristi, E fla: "Kómu é difísil pa gentis riku entra na Reinu di Déus! ²⁵ Pamodi, é más faxi pa un kamelu pasa na fundu di um gudja, di ki un riku entra na Reinu di Déus". ²⁶ Y kes gentis ki obi Jezus fla kel-li, es fla: "Nton, kenha ki pode ser salvu?" ²⁷ Jezus rasponde-s: "Kes kuza ki é imposível pa ómi, é posível pa Déus". ²⁸ Nton, Pedru fla Jezus: "Ali-nu li, dja nu dexa tudu kel ki nu tenba pa sigi-U". ²⁹ Y Jezus fla-s: "Na verdadi, N ta fla-nhos, ka ten ningen ki dexa kaza, ô mudjer, ô irmons, ô pais, ô fidjus, purkauza di Reinu di Déus, ³⁰ ki ka ta rasebe mutu bês más na es bida, y na kel ki ta ben, bida itérnu". ³¹ Jezus afasta un poku ku ses dozi disiplu y E fla-s: "Obi li! Nu sta na kaminhu di Jerusalen, undi ki ta ba kontise tudu kuza ki prufétas dja skrebe sobri Fidju di Ómi. ³² E ta ser intregadu na mon di kes ki ka é judeu. Y es ta ben faze trósa di El, es ta maltrata-L y es ta kuspi-L. ³³ Y dipôs ki es da-L ku xikóti, es ta mata-L. Má na tirseru dia, E ta rasusita". ³⁴ Má disiplus ka intende nada di kes kuza ki Jezus fla-s. Siginifikadu di kes palavra fika sukundidu di es, y es ka staba ta persebe kes kuza ki Jezus staba ta pâpia. ³⁵ Kontise ki, kandu Jezus txiga pértu di bila di Jerikó, un sértu ómi ségu staba xintadu na bera di kaminhu ta pidi zimóla. ³⁶ Óra ki kel ségu obi barudju di multidon ta pasa, e purgunta gentis sobri kuza ki staba ta kontise. ³⁷ Es fla-l ma Jezus di Nazaré staba ta pasa. ³⁸ Nton kel ségu grita: "Jezus, Fidju di Davidi, ten miserikórdia di mi!". ³⁹ Y kes ki staba ta bai dianti di el, es raprende-l, pa e fika kétu. Má e grita ainda más altu: "Fidju di Davidi, tem mizerikórdia di mi". ⁴⁰ Nton, Jezus para y E manda gentis trase-L kel ómi. Óra ki kel ómi txiga pértu, Jezus purgunta-l: ⁴¹ "Kuzé ki bu krê pa N faze-u?" Kel ómi fla: "Sinhor, N krê bira ta odja otu bês". ⁴² Asin, Jezus fla-l: "Nton, torna odja. Bu fé dja kura-u". ⁴³ Na kel mézmu instanti, kel ségu bira ta odja otu bês, y e bira sigidor di Jezus, ki ba ta sigi-L ta lova Déus. Y tudu algen ki odja es kuza ki kontise lova Déus tanbe.