¹ Agóra, tudu kobrador di inpostu, y otus pekador di ma-fama, staba ta txiga na Jezus pa obi-L. ² Nton farizeus ku dotoris di lei kumesa ta resmunga kóntra Jezus y es fla: "Es ómi ta rasebe pekadoris di ma-fama y E ta kume ku es". ³ Nton Jezus faze-s es konparason: ⁴ "Kal di nhos ki tenba sén karneru, y un di es perde, e ka ta dexa kes novénta y nóvi na kanpu, pa e ba prokura kel ki perde, ti ki e atxa-l? ⁵ Y óra ki e atxa-l, e ta fika xeiu di alegria, y e ta pô-l riba se onbru, ⁶ pa leba-l di volta pa kaza. Sin ki e txiga, e ta txoma tudu ses amigu ku vizinhu y e ta fla-s: 'Nhos fika alégri djuntu ku mi, pamodi dja N atxa nha karneru, kel un ki staba perdedu'. ⁷ N ta fla-nhos, di mézmu manera, ta ten más alegria na séu, purkauza di un pekador ki ta rapendi, ki purkauza di tudu kes novénta y nóvi justu ki ka mestie rapende". ⁸ Jezus faze otu konparason: "Ô, kal mudjer ki ten dés muéda di prata, y un perde, ki e ka ta sende kandiâ pa bare kaza, pa prokura-l dretu, ti ki e atxa-l? ⁹ Y óra ki e ta atxal, e ta kunbida ses amigu y vizinhu, y e ta fla-s: 'Nhos fika alégri djuntu ku mi, pamodi N atxa kel muéda ki staba perdedu'. ¹⁰ N ta fla-nhos, di mézmu manera, ten alegria na prizénsa di anjus di Déus, purkauza di un pekador ki ta rapende". ¹¹ Y Jezus konta otu konparason: "Un sértu ómi tenba dôs fidju matxu. ¹² Y un di ses fidju, kel ki éra kodé fla se pai: 'Nha pai, da-m kel párti di eransa ki ta pertense-m'. Nton se pai raparti tudu kuza ki e tenba, y e da kada un se párti. ¹³ Poku dia dipôs, kel fidju kodé djunta tudu kel ki ta pertense-l, y e nbarka na un viaji pa un téra mutu lonji. Na kel téra, e sbanja tudu kuza na bida di paródia. ¹⁴ Dipôs ki e kaba ku tudu, un grandi fómi txiga na kel téra, y e kumesa ta fika na piór. ¹⁵ Purtantu, kel fidju ba pidi trabadju pa un sidadon di kel téra, ki manda-l pa ses kanpu pa kuida di ses porku. ¹⁶ E staba ku tantu fómi ki e tenba gana di intxi bariga ku kumida ki kes porku staba ta kume, má ningen ka ta daba el nada. ¹⁷ Dipôs e ben na el, y e fla pa se kabésa: 'Nha pai ten tantu trabadjador, y tudu es ten kumida di sóbra, má mi, N sta li ta móre di fómi! ¹⁸ Nton, N ta labanta, N ta volta pa nha pai, y N ta fla-l: 'Nha pai, N peka kóntra Déus y tanbe kóntra bo. ¹⁹ N ka ta merese más ser txomadu bu fidju, má seta-m sima un di bus trabadjador'. ²⁰ Nton e labanta, e volta pa se pai. Má, kandu inda e staba lonji, se pai odja-l, y e fika xeiu di konpaxon. Nton, e kóre faxi pa ba rasebe se fidju, y kandu e txiga na el, e brasa-l y e beja-l. ²¹ Y se fidju fla-l: 'Nha pai, N peka kóntra Déus y tanbe kóntra bo. N ka ta merese más ser txomadu bu fidju'. ²² Má se pai fla pa ses kriadu: 'Faxi-faxi, nhos faze midjór ropa, y nhos bisti-l. Nhos pô un anel di família na se dédu. Nhos kalsa-l dretu ku sapatu nobu pa ses pé. ²³ Tanbe, nhos traze kel bizeru ki nu ingorda, y nhos mata-l. Nu ta kume y nu ta selebra ku un grandi fésta, ²⁴ pamodi nha fidju staba mortu y e sta bibu otu bês, e staba perdedu y e foi atxadu'. Nton, es kumesa ta festeja ku txeu alegria. ²⁵ Entritantu, kel fidju más bédju staba na kanpu. Kandu e volta, y e staba ta txiga pértu di kaza, e obi gentis ta toka músika y ta badja. ²⁶ Nton, e txoma un di ses sérvu y e purgunta-l: 'Kuzé ki sa ta kontise li'? ²⁷ Kel sérvu fla-l: 'Bu irmon volta ku saúdi. Purtantu, bu pai manda mata kel bizeru ki nu ingorda, pamodi e rasebe se fidju di volta'. ²⁸ Nton, kel fidju más bédju fika xatiadu, y e ka kreba entra na kaza. Má se pai sai, y e fika ta insisti ku el. ²⁹ Má e rasponde se pai: 'Odja, dja N ten tantu anu ki N ta sirbi-u, y nunka N ka dizobidese bus órdi. Má nunka bu ka da-m nen sikér un kabritu pa N festeja ku nhas amigu. ³⁰ Má óra ki ben es bu otu fidju, kel ki spanja bu dinheru ku mudjeris di ma-vida, bu manda mata kel bizeru más gordu pa rasebe-l'. ³¹ Y se pai fla-l: 'Nha fidju, bu sta sénpri ku mi, y tudu kuza ki é di-meu é di-bo tanbe. ³² Má gósi li, nu meste festeja, y fika alégri, pamodi es irmon di-bo staba mortu, y e sta bibu otu bês, e staba perdedu y e foi atxadu'".