¹ Jezus fla ses disiplu: "Sen dúvida, tentason pa peka ta ben, má ai di kel pesoa ki ta trase-l! ² Pa pesoa ki ta leba un di es pikinoti kai na pekadu, ta serba midjór pa el, si el éra botadu na mar ku grandi pédra di muinhu maradu na se piskós. ³ Purtantu, nhos toma kudadu! Si bu irmon kai na pekadu, rapriende-l y si e rapende, perdua-l. ⁴ Si e peka kóntra bo séti bês na un dia, y e volta pa bo séti bês pa fla-u ma e sta rapendidu, bu ten ki perdua-l". ⁵ Nton, apóstlus fla Jezus: "Sinhor, omenta nos fé". ⁶ Y Jezus rasponde-s: "Si nhos tenba fé tamanhu di simenti di mustarda, nhos podeba fla es figera brabu: 'Rinka bus raís di li, y ba fika plantadu na mar!' Y asin, kel figera ta obedeseba nhos. ⁷ Kal entri nhos ki ten un sérvu, ki volta di labra txon, ô di kuida di karneru na kanpu, ta fla-l: 'Ben toma lugar na méza pa bu kume'? ⁸ Okontráriu, bu ka ta fla-l: 'Pripara nha jantar, bisti pa bu sirbi-m inkuantu N ta kume y bebe'? ⁹ Purakasu, ta meste fla obrigadu pa sérvu sô pamodi e faze móda e mandadu? ¹⁰ Asin ki debe ser ku nhos tanbe. Kuandu dja nhos faze tudu kuza ki nhos mandadu, nhos debe fla: 'Anos e sinplis sérvu, y nu ka faze nada más ki nos obrigason'". ¹¹ Inkuantu Jezus staba ta kontínua ku se viaji pa sidadi di Jeruzalen, E pasa na frontera entri pruvínsia di Samaria ku Galiléia. ¹² Kontise ki, kandu E entra na un sértu bila, dés ómi ku lébra ben inkontra ku El. Es para ku un distánsia di Jezus, ¹³ y es kumesa ta grita: "Jezus, Méstri, ten dór di nos". ¹⁴ Jezus odja pa es y fla: "Nhos bai pidi saserdótis pa izamina-nhos". Kontise ki, inkuantu es staba ta bai, es fika kuradu. ¹⁵ Y un di kes dés volta pa Jezus, óra ki e odja ma e staba kuradu. E kumesa ta lova Déus ku vós altu. ¹⁶ E da ku duedju na txon na pé di Jezus y e agradese-L. (Agóra, es ómi éra samaritanu). ¹⁷ Nton, Jezus purgunta-l: "Ka tenba dés ómi ki fika kuradu? Nton, undi ki sta kes otu nóvi? ¹⁸ Ka ten ninhun, anonser es stranjeru, ki volta pa lova Déus?". ¹⁹ Nton Jezus fla kel ómi samaritanu: "Labanta y bu bai. Bu fé kura-u". ²⁰ Agóra, uns farizeu purgunta Jezus sobri ténpu ki Reinu di Déus ta ben. Jezus rasponde-s y E fla: "Reinu di Déus ka ta ben di manera ki e pode ser odjadu. ²¹ Nen es ka pode fla: 'Ali-l li!' ô 'Ala-l la!', pamodi Reinu di Déus sta déntu di nhos". ²² Nton Jezus fla ses disiplu: "Ta ben ténpu kandu nhos ta ten gana di odja un dia di Fidju di Ómi, má nhos ka ta odja-l. ²³ Y gentis ta fla-nhos: 'Ala-l la!' ô 'Ali-l li!', má ka nhos da-s atenson, nen ka nhos sigi-s. ²⁴ Pamodi, pa Fidju di Ómi, na se dia, e ta ser sima alanpra ki ta límia tudu séu, di un ladu pa otu. ²⁵ Má ántis, é nisisáriu pa E sufri txeu kuza, y pa E ser negadu pa gentis di es jerason. ²⁶ Sima staba ta ser na kes dia di Noé, asin ki ta ser na kes dia di Fidju di Ómi tanbe. ²⁷ Es staba ta kume y bebe, ómis staba ta kaza, y pais staba ta da ses fidju fémia pa kaza, ti kel dia ki Noé entra na arka. Dipôs, un dilúviu ben, y e kaba ku es tudu. ²⁸ Mézmu kuza kontise na kes dia di Ló, es staba ta kume y bebe, es staba ta kunpra y bende, y es staba ta planta y faze konstruson. ²⁹ Má na kel dia ki Ló sai di sidadi di Sudoma, ben txuba di fogu ku inxofri di séu, ki kaba ku es tudu. ³⁰ Ta ser asin tanbe na dia ki Fidju di Ómi ta ser reveladu. ³¹ Na kel dia, kel algen ki sta fóra na terasu, y tudu ses kuza ki sta la déntu di se kaza, e ka debe dixi déntu kaza pa panha ses bens. Di mézmu manera, pa kel algen ki sta na kanpu, e ka debe volta pa kaza pa panha nada. ³² Nhos lenbra di mudjer di Ló. ³³ Kalker algen ki ta tenta salva se bida, e ta perde-l. Má Kalker algen ki ta perde se bida, es ta salva se bida. ³⁴ N ta fla-nhos, na kel noti ta ten dôs algen na un kama, y kel un ta ser lebadu, má kel otu ta ser daxadu. ³⁵ Ta ten dôs mudjer ta trabadja djuntu na muinhu, y un ta lebadu, y kel otu ta dexadu. ³⁶ [Ta ten dôs ómi ki ta trabadja djuntu na kanpu, y un ta lebadu, má kel otu ta dexadu]". ³⁷ Nton ses disiplu purgunta-L: "Sinhor, na undi ki kel-li ta kontise?". Jezus rasponde-s: "Na undi ki ten korpu di un mortu, abutri ta djunta".