¹ Agóra, na kel mézmu ténpu, tenba alguns pesoa ki staba la ku Jezus, ki konta-L manera ke Pilátus, governador romanu, manda mata alguns judeu di Galiléia, inkuandu es staba ta oferese sakrifísiu pa Déus. Asin, sangi di kes judeu fika misturadu ku sangi di kes animal di sakrifísiu. ² Y Jezus rasponde y E fla-s: «Nhos ta pensa ma kes ómi ki matadu éra más pekador ki tudu otu gentis di Galiléia, pamodi es móre di es manera sufridu? ³ Nau! N ta fla-nhos, si nhos ka rapende, nhos tudu ta móre di mézmu manera. ⁴ Y kes dizoitu ómi ki móre kandu tori di Saloé kai riba es, nhos ta pensa ma ses pekadu éra más grandi ki pekadu di tudu kes otu algen ki staba ta mora na Jeruzalen na kel ténpu? ⁵ Nou! N ta fla-nhos, si nhos ka rapende, nhos tudu ta móre di mézmu manera.» ^{6 7} Nton Jezus faze es konparason: «Un ómi tenba un figera plantadu na se propriadadi. Nton, e ta baba djobe si kel figera ta daba figu, má e ka ta atxaba nada. Nton e fla enpregadu di se propriadadi: ⁸ Má enpregadu rasponde pa proprietáriu: "Sinhor, dexa-l fika li más es anu, pa N pode koba téra na se ridor, pa N poi strumu. ⁹ Asin, pode ser ki e ta ben da figu. Si e ka da na futuru, bu pode manda korta-l". ¹⁰ Agóra, na un sabru, Jezus staba ta inxina na un sinagóga. ¹¹ Y un mudjer ki tenba un spritu mau di infirmidadi, duranti dizoitu anu, staba la. E ta andaba krokadu y e ka ta podeba stendi se korpu pa e fika rétu. ¹² Óra ki Jezus odja kel mudjer E txoma-l y E fla-l: «Mudjer, bu sta libertadu di bu duénsa.» ¹³ Jezus poi ses mon na el, y na kel momentu se korpu fika rétu. Nton, kel mudjer kumesa ta lova Déus. ¹⁴ Xéfi di kel sinagóga fika xatiadu, pamodi Jezus kura algen na subru. Nton e fla pa povu ki staba la: «Lei judeu ta fla ma ten sais dia ki é nisisáriau pa nu trabadja. Purtantu, nhos ben na un di kes dia pa ser kuradu, y nau na dia di sabru.» ¹⁵ Nton Sinhor rasponde y e fla: «Falsus! Nhos ka ta dismara nhos boi ô nhos buru pa leba-s pa bebe agu na sabru? ¹⁶ Má ali-l li es fidju di Abron, ki Satanas mara ku duénsa pa dizoitu anu, ka é nisisáriu dismara-l na dia di diskansu?» ¹⁷ Es raspósta di Jezus poi burgónha na tudu kes gentis ki staba kóntra El. Y povu fika mutu konténti, purkuaza di tudu kes maravilha ki E sa ta fazeba ¹⁸ Nton, Jezus purgunta: «Ku kuzé ki Reinu di Déus ta parse? Ku kuzé ki N pode faze-l konparason? ¹⁹ El é sima un gran di mustarda ki un ómi símia na se órta. Kel gran kria y e bira un arvi, y uns pasu ben y es faze ninhu na ses ramu.» ²⁰ Otu bês E purgunta: «Ku kuzé ki N pode konpara Reinu di Déus? ²¹ El é sima furmentu ki un mudjer mistura na três medida di farinha, y dipôs tudu kel masa fika furmentadu.» ²² Dipôs, Jezus kontínua se viaji pa Jerusalen, y E ta inxinaba na kes sidadi ku bila na kaminhu. ²³ Y algen purgunta-L: «Sinhor, é poku algen ki ta ben ser salvu?» ²⁴ Nton Jezus fla-s: «Nhos faze tudu manera di entra pa pórta stretu, pamodi N ta fla-nhos ma un monti di algen ta tenta entra, má es ka ta pode. ²⁵ Kandu donu di kaza labanta y E fitxa pórta, nhos, ki fika di ladu di fóra, ta kumesa ta konkô na pórta, ta inplora: Sinhor, abri-nu pórta!' Má donu ta fla-nhos: N ka konxe-nhos, nen N ka sabe di undi ki nhos ben. ²⁶ Nton nhos ta kumesa ta fla: Nu kume y nu bebe ku Bo y Bu inxina nos gentis na nos rua.' ²⁷ Má E ta fla-nhos: Nka ka konxe-nhos, nen nka sabe di undi ki nhos ben. Nhos bai y nhos fika longi di Mi, tudu nhos ki ta faze sô maldadi!. ²⁸ Kandu nhos ta odja Abron, Izaki, Jakó y tudu prufétas na Reinu di Déus, la di fóra, pamodi nhos sta spulsu di la, nhos ta fika ta txora y ta nhemi tendi. ²⁹ Má gentis ta ben di lésti ku oésti y di nórti ku sul, y es ta toma ses lugar na méza di fésta na Reinu di Déus. ³⁰ Purtantu, ten kes ki sta primeru gósi, ki ta ser últimu, y ten kes ki sta últimu gósi, ki ta ser primeru.» ³¹ Na kel momentu, txiga alguns farizeu na Jezus y es fla-L: "Bu mesti parti gósi li, y bai pa otu lugar, pamodi rei Eródis krê mata-U". ³² Má E rasponde-s: "Nhos bai fla kel rapoza ma N ta kontínua ta spulsa dimóni, y ta kura duénti, oji y manhan. Má, na tirseru dia N ta termina, ³³ pamodi é nisisáriu pa N kontínua ta faze nha trabadju li, oji y manhan, y na tirseru dia pa N kontínua nha viaji. Pamodi ka ta fika dretu pa un pruféta móre fóra di Jeruzalen." ³⁴ Jezus kontínua y E fla: "Ó, Jeruzalen, Jeruzalen, ki ta mata prufétas, y ki ta da ku pédra kes mensajeru ki mandadu pa el. Kantu bês ki N kreba djunta nhos fidju, móda galinha ta djunta ses pinton di baxu di ses aza, má nhos nega. ³⁵ Ala-l la bu kaza, ki ta fika largadu. N ta fla nhos ma nhos ka ta odja-M más ti ki nhos fla: 'Bensuadu é kel ki ta ben na nomi di Sinhor'"