¹ Na un sértu sabru, kontise ki Jesus entra na kaza di un di kes xéfi di farizeus pa kume ku el, y gentis la staba ta spia-L ku txeu atenson. ² Y bira asin, un ómi txiga dianti di Jezus ku un duénsa ki ta poi ses pérna ku ses brásu fika intxadu. ³ Nton Jezus purgunta farizeus ku dotoris di lei ki staba la: "Lei di Moizes ta permiti pa kura algen na sabru, ô nau?" ⁴ Má es fika kaladu. Nton, Jezus poi se mon na kel ómi y E kura-l. Y dipôs, E manda-l bai. ⁵ Nton Jezus purgunta-s: "Kal di nhos, si el ten un fidju ô un boi ki kai na un posu na sabru, ki ka ta ba tra-l lógu di la?" ⁶ Nton, es ka podeba fla nada. ⁷ Óra ki Jezus rapara ma kes konbidadu staba ta skodje kes lugar di ónra na méza, E konta-s un konparason: ⁸ "Kandu algen konbida-u pa un fésta di kazamentu, bu ka debe toma lugar di ónra na méza, pamodi, pode ser ki donu di fésta konbida algen más inportanti ki bo. ⁹ Nton, kel ki konbida-u ta txiga na bo, y ta fla-u: 'Labanta, y dexa kel-li toma es lugar'. Nton, bu ta fika ku burgónha óra ki bu ten ki ba toma kel últimu lugar. ¹⁰ Má kandu bu é kunbidadu, ba toma kel lugar ménus inportanti. Asin, kandu kel ki konbida-u txiga, e ta fla-u: 'Amigu, pasa pa um lugar más inportanti'. Nton, bu ta ser onradu dianti di tudu kes algen ki sta na méza djuntu ku bo. ¹¹ Pamodi, tudu algen ki ta ngradese se kabésa, e ta ser umiliadu. Y kel algen ki ta umilia se kabésa, e ta ser ngradesidu". ¹² Y Jezus fla tanbe pa kel farizeu ki kunbida-L: "Kandu bu da un jantar ô un seia, ka bu kunbida bus amigu, nen bus irmon, nen bus parenti, y nen bus vizinhu riku. Pamodi, es ta torna kunbida-u, y asin bu ta rasebi rakonpénsa. ¹³ Má kandu bu da un banketi, kunbida gentis póbri, manku, paralizadu y ségu. ¹⁴ Asin, bu ta ser bensuadu, pamodi kes algen ka ten manera pa rakonpensa-u. Nton, Déus ta rakonpensa-u na rasureson di gentis justu". ¹⁵ Óra ki un di kes pesoa, ki staba ku Jezus na méza, obi-L ta fla kes kuza, e fla Jezus: "Bensuadu é kel ki ta toma se lugar na méza na Reinu di Déus!". ¹⁶ Nton Jezus rasponde-l ku es konparason: "Un sérvu ómi staba ta pripara un grandi fésta y e kunbida txeu algen. ¹⁷ Na óra di kumesa fésta, donu di fésta manda se sérvu ku es rekadu pa ses kunbidadu: 'Nhos ben, pamodi tudu kuza dja sta prontu pa fésta'. ¹⁸ Má, di kaza-en-kaza, tudu es kumesa ta da diskulpa. kel primeru fla kel sérvu: 'N kunpra un txon y N ten ki sai pa ba djobe-l. N ta pidi-u pa bu diskulpa-m'. ¹⁹ Y otu kunbidadu fla: 'N kunpra sinku par di boi y N sa ta bai sprimenta-s. N ta pidiu pa bu diskupa-m'. ²⁰ Inda otu kunbidadu fla: 'N kaza ku nha mudjer gósi li. Purtantu, nka ta podi bai'. ²¹ Nton sérvu bai pa kaza di se sinhor y e konta-l kes kuza. Nton, kel donu di kaza fika xatiadu y e fla se sérvu: 'Bai faxi pa tudu rua ku béku di es sidadi, bu djobi gentis póbri, paralizadu, ségu y manku y bu trase-s pa fésta'. ²² Kandu sérvu volta e fla: 'Sinhor, N faze sima nhu manda-m, má mézmu asin ta resta lugar pa más algen'. ²³ Se sinhor rasponde-l: 'Bai pa fóra na tudu béku ku beléku, y konvense-s pa es ben, pa nha kaza podi fika xeiu. ²⁴ Pamodi, N ta fla-nhos, ma ninhun di kes, ki N kunbida primeru, ta ben xinti gostu di nha seia'". ²⁵ Un grandi multidon staba ta kunpanha Jezus. Nton, E volta pa es y E fla: ²⁶ "Si algen ta txiga na Mi, y e ka ta ama-M más txeu ki se pai, se mai, se mudjer, ses fidjo, ses irmon, ses irman, y se própi bida, e ka ta podi ser nha disiplu. ²⁷ Kalker algen ki ka ta karega se krus, y ka ta sigi-M, e ka podi ser nha disiplu. ²⁸ Kal entri nhos, ki krê faze konstruson di un grandi armazén, ka ta xinta primeru pa faze kónta di kantu ki projétu ta kusta, pa verifika si e ten bastanti rakursu pa konpeta-l. ²⁹ Pamodi, si e faze alisérsi, má e ka ta pode konpleta óbra, tudu algen ki odja kel-la ta fazi trósa di el. ³⁰ Es ta fla: 'Kel ómi kumesa ta faze konstruson, má e ka podeba konpletga-l'. ³¹ Ô, kal rei, ki ta faze géra kóntra otu rei, ki ka ta xinta primeru pa konsidera si ses dés mil soldadu pode ganha kes vinti mil soldadu, ki ta ben kóntra el? ³² Si e odja ma es ka pode ganha, e ta manda un delegason, inkuantu kel otu rei inda sta lonji, pa ba pidi un akordu di pas. ³³ Asin tanbe, tudu algen ki ka ta nega tudu kuza ki ta pertense-l, e ka pode ser nha disiplu". ³⁴ Jezus kontínua ta fla: "Sal é bon. Má si e perdi se gostu, ka ten manera di torna pô-l fika salgadu sima otu bês. ³⁵ E ka ta bale más pa poi na téra, nen pa poi na strumu. E ta botadu fóra. Kel ki ten obidu, debe obi".