¹ Jezus faze es konparason pa ses disiplu: "Tenba un sértu ómi riku ki rasebe kexa ma dimistrador di ses propriedadi staba ta sbanja ses bens. ² Nton, kel ómi riku manda txoma se dimistrador, y e fla-l: 'Kuzé ki é, es kuzas ki N ta obi sobri bo? Da-m un kónta skritu di bu dimistrason, pamodi bu ka pode kontínua ta ser nha dimistrador'. ³ Kel dimistrador fla se kabésa: 'Nha padron ta ben dispidi-m! Nton, kuzé ki N ta faze gó? N ka ten forsa pa koba txon, y N ka pode pidi zimóla, pamodi N ta xinti burgónha. ⁴ Dja N sabe kuzé ki N ten ki faze pa pesoas rasebe-m sima un amigu na ses kaza, dipôs ki N perde nha trabadju'. ⁵ Nton e manda txoma kada pesoa ki tenba dívida ku se patron. Kandu kel primeru txiga, kel dimistrador purgunta-l: 'Kantu ki bu sa ta debe nha patron?'. ⁶ Kel ómi rasponde-l: 'N ta debe-l sén bidon di azeti'. Nton kel dimistrador fla-l: 'Toma es kónta di dívida ki dja bu sina, y ba xinta faxi ta skrebe otu kónta di dívida pa sô sinkuénta bidon di azeti'. ⁷ Asin tanbe e purgunta otu: 'Kantu ki bu sa ta debe nha patron?'. Y e rasponde-l: 'N ta debe-l sén medida di trigu'. Y asin tanbe, kel dimistrador fla-l: 'Toma es kónta di dívida, y skrebe otu pa sô oiténta medida di trigu'. ⁸ Na fin, kel patron ngaba kel dimistrador dizonéstu, pa spérteza na manera ki e ranja amigu, pamodi fidjus di es mundu é más spértu ki fidjus di lus kandu es ta trata ku gentis di es mundu". ⁹ Jezus kontínua, y e fla: "Asin tanbe, N ta fla-nhos, nhos uza rikéza di es mundu pa ganha amigus, y óra ki kel rikéza ta kaba, es ta rasebe-nhos na morada itérnu. ¹⁰ Kel pesoa ki é fiel na kuzas ku poku inportánsia, tanbe e ta ser fiel na kuzas ku txeu inportánsia, y kel pesoa ki é dizonéstu na kuzas ku poku inportánsia, tanbe e ta ser dizonéstu na kuzas ku txeu inportánsia. ¹¹ Purtantu, si nhos ka é fiel na manera ki nhos ta uza rikéza di es mundu, kenha ki ta ten kunfiansa pa intrega-nhos kel rikéza verdaderu? ¹² Y si nhos ka é fiel ku kel kuza ki ta pertense otu, kenha ki ta ben da-nhos kel kuza, pa e pasa ta pertense-nhos? ¹³ Ninhun sérvu ka pode sirbi dôs sinhor, pamodi e ta ben ôdia un, y e ta ama kel otu, ô e ta ben ser fiel ku un, y e ta dispreza kel otu. Purtantu, nhos ka pode sirbi Déus, y sirbi rikéza tanbe". ¹⁴ Óra ki farizeus obi kes kuza, es faze trósa di Jezus, pamodi es ta amaba ses dinheru. ¹⁵ Nton Jezus fla-s: "Anhos é kes tipu di gentis ki ta arma-en-bon dianti di ómi. Má Déus konxe nhos kurason, y kel kuza ki ómi ta valoriza txeu, ka ten ninhun valor pa Déus ¹⁶ Lei di Moizes, y Skrituras di prufétas, foi pruklamadu ti ténpu di Djon Batista. Désdi kel ténpu, sa ta ser pruklamadu Notísia Sábi di Reinu di Déus, y tudu algen sa ta faze forsa pa entra na el. ¹⁷ Kontudu, é más faxi pa séu ku téra disparse, di ki pa un trasu sikér kai di lei di Déus. ¹⁸ Kalker ómi ki divorsia di se mudjer, y e kaza ku otu, e ta komete adultériu. Y kel ómi ki ta kaza ku mudjer, ki se maridu divorsia, el tanbe e ta komete adultériu". ¹⁹ Jezus kontínua ta inxina ku es konparason: "Tenba un sértu ómi riku ki staba sénpri bistidu ku ropa bazófu, ku kor di púrpura y panu di linhu finu. E ta viveba na sabura, ku fésta tudu dia. ²⁰ Tenba tanbe un sértu mendigu, ku nómi di Lázaru, ki tenba korpu kubértu ku txeu xaga. Tudu dia, e ta fikaba detadu na frénti di porton di kel ómi riku. ²¹ E tenba gana pa rasebe kes réstu ki ta kaiba di méza di kel ómi riku, má sô katxor ki ta benba pa lanbe ses xaga. ²² Kontise ki, kel mendigu móre, y anjus di Déus leba-l pa séu, pa pô-l xinta na ladu di Abron. Kel ómi riku móre tanbe, y gentis intera-l. ²³ La na mundu di mortus, undi ki kel ómi staba ta sufri txeu, e labanta ses odju, y e odja Abron la lonji y Lázaru xintadu na se ladu. ²⁴ Nton e txoma: 'Pai Abron, ten mizerikórdia di mi. Manda Lázaru modja pónta di se dédu na agu, pa e ben refreska nha língua, pamodi N sa ta sufri txeu na es lumi li'. ²⁵ Má Abron fla-l: 'Fidju, lenbra ma bu rasebe tudu kuza di bon na bu bida, inkuantu Lázaru rasebe sô kuzas di mal. Má gósi li, Lázaru é konsoladu, inkuantu bu sa ta sufri. ²⁶ Alendumás, ten un grandi kobon di siparason ki podu entri nos. Purtantu, sikrê gentis krê pasa di nos ladu pa nhos ladu, es ka pode, y nen kes ki krê pasa di nhos ladu pa nos ladu, es ka pode'. ²⁷ Nton, kel ómi fla: 'Pai Abron, N ta pidi-u, nton manda Lázaru pa kaza di nha pai, ²⁸ pamodi N ten sinku irmon bibu. Dexa-l aviza-s pa es ka ben pa es lugar di kastigu tanbe'. ²⁹ Má Abron fla-l: 'Dja es ten Skrituras di Moizes y di prufétas pa aviza-s. Dexa-s obi ku es'. ³⁰ Má e insisti: 'Nau, pai Abron, má si algen ta labanta di mórti, pa ba aviza-s, es ta rapende'. ³¹ Má Abron fla-l: 'Si es ka ta obi ku Moizes y ku prufétas, es ka ta seta nen mézmu si algen ta labanta di mórti'".